Tegnum 20
20
Paulus Moog Tim Makedaunias Hab Akhayas
1Tomqaab kws txuj kev kubntxhuv ntawd tug lawm, Paulus txawm hu cov ntseeg tuaj uake, nwg haslug txhawb puab zug hab haslug ncaim puab, tes nwg txawm moog rua Makedaunias lawm. 2Thaus nwg taug kev moog, nwg qha ntau zaaj txhawb cov tuabneeg kws nyob huv tej cheebtsaam ntawd lub zug. Tes nwg txawm moog txug lub xeev Akhayas, 3hab nyob ntawd tau peb hlis. Thaus nwg taabtom yuav caij nkoj moog rua tim xeev Xilias, nwg nov tas cov Yudais tuavhuv yuav ua phem rua nwg, nwg txhaj txavtxim sab rovqaab moog hlaa peg lub xeev Makedaunias moog.
4Cov tuabneeg kws nrug Paulus moog yog Pilus tug tub Xaupataws kws nyob huv Npele-as, Alitakhus hab Xekudus kws nyob huv Thexalaunikes; Nkai-us kws nyob huv Dawnpis; Tikhikus hab Rhaufimus kws nyob huv Exias; hab Timautes. 5Puab cov ntawd xub uantej moog nyob rua huv lub nroog Rhau-as tog peb. 6Tomqaab ua Kevcai Noj Ncuav Tsi Xyaw Keeb taag, peb txawm caij nkoj tawm huv lub nroog Filipis moog. Peb moog tau tsib nub maamle moog txug lub nroog Rhau-as, hab peb nyob ntawd tau xyaa nub.
Paulus Moog Saib Lub Nroog Rhau-as Zag Kawg
7Thawj nub#20:7: Thawj nub; lossis Nubkaaj. ntawm lub limtam, peb tuaj sissau uake kws yog tuaj ua kevcai noj tug Tswv Rooj Mov. Paulus tau qhuabqha rua cov tuabneeg ntawd noog, nwg qha ntev loo moog txug ib taagmo, ruaqhov nub tomqaab ntawd xwb tes nwg yuav tau ncaim puab moog. 8Chaav tsev txheej sau kws peb saablaaj ntawd, puab taws ntau lub teeb.
9Muaj ib tug hluas hu ua Yutikhus, nwg nyob ntawm lub qhovrais. Thaus Paulus qha ntev loo moog ntxiv, Yutikhus txawm tsaugzug zujzug tuaj; thaus kawg nwg cale loojhlas hab poob nroog ntawm lub qhovrais txheej tsev thib peb rua huv aav. Thaus puab moog tsaa nwg, tes nwg tub tuag lawm. 10Tabsis Paulus txawm nqeg kag moog, nyo ntshis hab puag nkaus tug hluas ntawd, hab has tas, “Tsi xob txhawj, nwg tseem cajsa!” 11Tes Paulus txhaj nce rov moog rua sau tsev, muab ncuav lug ndlais hab faib rua suavdlawg noj. Paulus nrug suavdlawg thaam ntev loo moog txug ncua thaus kaajntug, nwg maamle ncaim puab moog lawm. 12Suavdlawg pum tug hluas ntawd tseem muaj sa, puab zoosab kawg le, puab txawm coj nwg moog tsev.
Moog Ntawm Rhau-as Rua Miletus
13Peb uantej moog rua nraag lub nkoj hab caij nkoj moog rua nraag lub nroog Axaus, qhov chaw kws peb yuav tog Paulus nrug peb moog. Nwg tub xub has kuas peb ua le ntawd lawm, ruaqhov nwg yuav moog kutaw moog rua nraag. 14Thaus nwg ntsib peb nraag lub nroog Axaus lawm, peb txhaj coj nwg nrug peb caij nkoj moog rua nraag lub nroog Mitilenes. 15Peb caij nkoj ntawm qhov chaw ntawd moog hab nub tomqaab peb maam moog txug rua ntawm lub povtxwv Khi-aus. Ib nub tomqaab ntxiv, peb moog txug lub povtxwv Xamaus, hab nub tomqaab ntxiv hab, peb maam moog txug nraag lub nroog Miletus. 16Paulus tau txavtxim sab caij nkoj moog kuas dlhau plawg lub nroog Efexus, sub txhajle tsi noj sijhawm rua huv xeev Exias, vim nwg maaj moog kuas txug nraag lub nroog Yeluxalees, seb moog puas ncaav nub Pheetekhos.
