Паччагьлугъар-1 10
10
1Хъасин Шамуили зейтундин ччим айи гъаб гъадабгъу, дугъан кӀулʼин улубзу, дугъаз мак гъапӀу ва гъапи:
– РАББИЙИ увкан Чан девлетниин – Чан халкьдиин гьюкумдар хьуз ччим ктатну! Уву РАББИЙИН халкьдин зиин гьюкумдарвал апӀидива ва думу юкьуб тереф илтӀикӀнайи душмнарихьан уьбхидива. Магьа РАББИЙИ уву Чан халкьдин гьюкумдарди ктагъбан лишан. 2Гьамус, узхьан гъушган, Вениаминдин юрднаъ, Целцахдиъ, Рахилин накьвдихъ увуз кьюр кас алахъидивуз, ва дурари увуз пиди: уву агурайи дажйир гъидихъну, яв адашдиз дажйирикан кӀваиндира имдар, хъа гьамус дугъак ичв гъалабулугъ кабхъна, ва гьерхру: «Йиз бализ фу гъабхьну?»
3Душвхьантина рякъ давам апӀидива ва Тавориъ айи мяхъюн гьарихьна гъидива. Душваъ увуз шубур кас алахъидивуз. Дурар Бет-Элиз Заануриз ибадат апӀуз гъягъюради хьиди. Сари шубуб мудур, тмунури шубуб уьл, хъа шубурпири чяхир айи илж гъахуради хьибди. 4Дурари увуз салам тувди ва кьюб уьл теклиф апӀидивуз: дурар дис.
5Хъасин уву филистимарин десте дийибгънайи Заанурин Гива кӀуру шагьриз гъягъидива. Шагьриз багахь гъахьиган, ибадат апӀрушвʼан гъюрайи пайгъамбрарин мажлис алабхъидивуз: дурари чюнграрин, дафарин, швутӀрамарин сесериккди ялхъвнар апӀиди ва, чӀигьар апӀури, пайгъамбарвалин ицлиъ учӀвди. 6Ва РАББИЙИН Рюгь увʼин алабхъиди – увура пайгъамбарвалин ицлиъ учӀвуз хъюгъдива ва асуллагь жара инсан хьидива. 7Гьаму улупбан лишнар тамам хьпан кьяляхъ яв кьувватнаъ айиб вари апӀин: увухъди Заанур хьиди. 8Уву Гилгализ гъягъидива ва душваъ узутӀан ухди хьидива, хъасин, вариубгбан ва демдин гъурбнар#10:8 Демдин гъурбнар: Му жюре гъурбнар Заанурихъди дюз аьлакьйир уьрхюз ва Дугъахъди албагбан ва цӀийикӀултӀан аьлакьйир хьпан шадлугъар ипӀбар-ухбариинди къайд апӀуз апӀури гъахьну. Убккбахъан гьяйванатдин тялукь пай гъурбан апӀрушвʼин убгуйи; хъа имбу пай гъурбан гъапӀу касди, дугъан хизанди ва Заанурин гъуллугъчийи ипӀури гъахьну. апӀбан бадали, узу увук ктикьидиза. Ургуд йигъан узуз ккилиг. Узу гъафиган, уву душвхъантина фу дапӀну ккундуш, гъаврикк ккаъдизаву.
9Шамуилихьан гъягъюз Саул илтӀикӀубси, Заанури Саулин юкӀв жараси гъапӀу. Вари улупбан лишнар чан гьадму йигъан тамам гъахьи. 10Гива шагьриз багахь гъахьиган, Саулиз пайгъамбрарин мажлис алабхъу, ва Заанурин Рюгь дугъʼин алабхъу, ва дугъу пайгъамбрарихъди сатӀиди кярякъру гафар пуз хъюгъю. 11Думу аьгъю инсанариз, пайгъамбрарихъди сатӀиди думу пайгъамбарвалин ицлиъ фици учӀвнаш, гъябкънийи, ва дурари сари сарихьан гьерхрайи:
– Кишдин бализ фу дубхьна? Саулра пайгъамбар духьнайкӀан?
