EBIKHOLWA AKARANJIL'LA
AKARANJIL'LA
Esitapu sie Ebikholwa bia Barumwa namang'ana akatsitsachil'langa okhumeeta khusitapu sia Mang'ana Amalahi singa kahandikwa nende Luka. Lichoomo likali liesitapu sie Ebikholwa bia Barumwa nokhwinoosia obwa abalondi ba Yesu abokhuranga bemel'lwa no Mwoyo Omutsienukhu nibalandia Amang'ana Amalahi aka Yesu Kristo “mu Yerusalemu, ne Buyahudi yosi, na Samaria okhwola khusihesi siesibala” (1:8). Namang'ana akomukanda Kwesikristo singa kwachiaka mu Bayahudi ma nikutsitsachilil'la okhuba omukanda kwobusubili khusibala siosi. Omuhandichi khandi yali nokhuhendela okhusubisia abandu abayahandichila mbu Abakristo sibali omukanda okwetsimemba okwokhutechesia obwami bwa Baroma tawe, ma okhubamanyia mbu obusubili Bwesikristo bwali okhuhesikha khwedini Yesiyahudi.
Esitapu sie Ebikholwa sinyala okhukabulwamwo ebikha bitaru ebikali, ebimanyianga obubambukhu obwemumbeka omwa Amang'ana Amalahi aka Yesu Kristo kakambwa ma Likanisa niliombokhwa: (1) Obuchiachilo bwokhulanda khwo Bukristo mu Yerusalemu inyuma wokhupulukha khwa Yesu; (2) Okhumetekha khwo Bukristo mubibala bindi ebia Bapalastina; (3) Okhutsitsachilil'la okhumetekha khwo Bukristo okhutsia mubibala bie ehale okhwola Eburoma.
Ling'ana likali musitapu sie Ebikholwa nobukholi obwo Omwoyo Omutsienukhu, owetsa nobunyali khubasubili mu Yerusalemu khwitukhu lia Pentekoste. Omwoyo Omutsienukhu mwene uyu atsitsachil'langa okhwemel'la nokhutinyilisia Likanisa na abemeli balio mu mang'ana kosi akaralwa musitapu yisi. Obukambi bwo khuranga obwe Esikristo bwahanwa mubwimbichiti mumakambo amenji, ne ebindu ebiekholekha ebiahandikwa musitapu sie Ebikholwa bimanyianga obunyali bwo obukambi yibu mubulamu bwa basubili nende mubuhambani bwe likanisa.
Akalimwo
Okhwerechekha okhuba abakobokheli ba Yesu 1:1-26
(a) Lilako lia Yesu eliokhumal'likha nende lisubisiolie 1:1-14
(b) Owabukula obukono bwa Yudasi 1:15-26
Obukobokheli mu Yerusalemu 2:1—8:3
Obukobokheli mu Buyahudi nende mu Samaria 8:4—12:25
Emilimo chia Paulo 13:1—28:31
(a) Oluchendo lwa Paulo olwokhuranga 13:1—14:28
(b) Okhubukana khwabemeli mu Yerusalemu 15:1-35
(c) Oluchendo lwa Paulo olwakhabili 15:36—18:22
(d) Oluchendo lwa Paulo olwakhataru 18:23—21:16
(e) Paulo omubohe mu Yerusalemu, Kaisaria nende Eburoma 21:17—28:31
©Bible Society of Kenya, 2019