Paulus Haslug Ncaim Rua Cov Txwjlaug Kws Tuaj Peg Efexus Tuaj
17Thaus Paulus tseem nyob huv lub nroog Miletus, nwg tau khaiv tuabneeg moog hu cov txwjlaug kws saib pawg ntseeg huv lub nroog Efexus kuas tuaj ntsib nwg. 18Thaus puab tuaj txug lawm, nwg has rua puab has tas, “Suav txij le nub kws kuv tuaj txug rua huv lub xeev Exias, mej yeej paub tas kuv ua kuv lub neej zoo lecaag. 19Kuv tau ua tug Tswv teg dlejnum lug ntawm kev txu fwjchim hab lub kuamuag poob; muaj ntau yaam teebmeem tuaj raug kuv vim cov tuabneeg Yudais tuavhuv ua phem rua kuv. 20Mej yeej paub tas thaus kuv qhuabqha, tsi has qha huv mej tej tsev los yog huv tej tsev saablaaj, kuv yeej tsi laam muab tej zaaj kws yuav paab tau mej zais ca ib zag le. 21Kuv pheej ceebtoom rua cov Yudais hab Lwmtsaav Tuabneeg kuas suavdlawg yuavtsum tso puab tej kev txhum tseg hab ntseeg peb tug Tswv Yexus.
22“Nwgnuav, kuv noog Vaaj Ntsujplig tug dlawbhuv lug, kuv txhaj yuav moog rua nraag lub nroog Yeluxalees, tabsis tsi paub tas sov yuav muaj dlaabtsi tshwmsim rua kuv nyob rua nraag. 23Kuv tsuas paub lawvle Vaaj Ntsujplig tau ceebtoom rua kuv has tas, kuv yuav raug kaw huv tsev lojcuj hab yuav raug kev txomnyem nyob rua txhua lub nroog. 24Tabsis kuv tsi suav has tas kuv lub neej tseemceeb dlaabtsi; kuv tsuas xaav ua tegnum kws tug Tswv Yexus muab rua kuv ua kuas tav xwb. Tegnum ntawd yog qha Txuj Moo Zoo kws has txug Vaajtswv txuj moovhlub. #2Tim 4:7
25“Nwgnuav kuv paub tas mej cov kws kuv tau qha txug Vaajtswv lub Tebchaws rua lawm, yuav tsi rov pum kuv ntxiv le lawm. 26Yogle ntawd, nubnua kuv qha tseeb rua mej has tas, yog leejtwg raug kev puamtsuaj, tsi yog tim kuv. 27Ruaqhov kuv tub qha taagnrho Vaajtswv lub homphaj rua mej lawm, kuv yeej tsi tau zais ib qho le.
28“Mej yuavtsum saib mej tugkheej hab saib taagnrho paab yaaj kws Vaaj Ntsujplig tug Dlawbhuv muab tso rua mej ua tug saib. Mej yuavtsum saib Vaajtswv#20:28: Vaajtswv; tej phoo ntawv qub kws xuas teg sau, muaj tug Tswv. pawg ntseeg ib yaam le tug tswv yaaj saib nwg paab yaaj, vim Nwg tau txhwv pawg ntseeg ntawd lug ua Nwg tug, kws yog lug ntawm Nwg#20:28: lug ntawm Nwg cov ntshaav; lossis lug ntawm Nwg tug Tub txuj kev tuag theej txhoj; lossis lug ntawm Nwg tug Tub cov ntshaav. cov ntshaav. 29Kuv paub tas thaus kuv moog lawm, yuav muaj maa nyaum nkaag lug rua huv mej, hab puab yuav tsi tseg paab yaaj hlo le. 30Txawm yog huv mej cov kag los yuav muaj qeeleej sawv lug ntxeev txuj kev tseeb, ntxag cov ntseeg kuas caum puab qaab moog. 31Yogle ntawd, mej yuavtsum ncuntsoov ceevfaaj, hab ncuntsoov tas tau peb xyoos nkaus kws kuv quaj qawg qha mej suavdlawg nruabnub montuj tsi tuncua le.
