Паччагьлугъар-1 18
18
1Давудди Саулихъди гафар апӀбан кьяляхъ, Давуддик Юнатандин юкӀв кабсу, дугъаз думу, чаз учвси, ккун гъахьи. 2Думу йигъан Саули Давуд, дугъаз адашдихьна хулаз кьяляхъ хътаркуз ихтияр тутрувди, чан багахь гъиту. 3Хъа Юнатанди Давуддихъди йикьрар гъийитӀу, гьаз гъапиш Юнатандиз думу, чаз учвси, ккун гъахьнийи. 4Чан чуха хъидибтну, Юнатанди думу, чан дявдин палатдихъди, турихъди, деркку-чӀимрихъди ва парчайин чӀулихъди сатӀиди, Давуддиз тувнийи.
5Саули Давуд наана гьаишра, Давудди хъуркьувал гъазанмиш апӀуйи, ва Саули думу кьушмин кӀулиъ айидарикан сар вуди деркку. Вари халкьди ва Саулиз багахь везирарира думу ляхин кьабул гъапӀнийи.
Давуддиин Саулин бахилвал
6Давуд филистимдиин гъалиб гъахьиган ва кьушмар хулаз кьяляхъ хътаркруган, Израилин вари шагьрариан дишагьлийир, аьхю шадвал улупури, Саул паччагьдин улихьна дафарин ва мукьмар йивру жара алатарин сесериккди мяълийир ва ялхъвнар апӀури, удучӀву. 7Ва ялхъвнар апӀури дишагьлийири шадди чӀигъар апӀуйи:
– Саули агъзрар ккагъну,
Давудди – йицӀуд агъзрар!
8Саулиз хайлин хъял гъафнийи: гьаму гафар дугъаз кьабул гъахьундайи. Дугъу гъапи:
– Давуддихъ йицӀуд агъзрар хъитӀра, хъа узухъ – анжагъ агъзрар. Дугъкан паччагь апӀубтӀан гъубзрадар.
9Ва гьадму йигъхъантина Саул Давуддихьна кьяниди лигури гъахьну.
10Хъайигъан Саулиин Заанурин амриинди пис жин алабхъу, ва думу, чан хулаъ ади, чав фу апӀурушра аьгъю даршлу гьялнаъ ахъу. Давудди, аьдат вуйиганси, мукьмар йивури думу сикин апӀурайи. Саулин хлиъ жида айи, 11ва Саули, Давуд цалик карсуз ккунди, жида гатӀабхьу. Хъа Давуддихьан кьюб ражари жидайиккан ккутӀурчӀвуз гъахьи.
12Саулиз Давуддихьан гучӀ хьуз хъюбгъю, гьаз гъапиш РАББИ Давуддихъди хъайи, хъа Саулихьан гъушнийи. 13Саули, агъзур эскриин аьхювал табшурмиш дапӀну, Давуд чахьан ярхла гъапӀу. Давудди чан эскрар дявдиз хъади гъягъюйи. 14Дугъу фу апӀурушра, дугъан хъуркьувал шуйи, гьаз гъапиш РАББИ дугъахъди хъайи. 15Давуддин хъуркьувалар рякъюри, Саул дугъан улихь гучӀʼвалиъ шуйи, 16хъа израилариз ва ягьудариз Давуд ккундийи, гьаз гъапиш думу дурарин кьушмин аьхюдарикан сар вуйи.
Давудди Саулин риш хпирди гъадагъуру
17Думуган Саули Давуддиз гъапи:
– Магьа йиз аьхюну риш Мерав, узу увуз думу хпирди тувурза, анжагъ узуз кӀубанди гъуллугъ апӀин ва РАББИЙИН дявйир гъайих.
Хъа чав гьамци фикир апӀури гъахьну:
– Гъит думу йиз хиллан ваъ, хъа филистимарин хиларилан гъарахри, гьаци ужуйи ву.
18Давудди Саулиз жаваб туву:
– Узу паччагьдин язна хьуз, узу фуж ву, ва Израилиъ йиз адашдин тухум гьадмукьан адлуб вуйинхъа?
19Хъа Мерав, Саулин риш, швуваз тувру вахт улубкьиган, Мехолайиан вуйи Адриэлиз хпирди тувнийи.
20Хъа Давуд Михализ, Саулин шураз, ккун гъахьнийи. Дидкан Саулиз мялум гъапӀнийи, ва паччагь рази гъахьнийи. 21Саули гьамци фикир апӀуйи:
– Йиз думу риш дугъаз тувдиза, ва думу ляхин дугъаз тӀапӀар хьибди. Гьамус думу филистимарин хиларилан гъягъиди.
