ROM 11
11
Agwatana Jineci shi Atwa Ubwa Isrɛl o
1Ibɛ po Ngee heŋteni, Ngɛɛ hiɛŋ, Agwatana jineci atwa ubwa suu? Awo! Shɛ gana ata kwukwuŋ! Iwɛnɛ po Gamba ni ikɛnyi mi N shɛ du bụtụ bi Isrɛl, M banɛ na ajalalo Abraham, bụtụ bu ụlamụ Bɛnjamin Ngaa shɛ. 2Agwatana jineci shi atwa ubwa na boo tolwo cebe o. Hi mepi shi suu iyi nɛ Iwɛ ya Agwatana jɛmɛ iwɛ Elaija, gana na tu baa tabwa Agwatana maa ga sukakana atwa Isrɛl? 3Bɛɛ hiɛŋ, Agwangwama, a kwunua egesere bu hwɛɛ, oo bworotogwo otukwu-ụrụpɛ bụ, nazhɛ Ngaa vwɛ ya Ngooko, ibɛ gɛnɛnɛ aa jalanana uhiuhiu mu. 4Ama imbe i shɛ ajɛshɛgwa na Agwatana peni buu? Bi jishijɛ bụ, bɛɛ hiɛŋ, N te meme tileneni ba etwenyi igbɛɛ-itɛtu-na-akpakwụ-a-ta (7,000) a na te kwuzeni shi tuwa ti beal no shilulo sha aba.#1 Shɛgwu 19:18 5Gobwonu du yaa ta namba taa hwayɛ, atwa na ta vwɛ a ta namba, aba shɛ atwa na Agwatana teri tedure no tulubo-ti-biye. 6Ama yaa shɛ tutala ta ata tɛ shɛ tedure no tulubo-ti-biye, asha shɛ nu ugondu tɛnda taa banɛ o; shibwonu asha tulubo ta ata ti biye ti zha shɛ ta sha ya tulubo-ti-biye o.
7Asha imbe yaa shɛ yaa? Iyi nɛ atwa Isrɛl a jalakaka, e gwushiji shi iŋ o, ama atwa na bee teri tuba gwushiji iŋ, ama shɛmɛ sha atwa vwɛ shɛ shɛshɛpanɛ. 8Gana na te e 'nyeci, ɛɛ hiɛŋ, Agwatana lagwụcɛnjɛ shihaŋsa sha aba, maa kede shishe sha aba shɛ kwụbɛ uhwaŋna o, maa kede shɛcɛbɛ sha aba shɛ hwụjɛ iwɛ o, uuwa i ci aka ga.#Undwa 29:4; Ayiz 29:10 9Ibɛ po ge Devid hiɛŋ,
Gɛ iyimɛyɛ ya aba unyasa i shanɛ aŋ gana modugwulo
keeni ugwuru na zhɛ wa ima aŋ;
keeni iyi udukwutwa keeni itɛpwɛ nɛ teni cɛŋ na aba.#Shɛzu 69:22,23
10Ge eshe 'wi aŋ tishi maa kede a kwụbɛ uhwaŋna o;
nda aŋ maa a shɛ nkwuko unyizo-nom.
11Ibɛ po Ngee heŋteni, Ngɛɛ hiɛŋ, Asha a twa suu udukwutwa ee leyi nu ufwu tɛnda? Awo! Shɛ gana ata kwukwuŋ! Ama ulayɛ wa aba leneni ubino maa u zhajɛ pa atwa na shɛ shɛ Eju, iwɛ maa shɛmɛ sha aba shi vwundwo maa a 'yaga isɛbwɛngwɛ na aba. 12Ama yaa shɛ ulayɛ wa aba peni unyizo uwebiye nɛ gembi, yaa shɛ kaa ti'ina ta aba ti peni atwa na shɛ shɛ Eju uwebiye nɛ gembi, asha tugwure ta aba hwɛ hwɛɛ tubaa, shɛ tuba suu ti zhɛ ta 'waŋnɛ ya uwebiye nɛ keeni ugombo duwa?
