Luka 2
2
Kũjiarwa kwa Jesũ
(Mat 1.18-25)
1Kagiitani kau mũnene Kaisari Agũstũ nĩ aarutire watho atĩ antũ barĩa batũũrĩte ndĩ yonde ĩrĩa yathagwa nĩ ũnene bwa kĩ Roma batarwe. 2Gũtarana gũkũ nĩ ku kwarĩ kwa mbere kũrũthwa rĩrĩa Kwiriniasi aarĩ gavana wa Sĩria. 3Antũ bonde bakĩthi kwĩandĩkithia, o muntũ taũni nene ya kwao.
4O nawe Josefu nĩ aumire kũu kwao Galili taũni nene ya Nazarethi akĩthi taũni nene ya Daudi ĩrĩa yetagwa Bethilehemu, kũu Judea. Athiire ku nĩũntũ aarĩ wa rũrĩjo rwa Daudi. 5Akĩthi kwĩandĩkithia arĩ amwe na mũcoore wae Maria, ũrĩa warĩ mũrito. 6Na rĩrĩa baarĩ kũu Maria agĩkinyia ĩndĩ ya kũgĩa mwana. 7Akĩgĩa na kaana, ĩrikithathi rĩa kaĩjĩ; agĩgatunga na cuka. Agĩkamamia rũkongoroni rwa ng'ombe#2.7 Rũkongoroni rwa ng'ombe: Antũ arĩa ng'ombe jiĩkagĩĩrwa ria ikarĩra o , nĩũntũ gũtarĩ na kanya mũkawani arĩa bangĩkara.
Arĩĩthi kumĩĩrwa nĩ mũraika
8Gũntũ kũu nĩ kwarĩ na arĩthi nyakini#2.8 nyakini: kũrĩa ndĩthia jiarĩthagua, rĩmwe arĩthi bagekara ku ntukũ nyingĩ. bekarĩtie ũrĩthi wao ũtukũ. 9Mũraika wa Mwathani nĩ abaumĩrĩĩre, na ũkengi mũnene wa Mwathani ũkĩbathiũrũkĩria, na bakĩgwatwa nĩ ũkĩri mwingĩ mũno. 10Ĩndĩ mũraika akĩbeera, “Tigani gũkĩra! Nĩũntũ rĩ, ndĩbũreterete nteto ĩmbega na ĩrĩa ĩgatũma antũ bonde bagĩe na gĩkeno kinene. 11Nĩũntũ ũmundĩ, kũu taũni nene ya Daudi nĩ bũjiarĩrĩtwe Mwonokia, na nĩwe Kristũ Mwathani. 12Na bũkamenya kaana kau atĩrĩ: bũkona kagenke gatungĩtwe na cuka na karĩ kamamie rũkongoroni rwa ng'ombe.”
13Kagiita o kau mũraika ũu akĩthiũrũkĩrua nĩ gĩkundi kĩnene kĩa araika bangĩ, bagĩkumia Ngai bakiugaga,
14“Ngai Ũrĩa ũrĩ Ĩgũrũ Mũno arokumua,
Naku ndĩ kũgĩe ũkiri
gatagatĩni ka antũ barĩa bakenagia nkoro yae.”
15Rĩrĩa araika babatigire baitia ĩgũrũ, arĩthi bakĩĩrana; “Tũthini kũu Bethilehemu tũkeonere maũntũ mama Mwathani atũmenyithia.”
16Bakĩthi bajiũĩte bakĩthĩra Maria na Josefu, na kagenke kamamĩtue rũkongoroni rwa ng'ombe. 17Na rĩrĩa bonire kaana, bakĩĩra ajiari ba ko nteto irĩa baarĩ bakwĩrwa nĩ mũraika jiĩgiĩ kaana kau. 18Na antũ bonde barĩa beguire nteto iu jia arĩthi bakĩrĩgara mũno. 19Ĩndĩ we Maria akiiga maũntũ mama monde nkoroni yae, akameciragia kaingĩ. 20Arĩthi bagĩcoka kĩrĩ ũrĩthi bwao, bagĩkumagia na gũkaatha Ngai nĩ marĩa monde beguĩte na bakĩona, o ta bũrĩa berĩtwe ni mũraika.
Jesũ gũtuĩrwa riĩtwa
21Ntukũ inyanya ikũthira na kaana gagũtanwa, nĩgetirwe Jesũ, riĩtwa rĩrĩa mũraika augĩte getwe mbere ya gina agĩa nda.
Jesũ kwirwa Hekarũni
22Nĩ gwakinyire kagiita ka Maria na Josefu kũrũtha mambura ma kwĩtheria, ta bũrĩa Watho bwa Musa bwathanĩte. Kwogũ bakiira Jesũ Jerusalemu, kũmũnenkanĩra kĩrĩ Mwathani, 23(ta bũrĩa kwandĩkĩtwe Wathoni bwa Mwathani atĩ, “No nkinya ĩrikithathi rĩonde rĩa kaĩjĩ rĩamũrĩrwe Mwathani”) 24na rĩrutĩrwe kĩgongoana kĩa “tũjĩa twĩrĩ kana tũnyoni twĩrĩ twa mũthemba wa tũjia” kũringana na Watho bwa Mwathani.
