Паччагьлугъар-1 14
14
Юнатандин гьунар
1Саб ражари Юнатанди, Саулин бали, чан яракь хруриз гъапну:
– Гъач филистимарин улгьан дестейихьна дерейин тмуну терефнаан ктучӀвухьа.
Хъа адашдиз дидкан гафкьан гъапундайи.
2Саули Гивайихьан ярхла дарди, Мигрондиъ нарин гьарикк бина йивнайи ва дугъахъди йирхьудварждихьна адми хъайи. 3РАББИЙИЗ суал тувбан бадали вуйи улгьани#14:3 Улгьани: Заанурин гъуллугъчйири алабхьрударикан саб. Заанурин аьхюну гъуллугъчийин улгьанийиъ кьюб гирами гъван ади гъахьну. РАББИЙИН амур аьгъю апӀбан бадали, думу гъванарихъди тупут гьипри гъахьну. Ахияйихь хьайи. Думу Ихаводдин чве Ахитувдин бай вуйи. Ахитув Шилойиъ Заанурин гъуллугъчи Илийин бай вуйи Пинехасдин бай вуйи. Юнатан гъягъюваликан халкьдиз аьгъдайи.
4Хъа Юнатанди филистимарин жергейихьна удучӀвуз кьаст дапӀнайи дерейин гьацӀкьялаъ кьюбиб терефарианра тик гъарзар а: сабдиз Боцец кӀуру, тмунубдиз – Сене. 5Саб тик гъарз кафарийизди, Михмасдихьинди илтӀибкӀна; тмунуб – кьиблайизди, Гивайихьинди.
6Гьаци, Юнатанди яракь хруриз гъапну:
– Гъач гьаму ккадрабтӀдарин улгьан дестейихьна ктучӀвурхьа. Белки, РАББИЙИ ухьуз кюмек апӀур. РАББИЙИЗ, ухьу гизаф вая цӀиб вуйивализ дилигди, ухьуз гъалибвал тувуб читин ляхин дар.
7Яракь хрури гъапи:
– Увуз ккунибси апӀин. Гъарах, узура увухъди гъидиза, увуз наана ккундуш.
8Юнатанди гъапи:
– Ухьу думу адмийирихьна гъягъидихьа ва дурариз ухьу рякъюз гъуздихьа. 9Эгер дурари гъапиш: «Дийигъай, учу учвухьна гъидича», – ухьу дийигъидихьа ва дурарихьна зиина ктучӀвидархьа. 10Хъа эгер дурари гъапиш: «Учухьна зина кудучӀвай», – ухьу зина ктучӀвидихьа, гьаз гъапиш думу РАББИЙИ дурар ихь хлиз тувнайивалин лишан хьибди.
11Дурар филистимарин улгьан дестейиз рякъру йишвахьна хъуркьиган, филистимари гъапи:
– Лигай, жугьдар чиб жин гъахьи урхъариан удучӀвура.
12Ва думу дестейиан вуйи адмийири Юнатандиз ва дугъан яракь хруриз чӀигъар гъапӀу:
– Учухьна зина кудучӀвай. Учу учвуз фу-вуш пидича.
Юнатанди яракь хруриз гъапи:
– Узухъди гъач: РАББИЙИ Израилиз дурариин гъалибвал тувна.
13Ва думу, хиларихъди ва ликарихъди хъчӀихури, зина ктучӀву, дугъан яракь хрурра – дугъахъди. Филистимар Юнатандин улихь алдакуйи, хъа яракь хрури жан илимбудар йивну йихуйи. 14Думу сабпи кчӀихбаъ Юнатанди ва дугъан яракь хрури сад жут йицари сад йигъан хътабкру хутӀлин гьацӀ йишвʼин къарихьна адми йивну гъакӀнийи.
15Филистимарин бинайиъ, вари аьтрафариъ ва кьушмиъ къурхулувал ккебгъу; улгьан дестейиъ ва алжагъбар апӀру дестйириъра къурхулувал абхъу; жил гукӀни гъабхьи, Заанури дурариина зурба пис гучӀʼвал гьапӀнийи.
16Саулин Вениаминдин Гивайиъ айи гъаравлариз вари терефаризди гьерграйи адмийирин гъварч гъябкънийи.
17Саули чан эскрариз гъапи:
– Вари кудухай ва, ихьдарикан фуж гъушнуш, аьгъю апӀинай.
Дих апӀури, вари ктуху, ва Юнатан ва дугъан яракь хрур адрувал аьгъю гъабхьи.
