Luka Kĩmenyithania
Kĩmenyithania
Nteto Ĩmbega ta bũrĩa yandĩkirwe nĩ Luka yonanĩtie Jesũ aarĩ Mwonokia ũrĩa erĩrĩtwe antũ ba Isiraeli, na Mwonokia wa antũ bonde. Luka nĩ andĩkĩte atĩ Jesũ etirwe ni Roho wa Mwathani “akaunjie Nteto Ĩmbega kĩrĩ nkĩa.” (4.18). Mbuku ĩno ĩjũrirĩte nteto jia antũ barĩ na ũbatu wa mĩthemba yonde. Nteto jia gĩkeno o najio nĩijũkĩtie kanya kanene mbukuni ĩno ya Luka, mũno ta icuncĩni jia mbere, irĩa jiĩgiĩ kwĩja kwa Jesũ gũkũ ndĩ; na kũrĩkĩĩria kwa mbuku kũrĩa kwarĩrĩtie gwitia ĩgũrũ kwa Jesũ. Rũgono rwa gũkũra na gũtamba kwa Ũkristiano nyuma ya Jesũ gwitia ĩgũrũ rwandĩkĩtwe nĩ mwandĩki o ũũ, mbukuni ya Jiĩko Jia Atũmwa.
Nteto irĩa irĩ icuncĩni ino jiĩrĩ (Iciko 1 na 2, ningĩ 9 nkinya 19) jiarĩtie nteto irĩa jionekaga mbukuni ĩno akĩ. Imwe jia nteto iu nĩ rũgono rwa rwĩmbo rwa araika (Luk 2: 13-14), arĩthi kũthi kwona kaana Jesũ (Luk 2: 8-20), Jesũ Hekarũni arĩ mũnini (Luk 2: 41-51), ngerekano ya Mũsamaria Mwega (Luk 10.25), na mũthaka ũrĩa waũrĩte (Luk 15: 11-32). Maũntũ megiĩ maromba, Roho Mũtheru, kanya ka antũ aka ũtungatani bwa Jesũ na bũrĩa Ngai arekagĩra antũ meyia mao nĩ ĩkinyĩĩrĩtue mũno kunde mbukuni ĩno.
Marĩa marĩ mbukuni ĩno
Kĩmenyithania 1.1-4
Kũjiarwa kwa Johana Mũbatithania na kwa Jesũ, na ũninini wao 1.5—2.52
Ũtungata bwa Johana Mũbatithania 3.1-20
Kũbatithua na kũgerua kwa Jesũ 3.21—4.13
Jesũ gũtungata mwingĩ Galili 4.14—9.50
Jesũ kuuma Galili kũthi Jerusalemu 9.51—19.27
Kiumia kĩa mũthia, Jesũ arĩ akuĩ Jerusalemu, na arĩ Jerusalemu. 19.28—23.56
Kũriũka, kumĩrĩra antũ na gwitia ĩgũrũ kwa Mwathani. 24.1-53
God's word open for all
©Bible Society of Kenya, 2021