Саалтыр 71
71
1Соломон псалома.
Айыы Таҥара, ыраахтааҕыны үөрэт көнөтүк дьүүллүүргэ,
ыраахтааҕы уолун – кырдьыктаах буоларга.
2Кини Эн дьоҥҥун көнөтүк дьүүллүөхтүн,
Эн дьадаҥыларгын кырдьыгынан көрүөхтүн.
3Хайалар дьоҥҥо или-эйэни аҕаллыннар,
томтордор – кырдьыгы.
4Кини норуот дьадаҥыларын көмүскээтин,
кыһалҕалаахтары быыһаатын,
кыһарыйааччыны сыһыттын.
5Оччоҕо кинилэр көлүөнэттэн көлүөнэҕэ, Айыы Таҥара,
ый-күн баарын тухары Эйигиттэн толлуохтара.
6Ыраахтааҕы охсуллар ходуһаҕа түһэр самыырга,
сир үрдүн ньүөлсүтэр ардахха холоонноох буолуоҕа.
7Кини кэмигэр кырдьыксыт туругуруоҕа,
ый сырдатарын тухары ил-эйэ чэчирии туруоҕа.
8Кини саарыстыбата муораттан муораҕа тиийиэҕэ,
Евфрат өрүстэн сир уһугар диэри тэнийиэҕэ.
9Кураайы дуол олохтоохторо кини иннигэр сөһүргэстиэхтэрэ,
кини өстөөхтөрө сири-буору салыахтара.
10Фарсис уонна муора арыыларын ыраахтааҕылара
киниэхэ түһээн төлүөхтэрэ;
Аравия уонна Сава ыраахтааҕылара
бэлэхтэрин илдьэ кэлиэхтэрэ.
11Бары ыраахтааҕылар киниэхэ сүгүрүйүөхтэрэ,
бары норуоттар киниэхэ үлэлиэхтэрэ.
12Кини көмө көрдүүр кыһалҕалаахтары,
дьадаҥыны, хантан да көмө кэлбэт киһитин өрүһүйүөҕэ;
13мөлтөҕү, баттаммыты-үктэммити аһыныаҕа,
кыһалҕалаахтар олохторун быыһыаҕа;
14хара батталтан, үтүргэнтэн дууһаларын толуйуоҕа;
кинилэр хааннара кини хараҕар улахаҥҥа туруоҕа.
15Туругурдун ыраахтааҕы!
Киниэхэ Аравия кыһыл көмүһүттэн биэриэхтэрэ;
кини туһугар өрүү үҥүөхтэрэ,
кинини күннэтэ алгыахтара.
16Бурдук, сиргэ өлгөмнүк үүнэн,
хайа үрдүгэр долгуйа хамсыаҕа,
үүнүүтэ Ливаҥҥа курдук, үрдүк буолуоҕа.
Куораттарын дьоно, төрөөн-үөскээн,
хонуу отунуу хойдуоҕа.
17Ыраахтааҕы аата-суола үйэлэргэ барыаҕа,
кини албан аата күн үйэтэ үйэлэниэҕэ.
Бары норуоттарга кини алгыһы аҕалыаҕа,
кинини ким барыта дьоллооҕунан ааттыаҕа.
18Алгыс буоллун Айыы Тойоҥҥо, Израиль Таҥаратыгар,
эҥин дьиктини оҥорор соҕотох сүдү кыахтаахха.
19Алгыс буоллун үйэлэр тухары Кини килбиэннээх аатыгар.
Кини кэрэмэн килбиэнэ сир үрдүн толоруохтун.
Аминь, аминь.
20Иессей уолун Давид үҥүүтэ бүттэ.
© Институт перевода Библии, 2008-2022