18Саули Ахияйиз гъапи:
– Заанурин сундух абкъин.
Ляхин гьадушваъ аки, думуган Заанурин сундух израиларихь чпихьди хьайи. 19Саули Заанурин гъуллугъчийиз дици кӀури имиди, филистимарин бинайиъ къурхулувал гужал шулайи. Думуган Саули Заанурин гъуллугъчийиз гъапи:
– Лазим дар.
20Чан адмийир уч дапӀну, Саул дяви гъябгъюрайи йишваъ архьу. Дурариз гъябкъю, бегьемди къурхулувалиъ ахъну, филистимари турарихъди сари сар уркурайи. 21Филистимарихъан вуйи ва дурарихъди дурарин бинайиз гъафи жугьдар гьамус Саулин ва Юнатандин израиларихъанди гъахьнийи. 22Ефраимдин дагълариъ жин гъахьи израилар, филистимар гьергуз мажбур апӀуб аьгъю дубхьну, дурарихъ, дурар урччвури, хъергу. 23Думу йигъан РАББИЙИ Израилиз гьаци гъалибвал тувнийи. КчӀихувал тап Бет-Авендихъна давам гъабхьнийи.
Саули Юнатан нянатнакк ккаъру
24Думу йигъан израилар бизарвалиан кьувватсуз гъахьнийи, амма Саули, «Хябяхъдиз, узу йиз душмнарилан кьисас алдабгъайиз, фукӀа гъипӀур нянатнакк ишри» дупну, адмийириин къадагъа иливу. Ва адмийири ипӀрубдик тӀубкьан кучундайи. 25Дурариз ярквраантина гъягъюб алабхънийи. Душваъ жилиин йиччв али йишв айи. 26Ярквраъ учӀвган, адмийириз, йиччв фици удубчӀвураш, гъябкънийи, амма думу гъадабгъуз ва ипӀуз кӀубанвал сарикра гъабхьундайи, гьаз гъапиш варидиз къадагъайихьан гучӀурайи. 27Хъа Юнатандиз адашди инсанариз къадагъа апӀру гафар гъеерхьундайи. Чан хлиъ айи маргъ гьачӀабккну, дугъу дидин кӀакӀ йиччвун рягъюк кубсу ва ушвнихъна гъабхи. Дугъан лигуб ачухъ гъабхьи. 28Думуган шли-вуш дугъаз гъапи:
– Яв адашди «Гъи хураг гъипӀур нянатнакк ишри» кӀуру къадагъа иливну. Гьаддиз халкь кьувватсузра дубхьна.
29Юнатанди гъапи:
– Йиз адашди уьлке терг гъапӀну. Узу сацӀиб йиччв гъипӀну кӀури, йиз лигуб фици ачухъ гъабхьнуш, лигай. 30Хъа халкьди гъи, душмандихь хюч дибихъну, ккунибкьан гъипӀнийиш, ухьу филистимар бегьемди дагъитмиш гъапӀну хьидийхьа!
31Думу йигъан дурари Михмасдихъан Айялондихъна#14:31 Михмасдихъан Айялондихъна: думу шагьрарин арайиъ 25 километр айи. филистимариз гъивнийи. Адмийир хябяхъдиз гизаф бизар гъахьнийи. 32Ккабхъубдиин алархьну, дурари марччар, йицар ва кӀарар дисуйи ва, гъидису йишвахь дурккну, ифдихьан бегьемди марцц хьайиз ккилилигди, йикк ипӀуйи. 33Дидин гьякьнаан, «Лиг, халкьди РАББИЙИН улихь гунагь апӀура: ифи кади йикк ипӀура» дупну, Саулиз хабар дебккнийи.
Дугъу гъапи:
– Учву хаинкрар вучва! Гьамусяаьт узухьна саб зурба гъван хуз амур апӀинай.
34Ва Саули гъапи:
– Адмийирилан илдицай ва гьарсариз узухьна чпин йицар ва марччар хуз амур апӀинай. Ифи кади йикк ипӀури, РАББИЙИН улихь гунагь дарапӀбан бадали, гъит дурар гьамушвахь урккри ва итӀри.
Ва думу йишвди вари адмийири чпихьди йицар хуйи ва гьадушвахь урккуйи. 35Хъа Саули РАББИЙИЗ гъурбан апӀрушв тикмиш гъапӀнийи. Дугъу тикмиш гъапӀу РАББИЙИЗ гъурбан апӀрушварикан думу сабпиб вуйи.
