Tegnum 4
4
Cov Numtswv Taug Petus Hab Yauhaas Zaaj
1Thaus Petus hab Yauhaas tseem taabtom qha cov tuabneeg ntawd, cov povthawj hlub#4:1: cov povthawj hlub; tej phoo ntawv qub kws xuas teg sau, muaj cov thawj povthawj hlub. qeeleej, tug thawj tubrog kws saib lub Tuamtsev, hab ib cov Xadukais txawm tuaj nrhav obtug. 2Puab ntxhuvsab heev, ruaqhov ob tug timthawj nuav pheej qha rua suavdlawg has tas Yexus tub sawv huv qhovtuag rovqaab lug lawm; qhov ntawd qha tau has tas, cov kws tuag lawm yuav sawv huv qhovtuag rov lug tau txujsa. 3Yogle ntawd, puab txhaj nteg obtug hab coj obtug moog kaw ib mos, vim thaus ntawd tub tsausntuj lawm. 4Tabsis muaj coob leej kws tau nov obtug tej lug qha ntawd, puab cale ntseeg Yexus; suav cov txivneej xwb muaj kwvlaam le 5,000 leej.
5Thaus kaajntug lawm, cov Yudais tej thawjcoj, cov txwjlaug, hab cov xwbfwb kws qha Kevcai tau tuaj uake saablaaj huv lub nroog Yeluxalees. 6Anas kws yog tug Tuam Povthawj Hlub, Kaiyafas, Yauhaas, Alexaadaws hab lwmtug kws yog tug Tuam Povthawj Hlub tsev tuabneeg kuj tuaj nrug puab saablaaj hab. 7Puab coj Petus hab Yauhaas lug sawv taabmeeg puab hab nug obtug has tas, “Meb siv lub fwjchim twg lossis meb siv leejtwg lub npe ua tej nuav?”
8Lub sijhawm ntawd, Petus puvnpo Vaaj Ntsujplig tug Dlawbhuv, txhaj teb tas, “Cov numtswv kws kaav pejxeem hab cov txwjlaug, 9nubnua yog mej nug txug yaam zoo kws wb tau ua rua tug txivneej tuag ceg nuav hab txug qhov kws nwg ob txhais ceg zoo lawm, 10tes tsimnyog mej hab taagnrho cov tuabneeg Yixalayees suavdlawg yuavtsum paub tas tug txivneej kws sawv taabmeeg ntawm mej nuav zoo lawm, tub yog Yexus Khetos tug kws yog tuabneeg Naxalev lub npe kws muaj fwjchim ua rua nwg zoo. Nwg yog tug kws mej muab ntsa rua sau tug ntoo khaublig hab yog tug kws Vaajtswv tau tsaa sawv huv qhovtuag rovqaab lug. #Nnkauj 118:22 11Yexus yog tug kws Vaajtswv Txujlug qha tseg has tas,
“ ‘Lub Pobzeb kws cov tuabneeg ua tsev muab xyeeb tseg lawm,
nwgnuav tau dlhau lug ua lub kws tseemceeb#4:11: lub kws tseemceeb; lossis lub thawj rua ntawm kaumtsev. tshaaj txhua lub lawm.’
12Kev cawmdlim yeej tsi muaj nyob rua huv lwmtug hlo le, ruaqhov yeej tsi muaj lwm lub npe kws Vaajtswv muab rua noobneej es yuav cawm tau kuas peb dlim.”
13Thaus cov thawjcoj huv Koomhum qebsab pum tas Petus hab Yauhaas muaj sab tawv teb le ntawd, puab xaav tsi thoob le, ruaqhov puab paub tas obtug yeej tsi tau kawm ntawv, obtug tsuas zoole luas tej hab xwb. Thaus ntawd puab ncu tau tas obtug txeev nrug Yexus uake lug lawm. 14Tabsis puab has tsi tau lecaag, ruaqhov puab pum tug txivneej tuag ceg kws zoo lawm nrug obtug sawv uake ntawd. 15Yogle ntawd, puab txhaj has kuas obtug tawm huv lub chaw saablaaj moog. Puab suavdlawg txhaj saablaaj has tas, 16“Peb yuav ua lecaag rua ob tug tuabneeg nuav? Txhua tug tuabneeg kws nyob huv lub nroog Yeluxalees nuav puavleej paub tas zaaj txujci tseemceeb nuav yog obtug ua, peb yuav tsi leeg paub tsi tau. 17Peb yuavtsum txwv tunrho tsi pub obtug has Yexus lub npe rua leejtwg le, zaaj nuav txhaj yuav tsi nrov-nchaa moog rua suavdlawg nov ntxiv.”
