Megàŋ ntúm 5
5
Ecÿɔ̌ nò Ananias pɔ́ nzwě we Safira
1Tá’, atsɔ̌ nyìŋ gẅie mé lɔ́ɔn ńtóŋo yé le Ananias pɔ́ nzwě wé Safira gʉa sẅiŋe jʉ’ʉ nká’ yɔ́b, 2ńkwaŋte, ńzá’a tsɔ́ gwǒŋo nkáb ńde’e, ńgʉa núŋe pfwɔ́’ mekwò megàŋ ntúm Yěsô. 3Piɛ leen ńké ńzɛ́te yé ngie: Ananias, mélà’a kɔ́ ɔ̀ zẅǐŋ Sátà jÿó gú tà ɔ̀ fʉte zẅìge Ssé? Mélà’a kɔ́ ɔ̀ sẅǐŋ nká’ gù, ńkú’te tsɔ́ gwǒŋo nkáb? 4Nká’ kɔ’ɔ́ ńgwɔ́ pɔ́ gú, tá ɔ̀ sẅiŋ. Ɔ̀ pǐŋ sẅiŋ, nkáb gwɔ́ pɔ́ jù. Ɔ̀ pǐŋ ńgÿo lêkɔ́ ńgẅiin yɔɔn ntí nkwàŋte tsɛ̀ɛ ntʉ̀m gú? Ɔ̀ kaa cÿɔ nò pɔ́ mbwó pʉ̀a mésoŋ wɔ́. Ɔ̀ cÿɔ̌ nò pɔ́ mbwó Ssé. 5Ananias jú’u yɔɔn shwóŋè, ńgwóon ńgwe ńkwé. Pʉ̀a metsèm pie é la jú’u yɔɔn nò pú ḿbɔ́g. 6Á gwaa gwɔ́, mbà á ně ńkwé pú’u, pûɔ ngwàshùm tó ńdɔgɔ pwó nzsǒ ńzémte pfó yé, ńkaa yé ńgʉa ńtúŋ, 7é gwaa cʉa mmó nèm ntá, nzwě wé tó ńzyɛ’ ńkúu ndá. À te ne ńzsé mmó gie á gÿǒ wɔ́. 8Piɛ zɛ́te yé ngie: Shwóŋo wɔ̀ɔn, pi ně sẅíŋ nká’ pɔ́ pá’ɔɔn lá? Á gɔɔn ngie: Oon, peg ně sẅiŋ pɔ́ pɛ́’ɛ. 9Piɛ lêen ńké ńgɔɔn né yé ngie: Pi lɔgɔ yɛ̌ shÿɔ́g tá ńtóo ńkwa’te Zẅìge Cʉ̀apʉ̀a? Jú’ pá’ pʉ̀a ée ncwò ndá ńgiŋe, pɔ́ fóo ńtuŋ ndǔm gu. Tá pɔ́ ge kaa gú jú lɔg gʉa túŋ mo. 10Á gwoon ńgwe ssé mvfò Piɛ, ńkwé. Pûɔ ngwàshùm kúu ndá, ńgyá pá’ à kwě, ńkaa pfó yé ńdɔg ńgʉa ńtúŋo lejʉ́ŋ yé ndǔm we. 11Acú’tè pʉ̀a Kristo mbɔɔ tsɔ́ pʉ̀a pie pɔ́ la jú’u yɔɔn nò pú ḿbɔ́g tɛ’.
Ngàŋ ntúm ne ńgÿo menò mmɔɔn mmɔɔn
12Megàŋ ntúm la ne ńgÿo menò mmɔɔn mmɔɔn lâ mekʉ’ʉ́ menò mentí mentí tsɛ̀ɛ lá’. Pɔ́ pʉ̀a Kristo metsèm lɔ́ɔn mbú ńtóo ńcú’te nà jʉ’ gie mé lɔ́ɔn ńtóŋo le ncwò kɔ̀’ Salomo. 13Nyìŋ ndyɛ̀’ɛ ké tě fʉ’ʉ lékúu nùɔ pɔ́b wɔ́, tá pʉ̀a metsèm ké ne ńgɔ’te ngÿǒ menò mɔ́b tɛ’. 14Mbàŋa tà ńgyɔ́ɔn lâ pànzwě la ne ńzába ntʉ́m nà Cʉ̀apʉ̀a tá ńkúu tsɛ̀ɛ nùɔ yɔ́b á kẅi’i. 15Mé la gɔ̀’te nò yɔ́b gɔ́’te tà mé lɔg mekǔ lâ mematá ńkaa meguɔ nùŋe wɔ́b mengʉ̀ŋe nzsé légwɔ́ gie Piɛ à ge gwaa cʉa, jʉjʉ́ŋ wé tè téme nà tsɔ̌ wɔ́, à teme nà tsɔ̌. 16Pʉ̀a tá ńgyɔ́ɔn lɔ́ɔn ńgíŋe fóo tsɛ̀ɛ melá’ mie ée ngʉ̀ŋe Yerósalem ńdɔgɔ meguɔ mbɔɔ pʉ̀a pie mezẅìge tepòŋ la ne ḿbue wɔ́b, ńtóo ńgyá megàŋ ntúm. Pɔ́ gÿo pɔ́b métsèm zeŋe.
