Паччагьлугъар-2 14
14
Юавди Авессалом Ерусалимдиз кьяляхъ гъювал гьязур апӀуру
1Юавдиз, Церуяйин бализ, паччагьдин юкӀв Авессаломдихъ либцурайиб аьгъяйи. 2Ва Юавди Текоайиз душвʼан аьяндар дишагьли хъади гъюз гьау. Дугъу думу дишагьлийиз гъапнийи:
– Уву ишурайирси улуп. Яснан палат алабхь ва увкан ицци ниъ хъайи ччимар макадатан. Уву гъакӀирихъ ишлар апӀури гизаф йигъар гьау дишагьлийиси гъайих. 3Паччагьдин багахьна гъарах ва дугъаз гьаму гафар йип. Ва Юавди дугъаз, фу гафар дупну ккундуш, улупнийи.
4Текоайиан вуйи дишагьли, паччагьдихьна учӀвиган, маш асина ккадаркну ва икрам дапӀну, дугъаз гъапнийи:
– Кюмек апӀин узуз, я паччагь!
5Паччагьди дугъхьан гьерхнийи:
– Фу дерди вуяв?
Дугъу гъапнийи:
– Гьяйиф, узу ачӀни хпир вуза, йиз жилир кечмиш гъахьну. 6Яв гъаравашдин кьюр бай айи. Дурар чпи жара апӀуз фужкӀа алдру хутӀлиин элегнийи. Дурарикан санури тмунуриз гъивнийи ва думу йивну гъакӀнийи. 7Ва магьа яв гъаравашдиз къаршуди вари тухум удубчӀвна; дурари кӀура: «Чан чвуччвуз гъивур учухьна ча, учу думу чав йивну гъакӀи чан чвуччвун уьмрихъанди аьжалихьна тувдича, гьятта гьаци учу айи-адру сар ирсчира тӀанкь апӀурушра». Дурари узуз гъубзнайи аьхиримжи цӀюмгъял ктӀубшвиди ва йиз жилириз жилиин я ччвур, я ирсчи гъитидар.
8Паччагьди дишагьлийиз гъапнийи:
– Гъарах яв хулаз; узу яв гьякьнаан табшуругъ тувдиза.
9Амма Текоайиан вуйи дишагьлийи гъапнийи:
– Йиз агъа вуйи паччагь, гъит тахсир узʼин ва йиз хизандиин алабхъри, хъа паччагь ва дугъан тахт тахсир ктрудар ишри.
10Паччагьди жаваб тувнийи:
– Эгер увуз шликӀа фукӀа гъапиш, думу узухьна хъади гъач, ва сарун дугъу увук кучидар.
11Дугъу гъапнийи:
– Дици вуш, гьамусдихъантина кьисасчийи ифдихъан йивну йикӀуз ихтияр тутрувбан ва йиз бай талаф дархьбан бадали, паччагьди РАББИЙИИНДИ, чан Заануриинди, ху апӀри.
– РАББИЙИИНДИ ху апӀурза, – гъапнийи паччагьди, – яв балин кӀуллан жилʼинади саб чӀаркьан алдабхъидар.
12Думуган дишагьлийи гъапнийи:
– Йиз агъа вуйи йиз паччагьдиз гаф пуз яв гъаравашдиз ихтияр тув.
– Йип, – жаваб тувнийи дугъу.
13Дишагьлийи гъапну:
– Гьаз уву Заанурин халкьдиз къаршуди дициб кьаст дапӀнавахъа? Дици кӀури, паччагьди чав чак тахсир кипрадаринхъа? Чан утӀурккнайи бай паччагьди кьяляхъ гъапӀундар аьхир. 14Ухьу вари кечмиш шлудар вухьа; ухьу жилиинди удубзу штуз ухшар вухьа, думу уч апӀуз шулдар. Амма Заанури уьмур тадабгъурдар; аьксина, Дугъу Чав ярхла гъапӀур гьаргандиз чахьан ярхла гъапӀурди гъудрузбакан фикир апӀуру. 15Ва магьа узу думу пуз йиз агъа вуйи паччагьдихьна гъафунза, гьаз гъапиш халкьди узуз гучӀ ккапӀну. Яв гъаравашди фикир гъапӀну: «Паччагьдихъди гафар-чӀалар апӀидиза, мумкин ву, дугъу чакан чан гъаравашдиз ккундайиб апӀур. 16Мумкин ву, паччагьди чан гъараваш узура, йиз байра Заанури учуз тувнайи ирснахъан хътатӀуз чалашмиш шулайирин хликкан азад апӀуз разивал тувур». 17Ва магьа яв гъаравашди кӀура: «Гъит йиз агъа вуйи паччагьдин гафну узуз сикинвал хури, гьаз гъапиш йиз агъа вуйи паччагь ужʼвална писвал аьгъю шлу Заанурин малайиксир ву. Гъит РАББИ, яв Заанур, увухъди ишри!»
