Аман өһө 15
15
1Сымнаҕас харда уордайбыты уоскутар,
оттон хабыр тыл уокка арыыны кутар.
2Муударай дьон тыла-өһө билиигэ угуйар,
оттон акаары хой баһын туойар.
3 Айыы Тойон аан дойдуну анаарар:
үтүө да, мөкү да барыта – Кини хараҕын далыгар.
4Үтүө тыл үтүөрдэр,
түөкэй тыл сүһүрдэр.
5Акаары уол аҕатын сүбэтин сиргэ-буорга тэпсэр,
оттон өйдөөх – сэмэни-суҥханы болҕойон истэр.
6Үтүө киһи дьиэтэ-уота барҕа баайдаах,
оттон куһаҕан киһи, барыһыран да, туһаламмат.
7Муударай киһи билиитин үллэстэр,
оттон акаары оннук кыаҕа суох.
8Сидьиҥнэр бэлэхтэриттэн Айыы Тойон сиргэнэр,
Кини көнө дьон үҥэриттэн үөрэр.
9Куһаҕан дьон суолун Айыы Тойон абааһы көрөр,
Кини кырдьыгы көрдөөччүлэри таптыыр.
10Суолуттан туорааччы ыардык буруйданыаҕа,
сүбэни абааһы көрөөччү өлүөҕэ.
11 Айыы Тойон бэл анараа дойдуну#15:11 …анараа дойдуну – Былыргы еврейдии тиэкискэ Шеолу уонна Аваддону. Шеол уонна Аваддон – өлбүттэр баар дойдулара, анараа дойду. курдары көрөр,
онон дьон сүрэҕин өтө көрөрө биллэн турар!
12Бэрдимсик сэмэлэтэрин сөбүлээбэт,
онон муударай дьоҥҥо барыа суоҕа.
13Ким сүрэҕэ ыллыыр, ол сирэйдиин-харахтыын сырдыыр,
оттон ыар санаа киһини хам баттыыр.
14Өйдөөх киһи билиигэ-көрүүгэ тардыһар,
оттон акаары солуута суоҕунан дуоһуйар.
15Дьадаҥы олоҕо эргиччи кыһарҕан,
оттон дьоллооххо күннэтэ малааһын.
16Барҕа баайданан баран дьиксинэ олоруохтааҕар,
дьадаҥытык да буоллар, Айыы Тойоҥҥо эрэллээх олорбут ордук.
17Эмис идэһэ этин тула иирсэ олоруохтааҕар,
оҕуруот аһын тула эйэ дэмнээхтик олорбут ордук.
18Киҥнээх киһи иирээни тардар,
оттон тулуурдаах өһү-сааһы ууратар.
19Күөх көппө суола барыта эрбэһин,
оттон үтүө дьон суола-ииһэ эриэ-дэхси.
20Өйдөөх уол аҕатын үөрдэр,
акаары уол ийэтин түһэн биэрэр.
21Акаары ааргытык быһыыланан астынар,
оттон өйдөөх киһи көнө суолунан сылдьар.
22Сүбэтэ-амата суох дьыала-куолу сатарыйар,
оттон сүбэһит элбэҕэр табыллар.
23Бэргэн хардаҥ бэйэҕин үөрдэр;
үчүгэй да буоллаҕа кэмигэр этиллибит үтүөкэн тыл!
24Муударай киһи олох суолун дабайар –
өлүү айаҕыттан киэр куотар.
25Улуутумсуктар дьиэлэрин Айыы Тойон урусхаллыаҕа,
оттон огдообо сирин-уотун хараанныаҕа.
26 Айыы Тойон уодаһыннаах санааны абааһы көрөр,
Кини үтүө тылы-өһү ылынар.
27Харчыга хараҥарааччы алдьархайы дьиэтигэр ыҥырар,
оттон бэриги абааһы көрөөччү кэскилин түстэнэр.
28Үтүө киһи ыараҥнатан баран саҥарар,
оттон сидьиҥ сидьиҥи суккуйар.
29 Айыы Тойон хара санаалаахтартан ыраах,
Кини көнө дьон көрдөһөрүн истэр.
30Эйэҕэс мичээр үөрдэр,
үтүө сурах үтүөрдэр.
31Ким сиэрдээх сэмэни ылынар,
ол муударай дьоннуун алтыһар.
32Ким сүбэни сүгүн истибэт, ол бэйэтигэр куһаҕаны оҥостор,
оттон сэмэни иннинэн истээччи үтүө өйдөнөр.
33 Айыы Тойоҥҥо ытыктабыл муудараска үөрэтиэҕэ;
көрсүө-сэмэй майгы – үтүө аат бастакы үктэлэ.
© Институт перевода Библии, 2008-2022