Саалтыр 72
72
III КИНИГЭТЭ
72–88 псаломнар
1Асаф псалома.
Чахчы даҕаны Таҥара үтүө сыһыаннаах Израильга,
ыраас сүрэхтээхтэргэ!
2Оттон мин бүдүрүйэн иһэн өрүһүннүм,
халтарыйан иһэн быыһанным:
3нэгэй дьон баай-талым олоҕун көрөммүн,
улуутумсуктары ордугургуу санаатым.
4Кинилэр өлүөхтэригэр да диэри эрэйи билбэттэр,
үскэл-ньүөл бэйэлээхтэр;
5дьон ыарахан үлэтигэр кинилэр суохтар,
атыттары кытта очурга охсуллубаттар.
6Ол иһин улахамсык санаа оҕуруоламмыттар,
баламат быһыы таҥастаммыттар.
7Аһара уойаннар, харахтара бүтэйбит,
мэник санаа сүрэхтэригэр көччүйбүт.
8Тугу барытын күлэллэр, кырыктаахтык тыллаһаллар,
улаханнык сананан, суоһурҕаналлар.
9Уостара халлааҥҥа тиийэ уһаабыт,
тыллара сири-дойдуну дархаһыйа кэрийбит.
10Ол иһин бэл Таҥара норуота кинилэри батыһар,
тугу куппуттарын толору сомсон иһэр.
11«Таҥара хайдах билиэҕэй,
Үрдүктэн Үрдүк билэр үһү дуо?» – дииллэр нэгэйдэр.
12Итинниктэр хара саҥнаахтар: бу үйэҕэ барҕараллар,
баайдарын-дуолларын хаҥаталлар.
13Ама халтайга мин ыраас сүрэхтэнэргэ таласпытым,
аньыыта-буруйа суох буоларга дьулуспутум,
14халтайга хас күн аайы охсуллубутум,
хас сарсыарда аайы дьарыллыбытым буолуо дуо?
15Ол эрэн: «Кинилэр курдук тыллаһыам», – диэбитим буоллар,
Эн норуотуҥ иннигэр буруйдаах тахсыах эбиппин.
16Хайдах итини өйдүүбүн дии саныырым,
итини ыпсарары ыарырҕата көрөрүм.
17Дьэ онтон, Таҥара Дьиэтигэр киирэн тураммын,
мин өйдөөбүтүм кинилэр муҥур уһуктарын.
18Чахчы даҕаны Эн кинилэри халтараан суолга туруорбуккун,
түгэҕэ биллибэт далайга түһэртиир эбиккин.
19Хайдах курдук эмискэ имнэри эһиннилэр,
хайдах курдук уолуйан, суола суох сүттүлэр!
20Киһи уһуктан баран түүлүн умнарыныы,
Айыы Тойон, Эн тураат да, кинилэр мөссүөннэрин умнуоҕуҥ.
21Мин сүрэҕим умайар-оргуйар,
дууһам муунтуйар кэмигэр,
22тугу да өйдөөбөт ньүдьү-балай этим,
сүөһү кэриэтэ этим Эн иннигэр.
23Ол да буоллар, мин өрүү Эйигинниин бииргэбин –
Эн миигин уҥа илиибиттэн сиэтэҕин,
24сүбэлээн-амалаан сирдиигин;
кэнэҕэһин да Эн миигин кэрэмэн килбиэҥҥэ киллэриэҕиҥ.
25Ким миэхэ баарый халлааҥҥа Эйигиттэн ураты?
Эйигин кытта сылдьан, сиргэ даҕаны тугу да баҕарбаппын.
26Төһө да этим-хааным, сүрэҕим мөлтөөбүтүн иһин,
Таҥара миэхэ сүрэҕим бигэ кириэппэһинэн,
үйэлэр тухары мин аналбынан хаалыаҕа.
27Дьиҥ чахчы, Эйигиттэн ыраатааччылар өлөллөр;
Эйигиттэн тэйээччилэри Эн имири эһэҕин.
28Оттон миэхэ үчүгэй да буоллаҕа Таҥараҕа чугаһыырым!
Эн бары дьайыыгын иһитиннэрээри,
Айыы Тойон Таҥараҕа мин эрэнним.
© Институт перевода Библии, 2008-2022