18Паччагьди дишагьлийиз гъапнийи:
– Узу увхьан гьерхруб узхьан жин мапӀан.
– Гъит йиз агъа вуйи паччагьди йипри, – гъапнийи дишагьлийи.
19Паччагьди гьерхнийи:
– Увухъди гьамдигъ варибдигъ гъяйир Юав даринхъа?
Дишагьлийи жаваб тувнийи:
– Яв уьмриинди ху апӀурза, йиз агъа вуйи паччагь, уву кӀуруб вари гьякь ву. Ав, яв гъараваш Юавди мици апӀуз улупунзуз ва гьаму гафар пуз яв гъараваш хъаъну. 20Яв гъараваш Юавди му ляхин гьамусяаьтнан аьгьвалат дигиш апӀбан бадали гъапӀну. Йиз агъайин аьяндарвал Заанурин Малайикдин аьяндарвалсиб ву – дугъаз жилиин арайиз гъюрайиб вари аьгъя.
21Паччагьди Юавдиз гъапнийи:
– Ужуйи, узу думу ляхин апӀидиза. Гъарах, живан Авессалом кьяляхъ апӀин.
22Юав жилиина ккадарку, икрам ва паччагьдиз ужʼвал ккун дапӀну, дугъу гъапнийи:
– Гъи яв гъаравашдиз паччагь чахъанди вуйивал аьгъю гъабхьну, йиз агъа вуйи паччагь, гьаз гъапиш паччагьди чан гъаравашдин хаиш тамам гъапӀну.
23Юав Гешуриз гъушнийи, ва дугъу Авессалом Ерусалимдиз кьяляхъ гъапӀнийи.
24Амма паччагьди гъапнийи:
– Гъит думу чан хулаз гъарахри; дугъаз йиз маш рябкъюз гъитуб лазим дар.
Авессалом, паччагьдин маш дярябкъди, чан хулаз гъушнийи.
Авессалом Давуддихъди албагуб
25Вари Израилиъ Авессаломси уткан, дугъʼинси гьяйран шлу жилижви адайи. КӀулин кӀукӀшилан швякьярихъна дугъак саб жюрейинра нукьсан ктайи. 26КӀулин чӀарар алдау гьарсаб ражну (дугъу чӀарар йискьубак саб ражну, чаз дурар лапра гъагъи гъахьиган, алдауйи), дугъу дурар ерцуйи, ва дурариан кьюдварж шекел#14:26 Кьюдварж шекел: тахминан 2,3 килограмм. гъагъ гъюйи.
27Авессаломдихъ шубур бай ва сар риш гъахьнийи. Шураз Тамарю кӀуйи, думу гюзел риш вуйи.
28Авессалом Ерусалимдиъ кьюд йисан, паччагьдин маш дярябкъри, яшамиш гъахьнийи.
29Ва магьа, паччагьдихьна думу гьаъбан бадали, Авессаломди Юавдиз дих апӀуз адмийир гьаънийи, амма Юавди дугъахьна гъюз «ваъ» гъапнийи. Думуган дугъу кьюбпи ражари адмийир гьаънийи, амма Юавди му ражнура «ваъ» гъапнийи. 30Думуган Авессаломди чан гъаравашариз гъапнийи:
– Йиз хутӀлин багахь Юавдин хутӀил рябкъюрачвуз? Дугъан душваъ мух дубзна. Гъарахай ва дидик цӀа кипай.
Ва Авессаломдин гъаравашари хутӀлик цӀа кипнийи. 31Думуган Юав гъудужвнийи ва Авессаломдин хулаз гъафнийи, ва дугъу дугъаз гъапнийи:
– Яв гъаравашари йиз хутӀлик цӀа гьаз кипну?
32Авессаломди Юавдиз гъапнийи:
– Магьа, узу увухьна гьамци пуз гьаънийза: «Паччагьдихьна, узу Гешуриан гьаз гъафнуш, гьерхуз уву гьауз гъач. Эгер узу гьамусра душваъ имийиш, узуз ужуйи хьибдийи!» Узуз паччагьдин маш рябкъюз ккундузуз, хъа эгер узук фтинкӀа тахсир каш, гъит дугъу узу аьжалин хлиз туври.
33Юав паччагьдихьна гъушнийи ва гьаму гафар дугъахьна гъурукьнийи. Паччагьди Авессаломдиз дих гъапӀнийи, ва думу гъафнийи, жилик маш кубкӀну, паччагьдиз икрам гъапӀнийи. Паччагьди кӀуруш, Авессаломдиз мак гъапӀнийи.
© Институт перевода Библии, 2010, 2013, 2016, 2018, 2023