Melÿo tsɛ̀ɛ lá’ ne ńnyɛɛ megàŋ ntúm ngɔ́’
17Tándá pànuŋe pwɔ́’ pâ pʉ̀a pie pɔ́ la ně ńtóonte nò yé lêen ńké ńzyé lekwɔ́’ɔ lóŋ ntí megàŋ ntúm. Pàtóonte nò yé ŋwɛ́ gwɔ́ ná nùɔ gie mé lɔ́ɔn ńtóŋo le ye pà *sadukay. 18Pâ pɔ̌ túm pʉ̀a, pɔ́ gwoon megàŋ ntúm ńnéŋe wɔ́b ndá tsǎŋ gie mé lɔ́ɔn ńnéŋe megàŋa tsǎŋ ntsèm wó. 19Tá á gÿo ńgwɔ́ letsẅɛ’, atsɔ̌ cÿɔ́’ Cʉ̀apʉ̀a tó, ńtsɔ́’ ndá tsǎŋ, ńgÿo megàŋ ntúm gwaa kẅɛ, á gɔɔn né pɔ́b ngie:
20Pi gʉa ńtyé tsɛ̀ɛ gyɛ̌ gie áa tsɛ̀ɛ *jʉ’ʉ Ssé éshwóŋó lá’ menò mie é líe le gwɔ́ we sẅe. 21Pɔ́ jú’ ncwò we. Njÿó lʉ́a, pɔ́ mʉ́ ńgʉa *jʉ’ʉ Ssé, ńzyé lézí’i nò Ssé mbwo lá’.
Tándá pànuŋe pwɔ́’ pâ pʉ̀a pé ńnéŋe tà ńcú’te mekěm pà Israel nà nò lésá’ ntsaŋ. Pâ pɔ̌ túm megàŋa fà’ ngie pɔ́ gʉa ndà tsǎŋ éfa’ megàŋ ntúm ńdɔgɔ wɔ́b ńtó. 22Tá megàŋa fà’ gʉa ńkúu ndá tsǎŋ, pɔ́ te wɔ́b gya, ḿbiŋ nzèm shwóŋ pʉ̀a pie é ně ńtúmo wɔ́b ngie: 23Peg gʉa tá ńkuu wó, ńgyá mencwò ndá tsǎŋ gwɔ́ mé njÿɔ̌’. Pàpyɛ́b jʉ’ ké ńtyé pɔ́ ncwò ndá. Peg tsɔ́’ mencwò ndá, ńkúu tsòló, ńké tè nyìŋ tsɛ̀ɛ ndá gyá. 24Tándá pàpyɛ́bɛ *jʉ’ʉ Ssé pâ metándá pànuŋe pwɔ́’ jú’u yɔɔn nò a kʉ’ʉ wɔ́b. Pɔ́ té zsé mmó gie á ně ńgÿo megàŋ ntúm wɔ. 25Atsɔ̌ tà’ nyìŋ gwoon ńzyɛ́’ ńkúu ndá, ńgɔɔn ngie: Epʉ̀a pá pie pi ka ńnéŋe wɔ́b ndá tsǎŋ la, cʉ́’ ńgwɔ́ pɔ́ tsɛ̀ɛ gyɛ̌ á *jʉ’ʉ Ssé, ńně ńzí’i lá’ mmó. 26Tándá pàpyɛ́b jʉ’ pâ pʉ̀a pé gʉa lélɔgɔ wɔ́b ńtó. Tá ńké tè lɔg tʉ̀ ńgwoon wɔ́b wɔ. Mélà’ mie àlá’ laa jʉ’ó tɛ’. Pɔ́ ně ḿbɔ́gɔ pá’ mé ge lɔg metóon témte wɔ́b é zẅéte.
27Pɔ́ lɔg megàŋ ntúm ńtó, ńtÿɔ́gɔ wɔ́b mvfò pàsá’a lá’. Tándá pànuŋe pwɔ́’ zɛ́te wɔ́b ngie: 28Peg ka té tɔ’ɔ gẅi legíŋ ńzí’i nò nyìŋ ŋwɛ́ á mbwo pʉ̀a wɔ́ le? Pi pǐŋ ńdɔgɔ nò yé mbú saa Yerósalem ntsèm. Pi te pɛ́’ɛ̀ fa’a ngie mé yé peg zsé nò nà legwé wé wáa?
