Саалтыр 77
77
1Асаф үөрэтиитэ.
Бар дьонум, өйдөөн истиҥ мин үөрэтэрбин,
болҕойуҥ амалыйар аман өспүн.
2Өс домохторун мин эһиэхэ сэһэргиэм,
былыргы кистэлэҥнэри иһитиннэриэм.
3Биһиги тугу истибиппитин-билбиппитин,
аҕаларбыт биһиэхэ кэпсээбиттэрин
4кистиэхпит суоҕа кинилэр удьуордарыттан;
кэлэр көлүөнэлэргэ иһитиннэриэхпит
Айыы Тойон килбиэннээх дьайыыларын,
Кини күүһүн-уоҕун, оҥорбут дьиктилэрин.
5 Иаковка анаан, Кини уураах таһаарбыта,
Израильга Сокуон олохтообута,
уонна, оҕолоргутугар үөрэтиҥ диэн,
кэс тылын өбүгэлэрбитигэр эппитэ;
6ону барытын кэлэр көлүөнэлэр,
кэнэҕэс төрүөхтээх оҕолор билэннэр,
бэйэлэрин тустаах кэмнэригэр
кэнчээри ыччаттарыгар кэпсиэхтээхтэрэ.
7Оччоҕо кинилэр Айыы Таҥараҕа эрэниэхтээхтэрэ,
Таҥара дьайыыларын умнубакка,
Кини кэриэстэрин тутуһуохтаахтара;
8оччоҕо өсөһөн өрө турар адьынаттаах,
бигэтэ суох сүрэхтээх өбүгэлэрин –
Таҥараҕа бэриниитэ суох көлүөнэ курдук
аны хаһан да буолуо суохтаахтара.
9Ох саанан сэбилэммит Ефрем уолаттара
охсуһуу күнүгэр чугуйбуттара;
10Таҥара кэс тылын тутуспатахтара,
Сокуонун толорортон аккаастаммыттара;
11Кини оҥорбут дьайыыларын,
көрдөрбүт дьиктилэрин умнубуттара.
12Оттон Таҥара кинилэр өбүгэлэрэ көрөллөрүгэр,
Египет сиригэр, Цоан толоонугар эҥин дьиктини оҥороро.
13Кини, муораны икки аҥыы хайытан, норуотун туораппыта,
ууну эркиннии өрө туруорбута.
14Күнүһүн былытынан кинилэри сирдиирэ,
түүнү быһа кинилэргэ уот сырдыгын түһэрэрэ;
15кураайы дуолга тааһы хайа охсон,
улуу далайтан ууну кутардыы, утахтарын ханнарара;
16очуос хайаттан ууну үрүйэлии сүүрдэрэ,
дохсун ууну өрүстүү күрүлэтэрэ.
17Оттон кинилэр син биир Кинини утары аньыыны оҥороллоро,
кураайы дуолга сылдьан, Үрдүктэн Үрдүккэ утарылаһаллара.
18Соруйан Таҥара тулуурун тургутан,
сөбүлүүр астарын-үөллэрин ирдииллэрэ.
19Таҥараны утары тыллаһан:
«Иччитэх дуолга Таҥара биһиэхэ ас бэлэмниэ дуо? – дииллэрэ. –
20Төһө да тааһы хайа охсубутугар,
уу суккуллубутун, үрүйэ сүүрдүбүтүн иһин,
килиэби Кини биһиэхэ кыайан биэриэ дуо,
норуотун этинэн хааччыйыа дуо?»
21 Айыы Тойон, итини истэ абаран,
Иаковка уора-кылына уоттуу оргуйбута,
Израильга кыыһырбыта сэтэрэн турбута –
22кинилэр Таҥараны итэҕэйбэттэрин,
Кини өрүһүлтэлээх күүһүгэр эрэммэттэрин иһин.
23Ол да үрдүнэн, үөһээҥҥи былыттары соруйан,
халлааннар ааннарын тэлэччи аспыта,
24аһаатыннар диэн, мааннаны ардахтыы куппута –
халлаан бурдугун кинилэргэ биэрбитэ.
