Паччагьлугъар-2 13
13
Тамариз аьр тувувал
1Саб кьадар вахтналан Давуддин бай Амнондин Тамар кӀуру гюзел шурʼин, Давуддин бай Авессаломдин чуччʼин, юкӀв улубкьуру. 2Амнонди гьаци аьзаб зигуйики, чан дархи чи Тамар себеб вуди иццру гъахьнийи, гьаз гъапиш думу ришди имийи, ва Амнондиз дугъахъди фукӀа апӀуз даршлубси гьугъубжвуйи.
3Амнондихъ Юнадав ччвур али дуст хъайи, думу Шимайин, Давуддин чвуччвун, бай вуйи. Юнадав гизаф аьмалдар вуйи. 4Дугъу Амнондихьан гьерхнийи:
– Уву, паччагьдин бай, йигълан-йигъаз гьаз ипни шулава? Узукна пидарнахъа?
Амнонди дугъаз гъапнийи:
– Узуз Тамар, йиз чве Авессаломдин чи, ккун духьназуз.
5– Ахникк дахъ ва уву иццурайирси улуп, – гъапнийи Юнадавди. – Увʼин улуркьуз яв адаш гъафиган, дугъаз йип: «Гъит йиз чи Тамар узухьна гъюри ва узуз фукӀа ипӀруб туври. Узуз думу рякъюри ва дугъан хилариан ипӀбан бадали, гъит дугъу хураг йиз уларикк гьязур апӀри».
6Амнон, иццурайиганси учв улупури, ахникк дахънийи. Чаин улуркьуз паччагь гъафиган, Амнонди гъапнийи:
– Гъит йиз чи Тамар узухьна гъюри ва, узхьан дугъан хилариан ипӀуз хьпан бадали, дугъу йиз уларикк кьюб лаваш гьязур апӀри.
7Давудди Тамариз гьамци пуз гъалайиз гьаънийи:
– Яв чве Амнондин хулаз гъарах ва дугъаз ипӀруб гьязур апӀин.
8Тамар чан чве Амнондин думу ахникк дахънайи хулаз гъягъюру. Тамари хямир ктӀибшуру, дугъан уларикк лавшар аркӀуру ва дурар уржуру. 9Хъасин дугъу, ягълачайиъди духну, дугъан улихь лавшар дивру, амма Амнон ипӀуз рази гъахьундайи.
– Гъит вари мушвʼан удучӀври, – кӀуру Амнонди.
Ва вари удучӀву. 10Думуган Амнонди Тамариз кӀуру:
– Яв хилариан узхьан ипӀуз хьпан бадали, хураг узухьна узу дахъру хулаз, абкъин.
Тамар, чав гьязур гъапӀу лавшар гъадагъну, дурар чан чве Амнон дахъру хулаз хьади гъюру. 11Амма дугъу дурар Амнондин улихьна, дугъу дурар итӀбан бадали, гъахиган, Амнонди думу гъидису ва гъапи:
– Чи, гъач, узухъди дахъ!
12– Ваъ, чве! – гъапи Тамари дугъаз. – Узу мажбур мапӀан. Израилиъ дициб ляхин апӀуз хай шулдар! Мициб деллувал мапӀан! 13Хъа узу йиз аьйибнакан фу апӀиди? Уву Израилиъ гьясппикк ккадраърударикан сар хьидива аьхир. Миннат вуйиз увкан, паччагьдихъди гафар-чӀалар апӀин; узу увуз швушвди тувбаз думу къаршу хьидар#13:13 Къаршу хьидар: кюгьне Израилин къанурариинди чвйирин ва чйирин арайиъ нюкягь йибтӀуб гъадагъа апӀуйи..
14Амма думу Тамарихъ хъпехъундайи, учв гужлир вуди хьпаз лигну, дугъаз аьр тувнийи. 15Дидин кьяляхъ Амнондиз думу яманди даккун гъахьнийи. Мугагьназ ккунигантӀан гужалди даккун гъахьнийи дугъаз думу.
Амнонди дугъаз гъапи:
– Гъудужв ва гьамлин дургин йихь!
16– Ваъ! – гъапи Тамари дугъаз. – Узу дургин апӀувал – му узуз уву гьамусди гъапӀубтӀан артухъди аьхю писвал ву.
Амма Амнон дугъахъ хъпехъурадайи. 17Дугъу чаз гъуллугъ апӀурайи жигьилиз дих гъапӀу ва гъапи:
– Гьаму мушвʼан дургин апӀин ва дугъан кьяляхъди раккин хъябкь!
18Ва гъаравашди думу адау ва дугъан кьяляхъди раккин хъябкью. Тамариин думу вахтна паччагьдин жилирихь хьтру шубари алабхьру гизаф багьади дабалгнайи палат алийи. 19Тамари дерднаан чан кӀулʼин бишируг алабхьу ва чан девлетлу палат гъячӀябгъю. Дугъу кӀул хиларигъ гъибису, ва, яманди ишури, думу душвхьан дургин гъахьи. 20Чан чве Авессаломди дугъаз гъапнийи:
– Увухъди яв чве Амнон гъахьнийин? Хъа гьамус, чи, ккебехъ; думу яв чве ву. Дидин гьякьнаан дердер мизиган, узу лигидиза.
