Паччагьлугъар-1 9
9
Саулиз Шамуил алахъуру
1Вениаминдин наслиан сар кас гъахьну, дугъаз Киш кӀуйи. Думу Авиэлин бай вуйи, хъа Авиэл Церорин, Церор Бехоратдин, Бехорат Афиахдин баяр вуйи. Думу касдиз аьхю гьюрмат айи. 2Хъа дугъахъ Саул кӀуру бай хъайи; жигьил ва тӀарам буй айи думу вари израилартӀан заан вуйи, дурарикан фунуртӀанра саб кӀулʼинди зина вуйи.
3Саб ражари Кишдин, Саулин адашдин, дажйир гъудургну, ва дугъу Саулиз, чан бализ, гъапнийи:
– Гъаравашарикан сар гъадагъ ва гъарах, дажйир аг.
4Думу Ефраимдин дагъларилан ва Шалиша жилилан илдицу, амма дугъаз дурар гъидихъдар; Шаалим жилилан илдицу, амма душваъра дурар адайи; Вениаминдин жилилан илдицу, амма душваъра дурариз фукӀа гъибихъдар.
5Дурар Цуфдин жилиина гъафи, ва Саули чахъди хъайи гъаравашдиз гъапи:
– Гъач кьяляхъ хътаркурхьа, дарш адашдик дажйирин ваъ, хъа ихь гьякьнаан гъалабулугъ кабхъди.
6Дугъу жаваб туву:
– Дийигъ, гьаму шагьриъ пайгъамбар а, гизаф гьюрмат айир; дугъу улигьмиди гъапиб вари кӀулиз удубчӀвуру. Гъач, шагьриъ учӀвхьа. Мумкин ву, ухьу наанди душну ккундуш, дугъу кӀур.
7Саули чан гъаравашдиз гъапи:
– Гъягъюз шул, хъа дугъахьна ухьу фу хьади гъягъиди? Ухьухь хьайи уьл ккудубкӀнихь, пайгъамбрихьна ичӀи хиларди гъягъидинхъа? Ухьухь фу хьа?
8Гъаравашди Саулиз гъапи:
– Магьа узухь арснан шекелин юкьуб пайнакан саб пай#9:8 Шекелин юкьуб пайнакан саб пай: тахминан 3 грамм. хьазухь. Думу пайгъамбриз тувдиза, хъа дугъу ухьуз, наанди душну ккундуш, пиди.
9(Улихьди израилари, Заанурикан ккун апӀуз гъягъюз гьязур шлуган, кӀуйи: «Гъачай гъюзимбуб рябкъру касдихьна гъягъюрхьа». Гьамус пайгъамбрар кӀурудариз улихьна гъюзимбуб рябкъру ксар кӀуйи.)
10Думуган Саули гъаравашдиз гъапи:
– Ужуйи, уву кӀуруганси апӀурхьа. Гъягъюрхьа.
Ва дурар пайгъамбар яшамиш шулайи шагьриз гъушу.
11Магьа дурар машнаканзина шагьриз за шулу, хъа дурариз гъапагъапди шид хуз гъягъюрайи шубар алахъуру.
– Мушваъ гъюзимбуб рябкъру кас айин? – гьерхру дурарихьан Саули ва дугъан гъаравашди.
12– Ав, думу гьамушваъ а. Дюзди гъарахай. Анжагъ гьялак йихьай! Думу гъи шагьриз гъафну, гъи ибадат апӀрушваъ халкьди Заануриз гъурбан апӀуру. 13Шагьриъ учӀвубси, учвуз думу дишлади дихъидичвуз! Тядиди, думу ибадат апӀрушваъ шлу демдиз гъягъяйиз, думу хътарди, халкь ипӀуз хъюбгъидар, гъурбан гъапӀу йикк ипӀуз дугъу РАББИЙИХЬАН ипӀуз хъюгъюз ихтияр гъадабгъну ккунду аьхир, анжагъ гьаддин кьяляхътӀан хяларихьан ипӀуз шулдар. Кьан дарапӀди гъарахай, учвуз думу дишлади дихъидичвуз.
