2 Kauleethaus 6
6
1Peb cov kws nrug Vaajtswv ua dlejnum, peb thov nquahu rua mej kuas tsi xob nkim Vaajtswv txuj moovhlub kws mej tau txais lawm. 2Ruaqhov Vaajtswv has tas:
“Thaus lub sijhawm kws Kuv txaussab,
Kuv yeej noog koj tej lug thov;
hab nub kws muaj kev dlim txim,
Kuv yeej paab koj.”
Mej ua tuabzoo noog! Taamsim nuav yog lub sijhawm kws Vaajtswv txaussab, taamsim nuav yog nub kws muaj kev dlim txim. #Yaxaya 49:8
3Peb tsi xaav kuas leejtwg thuam tau peb tegnum, peb txhaj tsi muab ib yaam dlaabtsi lug cuab leejtwg kev. 4Txhua yaam kws peb ua, peb yeej ua kuas suavdlawg pum tas peb yog Vaajtswv cov tubkhai, lug ntawm qhov kws peb ua sabntev tiv teebmeem, kev tuncua, hab kev txomnyem. 5Peb raug nplawm, raug kaw, hab raug kev kubntxhuv; peb ua num khwv-khwv, yoo dlaabndlub, nyaj tshaib yoo nqhes. #Tegnum 16:23 6Lug ntawm peb lub sab dlawbhuv, peb txuj kev paub, kev ua sabntev, hab kev ua sabdlawb sabzoo; kws yeej yog lug ntawm Vaaj Ntsujplig tug Dlawbhuv, hab lug ntawm lub sab hlub tag-tag; 7lug ntawm peb tej lug tseeb, hab lug ntawm Vaajtswv lub fwjchim. Peb muaj txuj kev ncaajnceeg lug ua tej cuabyeej kws peb siv tawmtsaam yeebncuab hab tivthaiv peb tugkheej. 8Peb raug fwm hab raug saib tsi taug; raug txobthuam hab raug qhuas. Txawm yog peb has tej lug tseeb xwb los tseem raug lam has tas peb yog tuabneeg dlaag; 9peb zoole cov tuabneeg kws tsi muaj leejtwg paub, tabsis suavdlawg puavleej paub peb; peb zoole cov kws tub tuag lawm, tabsis mej sim saib seb, peb tseem muaj sa nyob; peb raug tsimtxom, tabsis tsi tuag. 10Txawm muaj kev tusab los tseem zoosab puvnpo; txawm yog pluag los tseem ua rua ntau leej npluanuj; txawm tsi muaj ib yaam dlaabtsi le los txhua yaam puavleej tseem yog peb tug.
11Cov kwvtij kws nyob huv lub nroog Kauleethaus 'e, peb yeej qheb sab qheb ntsws rua mej hab yeej tsi zais ib qho le. 12Peb tsi tau zais sab rua mej, tsuas yog mej txhaj zais sab rua peb xwb. 13Qhov kws peb ib leeg ua ncaaj rua ib leeg tes yogle nuav, kuv has le kws mej yog kuv cov mivnyuas, mej yuavtsum qheb mej lub sab rua peb ib yaam le peb tub qheb peb lub sab rua mej lawm hab. Cale qheb mej lub sab kuas dlaav!
Ceebtoom Txug Cov Tsi Ntseeg Txuj Kev Haub-Ntxag
14Tsi xob moog nrug cov kws tsi ntseeg koom kwv ib tug quab, ruaqhov kev ncaajnceeg hab kev tsi ncaajnceeg yuav ua lecaag nyob tau uake? Kev kaaj hab kev tsaus yuav ua lecaag koom tau uake? 15Khetos hab dlaab ntxwgnyoog#6:15: dlaab ntxwgnyoog; lossis Npelias. yuav ua lecaag koom tau ib lub sab? Tug kws ntseeg yuav ua lecaag koom tau nrug tug kws tsi ntseeg? 16Yuav ua lecaag muab tau Vaajtswv lub Tuamtsev tso sistxig nrug tuabneeg nplajteb tej mlom? Ruaqhov peb yog Vaajtswv tug kws muaj sa nyob lub tuamtsev ntaag! Lawvle Vaajtswv tau has tseg has tas,
“Kuv yuav nrug puab nyob
hab nrug puab taug kev uake;
Kuv yuav yog puab tug Vaajtswv,
hab puab yuav yog Kuv tsaav tuabneeg.” #1Klt 3:16; 6:19; Levi 26:12; Exek 37:27
17Yogle ntawd, tug Tswv txhaj has tas,
“Mej yuavtsum muab puab tsotseg,
hab cais mej tugkheej tawm ntawm puab moog.
Tsi xob kov tej kws qas
Kuv txhajle txais yuav mej. #Yaxaya 52:11
18Kuv yuav ua mej txiv,
hab mej yuav yog Kuv cov tub cov ntxhais.
Tug Tswv kws muaj Fwjchim Luj Kawg Nkaus yog tug has cov lug nuav.” #2Xamu 7:14; 1Xwm 17:13; Yaxaya 43:6; Yelemi 31:9
© 2022 United Bible Societies. All rights reserved.