18Puab txhajle hu obtug rovqaab lug, hab txwv tunrho tsi pub obtug has lossis qha Yexus zaaj ib zag ntxiv le lawm. 19Tabsis Petus hab Yauhaas teb puab has tas, “Mej sim xaav seb, qhovtwg hum Vaajtswv sab dlua: wb noog mej lug zoo dlua los wb noog Vaajtswv lug zoo dlua? 20Yuav kuas wb tsi xob has lawvle tej kws wb nov hab wb pum lawm, yeej tsi tau le.” 21Thaus ntawd cov numtswv tseem hajyam txwv obtug tawv dlua qub ntxiv, tes puab txawm tso obtug moog. Puab tsi paub sov yuav rautxim lecaag rua obtug, ruaqhov tej tuabneeg suavdlawg taabtom qhuas Vaajtswv txug zaaj txujci tseemceeb kws tau tshwmsim ntawd. 22Tug txivneej kws Vaajtswv khu nwg zoo ntawd noobnyoog muaj plaubcaug tawm xyoo lawm.
Cov Ntseeg Thov Vaajtswv Kuas Puab Muaj Sab Tawv
23Thaus puab muab Petus hab Yauhaas tso lawm, obtug txawm rov moog rua ntawm cov ntseeg hab qha tej kws cov thawj povthawj hlub hab cov txwjlaug tau txwv obtug rua puab noog. 24Thaus cov ntseeg nov le ntawd, puab suavdlawg koom ib lub sab thov Vaajtswv has tas: “Tug Tswv kws muaj fwjchim, Koj yog tug kws Tsim lub ntuj hab lub nplajteb, tsim dlej havtxwv hab tsim txhua yaam kws nyob rua ntawm tej chaw ntawd huv tuabsi! #Tsiv 20:11; Teev 9:6; Nnkauj 146:6 25Koj kuas Vaaj Ntsujplig tug Dlawbhuv qha rua peb yawmkoob Daviv kws yog Koj tug tubkhai, has tas:
“ ‘Vim lecaag Lwmtsaav Tuabneeg chim heev;
hab vim lecaag tej tuabneeg tuavhuv ua phem yaam tsi muaj qaabhau? #Nnkauj 2:1-2 (LXX)
26Tej vaajntxwv kws kaav lub nplajteb nuav sawv nregnroog tog
hab tej numtswv tuaj uake
tawmtsaam tug Tswv hab Nwg tug Mexiyas.’
27Yeej muaj le ntawd tag, ruaqhov Helauj hab Pootius Philaj obtug nrug Lwmtsaav Tuabneeg hab cov Yixalayees tau tuaj uake rua huv lub nroog nuav tawmtsaam Yexus, kws yog Koj tug Tubkhai dlawbhuv kws Koj tau tsaa ua tug Mexiyas lawm. #Lukas 23:7-11; Math 27:1-2; Malak 15:1; Lukas 23:1; Yauh 18:28-29 28Tej kws puab ua nuav tub yog muaj lawvle Koj lub fwjchim hab Koj tug dlejsab kws Koj tau npaaj tseg lug lawm. 29Tug Tswv, nwgnuav thov Koj tsaa qhovmuag saib tej kws puab uanruj uatsiv rua peb. Hab thov Koj paab peb cov kws yog Koj cov tubkhai kuas muaj lub sab tawv qha Koj txujlug. 30Thov koj cev teg khu tej tuabneeg kws muaj mob, hab thov Koj pub kuas tej txujci tseemceeb kws peb ua yog lug ntawm Yexus kws yog Koj tug Tubkhai dlawbhuv lub npe.”
31Thaus puab thov taag, qhov chaw kws puab nyob ntawd txawm uazug koog. Puab suavdlawg cale puvnpo Vaaj Ntsujplig kws Dlawbhuv hab muaj lub sab tawv qha Vaajtswv Txujlug.
Cov Ntseeg Nqaa Tej Khoom Kws Puab Muaj Tuaj Tso Uake
32Cov ntseeg txhua tug puavleej koom ua ib lub sab. Tsi muaj ib tug yuav has tas tej kws nwg muaj yog nwg le, tabsis txhua yaam kws puab muaj, puab nqaa tuaj tso uake ua suavdlawg tug. #Tegnum 2:44-45 33Cov timthawj tau ua timkhawv muajceem heev has txug zaaj kws Tswv Yexus tau sawv huv qhovtuag rovqaab lug, hab Vaajtswv tau nchuav koobmoov ntau heev rua puab txhua tug. 34Puab cov ntawd tsi muaj ib tug txomnyem le. Cov kws muaj laj muaj teb ntau dlaim, muaj vaaj muaj tsev ntau lub, los puab muab muag, hab coj cov nyaj kws muag tau ntawd tuaj 35rua cov timthawj; hab cov timthawj muab cov nyaj ntawd faib rua suavdlawg lawvle nyag txuj kev cheemtsum.
36Yauxej kuj ua le ntawd hab; Yauxej yog xeem Levis, nwg yug tim lub povtxwv Xaipas. Cov timthawj tis dlua ib lub npe rua nwg hu ua Npananpas (lub npe ntawd txhais has tas “Tug kws Txhawbzug.”) 37Nwg muab nwg ib dlaim teb muag, hab coj cov nyaj tuaj rua cov timthawj.
© 2022 United Bible Societies. All rights reserved.