Паччагьлугъар-1 15
15
Саул ярхла гъапӀну
1Шамуили Саулиз гъапи:
– Узу РАББИЙИ увкан Чан халкьдиин, Израилиин, паччагьди дерккуз ччим кадатуз гьаънийи, гьаци вуйиган хъебехъ РАББИЙИН гафнахъ. 2Гьамци кӀура РАББИЙИ – Заварин Кьувватарин Аьхюри: «Израил Египетдиан удубчӀвруган, дидин рякъ гьадабтӀуз чалишмиш шули, Амалекди Израилиз фу гъапӀнуш, Узуз кӀваин гъабхьунзуз. 3Гъарах ва дурариин алархь. Дугъаз айиб вари нянайикк ккапӀ ва терг апӀин. Дугъан гьяйиф мапӀан, вари йивну йикӀ – жиларра, дишагьлийирра, бицӀидарра, никкдихъ хъайидарра; йицарра, марччарра, дажйирра, девйирра йивну йих».
4Саули кьушмиз дявдиз гъягъюз дих гъапӀу. Телаимдиъ кьушмиз гъилигиган, дугъу кьюдварж агъзур пияда эскер ва аьлава вуди Ягьудайиан йицӀуд агъзур эскер гьисаб гъапӀу. 5Амалекдин шагьрин багагьна дуфну, Саул гъяриъ ккеу. 6Кеней халкьдиз Саули гъапи:
– Дургин йихьай гьамлин, узу учву дурарихъди сатӀиди терг дарапӀбан бадали, амалекарихьан жара йихьай: израилар Египетдиан удучӀвруган, учву дурарихьна жумартди янашмиш гъахьунчва аьхир.
Ва кеней халкь амалекарихьан жара гъабхьнийи.
7Хавилайихъан Египетдин сяргьятдихъ хъайи Шурихъна йивури, Саули амалекар дагъитмиш гъапӀнийи. 8Агаг, Амалекдин паччагь, дугъу йисирвализ гъидиснийи, хъа дугъан халкь нянайикк ккаънийи ва турихъди терг гъапӀнийи. 9Амма Саули ва дугъан адмийири Агаг йивну гъакӀундайи, хъа гьацира ужударсдар марччар ва йицар, варитӀан чагъи кӀарар, ччилар ва кьимат хъайиб вари жараб дурариз гьяйиф гъахьнийи, анжагъ хайир кадруб ва лазим даруб терг гъапӀнийи.
10Думуган Шамуилихьна РАББИЙИН гаф гъафну:
11– Сауликан паччагь апӀбиин швумал гъахьунза. Дугъу Узхьан маш гьибицну ва Йиз табшуругъар тамам гъапӀундар.
Шамуилик яман хъял кубчӀву. Ярхи йишвди думу РАББИЙИЗ ккарагу, 12хъа гвачӀнин ухди Саулихъди гюрюш абгуз гъушу. Шамуилиз Саул Кармилиз гъягъюваликан ва дугъу душваъ чаз ядигар дивуваликан, хъасин Гилгализ кьяляхъ хътаркуваликан хабар дебккнийи. 13Хъа Шамуил Саулихьна гъафиган, Саули дугъаз гъапи:
– РАББИЙИ ужувлакк ккаъриву. Узу РАББИЙИН табшуругъ тамам гъапӀунза.
14Амма Шамуили гьерху:
– Дици вуш, узуз марччарин меэр ва йицарин бевер гьаз ерхьура?
15Саули жаваб туву:
– Дурар амалекарихьан тадагъдар ву. Халкьди, РАББИЙИЗ, яв Заануриз, гъурбан апӀбан бадали, ужударсдар марччар ва йицар гъитну. Хъа имбуб учу нянайикк ккапӀунча ва терг гъапӀунча.
16Думуган Шамуили Саулиз гъапи:
– ЧӀяаьн! Гьаму йишван РАББИЙИ узукна гъапиб узу увукна пидиза.
Дугъу жаваб туву:
– Йип.
17Ва Шамуили гъапи:
– Уву, жвуву варитӀан аскканурси гьисаб апӀури гъахьнушра, Израилин вари тухмарин аьхюр гъахьундайва? РАББИЙИ увкан Израилиин паччагь хьуз ччим ктатну. 18«Гъарах, намуссуз амалекар нянайикк ккаъ ва терг апӀин. Думу бегьемди тӀанкь апӀайизкьан дяви апӀин» кӀури амур дапӀну, РАББИЙИ уву дявдиз гьаънийи. 19РАББИЙИ гъапибдилан уву гьаз улдучӀвунва, гьаз хючʼин алархьунва ва РАББИЙИЗ затра даккни ляхин гъапӀунва?