29Tá’ Piɛ pâ megàŋ ntúm tsɔ́’ ngie: Á zɛ́te ngie me jú’ ncwò Ssé, ńcʉa le jú’ ncwò pʉ̀a mésoŋ. 30E Ssé pàmangʉa njʉ’ pégè, ka gÿo Yěsô gẅie pi ka kime yé nà tÿǒ nkǐ la, zíme nà legwé. 31E Ssé ka gÿo á kwɔ́’, á ńnéŋe yé nà gwòŋo pwò yé ye tʉ̀, pú’u, ńdɔgɔ yé ńgÿo fùɔ, ńgíŋe ńdɔgɔ yé ńgÿo *Nzà’nkÿo. E Ssé ka gÿo pú’u, le gwɔ́ gie pʉ̀a Israel ge kúbe mà wɔ́b, à lege menò tepòŋ mɔ́b. 32Peg gɔɔn pá’ɔɔn ńgwɔ́ pàjÿó ńgyá nà mɔɔn menò. À Zẅìge Ndʉalʉ̌a gie Ssé ne náa mbwó pʉ̀a pie é ne ńjú’u ncwò wé zɔ̌ tsóte weg légɔɔn.
33Mekěm jú’ pá’ pɔ́ gɔ̌ɔn pú’u, mbú ńgyáŋa lóŋ, ńzyé lékwaŋte lézẅé megàŋ ntúm. 34Tá’, atsɔ̌ nyìŋ wɔ́b, mé tóŋo yé lê Gamaliel, lu ssé ńtsẅi ngie mé gÿo megàŋ ntúm ná’a ńkẅɛɛ pí. Pú’u, ńgwɔ́ nyìŋ nà nùɔ pà *farisay, ńgwɔ́ nyìŋ ndÿò nà lékyagte mbʉ̌ Mǒsê, àlá’ ná mekù’ mé tɛ’. 35Megàŋ ntúm kẅɛ, Gamaliel gɔɔn ngie: Pà Israel, pi laga twó gí nà nò gie pi fa’a légÿo nà pʉ̀a pɛ. 36Pi kímte pá’ Tedas la kẅɛ, ńcú’te pʉ̀a nkÿo lekùɔ nà ye nùɔ, mé zẅé yé, pɔ́ tága tà ḿmag, ésa jʉ’. 37Á lá’ ńgwɔ́ fʉ̀’ gie mé la ne sáŋa lá’, Jẅidas, nyìŋ Galilea kẅɛ. Mé cʉ́me nzèm yé tɛ’. Mé gíŋe ńzẅé yé ye, epʉ̀a pé tága sa jʉ’, ayɔ́b mag. 38Mèŋ n dɔgɔ pá’ɔɔn shwóŋó gẅi ngie, pi nyé pʉ̀a pɛ, pɔ́ gʉa, mélà’mie ammó gie pɔ́ gÿo lɔɔn fóo pɔ́ mbwó pʉ̀a mésoŋ, ńgwɔ́ mmó gie pɔ́ zɔ̌ taŋté, mbà á ge lɔg pɔ́ ndɔ́ɔn ndɔ́ɔn mag. 39Nké fóo mbwo Ssé, mbà á lɔɔn ńgwɔ́ pi é léku’u létág wɔ́. Pi pɔ́ɔn pá’ á lɔɔn ńgwɔ́ pi lÿɔ́’ Ssé nê ncù.
Pɔ́ zẅíŋe nò gie Gamaliel gɔ̌ɔn, 40ńtóŋ megàŋ ntúm, ńtsẅi mé lɔg ngwɔ̀ɔn ńcúa wɔ́b. Pɔ́ tɔ’ɔ wɔ́b légíŋ ńdɔg lezíŋ Yěsô ńgɔɔn nò, ndêen ńké ńnyé wɔ́b pɔ́ gʉa. 41Pɔ́ gwaa fó tsɛ̀ɛ cú’tè pàsá’a lá’ kẅɛ, ńgíŋe ńkága kǎg. Mélà’ mie e Ssé gyá ngie pɔ́ ku’u légyá ngɔ́’ ntí nò lezíŋ Yěsô. 42Pɔ́ gʉa pú’u, ńgwɔ́ lyɛ̌’ ntsèm, á tsɛ̀ɛ jʉ’e Ssé, mbɔɔ tsɛ̀ɛ mendá mendá, ńně ńzí’i pʉ̀a mmó, ńně sá’a nkʉ̀ mbòŋo, ńgɔɔn ngie Yěsô, aa *Nzà’nkÿo.
Nouveau Testament en Ngienboum © Alliance Biblique du Cameroun, 2007.