25Kagiitani o kau nĩ kwarĩ na muntũ watwĩre kũu Jerusalemu wetagwa Simioni. Nĩ arĩ muntũ mwagĩru na nĩ akĩrĩte Ngai. Simioni aatwĩre eterete kwona kwonokua kwa antũ ba Isiraeli, na Roho Mũtheru nĩ arĩ amwe nawe. 26Roho Mũtheru nĩ amũguũrĩrĩtie atĩ atĩkua atĩonete Kristũ ũrĩa weranĩrĩtwe nĩ Mwathani. 27Simioni nĩ atongorirue nĩ Roho Mũtheru, akĩthi Hekarũni. Na rĩrĩa Jesũ aretirwe Hekarũni nĩ ajiari bae nĩkenda baingia bũrĩa Watho bwaugĩte, 28Simioni nĩ amũjũkirie njarani jiae na agĩcokeria Ngai nkatho akiuga,
29“Rĩu Mwathani ĩtĩkĩĩria ntungata yaku ĩthi ĩrĩ na ũkiri,
Kũringana na uuge bwaku;
30Nĩũntũ metho makwa nĩmeonerete wonokania bwaku
31Bũrĩa gwe ũthondekete mbere ya antũ bonde
32Bũrĩ werũ bwa kũguũrĩria antũ batĩ Ayahudi,
na ũkumio kĩrĩ antũ baku ba Isiraeli.”
33Ajiari ba Jesũ nĩbarigarirue mũno nĩ maũntũ marĩa Simioni aaririe megiĩ kaana kau. 34Simioni akĩbatharima, agĩcoka akĩĩra Maria, gina wa Jesũ,
“Atĩrĩ, kaana gaka nĩ kathurĩtwe nĩ Ngai nĩkenda gatũme antũ baingĩ ba Isiraeli bathire na bangĩ baingĩ bonoke.
Gakethĩrwa karĩ kĩonania kuuma kĩrĩ Ngai kĩrĩa antũ baingĩ bakaregana nakĩo, 35nabu bũrĩa antũ beciragia nkoroni jiao bumbũke;
Naagwe ũgacinwa nĩ ũrũrũ ta bwa rũyiũ rũkũmuntĩte nkoro.”
36Na o kũu nĩ kwarĩ mũgekũrũ kĩroria, waarĩ mũkũrũ mũno wetagwa Anna. Anna aarĩ mwarĩ wa Fanueli, wa kuuma mbarĩ ya Asheri. Akũgũrwa, nĩ atũũrire na mũrũme mĩaka mũgwanja, 37mũrũme agĩcoka agĩkua. Anna agĩtũũra arĩ ntigwa, agĩkinyia mĩaka mĩrongo ĩnaana na ĩna. Aatũraga Hekarũni akĩthathaagia Ngai, eimĩte irio na akĩrombaga Ngai ũtukũ na mũthenya. 38Ĩthaani o rĩu Jesũ anenkanagĩrwa Hekarũni Anna nĩ akinyire na agĩcokeria Ngai nkatho nĩũntũ bwa kaana kau Jesũ. Akĩaria nteto jiĩgiĩ kaana kau kĩrĩ antũ barĩa bonde batwĩre beterete gũkũrũa kwa Jerusalemu.
Gũcoka Nazarethi
39Rĩrĩa Maria na Josefu barĩkirie kũingia maũntũ marĩa monde mabatiĩ kũingua kĩrĩ Watho bwa Mwathani, nĩbacokire kwao mũjiĩ Nazarethi, kũu Galili. 40Nako kaana nĩ gakũrire, na gakĩgĩa inya na ũũgĩ mwingĩ, na wega wa Ngai waarĩ amwe nako.
Jesũ Hekarũni
41O mwaka, ajiari ba Jesũ nĩbathijaga Jerusalemu gũkeneera mambura ma Pasaka. 42Na ta bũrĩa kwarĩ wĩthĩre, Jesũ agũkinyia mĩaka ĩkũmi na ĩĩrĩ nĩ athijanirie na ajiari bae Jerusalemu, mamburani mau. 43Mambura makũthira, ajiari ba Jesũ nĩbagwatire njĩra bakĩambĩria gũcoka kwao, ĩndĩ Jesũ agĩtigwa Jerusalemu, na ajiari bae batĩnamenye. 44Nĩ bathiire rũgendo rwa ntukũ ngima, o bakĩmũcũaga kũu gatagatĩni ka acoore na antũ bao, nĩũntũ beciragia aarĩ o kũu gĩkundini kĩa barĩa benũkanĩtie nabo. 45Bakũmwaga, bagĩcoka Jerusalemu o bakĩmũcũaga. 46Nyuma ya ntukũ ithatũ bakĩmwĩthĩra Hekarũni, ekaranĩtie na arutani abathikĩrĩtie na akĩbaũragia jiũria. 47Antũ bonde barĩa bamũthikĩrĩtie nĩbarigarire nĩ bũrĩa agĩcokia jiũria na ũũgĩ mwingĩ. 48Ajiari bae bakũmwona nĩbarigarire mũno. Gina akĩmũũria, “Mwana wakwa, nĩmbi ĩtũmĩte ũtũrutithia wĩra bũkari ũũ? Niũ na abagu tũtangĩkĩte mũno tũgĩgũcũa.”
49Jesũ akĩbaũria, “Nĩmbi ĩgũtũmaga bũncũa? Nĩka bũtaijĩ no mwanka nkethĩrwa ndĩ nyombani ya Baba?” 50Ĩndĩ ajiari batataũkĩrwa nĩ bũrĩa aberire.
51Agĩcoka akĩbathingata, bakĩĩnũka kwao Nazarethi, kũrĩa ekarire akĩbaathĩkagĩra. Nawe gina nĩ aigaga maũntũ mama monde nkoroni, akameciragia kaingĩ.
52Nawe Jesũ agĩkũra akĩneneaga mwĩrĩ, akĩũgĩaga, na akĩendagwa nĩ Ngai o na nĩ antũ.
God's word open for all
©Bible Society of Kenya, 2021