ROM 2
2
Ụshɛrɛya na Agwatana a Duma
1Iwɛbɛ po okwo bụtụ be elele na abɛ shɛ, ta aba duma ụshɛrɛya binya bụtụ, bu zasa ajɛshɛgwa elele na maa peni kwukwuŋ. Ijɛ ɛtɛ aba duma ụshɛrɛya binya bụtụ, ibɛ kaa du aba nda gbaa, asha bu meme peni du n-ndumwa-tụwụma ni ikɛnyi bu.#Mat 7:1; Luk 6:37 2Ti mepi maa ụshɛrɛya na Agwatana a duma teni cɛŋ na atwa na a nda iyi gɛnɛ gɛ. 3Gabụ na ba duma ụshɛrɛya wa atwa na a nda iyi gɛnɛ ɛtɛ, gabụ kaa ba nda du ijɛ ɛtɛ ni ikɛnyi bu, bi heŋshi ree maa bi zhɛ ba banangana ụshɛrɛya wa Agwatana? 4Kwo kaa bu ngbaracɛ ree ugombo iwɛ-tumapa ubwa, keeni isɛbwɛ ibwɛ ti'ima keeni egiri ubwa tula cwɛŋ? Bi eshiciji shi maa iwɛ-tumapa ya Agwatana ibɛ ma bu 'yagaga maa jɛshɛrɛjɛ-ahaŋsa o. 5Ama gana na ta amɛ bu hweteni, aa jɛshɛrɛjɛ shɛ, bu mama intananɛ isɛbwɛ nụ ụjita isɛbwɛ ya Agwatana, na aka na tụ ụshɛrɛya ubwa u tishiriri zhɛ wa kapɛshɛngwa jita ata. 6Ubwa kaa zhɛ ba tụpa bụtụ bụtụ te teni cɛŋ gana na tu baa njɛ ugondu.#Shɛzu 62:12; Eshi 24:12 7Uraiŋ unyizo-nom ubwa Agwatana zhɛ a tụpa atwa na 'imɛ-isɛbwɛ a nda ugondu ubiye, a na a jalakaka ụjɛrụma, keeni tumuna. 8Ama isɛbwɛ ya Agwatana zhɛ ya patana nu uhiuhiu wa atwa na shɛ e'weji-uwuru, a na jeri shi maa a na nda iyi nɛ teni cɛŋ, ama a jala maa a na nda gi iyi iwɛ. 9Ụbaụta keeni ụngwụ-tụhwụga zhɛ wa patana nu uhiuhiu bụtụ be elele na ba nda iyi iwɛ, no ofwo Eju hiiŋ keeni Egrik du. 10Ama ụjɛrụma keeni tumuna keeni amɛ-olom zhɛ ya namana bụtụ be elele na ba nda iyi ibiye, no ofwo Eju hiiŋ keeni Egrik du. 11Iwɛnɛ po Agwatana zenji shi atwa o.#Undwa 10:17
12Atwa elele na njɛ la iwɛwɛ na aka na tu Undwa Moses ta zasaba, ɛ zhɛ a duma du ụshɛrɛya wa aba na aka na tu Undwa ta zasaba. Ama atwa elele na njɛ iwɛwɛ na aka na tu Undwa Moses namwawaŋ, ɛ zhɛ a duma du ụshɛrɛya wa aba tedure nu Undwa ata. 13Shɛ atwa na a hwuga iyi nɛ Undwa jɛmɛ kwakwa ɛɛ zhɛ a pana n-ndumwa-zhɛ na agba Agwatana o, semi atwa na a nda iyi nɛ Undwa jɛmɛ, aba kiri Agwatana zhɛ a pana n-ndumwa-zhɛ. 14Yaa shɛ atwa elele a na shɛ shɛ Eju a na kaa zasa Undwa a nda iyi nɛ Undwa jɛmɛ, na masha ma butugwumwa, asha okwo ta a zasa Undwa, a mama ndanɛ Undwa ni ikɛnyi aba. 15Asha e mbiseni iŋ caakwụ maa e 'nyeci iyi nɛ Undwa wa jala na shɛmɛ sha aba, bimbisegeni-ba-shɛmɛ sha aba kaa ba la aŋ tiseyida, tuhaŋsa ta aba kaa du ta pana aŋ n-ndumwa-tụwụma, nekeshi sha lashaga aŋ, 16nụ ụjita na Agwatana zhɛ a duma ụshɛrɛya iyi tusweci nɛ atwa a haŋsa na shɛmɛ sha aba gana na ta Anabarɛ Ebiye a na Ama ananga namɛ tedure ne Jisus Krast.