Ва Саули Давуддиз хъана гъапи:
– Гъи уву йиз язна хьидива.
22Хъа чан везирариз амур гъапӀу:
– Давуддихъди жиниди гафар апӀинай. Йипай: «Паччагь увкан разиди ву, ва дугъан гъуллугънаъ айидариз варидиз уву ккунду. Паччагьдин язна йихь сарун».
23Ва гъаравашари Давуддикна думу гафар текрар гъапӀу. Дугъу дурариз наразиди гъапи:
– Ичв фикриан, узуси касибриз, адлу тухумдиан даруриз, паччагьдин риш хпирди хувал рягьят ляхин вуйин?
24Гъаравашари гьаму гафар Саулихьна гъурукьу, Давуддин жаваб гьамциб гъабхьну кӀури. 25Думуган Саули гъапи:
– Давуддикна йипай: «Паччагьдиз швушвахъ ккуни гьякъи ялгъуз сабтӀан дар – паччагьдин душмнарилан кьисас вуди, варж филистимдин ккадабтӀну хувал».
Саули гьисаб апӀурайики, мици Давуд филистимарин хилариан талаф хьиди.
26Паччагьдин везирари Давуддиз гьаму гафар ктиту, ва Давуддиз паччагьдин язна хьпан фикир кьабул гъабхьи. Тяйин дапӀнайи вахт ккудубкӀайизра, 27Давуд чан адмийир хъади гъушу, ва дугъу кьюдварж кас филистим йивну гъакӀи. Дугъу дурарин ккадатӀдар гъахну, ва дурар паччагьдиз Давуд дугъан язна хьпан бадали тамам кьадарнаъди улупу. Ва Саули дугъаз чан риш Михал хпирди туву.
28Саулиз РАББИ Давуддихъди хъайивал ва чан риш Михализ Давуд ккунивал гъябкъну, 29ва дугъаз Давуддихьан хъана артухъ гучӀ хьуз хъюбгъю, думу Давуддин уьмурлугъ душман гъахьи.
30Филистимарин дестйир алархьиган, Давуддин хъуркьувалар паччагьдин имбу кьушмарин аьхюдаринтӀан заандар шуйи, ва думу гизаф адлу гъахьнийи.
© Институт перевода Библии, 2010, 2013, 2016, 2018, 2023
Паччагьлугъар-1 18
18
1Давудди Саулихъди гафар апӀбан кьяляхъ, Давуддик Юнатандин юкӀв кабсу, дугъаз думу, чаз учвси, ккун гъахьи. 2Думу йигъан Саули Давуд, дугъаз адашдихьна хулаз кьяляхъ хътаркуз ихтияр тутрувди, чан багахь гъиту. 3Хъа Юнатанди Давуддихъди йикьрар гъийитӀу, гьаз гъапиш Юнатандиз думу, чаз учвси, ккун гъахьнийи. 4Чан чуха хъидибтну, Юнатанди думу, чан дявдин палатдихъди, турихъди, деркку-чӀимрихъди ва парчайин чӀулихъди сатӀиди, Давуддиз тувнийи.
5Саули Давуд наана гьаишра, Давудди хъуркьувал гъазанмиш апӀуйи, ва Саули думу кьушмин кӀулиъ айидарикан сар вуди деркку. Вари халкьди ва Саулиз багахь везирарира думу ляхин кьабул гъапӀнийи.
Давуддиин Саулин бахилвал
6Давуд филистимдиин гъалиб гъахьиган ва кьушмар хулаз кьяляхъ хътаркруган, Израилин вари шагьрариан дишагьлийир, аьхю шадвал улупури, Саул паччагьдин улихьна дафарин ва мукьмар йивру жара алатарин сесериккди мяълийир ва ялхъвнар апӀури, удучӀву. 7Ва ялхъвнар апӀури дишагьлийири шадди чӀигъар апӀуйи:
– Саули агъзрар ккагъну,
Давудди – йицӀуд агъзрар!
8Саулиз хайлин хъял гъафнийи: гьаму гафар дугъаз кьабул гъахьундайи. Дугъу гъапи:
– Давуддихъ йицӀуд агъзрар хъитӀра, хъа узухъ – анжагъ агъзрар. Дугъкан паччагь апӀубтӀан гъубзрадар.
9Ва гьадму йигъхъантина Саул Давуддихьна кьяниди лигури гъахьну.
