2 Kauleethaus 1
1
1Kuv yog Paulus, kws yog Yexus Khetos ib tug timthawj lawvle Vaajtswv tug dlejsab, hab lug ntawm peb tug kwv Timautes.
Xaa moog rua Vaajtswv pawg ntseeg kws nyob huv lub nroog Kauleethaus, hab taagnrho Vaajtswv tsaav tuabneeg kws nyob thoobplawg huv lub xeev Akhayas: #Tegnum 18:1
2Thov Vaajtswv kws yog peb Leejtxiv hab tug Tswv Yexus Khetos pub txuj moovhlub hab kev nyaabxeeb rua mej.
Paulus Ua Vaajtswv Tsaug
3Peb cale ua Vaajtswv kws yog peb tug Tswv Yexus Khetos Leejtxiv tsaug, Leejtxiv tug kws muaj txuj kev hlub hab Vaajtswv tug kws muaj kev taabncuab. 4Nwg txhawb peb lub zug thaus peb raug txhua yaam kev nyuajsab, sub peb txhaj muaj cuabkaav moog txhawb tau lwmtug lub zug thaus puab raug txhua yaam kev nyuajsab ib yaam le Vaajtswv tau txhawb peb lub zug lawm. 5Peb muaj feem nrug Khetos raug txuj kev txomnyem ntau npaum lecaag, lug ntawm Khetos, peb kuj muaj feem tau txais Vaajtswv txuj kev taabncuab ntau npaum le ntawd hab. 6Qhov kws peb raug kev txomnyem, yog kev txhawb mej lub zug hab paab kuas mej muaj kev cawmdlim; qhov kws Vaajtswv txhawb peb lub zug, yog kev txhawb mej lub zug ib yaam nkaus, kuas mej ua taug sabntev tiv tej kev txomnyem ib yaam nkaus le peb tub tiv lug lawm. 7Yogle ntawd, peb txhaj casab ruaj-khov rua mej, ruaqhov peb paub tas mej nrug peb raug kev txomnyem lecaag, tes mej yeej yuav tau nrug peb txais kev taabncuab ib yaam le ntawd hab.
8Cov kwvtij, peb xaav kuas mej paub txug tej teebmeem kws lug raug peb thaus peb nyob huv lub xeev Exias. Tej teebmeem ntawd nyaav kawg nkaus le, nyaav dlhau peb lub zug, ua rua peb taag kev casab has tas sov peb puas yuav muaj txujsa le lawm. #1Klt 15:32 9Qhov tseeb, peb xaav tas lub txim tuag lug raug rua peb lawm. Tabsis yuavtsum muaj le nuav sub peb txhajle tsi casab rua peb tugkheej, tabsis casab rua Vaajtswv tug kws tsaa tau tuabneeg tuag sawv rovqaab lug. 10Nwg tau cawm peb dlim ntawm txuj kev tuag kws phem kawg nkaus le, Nwg yeej yuav cawm kuas peb dlim; hab peb casab ntsoov rua Nwg has tas yaav tomntej nuav Nwg tseem yuav cawm peb ntxiv hab, 11vim mej najnub paab peb lug ntawm mej txuj kev thov Vaajtswv. Muaj coob leej tau thov Vaajtswv paab peb, mas Vaajtswv tau teb suavdlawg tej lug thov, hab Vaajtswv tseem yuav foom koobmoov rua peb; hab muaj coob leej yuav tsaa puab lub suab lug ua Vaajtswv tsaug.
Paulus Ncua Tsi Moog Saib Cov Ntseeg
12Peb zoosab qhov kws peb lub sab qha rua peb paub tas peb lub neej huv nplajteb nuav, tshwjxeeb yog peb txuj kev phoojywg nrug mej, peb ua nrug txuj kev ncaajnceeg hab ua nrug nploojsab dlawbpaug#1:12: dlawbpaug; tej phoo ntawv qub kws xuas teg sau, muaj dlawbhuv. lug ntawm Vaajtswv. Peb ua tau le ntawd, tsi yog peb ua lawvle peb lub tswvyim tabsis yog lawvle Vaajtswv txuj moovhlub xwb. 13-14Ruaqhov peb yeej tsi sau lwmyaam tuaj rua mej, tsuas yog sau tej kws mej muaj peevxwm nyeem hab totaub tau xwb. Txawm yog nwgnuav mej tsuas totaub mivntsiv txug peb xwb los, kuv casab has tas mej yuav totaub txhua yaam txug peb, sub nub kws peb tug Tswv Yexus rovqaab lug, mej yuav txaussab rua peb ib yaam le peb txaussab rua mej hab.
15Thaus kuv paub meej le nuav lawm, kuv txhaj npaajsab uantej has tas kuv yuav xub tuaj saib mej kuas mej tau koobmoov ob npaug. 16Kuv npaajsab has tas kuv yuav tuaj saib mej thaus kuv tuaj moog rua Makedaunias, hab thaus kuv rov lug kuv yuav lug saib mej dlua, sub mej txhaj paab xaa tau kuv moog rua nraag lub xeev Yudas. #Tegnum 19:21 17Thaus kuv npaaj tej nuav lawm, kuv tseem yuav hloov sab hab lov? Lossis puas yog kuv npaaj lawvle tuabneeg nqajtawv npaaj kws has tas “Tuaj, tuaj,” tabsis ho “Tsi tuaj, tsi tuaj” nua lov?
18Vaajtswv yeej yog tug ncaajnceeg, tej lug kws peb has rua mej tsi yog tej lug kws has tas, “Ua” hab “Tsi ua.” 19Ruaqhov Vaajtswv tug tub Yexus Khetos, tug kws Xilas, Timautes hab kuv tau qhuabqha rua mej ntawd, Nwg tsi yog tug kws has tas, “Ua” hab “Tsi ua,” tabsis Nwg yeej ibtxwm has tas “Ua” nua xwb. #Tegnum 18:5 20Ruaqhov txhua yaam kws Vaajtswv tau coglug tseg lawm, Yexus yog tug “Ua” huv tuabsi. Tub yog vimle nuav peb txhajle has “Amees” lug ntawm Yexus Khetos lub npe, kws yog ua rua Vaajtswv tau koobmeej. 21Vaajtswv yog tug kws ua rua peb hab mej nyob ruaj-khov rua ntawm Khetos, Nwg yog tug kws muab peb tsaa rua ibcaag, 22Nwg muab Nwg lub cim lug nas rua peb, hab Nwg pub Vaaj Ntsujplig tug Dlawbhuv lug nyob rua huv peb lub sab kws yog ua timkhawv qha has tas peb yuav tau txhua yaam kws Nwg npaaj tseg ca rua peb lawm.
23Kuv thov Vaajtswv nrug ua kuv tug timkhawv, vim Nwg paub kuv lub sab! Qhov kws kuv tsi tau rovqaab tuaj rua huv lub nroog Kauleethaus yog kuv xaav txuag mej xwb. 24Peb tsi yuam has tas mej yuavtsum ntseeg lecaag, ruaqhov peb paub tas mej yeej sawv khovkho rua ntawm txuj kev ntseeg lawm, tabsis peb xaav nrug mej ua dlejnum uake kuas mej muaj kev kaajsab xwb.
© 2022 United Bible Societies. All rights reserved.