25Онон киһи Аанньал килиэбин сиэбитэ;
Таҥара кинилэргэ дэлэй аһы ыыппыта.
26Кини халлаантан илиҥҥи тыалы түһэрбитэ,
соҕурууҥҥу тыалы үүрэн аҕалбыта.
27Быылы ыһар кэриэтэ үөһэттэн эти ыспыта –
муора кумаҕын курдук элбэх көтөрү ыыппыта;
28ол көтөрдөрү кинилэр тохтообут сирдэригэр –
отууларын тулатыгар түһэрбитэ.
29Онон тото-хана, дуоһуйа аһаабыттара –
Таҥара тугу баҕарбыттарын биэрбитэ.
30Ол эрээри, эккэ баҕалара хана илигинэ,
өссө да аһыы олордохторуна,
31Таҥара, кинилэргэ уордайан,
саамай күүстээхтэрин суох оҥорбута,
Израиль эдэр уолаттарын умса уурбута.
32Оттон кинилэр аньыыны оҥороллорун уураппатахтара,
Кини дьикти дьайыыларын итэҕэйбэтэхтэрэ.
33Ол иһин Таҥара кинилэр күннэрин сүпсүккэ сүтэрэр,
сылларын кутталга аһардар оҥорбута.
34Онтон, кинилэри өлөртөөн барбытыгар,
дьэ Кинини көрдүүр буолбуттара;
аньыыларын-буруйдарын кэмсинэн,
Таҥараны ис сүрэхтэриттэн көрдөөбүттэрэ.
35Таҥара кинилэргэ халыҥ хахха буоларын,
Үрдүктэн Үрдүк Таҥара кинилэри өрүһүйэн ыларын
онно эрэ өйдөөбүттэрэ.
36Ол да үрдүнэн Кинини кытта албыннык кэпсэтэллэрэ,
Киниэхэ сымыйаны этэллэрэ;
37бигэ санаата суох буоланнар,
Кини кэс тылын кэһэллэрэ.
38Оттон аһыныгас Таҥара буруйдарын бырастыы гынара,
кинилэри имири эспэт этэ;
кыыһырартан элбэх төгүл туттунара,
уорун-кылынын толору күөдьүппэт этэ.
39Кини өйдүүрэ кинилэр өлөр үйэлээхтэрин,
төннүбэттии, ил гынан ааһар сиккиэр кэриэтэлэрин.
40Хаста кинилэр кураайы дуолга сылдьан,
Киниэхэ утарыласпыттарай,
иччитэх сиргэ сылдьан, Кинини хомоппуттарай!
41Күнтэн күн Таҥараны тургуталлара,
Израиль Сибэтиэйин атаҕастыыллара.
42-43Кинилэр Таҥара сүдү күүһүн –
өстөөхтөн кинилэри өрүһүйбүт күнүгэр
Египеккэ сөҕүмэр бэлиэлэри көрдөрбүтүн,
Цоан толоонугар дьиктилэри оҥорбутун умнубуттара.
44Ол саҕана Кини, Египет дьоно иһэр уута суох буоллун диэн,
дойдуларын өрүһүн барытын хааҥҥа кубулуппута.
45Кинилэри, үөн-көйүүр былытын аҕалан, тэһитэ кэйдэрбитэ,
алдьатыылаах баҕалары ыытан үрэйтэрбитэ.
46Бурдуктарын үүнүүтүн түүлээх үөҥҥэ сиэппитэ,
үлэлэрин түмүгүн саранчаҕа биэрбитэ.
47Виноградтарын тобураҕынан эспитэ,
смоковницаларын хаһыҥҥа мэлиппитэ.
48Сүөһүлэрин толонунан тоҕута сыспыта,
үөрдэрин чаҕылҕанынан дапсыйбыта.