Ва Тамар чан чве Авессаломдин хулаъ, гъирагъдиан сарихъдира гаф-чӀал дарапӀди, яшамиш шули гъахьнийи.
21Гьамдикан варибдикан Давуд паччагьдиз гъеебхьиган, дугъак яманди хъял кубчӀвну, амма дугъу Амнондиз жаза тувундайи, гьаз гъапиш чан сарпи велед вуйи Амнон паччагьдиз гизаф ккундийи. 22Авессаломди Амнондиз саб гафра гъапундайи, я харжибра, я ужубра; дугъаз думу дяркънукьан ккундайи, гьаз гъапиш дугъу Авессаломдин чи Тамар аьйибнакк ккаънийи.
Авессаломди Амнон йивну йикӀуру
23Кьюд йислан, Ефраимдин багахь хьайи Баал-Хацориъ Авессаломдин чарвйир ултӀукъурайиган, Авессаломди дина паччагьдин вари баяриз теклиф гъапӀнийи. 24Авессаломди, паччагьдихьна дуфну, гъапнийи:
– Яв гъаравашдин чарвйир ултӀукъура. Паччагь ва дугъан гъуллугънаъ айидар узухъди гъидийкӀан?
25– Ваъ, йиз бай, – жаваб тувнийи паччагьди. – Увуз гъагъиди алалабхъбан бадали, учу вари гъидарча.
Дугъкан Авессаломди гизаф ккун апӀури гъахьнушра, дугъу гъягъбакк кӀул ккивундайи, амма дугъаз думу ляхин апӀуз чан разивал тувнийи. 26Думуган Авессаломди гъапнийи:
– Уву ваъ кӀураш, учухъди йиз чве Амнондиз гъюз ихтияр тув.
Паччагьди дугъхьан гьерхнийи:
– Дугъан увухъди душну гьаз ву?
27Амма Авессаломди дугъкан гизаф ккун гъапӀнийи, ва паччагьди дугъахъди Амнон ва имбу вари чан баяр деетнийи. Авессаломди паччагьдин дем#13:27 Дем: ипӀруб-убхъруб гьивувал. гьязур гъапӀнийи.
28Авессаломди чан адмийириз амур гъапӀнийи:
– Лигай, Амнон чяхирикан кефлу гъахьиган ва узу учвуз «Амнондиз йивай» гъапиган, думу йивну йикӀай. ГучӀ мапӀанай. Мициб амур учвуз туврайир узу учв даринхъа? Дирбаш ва кӀубан йихьай!
29Ва Авессаломдин адмийири Авессаломдин амур тамам гъапӀнийи – дурари Амнон йивну гъакӀнийи. Хъа паччагьдин вари баяр гъудужвнийи ва, чпин гъятрариин элеъну, гьергнийи. 30Дурар рякъюъ имиди, Давуддихьна хабар гъафнийи: «Авессаломди паччагьдин вари баяриз гъивну; дурарикан саркьан имдар».
31Паччагь гъудужвнийи, яснан лишан вуди, дугъу чаин али палтар гъячӀяргънийи ва жилиина ккадаркнийи, паччагьдин багахь дийигънайи вари гъаравашарира чпин палтар гъячӀяргънийи.
32Амма Юнадавди, Давуддин чве Шимайин бали, гъапнийи:
– Гъит йиз агъайи, паччагьдин вари баяр йивну гъакӀну кӀури, фикир дарапӀри, анжагъ Амнон гъакӀну. Авессаломди дициб кьаст чан чи Тамариз Амнонди аьр туву йигъланмина дапӀнайи. 33Паччагьдин вари баяр гъакӀну кӀуру хабриинди гъит йиз агъа вуйи паччагьди чан кӀвак гъалабулугъ кидрипри. Анжагъ Амнон гъакӀну. 34Авессалом гьергнийи.
Гъаравлиъ дийигънайи живан гъилигнийи, ва дугъаз тепейин ямажнакан вуйи рякъюъди ктучӀвурайи гизаф кьадар адмийир гъяркънийи. 35Юнадавди паччагьдиз гъапнийи:
– Магьа, паччагьдин баяр гъюра; вари яв гъаравашди гъапиганси якьинди гъабхьну.
36Дугъан улхуб ккудубкӀиган, паччагьдин баяр, гьарйир апӀури, ишури, учӀвнийи. Паччагь учвра, дугъан вари гъаравашарра гизаф яманди гъишнийи.
37Авессалом гьергнийи ва Гешурин паччагь Талмайихьна, Аммиуддин балихьна, гъафнийи. Хъа Давуд паччагьди йигъан-йигъан чан балихъ ишлар апӀурайи.
38Гьергну ва Гешуриз дуфну, Авессалом душваъ шубуд йисан гъузнийи. 39Хъа паччагьдин кӀваъ Авессаломдихьна хъял имдайи, гьаз гъапиш дугъу Амнондин дерд зигури имдайи.
© Институт перевода Библии, 2010, 2013, 2016, 2018, 2023