Паччагьлугъар-1 29
29
Филистимари Давуддин кюмек кьабул апӀурдар
1Израилар Изреелиъ булагъдихъ дийигънайи, хъа филистимар, чпин вари кьушмар Афекдихъна уч дапӀну, 2душвхьан тина гъушнийи. Филистимдин гьарсар гьюкумдар варж ва агъзур эскер айи дестйириз жара дапӀнайи чан кьушмихъди гъягъюрайи. Ахишдин кьушмиъ аьхиримжидарди Давуд ва дугъан адмийир гъягъюрайи. 3Филистимдин кьушмарин аьхюдари гьерхуйи:
– Гьаму жугьдари мушваъ гьапӀра?
Ахишди дурариз жаваб тувуйи:
– Му израил паччагь Саулин везир, Давуд ву аьхир. Дугъу тягьна кадарди узуз гъуллугъ апӀури сад йис дар, узухьна гьергну гъафихъанмина гьамусдиз гъуллугъ апӀура.
4Ахишдин жавабну дурарик гъизгъин хъял капӀу.
– Кьяляхъ гьаъ думу, – кӀуйи дурари, – уву наанди тяйин гъапӀнуш, гъит гьадина кьяляхъ гъарахри. Думу ухьухъди дявдиз дуфну ккундар: женгнаъ дугъу ухьуз хаинвал апӀиди. Муганайиздин жанабийин ихтибарвал дугъу фици гъазанмиш апӀиди? ВаритӀан ужуб мумкинвал – ихь адмийирин уьмрариинди. 5Думу ялхъван апӀругандин мяълийиъ чакан «Саули агъзрар ккагъну, хъа Давудди – йицӀуд агъзрар!» кӀурайи гьадму Давуд ву аьхир.
6Ахишди Давуддиз дих гъапӀу ва дугъаз гъапи:
– РАББИЙИИНДИ ху апӀурза, уву намуслу адми вува, ва узу увуз, эскризси, кьимат тувурза. Узухьна гъафихъанмина гьамусдиз уву тягьна кайир дарва. Амма гьюкумдрар увуз къаршуди дийигъна. 7Гьаци вуйиган, филистим гьюкумдрарик хъял кадрапӀбан бадали, ислягьвалиинди кьяляхъ гъарах.
8– Фтин узкан тахсир ктубчӀвну? – жаваб тувуйи Давудди. – Яв лукӀ увуз гъуллугъ апӀуз хъюгъхъанмина гьамусдизкьан тягьна кадрур дайин? Узхьан йиз жанабийин, паччагьдин душмнарихъди сатӀиди дявдиз гъягъюз гьаз шулдар?
9Ахишди дугъаз гъапи:
– Узуз аьгъязуз, йиз улихь, Заанурин малайикдикси, увук тягьна кадарвук, амма филистимарин кьушмарин аьхюдари гъапну: «Думу учухъди сатӀиди дявдиз душну ккундар». 10Гьаддиз закур гвачӀнинган, акв алабхьубси, яв жанабийин увухъди сатӀиди гъафи лукӀарихъди гъарах.
11ГвачӀнин ухди Давуд ва дугъан адмийир филистимарин уьлкейиз кьяляхъ рякъюъ учӀву, хъа филистимар Изреелин терефназди диш гъахьи.
© Институт перевода Библии, 2010, 2013, 2016, 2018, 2023