32“Nwgnuav kuv muab mej tso rua ntawm Vaajtswv hab rua ntawm txujlug kws yog Nwg txuj moovhlub; qhov ntawd txhaj yuav paab tau mej hab yuav pub tau tej koobmoov kws Vaajtswv muab rua txhua tug kws yog Nwg tsaav tuabneeg. 33Kuv yeej tsi tau ntshaw leejtwg tej nyaj tej kub lossis tej rigtsho. 34Mej suavdlawg puavleej paub tas kuv hab cov phoojywg kws nrug kuv ua num tau noj tau naav tub yog vim kuv ob txhais teg khwv yug suavdlawg xwb. 35Txhua yaam num kws kuv ua khwv-khwv nuav yog ua qha kuas mej pum tas peb yuavtsum ua paab cov tuabneeg kws tsi muajzug. Ncuntsoov tej lug kws tug Tswv Yexus tau qha lawm has tas, ‘Kev pub ua rua muaj kev zoosab tshaaj le kev tau txais.’ ”
36Thaus Paulus qha puab taag lawm, nwg txawm nrug puab txhuscaug hab thov Vaajtswv. 37Thaus nwg yuav ncaim puab moog, suavdlawg quaj kawg le, puab txawm lug khawm nwg hab nwj nwg. 38Puab ntxhuvsab heev vim nwg tau has tas, puab yuav tsi pum nwg ntxiv le lawm. Yogle ntawd, puab txhaj xaa nwg moog rua nraag lub nkoj.
© 2022 United Bible Societies. All rights reserved.
Tegnum 20
20
Paulus Moog Tim Makedaunias Hab Akhayas
1Tomqaab kws txuj kev kubntxhuv ntawd tug lawm, Paulus txawm hu cov ntseeg tuaj uake, nwg haslug txhawb puab zug hab haslug ncaim puab, tes nwg txawm moog rua Makedaunias lawm. 2Thaus nwg taug kev moog, nwg qha ntau zaaj txhawb cov tuabneeg kws nyob huv tej cheebtsaam ntawd lub zug. Tes nwg txawm moog txug lub xeev Akhayas, 3hab nyob ntawd tau peb hlis. Thaus nwg taabtom yuav caij nkoj moog rua tim xeev Xilias, nwg nov tas cov Yudais tuavhuv yuav ua phem rua nwg, nwg txhaj txavtxim sab rovqaab moog hlaa peg lub xeev Makedaunias moog.
4Cov tuabneeg kws nrug Paulus moog yog Pilus tug tub Xaupataws kws nyob huv Npele-as, Alitakhus hab Xekudus kws nyob huv Thexalaunikes; Nkai-us kws nyob huv Dawnpis; Tikhikus hab Rhaufimus kws nyob huv Exias; hab Timautes. 5Puab cov ntawd xub uantej moog nyob rua huv lub nroog Rhau-as tog peb. 6Tomqaab ua Kevcai Noj Ncuav Tsi Xyaw Keeb taag, peb txawm caij nkoj tawm huv lub nroog Filipis moog. Peb moog tau tsib nub maamle moog txug lub nroog Rhau-as, hab peb nyob ntawd tau xyaa nub.
Paulus Moog Saib Lub Nroog Rhau-as Zag Kawg
7Thawj nub#20:7: Thawj nub; lossis Nubkaaj. ntawm lub limtam, peb tuaj sissau uake kws yog tuaj ua kevcai noj tug Tswv Rooj Mov. Paulus tau qhuabqha rua cov tuabneeg ntawd noog, nwg qha ntev loo moog txug ib taagmo, ruaqhov nub tomqaab ntawd xwb tes nwg yuav tau ncaim puab moog. 8Chaav tsev txheej sau kws peb saablaaj ntawd, puab taws ntau lub teeb.
