Tegnum 12
12
Cov Ntseeg Yexus Raug Kev Tsimtxom Ntxiv
1Lub sijhawm ntawd Vaajntxwv Helauj#12:1: Vaajntxwv Helauj: Yog Helauj Akipas tug thib Ib kws kaav taagnrho tebchaws Yixalayees. tau pib muab qeeleej kws nyob huv pawg ntseeg coj moog tsimtxom. 2Nwg tau muab ntaaj tua Yakaunpaus kws yog Yauhaas tug tijlaug povtseg. 3Thaus nwg pum tas qhov kws nwg ua ntawd hum cov Yudais sab, nwg txawm nteg Petus hab. (Thaus ntawd yog lub sijhawm kws ua Kevcai Noj Ncuav Tsi Xyaw Keeb.) 4Tomqaab nteg tau Petus lawm, puab coj nwg moog kaw rua huv tsev lojcuj hab kuas plaub paab tubrog zuv nwg, ib paab twg muaj plaub leeg. Helauj xaav tas, tomqaab kws ua kevcai Hlaa Dlhau taag, nwg yuav coj Petus lug txavtxim taabmeeg cov pejxeem. #Tsiv 12:1-27 5Tabsis thaus Petus tseem raug kaw huv tsev lojcuj, cov ntseeg kubsab lug thov Vaajtswv paab nwg.
Petus Dlim Huv Tsev Lojcuj
6Mo kws uantej Helauj yuav coj Petus lug rua cov pejxeem, Petus pw tsaugzug huv ob tug tubrog kis nruabnraab. Luas muab ob txuj saw hlau khi nwg hab yeej muaj tubrog zuv ntawm lub qhovrooj kws nkaag rua huv lub tsev lojcuj huv tuabsi. 7Taamsim ntawd tug Tswv ib tug timtswv txawm lug sawv rua ntawd, hab muaj dluab ci laamlug rua huv chaav tsev ntawd. Tug timtswv tuav nkaus Petus xubpwg dlaj kuas nwg tsim hab has tas, “Kawg-kag! Cale sawv!” Tes taamsim ntawd ob txuj saw hlau kws khi Petus ob txhais teg txawm nplaam plawg lawm.
8Tug timtswv has rua Petus has tas, “Cale sa hlaab khovkho hab rau khau.” Petus txawm ua le ntawd. Tug timtswv has ntxiv tas, “Cale muab koj lub tsho ntev naav hab lawv kuv qaab.” 9Petus txawm lawv tug timtswv qaab tawm moog rua saabnrau. Petus tsi paub tas sov qhov kws tug timtswv ua ntawd puas yog tseeb tag; nwg xaav tas ntshe yog nwg ua ywgtoog pum dlaabtsi xwb. 10Obtug moog dlhau thawj paab tubrog hab moog dlhau paab thib ob, tes txawm moog txug ntawm lub roojvaag hlau kws yuav moog rua huv lub nroog. Lub roojvaag nwg txawm cale qheb nwg rua obtug, tes obtug txhaj tawm moog lawm. Obtug taug kev moog mivntsiv tes tug timtswv txawm cale pluj ntshis ntawm Petus moog lawm.
11Thaus ntawd Petus txhaj feeb meej hab nwg has tas, “Zagnua kuv paub tseeb has tas Vaajtswv khaiv Nwg tug timtswv lug cawm kuv dlim ntawm Helauj txhais teg hab dlim ntawm txhua yaam kws cov Yudais yuav ua rua kuv.”
12Thaus Petus paub le ntawd, nwg txhaj moog rua tom Malis, kws yog Yauhaas Malakaus nam, lub tsev. Muaj tuabneeg coob-coob tau tuaj nyob uake rua huv hab thov Vaajtswv. 13Petus khob lub qhovrooj saabnrau, tes ib tug nkaujqhe hu ua Laudas txawm lug xauj seb yog leejtwg. 14Thaus nwg ncu tau has tas yog Petus lub suab, nwg zoosab heev, nwg tsi ncu qheb qhovrooj, nwg txawm cale dlha rov moog qha rua suavdlawg has tas Petus taabtom sawv saabnrau. 15Puab has rua nwg has tas, “Koj vwm lawm vob!” Tabsis nwg has tas yeej yog Petus tag-tag le. Puab txawm has tas, “Ntshe yog Petus tug timtswv xwb.”
16Petus tseem rausab ntso khob qhovrooj. Thaus kawg puab txhajle qheb qhovrooj, thaus puab pum nwg lawm, puab xaav tsi thoob le. 17Petus cu teg kuas suavdlawg nyob tuabywv, tes nwg txawm qha seb tug Tswv coj nwg tawm lecaag huv tsev lojcuj lug rua puab noog. Hab nwg has rua puab has tas, “Mej cale moog qha tej nuav rua Yakaunpaus hab cov ntseeg suavdlawg paub,” tes nwg txawm moog rua lwmqhov lawm.
18Thaus kaajntug, cov faajxwm kws zuv lub tsev lojcuj ntxhuvsab kawg nkaus le. Puab sisnug zumzawg has tas Petus dlua twg lawm? 19Helauj khaiv tuabneeg moog nrhav Petus, tabsis puab nrhav tsi tau Petus. Yogle ntawd nwg txhaj hu cov faajxwm kws zuv lub tsev lojcuj lug nug hab kuas muab puab coj moog tua povtseg.
Tomqaab ntawd Helauj tawm huv lub xeev Yudas moog nyob tau ib ntus peg lub nroog Xixaleyas.
Helauj Tuag
20Helauj chim heev rua cov tuabneeg kws nyob huv lub nroog Thailes hab Xidoos, yogle ntawd puab txhaj sissau ib paab tuaj cuag nwg. Puab xub moog cuag Nplaxatus, kws yog tug saib Helauj lub tsev, kuas nwg paab puab. Dlhau ntawd, puab maamle moog cuag Helauj hab thov nwg pub kev nyaabxeeb rua puab, ruaqhov puab txuj kev noj kev haus yog lug ntawm Helauj lub tebchaws lug xwb.
21Thaus txug nub kws tau teem tseg lawm, Helauj naav nwg cev rigtsho vaajntxwv hab nyob sau nwg lub zwmtxwv haslug rua cov pejxeem. 22Cov pejxeem txawm qw nrov-nrov has tas, “Tej lug nuav tsi yog tuabneeg has, tabsis yog ib tug nyuas vaajtswv has!” 23Taamsim ntawd tug Tswv ib tug timtswv txawm lug rautxim kag rua Helauj, ruaqhov nwg tsi muab lub meejmom rua Vaajtswv; nwg txhaj raug kaas muab nwg noj ua rua nwg tuag lawm.
24Tabsis Vaajtswv Txujlug najnub nthuav dlaav hab lujhlub zujzug.
25Thaus Npananpas hab Xaulus obtug ua tej dlejnum tav lawvle tau npaaj tseg lawm, obtug txhaj tawm#12:25: tawm huv lub nroog Yeluxalees moog; tej phoo ntawv qub kws xuas teg sau, muaj rov moog rua huv lub nroog Yeluxalees. huv lub nroog Yeluxalees moog, hab coj Yauhaas Malakaus nrug obtug moog.
© 2022 United Bible Societies. All rights reserved.