49Кыыһырбыт уоҕун-төлөнүн,
бары абатын-сататын, уорун-кылынын түһэрэн,
кинилэргэ аан алдьархайы –
өлөрөр-өһөрөр үтүмэн аанньалы ыыппыта.
50Онно Кини уордайартан туттуна барбатаҕа,
олохторун аны харыһыйбатаҕа –
өлүүлээх сутулу кинилэргэ туруорбута.
51Египет бары ыалларын бастакы уолаттарын,
Хам#77:51 Ной уолаттарыттан биирдэстэрэ, Египет норуотун төрдө. отууларын бастыҥ күүһүн, өлөртөөбүтэ.
52Дьэ онтон маныыһыт курдук, норуотун илдьэ барбыта,
кураайы дуол устун бараан үөрүнүү сирдээбитэ.
53Куттала суох сиринэн илдьэ иһэр буолан,
кинилэр туохтан да кыраҕыйбат этилэр;
өстөөхтөрүн муора уута саба халыйбыта.
54Кини норуотун сибэтиэй томторугар,
уҥа илиитинэн ылбыт хайатыгар, аҕалбыта.
55Омуктары кинилэртэн үүртэлээн баран,
олор отууларыгар Израиль аҕа уустарын олохтообута;
барыларыгар өлбүгэ сир быһаттаан биэрбитэ.
56Ол да үрдүнэн Үрдүктэн Үрдүк Таҥараны тургуталлара,
уураахтарын тутуспакка, Киниэхэ утарылаһаллара.
57Өбүгэлэрин курдук, кинилэр эмиэ Таҥараттан тэйэн,
Киниэхэ бэриниитэ суох этилэр,
алдьаммыт ох саа курдук, эрэбилэ суохтара.
58Сымыйа таҥараларга үҥэр үрдэллэринэн
Айыы Таҥараны хомотоллоро,
эмэгэккэ сүгүрүйэн, Кинини күнүүлэтэллэрэ.
59Таҥара, барытын истэн, улаханнык уордайбыта:
Кини Израильтан букатын аккаастаммыта.
60Онон Силомҥа баар олоҕун,
дьон ортотугар олорбут Отуутун, быраҕан барбыта;
61 ковчегын # 77:61 Тылыттан тылыгар түһэрдэххэ: күүһүн. билиэҥҥэ туттарбыта –
албан аатын өстөөх илиитигэр туран биэрбитэ.
62Норуотун кылыс уһугар туруортарбыта,
ол курдук Кини Бэйэтин дьонугар уордайбыта.
63Онон уолаттарын уот мэҥиэстибитэ,
кыргыттарыгар уруу ырыата ылламматаҕа;
64 аҕабыыттара кылыстан охтубуттара,
огдооболоро кинилэри аһыйан ытыыр кыахтара суоҕа.
65Дьэ онуоха Айыы Тойон уутуттан уһуктардыы,
уохтаах арыгыттан өрө көтөҕүллүбүт бухатыырдыы,
66кинилэр өстөөхтөрүн киэр үүртэлээбитэ,
аны көммөттөрүн курдук, сир сирэйдээбитэ.
67Кини Иосиф удьуоруттан аны аккаастаммыта,
Ефрем аҕатын ууһун талбатаҕа,
68ол оннугар Иуда аҕатын ууһун,
таптыыр Сионун хайатын, талан ылбыта.
69Онно үрдүк халлааннар курдук сүдү,
үйэлэргэ олохтообут сирин курдук бигэ
сибэтиэй Дьиэни Бэйэтигэр тэриммитэ.
70Онтон кулутун Давиды талан ылан,
бараанын далыттан аҕалтарбыта;
71эмньик барааннарын көрө сырыттаҕына ылларан,
Бэйэтин норуотун Иаковы, бас билэр Израилын,
көрөр-истэр маныыһыт оҥорбута.
72Давид, ыраас сүрэҕиттэн кыһаллан,
сатабыллаах илиитинэн кинилэри салайара.
© Институт перевода Библии, 2008-2022