Mateo 15
15
Runakuna llutankunata yarpar impüru rikakuyanqan
Marcos 7.1-23
1Tsaypitanam fariseukuna y ley yachatsikuqkuna Jerusalénpita chaykur Jesústa tapuyarqan: 2<<¿Imanirtä discïpuluykikuna unay castantsikkunapa costumbrinkunata mana cäsur mikuyänanpä makinkunata awikuyantsu?>>
3Jesúsnam nirqan: <<Qamkunapis ¿imanirtä Tayta Diospa mandamientunta cumpliyänaykipa rantin costumbrikikunata mas cumpliyanki? 4Tayta Diospa mandamientunmi nin: <Mamaykita y papänikita alli rikanki>.#Éxo. 20.12; Deut. 5.16. Tsaynöllam nin: <Pipis mamanta o papäninta mana respitaq kaqqa wanutsishqa katsun>.#Éxo. 21.17; Lev. 20.9.
5<<Peru qamkunaqa yachatsirmi niyanki: <Imaykikunapis Tayta Diosllapä kanqanta nikarqa mamaykita ni papänikita yanapayänaykipä manam yatayankimantsu>. 6Mamanta y papäninta manana yanapayänanpä yachatsirqa Tayta Diospa palabranta manakaqmanmi churaykäyanki. 7¡Allish tukuq runakuna! Rasun kaqtam Isaías qamkunapä qellqarqan. Tsay qellqanqanchömi nin:
8<< <Kay runakunaqa shimillanwanmi cäsuyämänanpä niyäman.
Peru shonqunkunachöqa juktam yarpaykäyan.
9Ninqäta yachatsiyänanpa rantinqa runakuna niyanqallantam yachatsiyan.
Tsaymi adorayämanqanpis manakaqllapä kaykan> >>.#Isa. 29.13.
10Runakunata qayaskirnam Jesús nirqan: <<Kay ninqäkunata shumaq tantiyakuyay. 11Manam imatapis mikunqanpitatsu pipis impüru kaykan, sinöqa llutankunata parlanqanpitam>>.
12Discïpulunkunanam Jesústa niyarqan: <<¿Tantiyankiku tsaynö niptiki fariseukuna rabyakuyanqanta?>>
13Jesúsnam nirqan: <<Ciëluchö kaykaq Papänï mana plantanqan jacha karmi paykunaqa chakrapita llukirishqa kayanqa. 14Paykunata ama cäsuyaytsu. Paykunaqa qaprapura pushanakuqnömi kayan. Qaprapura pushanakurqa ishkanmi pözuman jeqarpuyanqa>>.#Luc. 6.39.
15Tsaynö niptinnam Pedro nirqan: <<Taytay, mikuyman iwalatsiypa yachatsinqaykita tantiyaykatsiyällämay>>.#Mat. 15.11.
16Jesúsnam nirqan: <<¿Qamkunapis manaku tantiyayanki? 17Runaqa manam mikuyta mikunqanpitatsu impüru rikakun. Mikunqanqa pachanpitam päsakun. 18Peru shonqunchö mana allita yarpanqanta parlarmi sïqa impüru rikakun.#Mat. 12.34. 19Runakunaqa shonqunchö mana allikunata yarparmi runa mayinta wanutsiyan, adulteriu jutsata rurayan y fornicación jutsata rurayan. Tsaynöllam suwakuyan, llullakuyan y runa mayinta ashlliyan. 20Tsaykunata rurarmi runaqa impüru rikakun. Manam makinta mana awikullar mikunqanpitatsu impüru rikakun, sinöqa shonqunchö mana allikunata yarpanqanpitam>>.
Mana Israel warmi Jesúsman criyikunqan
Marcos 7.24-30
21Tsaypitanam Jesús aywarqan Tiro y Sidón markakuna lädupa. 22Tsay markakunachömi cananeo niyanqan mana Israel runakuna täyan. Tsaymi juk cananea warmi Jesús kaqman aywar jinchipa rugakur nirqan: <<¡Davidpa Tsurin Jesús, kuyapaykallämay! Warmi wamrätam supay löcayätsir pasaypa ñakatsin>>.
23Tsaynö niptin Jesús manam imatapis parlakurqantsu. Tsaymi discïpulunkuna Jesústa niyarqan: <<Pasaypa qayaykacharmi taqay warmi qatiraykämantsik. Taytay, aywakunanpä niykuy>>.
24Tsaymi tsay warmita Jesús nirqan: <<Oqrakashqa üshanö kaykaq Israel runakunallamanmi Tayta Dios mandamashqa>>.
25Tsaynö niptinmi tsay warmi Jesúspa puntanman qonqurikuykur nirqan: <<¡Taytay, yanapaykallämay!>>
26Jesúsnam nirqan: <<Qamta yanaparqa wamrakunapa tantanta qechuskir allqukunata qaraqnömi käman>>.
27Warminam nirqan: <<Awmi, taytay. Peru mësapita shushupakuyanqantam allqukunapis mikuyan>>.
28Jesúsnam nirqan: <<Rasunpam yärakamunki. Rugakamanqaykinömi kanqa>>.
Tsay höram tsay warmipa wamran alliskirqan.
Qeshyaykaqkunata Jesús allïtsinqan
29Tsaypita aywakurnam Galilea qocha kuchunpa Jesús päsarqan. Tsaypitanam juk jirkanman witsarkur tsaychö jamakurqan. 30Tsaymanmi atskaq runakuna chätsiyarqan weqrukunata, qaprakunata, makllukunata, mana parlaqkunata y wakin qeshyawan qeshyaqkunatapis. Tsaychömi llapan qeshyaqkunata Jesús allïtsirqan. 31Tsaymi runakuna pasaypa kushikuyarqan upakuna parlaqta wiyar, makllukuna allishqa kaykaqta rikar, weqrukuna puriqta rikar y qaprakuna rikaqta rikar. Tsaynö kushikurmi Tayta Diosta alabayarqan.
Chusku waranqa runakuna mikuyänanpä milagruta Jesús ruranqan
Marcos 8.1-10
32Tsaypitanam discïpulunkunata qayaykur Jesús nirqan: <<Kay runakunatam pasaypa kuyapä. Kimsa junaqnam mikuytapis mana yawar noqantsikwan kaykäyan. Mallaqllata <aywakuyay> niptïqa wayinkunamanpis manarä chäyaptinmi bäjidus tsarinqa>>.
33Discïpulunkunanam niyarqan: <<Kay jäkuqchöqa ¿maychörä mikuyta tariykushun atskaq runakunapä?>>
34Jesúsnam tapurqan: <<¿Aykatä tantaykikuna kan?>>
Niptinnam niyarqan: <<Taytay, qanchis tantawan juk ishkay pescädullam kan>>.
35Tsaynö niyaptinmi runakuna jamakuyänanpä Jesús nirqan. 36Jamaskiyaptinnam pescäduta y qanchis tantata aptarkur Tayta Diosta mañakur agradëcikurqan. Tsaypitanam tantata pakiskir discïpulunkunata makyarqan aypukuyänanpä. 37Tsaymi pacha junta llapanpis mikuyarqan. Sobraq kaqkunatanam qanchis canasta juntata discïpulunkuna qoriyarqan. 38Tsaychö mikuqkunaqa chusku waranqanömi (4,000) kayarqan. Warmikunata y wamrakunataqa manam yupayarqantsu.
39Runakunata aywakuyänanpä niskirnam büquiman yarkurkur discïpulunkunawan Magdala partiman Jesús aywarqan.
© 2002, 2008, Wycliffe Bible Translators, Inc. All rights reserved.