12Хъа гьадму йишваъ яшамиш шулайи адмийирикан сари дурарихъди рази дарувал улупу:
– Хъа имбударин абйир фужар ву?
Гьаци арайиз гъафну «Саулра пайгъамбраригъ гъяйин?» кӀуру мисал.
13Хъа Саул, пайгъамбарвал апӀувал дебккну, ибадат апӀрушваъ учӀву.
14Саулин эмди дугъхьан ва гъаравашдихьан гьерху:
– Учву наана гъушнийчва?
Дугъу жаваб туву:
– Дажйир агурайча, дидрихъган, Шамуилихьна гъушнийча.
15Эмди гьерху:
– Фу гъапнийкӀан учвуз Шамуили? Кидибт!
16Саули жаваб туву:
– Дугъу учуз, дажйир гъидихъну, гъапнийи.
Хъа Шамуили чаз паччагьваликан пувал дугъу гъапундайи.
Саул паччагьди мялум апӀуру
17Шамуили халкьдиз РАББИЙИХЬНА Мицпайиз дих гъапӀнийи 18ва израилариз гъапнийи:
– Гьамци кӀура РАББИЙИ, Израилин Заанури: «Египетдиан израилар Узу адаунза; египетлуйирихьан ва учвуз истисмар апӀури гъахьи жара паччагьлугъарихьан Узу гъюрхюнза учву». 19Хъа гьамус учву бедбахтваларихьан ва кӀваин алдру балйирихьан уьрхру ичв Заанур ярхла гъапӀунчва ва гъапунчва: «Ваъ, учʼин паччагь деркк». Гьан, РАББИЙИН улихь тухмариинди ва мирасариинди жергйириъди дийигъай.
20Шамуили Израилин вари наслариз чахьна гъюз амур гъапӀу, ва улупуб Вениаминдин насил гъабхьнийи. 21Дугъу Вениаминдин наслиз мирасариинди нубатнахъди чахьна гъюз амур гъапӀу, ва улупуб Матри мирас гъабхьнийи, хъа думу мирасдиъ Саулин, Кишдин балин, ччвур гъапнийи. Ва думу агуз хъюгънийи, амма агуз шуладайи. 22Думуган РАББИЙИХЬАН хъана гьерху:
– Мина хъана фужкӀа дуфну ккундийин?
РАББИЙИ жаваб туву:
– Гьатмагьа думу, аьрабайиъ жин духьна.
23Дугъахьна гъажаргънийи ва Саул халкьдихьна гъахнийи. ЖарадартӀан думу саб кӀулʼинди заан вуйиб варидиз гъябкънийи. 24Думуган Шамуили гъапи:
– Рякъюрачвуз, учвуз РАББИЙИ фуж ктагънуш? Дугъаз барабар вуйир халкьдин арайиъ адар.
Ва халкьди гьарай гъапӀу:
– Яшамиш ишри паччагь!
25Шамуили халкь, паччагьди фици гьюкумдарвал дапӀну ккундуш, гъаврикк ккау, думу китабдик гъибикӀу ва РАББИЙИН улихь диву, хъасин халкьдиз хулариз алдагъуз амур гъапӀу.
26Саулра Гивайиз чан хулаз гъушу, ва дугъахъди – чпин юкӀварик Заанур куркӀу варитӀан кӀубан эскрарра.
27– Гьамгъу ухьу уьрхидин? – кӀуру мердимазарарра гъахьнийи. Чпиз Саул рякънукьан даккнивал улупури, дурари дугъаз пешкешар хурдайи, хъа дугъу думу ляхин чаз дярябкъруб гьисаб апӀуйи.
© Институт перевода Библии, 2010, 2013, 2016, 2018, 2023