Púcook 9
9
Písiyool pa piti Pútuun pa niŋ Nowe
1Pútuun pa mpisampan Nowe niŋ epuukoo mpusokii: “Nipukool innimeeŋan etaam ya. 2Púlukuleen pa púlooŋ efipife aluu: púlukuleen pa piti etaam ya niŋ pusuwa pa, púlukuleen pa empa mpúhuunoolo pa niŋ soon sa, pikina púlooŋ umpa ti kayine ka kitaaluu. 3Waah óo waah weeyem kaloŋa nuumuusool inci uwwufanaa wo aluu kati uyeno pákuumanal aluu samat nii fa inci uwwufane fa aluu punuun pa niŋ píheeni empa mpitaak pa pukoon. 4Pale niñaŋut hili efoofa eetaake hísim kaatuko eloŋ ti hísim naayem. 5Niŋ an amukaa an inci fasiiŋanoo ti pisiya. Inci fasiiŋan ti pisiya an óo an niŋ élukuleen óo élukuleen eemuke an.
6An óo an eeniise hísim an
akee lompo afaaniis hísimoo
kaatuko Pútuun pa piliilaaliil an ápuful po.
7“Pale aluu nipukool innimeeŋ, papukal aluu mpihancaloolo ti etaam ya.”
8Púful toko, Pútuun pa mpusok Nowe niŋ epuukoo: 9“Inci piliil písiyool pa putoom niŋ aluu niŋ keesoke aluu maamaa 10niŋ lompo waah wa púlooŋ weeyem wa kaloŋa niŋ aluu: pusuwa pa, púlukuleen puwuluwul pa niŋ piti elampa ya, waah óo waah wéefulii ti piteen pa niŋ aluu, púlukuleen pa púlooŋ peeyem pa ti etaam ya. 11Písiyool empe inci iyyem ti hiliilu naaluu: man menfakat etinene múpucalool waah wa púlooŋ weeyem wa kaloŋa, kaahootan etinene kúpucalool etaam ya.”
12Pútuun pa nene pusok: “Ehe píyisan pa piti písiyool empa inci iyyem pa ti kaasiiŋan ti pututayam niŋ aluu, niŋ waah óo waah weeyem kaloŋa niŋ ti pikaay pa peeyem pa ti ékey fo eket maama. 13Inci siiŋanaa étiifeel#9:13 Ekina eyem “kulliŋ-maroo”. ya etoom ti útiŋu wa, ekina efeeyeno píyisan pa piti písiyool pa putoom ti pututayam niŋ etaam ya. 14Tan óo tan ta inci inconcenoole útiŋu wa patiila étiifeel ya néefulii, 15inci fánawuno písiyool pa putoom empa inci illiile pa naaluu niŋ waah óo waah weeyem kaloŋa. Kaahootan etinene kúpucalool eloŋ ya púlooŋ. 16Tan óo tan ta étiifeel ya néefulii ti útiŋu wa, inci facuk yo ínnawuno písiyool pa peepayantoo pa ti pututa inci, Pútuun pa, niŋ waah wa púlooŋ weeyem wa kaloŋa t’etaam ya.”
17Pútuun pa nene pusok Nowe: “Etíifeel ya eyem píyisan pa piti písiyool empa inci illiile pa niŋ waah óo waah weeyem kaloŋa t’etaam.”
Epuuk Nowe
18Epuuk Nowe kéefulii ka ti piteen pa kayem Sem, Ham niŋ Yafet. Ham ayem paapaa ati Kanaan. 19Epuuk ya pakati Nowe pákahaaciil paka payenkuu kayem símaama an óo an eeyem ti etaam ya fíyooy.
20Nowe ayaya, akina áyaañe asuk kaakit kiti kikenenk. 21Hikee hinoom, naalaan elaan etenko náakuman fo ayeno ñáfalfali ti ékuut ya eteyoo. 22Ham, paapaa ati Kanaan, naacuk paapaa ateyoo ñáfalfali náaful apicaakaman ho ñúnuwoo. 23Fiye, Sem niŋ Yafet nkacoop kahuuy kenfakat nkanaŋ ko ti úpantiyii. Púful toko nkayeno pikaayu kaasonaay fo kacol ti paapaa ateyii nkáwufalooloo. Páawoo kayesanaayesan ñuhooŋuyii, kacukut paapaa ateyii ñáfalfali.
24Ta Nowe náalitoonii ta ti ékuman ya eteyoo, náasi eeha kahiineen ka kiteyoo nkíhine ha. 25Fiye naaceek apusok:
“Ñanaa Kanaan!
Ayeno amiikan a akelan a ati ñúnuwoo!”
26Púful toko naasok:
“Múlaa Ateeteyo Pútuun pa piti Sem!
Alímaati Kanaan ayeno amiikan a ati Sem!
27Alímaati Pútuun pa pipenan etaam ya eti Yafet,#9:27 Ti kaŋ ya eti Hiburu, “Yafet” niŋ “kapenan etaam” kanakoolaa-nakool.
akin ti púkuut pa piti Sem,
Kanaan ayeno amiikan a ateyoo!”
28Ta kaahootan ka nkumuuse ta, Nowe naaloŋ sitiil sikeme síhaaciil niŋ áwii ésupak niŋ ŋaasuwan (350). 29Eloŋoo púlooŋ neeyeno sitiil sikeme isak niŋ sipaakiil niŋ áwii ésupak niŋ ŋaasuwan (950). Púful toko naaket.
(Active) © Wycliffe Bible Translators, Inc