9Muaj ib tug hluas hu ua Yutikhus, nwg nyob ntawm lub qhovrais. Thaus Paulus qha ntev loo moog ntxiv, Yutikhus txawm tsaugzug zujzug tuaj; thaus kawg nwg cale loojhlas hab poob nroog ntawm lub qhovrais txheej tsev thib peb rua huv aav. Thaus puab moog tsaa nwg, tes nwg tub tuag lawm. 10Tabsis Paulus txawm nqeg kag moog, nyo ntshis hab puag nkaus tug hluas ntawd, hab has tas, “Tsi xob txhawj, nwg tseem cajsa!” 11Tes Paulus txhaj nce rov moog rua sau tsev, muab ncuav lug ndlais hab faib rua suavdlawg noj. Paulus nrug suavdlawg thaam ntev loo moog txug ncua thaus kaajntug, nwg maamle ncaim puab moog lawm. 12Suavdlawg pum tug hluas ntawd tseem muaj sa, puab zoosab kawg le, puab txawm coj nwg moog tsev.
Moog Ntawm Rhau-as Rua Miletus
13Peb uantej moog rua nraag lub nkoj hab caij nkoj moog rua nraag lub nroog Axaus, qhov chaw kws peb yuav tog Paulus nrug peb moog. Nwg tub xub has kuas peb ua le ntawd lawm, ruaqhov nwg yuav moog kutaw moog rua nraag. 14Thaus nwg ntsib peb nraag lub nroog Axaus lawm, peb txhaj coj nwg nrug peb caij nkoj moog rua nraag lub nroog Mitilenes. 15Peb caij nkoj ntawm qhov chaw ntawd moog hab nub tomqaab peb maam moog txug rua ntawm lub povtxwv Khi-aus. Ib nub tomqaab ntxiv, peb moog txug lub povtxwv Xamaus, hab nub tomqaab ntxiv hab, peb maam moog txug nraag lub nroog Miletus. 16Paulus tau txavtxim sab caij nkoj moog kuas dlhau plawg lub nroog Efexus, sub txhajle tsi noj sijhawm rua huv xeev Exias, vim nwg maaj moog kuas txug nraag lub nroog Yeluxalees, seb moog puas ncaav nub Pheetekhos.
Paulus Haslug Ncaim Rua Cov Txwjlaug Kws Tuaj Peg Efexus Tuaj
17Thaus Paulus tseem nyob huv lub nroog Miletus, nwg tau khaiv tuabneeg moog hu cov txwjlaug kws saib pawg ntseeg huv lub nroog Efexus kuas tuaj ntsib nwg. 18Thaus puab tuaj txug lawm, nwg has rua puab has tas, “Suav txij le nub kws kuv tuaj txug rua huv lub xeev Exias, mej yeej paub tas kuv ua kuv lub neej zoo lecaag. 19Kuv tau ua tug Tswv teg dlejnum lug ntawm kev txu fwjchim hab lub kuamuag poob; muaj ntau yaam teebmeem tuaj raug kuv vim cov tuabneeg Yudais tuavhuv ua phem rua kuv. 20Mej yeej paub tas thaus kuv qhuabqha, tsi has qha huv mej tej tsev los yog huv tej tsev saablaaj, kuv yeej tsi laam muab tej zaaj kws yuav paab tau mej zais ca ib zag le. 21Kuv pheej ceebtoom rua cov Yudais hab Lwmtsaav Tuabneeg kuas suavdlawg yuavtsum tso puab tej kev txhum tseg hab ntseeg peb tug Tswv Yexus.
