KORINT HIIŊ 4
4
Atumwa Krast
1Hiɛ shɛ hi ma tɛ rɛta maa tɛ shɛ miaụŋ-mu-ugondu Krast, keeni ehiu-ihwɛ iyi tusweci ya Agwatana. 2Iwɛ ecilo ata, iyi nɛ aa jala no olugwo ehiu-ihwɛ, i shɛ tɛcara. 3Ama i shɛ iyi ticwɛŋ ne eshe mi maa i shɛ ahiɛba hi zhɛ hia duma ụshɛrɛya mu, kwo kaa binya bụtụ, okwo Gamba ni ikɛnyi mi, N jɛmɛ shɛ ụshɛrɛya mu o. 4Iwɛnɛ po bimbisegeni-ba-amɛ mi m peni shi tụwụma ni iyi elele o; ama shɛ inɛ ɛtɛ tuba n njɛ maa ma sha bụtụ bi tiririri o. Ama Agwangwama ubwa shɛ bɛjɛmɛ-bụ-ụshɛrɛya mu. 5Iwɛbɛ po ta duma ma ụshɛrɛya iyi elele nazhɛ aka ata ci o, ibɛ shɛ uuwa i ci aka na Agwangwama zhe gwure. Ubwa zhɛ be suje iyi tusweci nɛ namɛ ne tishi bo tulono iŋ nu uhioko-uhwaŋna, bɛɛ zhɛ kaa bo mbisono shihaŋsa shɛ na atwa a haŋsa na shɛmɛ sha aba caakwụ; nazhɛ Agwatana zhɛ a dumanga bụtụ bụtụ.
6Amiaụŋ-mo-bino mi na amɛ Krast, N jishirijɛ ya ijɛ no ofwo mi keeni Apụlụs gana ufwoto iwe hiŋ, iwɛ maa hi seshi no olugwo tu, maa kede hi heŋshi te keshici iyi nɛ ee 'nyeci o, iwɛ maa du hi genji tumama sata tu na ohio gombicingo bimbisegeni bu ko maa sukakana bimbisegeni binya. 7Gaaba kwuŋ ubu njɛ maa nama swooŋ na atwa vwɛɛ? Imbe kwuŋ abu 'yajɛ i shɛ shɛ tụpana ee bi penii? Ama yaa shɛ tụpana ee bi peni, asha imbe po aba busa ya gana maa shɛ tụpana ee bi penii?
8Hi shigwogwo cebe! Hi shɛwa azhɛgba cebe! Hi yɛwa tugwama na aba tu! Iiŋ, i n kwụlanɛ maa hiɛ yɛ tugwama gom, iwɛ maa ta yaa du tugwama ne hiŋ! 9N heŋshi maa Agwatana utu suji atuba na tɛ shɛ atumwa bee tileni umɛwɛɛ gana atwa na ee peni tụwụma to tu'wo. Iwɛnɛ po a tɛ njɛ iyi igbɛtɛtɛ ne eshe unyizo, te eshe atumwa-azuba keeni eshe atwa. 10Tɛ shɛ shɛlagwụ iwɛ Krast, ama hiɛ incɛ tuba na amɛ Krast, tu lwegeji, ama hi 'yajɛ tuba ikɛnyi, a tu ngbaracɛ cwɛŋ, ahiɛ 'yajɛ tuba ụjɛrụma. 11Imunɛ keeni i'uyɛ ma tu kwụna uuwa i ci aka ga, tu namɛ mohondo, aa ma tu tagana okwu, tu zasa kaa okwo ofwo tuzwono kpororo. 12Ta nda ụbaụta nu ugondu na ata nda ni i'ɛlɛ tu. Aka na atwa ma tu twaga, ta pana aŋ ajɛshɛgwa ebiye; aka na atwa ma ti shɛka, ta ima-isɛbwɛ; #Ugo 18:3 13aka na atwa mo tu gbozhigo, ta dumanga aŋ. A tɛ njɛ gana aswala unyizo, aa ta tu nda gana ata taa hwayɛ, tɛ shɛ gana tiri tu na aa wafwajɛ ni iyi elele tutu taa hwayɛ.
14Ama shɛ iwɛ maa Ma hi pana ezuye Ngaa 'nyacɛ ijɛ o, ama iwɛ maa ma hi tɛtagana-unu iwɛnɛ ta ahiɛ shɛ miaụŋ mi mi mu na Omo lubo. 15Iwɛ ecilo ata, okwo ahiɛ 'yajɛ embisegeni i ci igbɛɛ ifwugwo na amɛ Krast, bishi bu ko kiri ahiɛ 'yajɛ. Gamba n hi meci na amɛ Krast Jisus tedure na Anabarɛ Ebiye. 16Iwɛbɛ po Ama hi tabwa maa hi na ma shata.#1 Kor 11:1; Fili 3:17 17Iwɛ ecilo ata Ngaa tumwanɛ Timoti na shɛ yɛu mi tulubo keeni yɛu mi tɛcara na amɛ Agwangwama pi hiŋ. Ubwa zhɛ me hi teyingeni uhwaŋna na Omo mbisogono atwa iyi na amɛ Krast, no ofwo elele na tụ'ụlwatagwụ-tụ-ụhiɛŋshɛ-Agwangwama hwɛɛ. 18Ama atwa hiŋ oko mama sata, aa busa gana maa N zha shɛ ma zhajɛ ya pi hiŋ o. 19Ama yaa shɛ Agwangwama leni, Gamba ta me ci kakayɛ, shɛ nu n-ndumwa Ngɛɛ zhɛ ma mapa atwa na mama sata na tubusa o, semi nu ukpahiŋ. 20Iwɛnɛ po Cɛnjɛ-ta-tugwama ta Agwatana tɛ shɛ shɛ nu n-ndumwa mohondo, ama semi nu ukpahiŋ. 21Inɛ nɛɛ ahia jalaa? Maa ma zhajɛ suu pi hiŋ nu udugwu, kwo kaa no tulubo keeni ahaŋsa tusuu?
Rubassa Bible © Bible Society of Nigeria, 2008