Паччагьлугъар-1 28
28
1Думу вахтна филистимари, Израилихъди дявдиз гьязур шули, кьушум уч апӀуради гъабхьну, ва Ахишди Давуддиз гъапну:
– Гьисабназ гъадабгъ, уву узухъди дявдиз гъидива, увура, яв адмийирра.
2Давудди жаваб туву:
– Яв лукӀрахьан фу шулуш, думуган рябкъидивуз!
– Дици вуш, уву гьарган узу уьрхрурди дерккраза, – гъапи Давуддиз Ахишди.
Саули Шамуилин гъарантуйихъди гафар апӀувал
3Шамуил дукӀнайи. Вари израилар дугъахъ гъишнийи, думу чан багъри шагьриъ, Рамайиъ, накьвдик кивнийи. Хъа гъакӀидарихъди гафар апӀрудар ва сюгьюрчйир чан паччагьлугъдиан Саули утӀурккнайи.
4Филистимари кьушум уч гъапӀу, дурар Шунемдиз гъафнийи ва душваъ бина йивну дийигънийи. Саули вари израилар уч гъапӀнийи, ва думу Гилбоа дагъдиин дийигънийи. 5Филистимарин бина дябкъну, Саулик къурху кабхъу. 6Дугъу РАББИЙИХЬАН гьерхуз хъюгъю, амма РАББИЙИ я нивкӀʼан рябкъювалиинди, я тупут ипбиинди, я пайгъамбрарикди дугъаз жаваб туврадайи. 7Думуган Саули гъаравашариз амур гъапӀу:
– Гъийихдарин рюгьяр гъюз гъитру сюгьюрчи дишагьли агай узуз. Узуз дугъахьна гъягъюз ва дугъкан ккун апӀуз ккундузуз.
Ва гъаравашари гъапи:
– Гьацир сюгьюрчи-дишагьли Эн-Дордиъ а.
8Учв аьгъю дархьуз, Саули жарарин палат алабхьу, ва, чахъди кьюр касра хъади, думу рякъюъ учӀву. Йишвну дурар думу дишагьлийихьна гъафи, ва Саули гъапи:
– Узуз рюгьназ дих апӀин. Увуз узу гъапир гъюз мажбур апӀин.
9Дишагьлийи дугъаз жаваб туву:
– Саули фу гъапӀнуш, увуз аьгъявузки: дугъу ихь уьлкейиъ гъийихдарихьан гьерхувал ва сюгьюрчйир терг гъапӀну. Узу тӀянкьюйиъ аърава? Узу талаф апӀуз ккундавуз?
10Ва Саули РАББИЙИИНДИ ху гъапӀу:
– РАББИЙИИНДИ ху апӀурза, – гъапи дугъу, – дидин жаваб тувуб алабхъидарвуз!
11Дишагьлийи гьерху:
– Узу увухьна шлиз дих апӀуза?
– Шамуилиз дих апӀин узухьна, – гъапи дугъу.
12Шамуил дяркъну, дишагьлийи, Саулихьна илтӀикӀури, чӀигъар гъапӀу:
– Уву узуз гьаз кучӀлар гъапӀунва? Уву Саул вува аьхир!
13– ГучӀ мапӀан, – гъапи паччагьди дугъаз, – увуз фу рябкъюравуз?
– Жиликкан за шулайи рюгь рябкъюразуз, – гъапи дугъу Саулиз.
14– Думу фициб ву? – гьерху Саули.
Дишагьлийи жаваб туву:
– Чухайигъян гъидиржнайи кьабир за шула.
Думу Шамуил вуйибдин гъавриъ духьну, Саул маш исизди жилиин дахъу, ва дугъу икрам гъапӀу.
15Шамуили Саулик гафар кау:
– Уву гьаз узу инжик ва узу гъюз мажбур гъапӀунва?
– Йиз ляхнар харабди вуйиз, – гъапи Саули, – филистимар узʼин алархьну, хъа Заанур узхьан гьидицну: я пайгъамбрарикди, я нивкӀарикди узуз жаваб туврадар. Ва узу увуз дих гъапӀунза – насигьят тув, узу гьапӀза?
16– Уву узхьан гьаз гьерхрава, – наразивал улупу Шамуили, – эгер учв РАББИ увхьан гьидицнуш ва увуз душман гъахьнуш? 17РАББИЙИ, узлантина фтин гаф тувнуш, гьадму гъапӀну. Дугъу увхьан паччагьлугъ тадабгъну ва жара адмийихьна, Давуддихьна, тувну. 18Уву РАББИЙИ кӀуруб гъапӀундарва: Дугъан хъял Амалекдиина гъюз гъибтундарва, гьаддиз РАББИ гъи увухъди гьаци а. 19Дугъу филистимарин хилариз неинки уву сар, хъа гьацира вари Израил тувди. Закур уву яв баярихъди, узу наан аш, гьадушваъ хьидива. Хъа израилин кьушум РАББИЙИ филистимарин хилариз тувди.
20Думуган Саул хабарсузди ккадарку ва жилиин ярхи гъахьи: дугъаз Шамуилин гафари гучӀ ккапӀу; дидланна савайи, думу кьувватнаан адахънийи, гьаз гъапиш сад йигъанна сад йишван дугъу фукӀа гъипӀундайи. 21Дишагьли Саулиз багахь гъахьи, ва дугъаз Саулиз гизаф гучӀ дубхьнайиб гъябкъю.
– Рябкъюравуз, яв лукӀ увухъ хъпехъну, – гъапи дугъу, – кӀулʼина гъюз мумкин вуйи хатӀалувализ дилигди, яв хаиш тамам апӀуз разивал тувну. 22Гьамус увура яв лукӀрахъ хъебехъ: гъач узу увуз саб кьацӀ уьлкьана хуза, рякъюъ учӀвайиз, фун абцӀ.
23Сифте дугъу «ваъ» гъапнийи:
– Узу ипӀидарза.
Амма хъасин дугъан гъаравашар дишагьлийихъди сатӀиди дугъу разивал тувуз гъитуз чалишмиш гъахьи, ва дугъу разивал туву, думу жилилан гъудужву ва чарпасдиин деу. 24Дишагьлийин дюбхнайи кӀари айи, дугъу дишлади думу гъубкку; хю гъабхи, хамир ктӀибшу, дун кадру уьлер гъуржу 25ва гьадрар вари Саулин ва дугъан адмийирин улихь диву. Дурари гъипӀу ва гьадму йишван гъушу.
© Институт перевода Библии, 2010, 2013, 2016, 2018, 2023