36Хъасин Саули гъапи:
– Гъачай йишвну филистимариин, акв алабхьайиз дурарин бина тӀараш апӀбан ва, сарра гъидритди, вари йивну йикӀбан бадали, алархьурхьа.
Дугъаз жаваб туву:
– Увуз фици ккундуш апӀин.
Амма Заанурин гъуллугъчийи гъапи:
– Сифте Заанурин мурад аьгъю апӀурхьа.
37Ва Саули Заанурихьан гьерху:
– Филистимариин алархьуза? Уву дурар израиларин хлиз тувдина?
Амма думу йигъан дугъаз жаваб тувундайи.
38Саули гъапи:
– Кьушмиз буйругъ туврайидар вари мина гъачай! Гъи фу гунагь гъапӀнуш, аьгъю апӀинай. 39Израил гъюбхю РАББИЙИИНДИ ху апӀурза, йиз бай Юнатанди гьадму гунагь гъапӀнушра, думу жаза гьадабтӀбиинди йикӀиди.
Амма сарира дугъаз жаваб тувундар.
40Думуган дугъу вари израилариз гъапи:
– Учву саб терефназди дийигъай, хъа узуна йиз бай Юнатан тмунуб терефназди дийигъидича.
Ва халкьди жаваб туву:
– Увуз фици ккундуш апӀин.
41Саули РАББИЙИЗ, Израилин Заануриз, гъапи:
– Гъит туптари тахсиркрар улупри.
Туптари Юнатанна Саул улупнийи, хъа халкьдилан тахсир алдабгънийи. 42Саули гъапи:
– Хъа гьамус узуз ва йиз бай Юнатандиз тупут ипай.
Тупти Юнатан улупнийи.
43Саули Юнатандиз гъапи:
– Уву фу гъапӀнуш, кидибт.
Ва Юнатанди дугъан улихь кӀулʼин гъадабгъу:
– Узу йиз хлиъ айи маргълин кӀакӀниинди сацӀиб йиччв гъипӀунза ва гьаддиз аьжал кьабул апӀуз гьязур вуза.
44Ва Саули гъапи:
– Уву, Юнатан, жаза гьадабтӀбиинди йикӀидива, гьаци дарш, гъит Заанурин хъял узʼин алабхъри.
45Амма халкьди Саулиз гъапи:
– Израилиз гьамкьан зурба гъалибвал гъабхи Юнатан жаза гьадабтӀбиинди йикӀидин? Ваъ! РАББИЙИИНДИ ху апӀурча, гъи дугъан кӀуллан чӀаркьан алдабхъидар, гъи гьунар улупуз дугъаз Заанури кюмек гъапӀну аьхир.
Гьаци халкьди Юнатан жазайиинди йикӀуваликкан гъюрхну.
46Саул филистимарихъди дявдиан кьяляхъ гъафи, хъа филистимар чпин хулариз гъушу.
Саулин гъалибваларикан
47Израилиин паччагьвал чахьна гъурубкьган, Саули юкьуб тереф илтӀишнайи вари душмнарихъди дявйир гъурхну: Муавдихъди, Аммундихъди, Эдумдихъди, Цувайин паччгьарихъди ва филистимарихъди. Шлихъди дугъу дяви апӀури гъахьнушра, варишвариъ думу гъалиб шули гъахьну. 48Дугъан кьувват артухъ шули гъабхьну. Дугъу амалекар дагъитмиш гъапӀну ва Израил тӀарашчивалин алжагъбарихьан гъюбхну.
Саулин хизандикан
49Саулин баяр Юнатан, Ишʼви ва Малкишуа вуйи, хъа кьюр шуран ччвурар гьамцдар вуйи: аьхюнурин – Мерав, бицӀинурин – Михал. 50Саулин хпириз Ахиноам кӀуйи, думу Ахимаацдин риш вуйи. Саулин кьушмарин аьхюр чан Нер кӀуру эмдин бай Авнер вуйи. 51(Киш, Саулин адаш, ва Нер, Авнерин адаш, кьюридра Авиэлин баяр вуйи.)
52Саули паччагьвал апӀру вари вахтна филистимарихъди дяви яваш гъабхьундар. Чаз кӀубан ва гужли адми гъидихъган, Саули думу чан кьушмиз гъадагъуйи.
© Институт перевода Библии, 2010, 2013, 2016, 2018, 2023