22“Nwgnuav, kuv noog Vaaj Ntsujplig tug dlawbhuv lug, kuv txhaj yuav moog rua nraag lub nroog Yeluxalees, tabsis tsi paub tas sov yuav muaj dlaabtsi tshwmsim rua kuv nyob rua nraag. 23Kuv tsuas paub lawvle Vaaj Ntsujplig tau ceebtoom rua kuv has tas, kuv yuav raug kaw huv tsev lojcuj hab yuav raug kev txomnyem nyob rua txhua lub nroog. 24Tabsis kuv tsi suav has tas kuv lub neej tseemceeb dlaabtsi; kuv tsuas xaav ua tegnum kws tug Tswv Yexus muab rua kuv ua kuas tav xwb. Tegnum ntawd yog qha Txuj Moo Zoo kws has txug Vaajtswv txuj moovhlub. #2Tim 4:7
25“Nwgnuav kuv paub tas mej cov kws kuv tau qha txug Vaajtswv lub Tebchaws rua lawm, yuav tsi rov pum kuv ntxiv le lawm. 26Yogle ntawd, nubnua kuv qha tseeb rua mej has tas, yog leejtwg raug kev puamtsuaj, tsi yog tim kuv. 27Ruaqhov kuv tub qha taagnrho Vaajtswv lub homphaj rua mej lawm, kuv yeej tsi tau zais ib qho le.
28“Mej yuavtsum saib mej tugkheej hab saib taagnrho paab yaaj kws Vaaj Ntsujplig tug Dlawbhuv muab tso rua mej ua tug saib. Mej yuavtsum saib Vaajtswv#20:28: Vaajtswv; tej phoo ntawv qub kws xuas teg sau, muaj tug Tswv. pawg ntseeg ib yaam le tug tswv yaaj saib nwg paab yaaj, vim Nwg tau txhwv pawg ntseeg ntawd lug ua Nwg tug, kws yog lug ntawm Nwg#20:28: lug ntawm Nwg cov ntshaav; lossis lug ntawm Nwg tug Tub txuj kev tuag theej txhoj; lossis lug ntawm Nwg tug Tub cov ntshaav. cov ntshaav. 29Kuv paub tas thaus kuv moog lawm, yuav muaj maa nyaum nkaag lug rua huv mej, hab puab yuav tsi tseg paab yaaj hlo le. 30Txawm yog huv mej cov kag los yuav muaj qeeleej sawv lug ntxeev txuj kev tseeb, ntxag cov ntseeg kuas caum puab qaab moog. 31Yogle ntawd, mej yuavtsum ncuntsoov ceevfaaj, hab ncuntsoov tas tau peb xyoos nkaus kws kuv quaj qawg qha mej suavdlawg nruabnub montuj tsi tuncua le.
32“Nwgnuav kuv muab mej tso rua ntawm Vaajtswv hab rua ntawm txujlug kws yog Nwg txuj moovhlub; qhov ntawd txhaj yuav paab tau mej hab yuav pub tau tej koobmoov kws Vaajtswv muab rua txhua tug kws yog Nwg tsaav tuabneeg. 33Kuv yeej tsi tau ntshaw leejtwg tej nyaj tej kub lossis tej rigtsho. 34Mej suavdlawg puavleej paub tas kuv hab cov phoojywg kws nrug kuv ua num tau noj tau naav tub yog vim kuv ob txhais teg khwv yug suavdlawg xwb. 35Txhua yaam num kws kuv ua khwv-khwv nuav yog ua qha kuas mej pum tas peb yuavtsum ua paab cov tuabneeg kws tsi muajzug. Ncuntsoov tej lug kws tug Tswv Yexus tau qha lawm has tas, ‘Kev pub ua rua muaj kev zoosab tshaaj le kev tau txais.’ ”
36Thaus Paulus qha puab taag lawm, nwg txawm nrug puab txhuscaug hab thov Vaajtswv. 37Thaus nwg yuav ncaim puab moog, suavdlawg quaj kawg le, puab txawm lug khawm nwg hab nwj nwg. 38Puab ntxhuvsab heev vim nwg tau has tas, puab yuav tsi pum nwg ntxiv le lawm. Yogle ntawd, puab txhaj xaa nwg moog rua nraag lub nkoj.
© 2022 United Bible Societies. All rights reserved.