Atwa na Shɛ shɛ Eju Tɛtanɛ-rishe
13Ama ne hiŋ Ama njɛ ya ahiɛba na hiɛ shɛ shɛ Eju, iwɛnɛ tu Ngaa shɛ butumwa na aa tumwanɛ pa atwa na shɛ shɛ Eju, ibɛ po Ama pana ugondu mu na Ama ndana atwa ụjɛrụma. 14Yaa shɛ yee ge cimi, N ngɛ zhɛ ma nda maa atwa na shɛ udenji mu a 'yaga isɛbwɛngwɛ maa e bicinji atwa oko na ashashɛ aba. 15Yaa shɛ tijinoko tu na ee jineci aŋ tu togononu atwa unyizo na Agwatana maa kede a shɛ ya atwa i'ime ibwɛ o, asha tulashɛga ta aba tubaa, shɛ tuba suu ti zhɛ ta sha uraiŋ na banɛ no tu'wo: 16Yaa shɛ ee peni Agwatana uhiuhiu tɛga, asha bumbara ata vwɛ hwɛ hwɛɛ bɛ shɛ ya du bu na ba Agwatana. Yaa shɛ kaa bini bụ ụ'wụ'wụ bɛ shɛ bu na bi tijilo, asha shɛ'walụ shɛ bwa du shɛ shɛ ya ma shɛ shɛ tijilo.
17Ama yaa shɛ aa kwusatajɛ a'walụ ụ'wụ'wụ ata oko, nazhɛ aa bu shapɛ gabụ na bu ga shɛ buta be ehilo ee bi seteni na ashashɛ aba, nazhɛ aba swa ya meni me tini tụ ụ'wu'wụ ata buta ahiɛbana na aba. 18Asha ta busana a'walụ ata o, ama yaa shɛ aba busa, asha teyinje maa shɛ gabụ bu untanganɛ bini o, ama bini ata ubwa ubu untanganɛ. 19Ama bi zhɛ bɛ hiɛŋ, A kwusatajɛ a'walụ ata, nazhɛ ee n seteni. 20Too i zhɛmɛ! Tulaka tu na aa lacɛ rishe-tɛtɛtana, ibɛ po aa kwusatajɛ aŋ, ama iwɛnɛ ebi shikeni tuba ne rishe-tɛtɛtana ibɛ po ee bi seteni. To momo mungicingo ya tuba o, ama na nda inyɛsɛ. 21Yaa shɛ Agwatana hebi shi a'walụ ata ni ikɛnyi aba, asha shɛ gabụ ya bɛɛ zhɛ ba haba o. 22Ibɛ po mapa iwɛ-tumapa ya Agwatana keeni mazhanga mu bwa: mazhanga mu bwa mu namɛ no ohiuhiu atwa na leyi, ama iwɛ-tumapa ubwa namɛ nu uhiuhiu bu, ti yaa shɛ abu uranjɛ iwɛ-tumapa ata ubwa; shibwonu ɛ zhɛ du ma bu jaja. 23Yaa shɛ aa uranjɛ shɛ rishe-tɛtɛtana tulaka, asha ɛ tɛ zhɛ a satana aŋ du, iwɛnɛ ta Agwatana te eri ba satana aŋ sasana. 24Ahiɛba na hiɛ shɛ shɛ Eju, hiɛ shɛ gana ụ'wụ'wụ u buta na unshɛ taa na ambɛ, nazhɛ ee hi seteni nụ ụ'wụ'wụ u buta bu tugom, unaa na abu ga shɛ shɛ a'walụ ubwa taa nu umozhigo. Eju aba shɛ gana a'walụ ata a shɛ a na ụ'wụ'wụ ata ni ikɛnyi aba, shɛ a na ata suu ɛɛ zhɛ a satana na buta ata ga shɛ ụ'wụ'wụ ubwa kakayɛ?