14Саули гъаравашдихъди рякъ давам гъапӀу. Дурар шагьриъ учӀвруган, дурариз гъапагъапди гъюрайи Шамуил алахъу – думу ибадат апӀрушваз гъягъюрайи.
15Хъа Саулихъди му гюрюшдиз сад йигъ улихьна РАББИЙИ Шамуилиз улигьмиди дупнайи:
16– Закур гьаму вахтна узу увухьна Вениаминдин ругарилан вуйи адми гьаъдиза, хъа уву дугъкан Израилин, Йиз халкьдин, зиин гьюкумдар хьуз лишан вуди, зейтундин ччим кадат#9:16 Зейтундин ччим кадат: Ччим кадатбиинди инсан тялукь гъуллугъназ бахш апӀуйи. Гьациб аьдат пайгъамбар, паччагь ва Заанурин гъуллугъчи хьуз апӀуйи.. Дугъу Йиз халкь филистимарихьан уьбхиди. Узу Йиз халкьдихьинди гъилигунза: Узухьна дидин аьрзар хъуркьну.
17Шамуилиз Саул гъяркъиган, РАББИЙИ дугъаз гъапну:
– Магьа думу, Узу увуз чакан гъапир. Дугъу Йиз халкьдиин гьюкумдарвал апӀиди.
18Саул Шамуилихьна, думу урнарихъ хъайиган, багахь шулу, ва дугъу гьерхру:
– Йип узуз, гъюзимбуб рябкъру касдин хулар наанди хьа?
19Шамуили Саулиз жаваб туву:
– Узу вуза гъюзимбуб рябкъру кас. Гъачай узухъди ибадат апӀрушваз, гъи учву узухъди сатӀиди уьл ипӀидичва, хъа гвачӀнинган узу уву деетидиза. Увук гъалабулугъ кипнайибдиз варибдиз жаваб тувдиза. 20Хъа шубуд йигъ улихьна гъудургу яв дажйирикан фикир мапӀан: дурар гъидихъну. Гьамус Израилин вари девлетар шлиндар ву? Яв ва яв тухумдин!
21Саули гъапи:
– Узу Израилиъ варитӀан бицӀи тухмарикан вуйи Вениаминдин наслиан вуза аьхир, ва йиз мирас Вениаминдин тухумдиъ аьхиримжиб ву! Уву фтикан улхурава?!
22Шамуили Саул ва дугъан гъараваш сумчӀурихьна хялар уч духьнайи аьхю хулаз хъади гъафи, дурар суфрайин кӀулихъ диту, 23ва думу кьасабрихьна илтӀикӀу:
– Узу увухьна уьбхюб ккун дапӀну туву гьадму йиккун парчи аьбкъин.
24Кьасабри агъ ва чарвайин рижв гъахи ва Саулин улихь жаради диву. Шамуили гъапи:
– Гьадабгънайиб гьаму вуйи. Гъадабгъ ва ипӀин, гьаз гъапиш узу хялариз теклиф дапӀназа гъапиган, гьамциб дюшюшдиз думу увуз дюбхнайи.
Гьамци думу йигъан Саули Шамуилихъди сатӀиди уьл гъипӀу.
25Дурар ибадат апӀрушвʼан шагьриз кьяляхъ гъафи, ва Шамуили Саулихъди гъваин гафар-чӀалар гъапӀнийи.
26Ахсрар ккивган, Шамуили гъваин али Саулиз чӀигъ гъапӀу:
– Гьязур йихь, узу уву рякъюъ аурза!
Саул рякъюъ учӀвуз гьязур гъахьи, Шамуилна думу раккнарихъна удучӀву.
Шамуили Сауликан паччагьвализ ччим ктатуру
27Шагьрин гъирагъдихъ Шамуили Саулиз гъапи:
– Гъаравашдиз рякъ давам апӀуз амур апӀин, хъа уву дийигъ; узу увукна Заанурихьан вуйи гаф пидиза.
Ва гъараваш улихьди гъушу.
© Институт перевода Библии, 2010, 2013, 2016, 2018, 2023