N-ndumwa mụ Wụmɛ Eju na Agba Agwatana iwɛ Undwa
17Gabụ na bu mama suyana maa bɛ shɛ Biju, yaa shɛ abu datanɛ kwakwa Undwa, aba busa iwɛ ụmatụ bụ na Agwatana, 18gabụ kaa bi mepi ukwulana ubwa iwɛnɛ te e bi mbisegeni iyi nɛ namɛ nu Undwa, ebi leni du kaa maa iyi ibiye teni cɛŋ tɛnda. 19Yaa shɛ abu tɛtanɛ kaa rishe maa gabụ ba 'yagaga sholubo, maa gabụ bɛ shɛ uhioko-uhwaŋna wa atwa na namɛ ne tishi, 20maa gabụ bo mbisogono shɛlagwụ iyi, maa gabụ bo mbisogono miaụŋ mi shenje iwɛ, abi 'yajɛ kaa ụsụbwa iyi-tumapa keeni iwɛ-tɛkana nu Undwa. 21Asha to bo mbisogono bata anya atwa iyi, bu meme mbisegeni shi ree? Gabụ na ba ananga maa kede bụtụ zunji izunde o, gabụ suu bo zundo ya izunde? 22Gabụ na ba duma maa kede bụtụ njɛ tuwɛle o, gabụ suu ba nda ya tuwɛle? Gabụ na bo imo ntatanuwaŋ, gabụ suu be zunje ya i'wɛŋnɛ nu nsumo mu ntatanuwaŋ? 23Gabụ na ba busa iwɛnɛ ta bu 'yajɛ Undwa wa Agwatana, asha shɛ Agwatana ree aba nda ụpụrụsa ta ba bwada bata Undwa? 24Gana na ti yee 'nyeci, yɛɛ hiɛŋ, Ahiɛba hi po atwa na shɛ shɛ Eju a dumangana Agwatana n-ndumwa mụ wɛ.#Ayiz 52:5
25Teleyi tijaja ti 'yajɛ ule ti yaa shɛ aba nda iyi nɛ Undwa jɛmɛ, ama yaa shɛ abɛ shɛ bubweji bu Undwa, asha teleyi tụ bụ tijaja tɛ shɛ gana bụtụ na te jeji shi teleyi kwukwuŋ. 26Yaa shɛ bụtụ na jeji shi teleyi ba untangana iyi nɛ Undwa jɛmɛ, a zha shɛ a rɛta bu suu gana bụtụ na jeji teleyi? 27Iwɛ-tɛkana okwo ta butugwumwa jeji shi teleyi ta bụtụ ata, yaa shɛ bụtụ ata ba nda iyi nɛ Undwa jɛmɛ, bi zhɛ ma bu pana n-ndumwa-tụwụma okwo ta bu untanganɛ yibwa ti'nyeci ta ata tu Undwa keeni tileyi tụ bụ tijaja, abɛ shɛ kaa bubweji bu Undwa. 28Iwɛnɛ po shɛ Biju na ba nda iyi no tupohondo ta tu'waba, shɛ ubwa i shɛ Biju bu tugom o, shɛ teleyi tu tu'waba tijaja kaa, tɛ shɛ teleyi tijaja tu tugom o. 29Ama Biju bu tugom i shɛ na amɛ, teleyi tijaja tu tugom kaa tɛ shɛ na ahaŋsa, tedure na Mpiala, shɛ a na ti'nyeci o. Agwatana kiri ba dumanga bụtụ gana ata, shɛ atwa o.#Undwa 30:6
Rubassa Bible © Bible Society of Nigeria, 2008