Ɛ Zhɛ o bicingo Kaa Miaụŋ mi Isrɛl Hwɛ Hwɛɛ
25A-miaụŋ-mo-bino mi na amɛ Krast, i n kwụlanɛ shɛ maa hiɛ shɛ ogbodu ni iyi tusweci gɛ o, shibwonu hi zhɛ hia sha egwoni ni ikɛnyi hiŋ. Ibɛ po shihaŋsa shi hiŋ ahiɛba miaụŋ mi Isrɛl shi zhɛ sha muna sha shɛshɛpana, uuwa i ci aka na ofwugwo wa atwa na shɛ shɛ Eju ulwa tizhajɛ no ofwo Agwatana. 26Nazhɛ ɛɛ zhɛ o bicingo ya atwa Isrɛl hwɛ hwɛɛ; gana na te e 'nyeci, ɛɛ hiɛŋ,
Bibicinji zhɛ ba banɛ nu Zayon,
ubwa zhɛ ba jɛshɛrɛga masha ma ajalalo Jekob mu na mu ga
shɛ masha mụ wɛ maa mi genji aŋ.#Ayiz 59:20,21
27Inɛ gɛ ibɛ shɛ unu mu na Ngɛɛ zhɛ ma twa na
aba, na aka na Ngɛɛ zhɛ mo sugo iwɛwɛ ya aba.#Ayiz 27:9
28Iwɛ Anabarɛ Ebiye na aa lacɛ, ibɛ po aa shɛ atwa i'ime Agwatana iwe hiŋ ahiɛba na hiɛ shɛ shɛ Eju, ama iwɛ tutala tu na Agwatana teri la ogwunukwoshi aba, ibɛ po aa shɛ ya atwa ubwa a na boo lubo. 29Agwatana kaa sheyinji shi ahaŋsa ubwa iwɛ apwaŋ ubwa keeni iwɛ atwa na baa suyanɛ o. 30Okwo ta ahiɛ hwụjɛ shɛ la unu wa Agwatana, ama Agwatana hieci inyɛmɛnyɛmɛ hiŋ hwuwayɛ, iwɛnɛ te Eju hwụjɛ shɛ unu ubwa. 31Iwɛnɛ ta atwa ata hwụjɛ shɛ unu hwuwayɛ#11:31 hwuwayɛ: Abayiburu oko zasa hwuwayɛ o. ibɛ po tuba Agwatana hieci inyɛmɛnyɛmɛ hiŋ, gobwonu du ga Agwatana hieci inyɛmɛnyɛmɛ ya aba. 32Agwatana kepeni atwa kpaaŋ uhwaŋna iwɛ maa kede a hwụjɛ-unu o, iwɛ maa tuba bu no hioko inyɛmɛnyɛmɛ ya atwa kpaaŋ du.
Ga Ụjɛrụma Nama na Agwatana Tutu Unyizo-nom
33Hioko ma gana na tu ugombo#11:33 Hioko ma…tu ugombo: Kwo kaa uduciya. ti'inta ta Agwatana keeni iyi ibwɛ tumapa iri! I zasa bụtụ eri ba jalakaka ụshɛrɛya na baa duma maa to uce o! Ihwɛŋnɛ ibwɛ kaa keshici ti'eshicigo.#Ayiz 55:8
34Utakada Iwɛ ya Agwatana hiɛŋ, Gaaba mepi ahaŋsa Agwangwamaa?
Gaaba bo sokokono bu iwɛɛ? #Ayiz 40:13
35Kwo kaa gaaba pwonuo bu iyi hiiŋ,
iwɛ maa gwuricingono buu? #Job 41:11 36Ubwa karɛ iyi elele, tedure nu ukpahiŋ ubwa kaa iyi elele namɛ, ubwa kaa 'yajɛ iyi elele kpaaŋ. Ga ụjɛrụma shɛ una ubwa tutu unyizo-nom! Ami.#1 Kor 8:6
Rubassa Bible © Bible Society of Nigeria, 2008