Awos. 6
6
Kiikinae Ŋisirael alakuno
(Awos. 3:1-22, 4:1-17)
1Tema nai Ekapolon neni a Moses, “Iŋolikini tokona iyoŋ ŋuna etiyakini ayoŋ neni a Parao: Kire jik, areikini ayoŋ iŋes kimyek ŋituŋa kaŋ toloto, kire areikini ayoŋ iŋes kirita ŋituŋa kaŋ torotokis anakwap keŋ.”
2Kirwor daŋ Akuj neni a Moses tema, “Arae ayoŋ Ekapolon. 3Abu ayoŋ otakanu neni ka Aburaam, Isaka ka Yakob ikwapei Akuj ŋina Etiron, nai alokiro kaŋ a ŋolo enyaritae ‘Arae Ayoŋ ŋina Arae Ayoŋ’ abu ayoŋ nyeteyenikin ikes. 4Abu daŋ ayoŋ ewuak Acamunet kaŋ ka ikes, iŋes ainakin ikes akwap ŋina a Kanaan, akwap ŋina eboitotor ikes erae ŋigelaanotin. 5Adau daŋ ayoŋ akiirar akigworo a Ŋisirael a ŋulu etiŋitae alo Ijipit erae ŋipi, ido atamu ayoŋ Acamunet kaŋ ka ikes. 6Aŋun, ape tolimok Ŋisirael ebe, ‘Arae ayoŋ Ekapolon, akalakuni ayoŋ iyes anakisicaneta a Ŋijipitian, akalakuni ayoŋ iyes anapitoonut aneni kec. Akalakuni ayoŋ iyes a apedor kaŋ ka esicani ayoŋ ikes nooi. 7Akayai ayoŋ iyes irae ŋituŋa kaŋ ka aruwor ayoŋ Akuj kus. Iyenunete iyes atemar arae ayoŋ Ekapolon Akuj kus, ŋolo akalaku iyes anakisicaneta a Ŋijipitian. 8Akayauni ayoŋ iyes nakwap ŋina abu ayoŋ ekoŋ ainakin Aburaam, Isaka ka Yakob; akainakini ayoŋ iyes akwap ŋin toruwor ŋina kus. Arae ayoŋ Ekapolon.’ ” 9Abu nai Moses tolimok Ŋisirael ŋakiro ŋun, nai apotu ikes nyepupokis ŋuna abala Moses aŋuna abunio akigeno todaun aneni kec ka aŋuna ke epite a ŋolo ka apitoonut kec a ŋina esicanitere ikes nooi.
10Tema nai Ekapolon neni a Moses, 11“Ape, tolimok Parao erwosit ŋolo a Ijipit kimyek Ŋisirael torotokis anakwap keŋ.” 12Abu nai Moses kiŋit Ekapolon tema, “Ani nai kewounito Ŋisirael apupokin ŋakiro kaŋ, alipite nai epupokinia Parao ŋakiro kaŋ a ŋolo nyayeni erwor ejok?” 13Kicik nai Ekapolon Moses ka Aron tema, “Tolimokisi Ŋisirael ka Parao erwosit ŋolo a Ijipit atemar akalimok ayoŋ iyes akiya Ŋisirael anakwap a Ijipit.”
Ŋirorwa a ŋituŋa a ekal a Moses ka Aron
(Akisy. 46:8-27)
14Ruben iŋes lokoku a Yakob ŋolo kiyae, ayakar Ruben ŋidwe ŋulusapa lu: Anok, Palu, Esiron ka Karimi, arae ŋul ŋituŋa a ekal a Ruben. 15Ŋidwe a Simeon ŋulusapa lu: Yemuel, Yamin, Oad, Yakin, Soar ka Saul ŋolo arae aberu ŋina alo Kanaan auruuni. Arae ŋulu ŋituŋa a ekal a Simeon. 16Ŋulu etupakinete erae ŋirorwa a ŋidwe a Lepi a ŋulusapa ameun aneni a ŋolo kiyae: Gerison, Koas ka Merari. Arae ŋikaru a Lepi daadaŋ amiat ka ŋatomoniuni ka ŋikanikaarei ekaku ŋikaru ŋul, totwan. 17Ŋidwe a Gerison ŋulusapa lu imarunitae a ŋikalya kec: Libini ka Simei. 18Ŋidwe a Koas ŋulusapa lu Amiram, Isiar, Eburon ka Usiel. Arae ŋikaru a Koas daadaŋ amiat ka ŋatomoniuni ka ŋiuni ekaku a ŋikaru a ŋul, totwan. 19Ŋidwe a Merari ŋulusapa lu: Mali ka Musi ŋituŋa a ekal a Lepi ŋul. 20Abu Amiram kiit nakaato a papa keŋ ŋina anyaritae Yokebed, ŋina abu touru Aron ka Moses. Arae ŋikaru ka Amiram daadaŋ amiat ka ŋatomoniuni ka ŋikanikaarei ekaku a ŋikaru a ŋul, totwan. 21Ŋidwe a Isiar ŋulusapa lu: Kora, Nepeg ka Sikiri. 22Ŋidwe a Usiel ŋulusapa lu: Misael, Elisapan ka Sisiri. 23Abu Aron kiit Eliseba nakoku ka Aminadab, nakaato a Nason. Touru Eliseba Nadab, Abiu, Eleasar ka Isamar. 24Ŋidwe a Kora ŋulusapa lu: Asir, Elikana ka Abiasap. Arae ŋul ŋituŋa a ekal a Kora. 25Abu lokoku ka Aron ŋolo anyaritae Eleasar kiit nakoku a Putiel ŋina abu touru Pineas. Arae ŋul ŋituŋa a ekal a Lepi a ŋatekerin kec.
26Arae Aron ŋolopei ŋol ka Moses abu Ekapolon tolimok ebe, “Yautu Ŋisirael anakwap a Ijipit elosete a ŋatukon esibit ŋajoresyo.” 27Arae ikes apotu kirworo neni a Parao a erwosit a Ijipit ŋakiro ŋuna ka ayaar Ŋisirael anakwap a Ijipit.
Kiwuapa Moses ka Aron ŋakiciketa ka Akuj
28Apei koloŋit, abu Ekapolon kirwor neni a Moses anakwap a Ijipit, 29tema, “Arae ayoŋ Ekapolon; tolimok Parao erwosit ŋolo a Ijipit ŋakiro daadaŋ ŋuna abuni ayoŋ alimokin iyoŋ.” 30Nai abu Moses alokiŋaren Ekapolon kiŋit iŋes tema, “Ikwapei ayenia ayoŋ atemar nyerworo ayoŋ ejok, alipite nai epupokinia Parao ŋakiro kaŋ?”
Ngakarimojong Interconfessional Bible © Bible Society of Uganda, 2008.