O waamulha 15
15
Nasansoni anowaakottolha Afilisti
1Avireke mahuku, ikatema yo nlhaalha wo ukhwachiya ingaano, Nasansoni ahonkusha mwaapuri, nkaarwaa uwaashikuriani ahanu aya. Nkayoolhumana ahokohi aya wo weerelha wiira, “Kinothanana urwaa uchuumbani wa ahanu aka.”
Nansho ahokohi ayo ahachiichiha wiira ahikelhe. 2Nkeerelha Nasansoni wiira, “Miyaano kahochuwelha wiira khamwaattunne mena. Paahi kahaathelhiha ampwana inyu. Ata inakhalhaka chiicho, vaa ahaawo nhima aya. Munthelheke etu yoyo baada yo ayo.”
3Nasansoni nkaakhulha wo wiira, “Vano, kinokhalha ni nlhatu wo ukhuwachiya, wo nlhatu wo ittu kinohalha aka waapangelha Afilisti iyo.”
4Paahi Nasamsoni nkaarwa, nkaavara anancheto imia ttaru ni waattuka miilha chaya vamoka eelhi elhi. Yamalheke nkayeesha nttuko wo kila anancheto eelhi elhi. 5Vaamalhinhe aya uparihelha mithuko ni waahiyacha anancheto ayo, aattawelhanche mmamatani mwa Afilisti nkayaapahacha mooro ihiru cho ingaano, ni ingaano yaari ihinaya ukhunguriya, ni upaha ni miri cho mizeituni. 6Afilisti vaakohananche aya wiira mpani pangilhe yayo, ahaakhulhiya wiira, “Nasansoni, nhokohi naya yayo, phi pangilhe yeyo ittu iyo, wo nlhatu wo ahokohi aya waathelhiha ahanu a Nasansoni wa mmirawo mmoka yeemelhenlhe Nasamsoni u arusini.” Paahi Afilisti ahorwaacha nkayampaha mooro nthiyana ulhe vamoka ni athumwanawe.
7Nasansoni nkeerelha Afilisti wiira, “Ukhalhawaya nihopanga chittu thoko chechiyo, paahi kinoulhupelha wiira akinothama va mpaka vanohalha aka uhokolhoshera.” 8Paahi Nkaatakacha chinene ni weevakacha attu enchi. Yamalheke, nkayaarwaa uukhalhani unikhukuni umwalhani Uetamu.
Nasansoni anowakottolha Afilisti
9Paahi Yamalheke yayo, Afilisti ahowaacha nkayeesha nipuro naya ilhapo yo Uyuda ni uchokholha ukelhelha ilhapo yo Ulehi. 10Attu o ilhapo yo Uyuda nkayaakoha, “Chani nnonaatakacherani?”
Ni ayo nkayaakulha wiira, “Kipangilhe thoko chipangilhe aya ni ayo uwannyaka.”
11Paahi attu maelufu mararu o ukhuma Uyuda ahorwaa unikhukuni umwalhani Uetamu u Nasansoni ni weerelha wiira, “Chani kanchuwenlhe wiira Afilisti phi anonitawara hii? Paahi nkoonani chinre inyu wo unithapaniha!”
Nasansoni Nkaakhulha eeraka, “Thoko chipangenlhe aya, ni mii phinre aka wo waapangelha chiicho.”
12Attu ayo ni ayo nkeera, “Paahi etu nihowa nuuttukeni ni urweeheni uwannaya.”
Nasansoni nkaakhulha, “Nkilhupelheke etu wiira mwaatti mwaashinene khannokiva.”
13Ni attu ayo nkaathepa wiira, “Hii khaninowiivani, nansho ninouttukani etu ni urweehani uwannyaya.” Paahi nkaattuka wo mikhoyi cho naanano piilhi ni waakumiha nnikhukuni mmo. 14Vaapilhe aya Ulehi, Afilisti ahottimakacha uwa attapelhelhaka. Nansho wo uhikhulhuvelhiya iphumu ya Apwiiya Nlhuku yahaakhuruwelha Nasansoni o machiri ni mikhoyi chaathukiye aya mmiononi waya chilhe nkachaakwatuwacha thoko ikitani ivanre mooro, nkachaathaphuwa nkachaamora vathi. 15Nasansoni nkayoona nikhuva no nrama no iphuta, nkayaarokotta ni uphanga ikerero yo weevelha attu, nkayeevakacha attu elufu imoka. 16Paahi Yamalheke Nasansoni aheepa Ichipo neera,
“Kiheevakacha attu elufu imoka,
wo waata mi wo nikhuva no nrama no iphuta,
Wo nenno nikhuva no nrama no iphuta nno,
kihokhupacha mapuhe o mitembo.”
17Vaamalhinhe aya wulhumacha, ahoriha nrama nno vathi. Vavawo vakittu etu nkaweehaniya Ramathlehi, maana aya mwaako wo nikhuva no nrama.
18Yamalheke Nasansoni ahowolhiya nttona chinene. Paahi nkayaalhepelha Apwiiya Nlhuku yeeraka wiira, “Inyu Nlhuku, phi inyuva mmwihilhe ulha noopo ulha, wo ukiruma mii karumiya inyu. Chani vano nnokihiya wiira kikhwe wo nttona ni uvariya mateeka ni Afilisti o uhineelhiya alha?” 19Nansho Nlhuku nkaapatakulha vakittu vaari ni nlhikiti Uleki uwo, nkaakhoolhiha maashi. Nasansoni nkaawuria maashi ni machiri aya nkayaahokolhelha. Nnno nrapo nno nkaneehaniya, Enhakore, ni nno nihaawo Ulehi uwo mpaka lhelho nna.
20Nasansoni nkaakhalha ntu o waamulha a attu o Uisraeli iyaakha makhumi meelhi, ikatema ya Afilisti.
The Bible Version in Makua @The Word for The World International and Makua Language translators. All rights reserved.