20Саули Шамуилиз гъапи:
– Узу РАББИЙИ гъапиб гъапӀунза. РАББИЙИ узу гьау дявдиз гъушунза. Узу Агаг, Амалекдин паччагь, йисирвализ гъадагъунза, хъа имбу вари амалекар нянайикк ккаунза ва терг гъапӀунза. 21Нянайикк ккапӀнайи хючкан адмийири, Гилгалиъ РАББИЙИЗ, яв Заануриз, гъурбан апӀбан бадали, ужударсдар марччар ва йицар гъадагъну.
22Хъа Шамуили гъапи:
– РАББИЙИЗ вариубгбан гъурбнар ва садакьйир
хъпехъувалтӀан лазим вуйинхъа?
Ваъ, хъпехъувал Дугъаз садакьйиртӀан ужу ву,
апӀин кӀуруб апӀувал чагъу якъартӀан ужу ву.
23Хъа мютӀюгъ дархьувал фал кипбан гунгьиз,
хъа инкарвал – бутариз ибадат апӀбаз барабар ву.
Уву РАББИЙИН табшуругъ ярхла апӀбаз лигну,
Дугъу увура ярхла ва паччагьлугъдихъ мягьрум гъапӀну.
24Саули Шамуилиз гъапи:
– Узук тахсир казук: РАББИЙИН амур ва яв улупбар тамам гъапӀундарза; халкьдихьан гучӀури, дидихъ хъпехъунза. 25Амма миннат апӀурза, йиз гунгьилан хил алдабгъ ва, узхьан РАББИЙИЗ ибадат апӀуз хьпан бадали, узухъди сатӀиди кьяляхъ хъадарк.
26Шамуили Саулиз гъапи:
– Узу увухъди кьяляхъ хътаркидарза: уву РАББИЙИН гаф ярхла гъапӀунва, ва Дугъу уву, Израилиин паччагьдин гьюкмихъ мягьрум дапӀну, ярхла гъапӀну.
27Гъягъюз ккунди Шамуил илдициган, Саул дугъан чухайин канчӀлихъан гьаци хъчӀихнийики, дидкан саб парчи кчӀябгъю. 28Ва Шамуили дугъаз гъапи:
– Гъи РАББИЙИ увхьан Израилиин паччагьдин гьюкум тадабгъну ва жара касдихьна тувну, думу увутӀан ужур ву. 29Израилин Даима Заанури Чан гаф чӀур апӀурдар ва Думу Чав адабгъу къарариин швумал шулдар, гьаз гъапиш, Чан къарариин швумал хьуз, Думу адми дар.
30Саули гъапи:
– Узук тахсир казук. Амма миннат апӀурза увкан: йиз халкьдин аьхюдарин улихь ва Израилин улихь узуз гьюрмат апӀин – узухъди кьяляхъ хъадарк, узхьан РАББИЙИЗ, яв Заануриз, ибадат апӀуз хьпан бадали.
31Думуган Шамуил Саулихъди кьяляхъ хъадарку, ва Саули РАББИЙИЗ ибадат гъапӀу.
32Ва Шамуили гъапи:
– Узухьна Агаг, Амалекдин паччагь, акъинай.
Агаг, «КьутӀкьли аьжал йиз багхьан гъубшну хьиди» – фикир апӀури, дугъахьна архаинди гъафи.
33Хъа Шамуили гъапи:
– Яв тури жара дишагьлийир бицӀидарихъ фици мягьрум апӀуйиш, гьаци яв дадара бицӀидар хътру дишагьлийирикан ишри.
Ва Шамуили Гилгалиъ РАББИЙИН улихь Агаг тикйириз гъурку.
34Хъасин Шамуил Рамайиз гъушу, хъа Саул чан хулаз, Саулин Гивайиз, кьяляхъ хъадарку. 35Ва сарун Шамуил Саулихъди чан йигъар ккудуркӀайизкьан гюрюшмиш гъахьундар, гьаз гъапиш Шамуили Саулин дерд зигури гъахьну, хъа РАББИ Сауликан Израилин зиин паччагь апӀбан швумал гъахьну.
© Институт перевода Библии, 2010, 2013, 2016, 2018, 2023