10Хъайигъан Саулиин Заанурин амриинди пис жин алабхъу, ва думу, чан хулаъ ади, чав фу апӀурушра аьгъю даршлу гьялнаъ ахъу. Давудди, аьдат вуйиганси, мукьмар йивури думу сикин апӀурайи. Саулин хлиъ жида айи, 11ва Саули, Давуд цалик карсуз ккунди, жида гатӀабхьу. Хъа Давуддихьан кьюб ражари жидайиккан ккутӀурчӀвуз гъахьи.
12Саулиз Давуддихьан гучӀ хьуз хъюбгъю, гьаз гъапиш РАББИ Давуддихъди хъайи, хъа Саулихьан гъушнийи. 13Саули, агъзур эскриин аьхювал табшурмиш дапӀну, Давуд чахьан ярхла гъапӀу. Давудди чан эскрар дявдиз хъади гъягъюйи. 14Дугъу фу апӀурушра, дугъан хъуркьувал шуйи, гьаз гъапиш РАББИ дугъахъди хъайи. 15Давуддин хъуркьувалар рякъюри, Саул дугъан улихь гучӀʼвалиъ шуйи, 16хъа израилариз ва ягьудариз Давуд ккундийи, гьаз гъапиш думу дурарин кьушмин аьхюдарикан сар вуйи.
Давудди Саулин риш хпирди гъадагъуру
17Думуган Саули Давуддиз гъапи:
– Магьа йиз аьхюну риш Мерав, узу увуз думу хпирди тувурза, анжагъ узуз кӀубанди гъуллугъ апӀин ва РАББИЙИН дявйир гъайих.
Хъа чав гьамци фикир апӀури гъахьну:
– Гъит думу йиз хиллан ваъ, хъа филистимарин хиларилан гъарахри, гьаци ужуйи ву.
18Давудди Саулиз жаваб туву:
– Узу паччагьдин язна хьуз, узу фуж ву, ва Израилиъ йиз адашдин тухум гьадмукьан адлуб вуйинхъа?
19Хъа Мерав, Саулин риш, швуваз тувру вахт улубкьиган, Мехолайиан вуйи Адриэлиз хпирди тувнийи.
20Хъа Давуд Михализ, Саулин шураз, ккун гъахьнийи. Дидкан Саулиз мялум гъапӀнийи, ва паччагь рази гъахьнийи. 21Саули гьамци фикир апӀуйи:
– Йиз думу риш дугъаз тувдиза, ва думу ляхин дугъаз тӀапӀар хьибди. Гьамус думу филистимарин хиларилан гъягъиди.
Ва Саули Давуддиз хъана гъапи:
– Гъи уву йиз язна хьидива.
22Хъа чан везирариз амур гъапӀу:
– Давуддихъди жиниди гафар апӀинай. Йипай: «Паччагь увкан разиди ву, ва дугъан гъуллугънаъ айидариз варидиз уву ккунду. Паччагьдин язна йихь сарун».
23Ва гъаравашари Давуддикна думу гафар текрар гъапӀу. Дугъу дурариз наразиди гъапи:
– Ичв фикриан, узуси касибриз, адлу тухумдиан даруриз, паччагьдин риш хпирди хувал рягьят ляхин вуйин?
24Гъаравашари гьаму гафар Саулихьна гъурукьу, Давуддин жаваб гьамциб гъабхьну кӀури. 25Думуган Саули гъапи:
– Давуддикна йипай: «Паччагьдиз швушвахъ ккуни гьякъи ялгъуз сабтӀан дар – паччагьдин душмнарилан кьисас вуди, варж филистимдин ккадабтӀну хувал».
Саули гьисаб апӀурайики, мици Давуд филистимарин хилариан талаф хьиди.
26Паччагьдин везирари Давуддиз гьаму гафар ктиту, ва Давуддиз паччагьдин язна хьпан фикир кьабул гъабхьи. Тяйин дапӀнайи вахт ккудубкӀайизра, 27Давуд чан адмийир хъади гъушу, ва дугъу кьюдварж кас филистим йивну гъакӀи. Дугъу дурарин ккадатӀдар гъахну, ва дурар паччагьдиз Давуд дугъан язна хьпан бадали тамам кьадарнаъди улупу. Ва Саули дугъаз чан риш Михал хпирди туву.
28Саулиз РАББИ Давуддихъди хъайивал ва чан риш Михализ Давуд ккунивал гъябкъну, 29ва дугъаз Давуддихьан хъана артухъ гучӀ хьуз хъюбгъю, думу Давуддин уьмурлугъ душман гъахьи.
30Филистимарин дестйир алархьиган, Давуддин хъуркьувалар паччагьдин имбу кьушмарин аьхюдаринтӀан заандар шуйи, ва думу гизаф адлу гъахьнийи.
© Институт перевода Библии, 2010, 2013, 2016, 2018, 2023