2 CORINTHNAO 1
1
1 #
Eph 1.1; Col 1.1; 2 Cor 1.19; Ots 16.1; 18.1. Varivarawui ningkachāng athishurda Khrista Jishuwui paokazata ngasā kahaia Paul eina avānao Timothyna Corinthli khalei Varewui church kala Achaiali khalei Varewui mibing saikorali kagapina. 2#Rom 1.7. Ithumwui Avāva̱ Varivara kala Proho Jishu Khristana nathumli lukhamashan kala chingri kahai tāshungmiranu.
Paulna Vareli Ningkashi Khami
3 #
Eph 1.3; 1 Pet 1.3; Rom 15.5. Ngachonmiching kaje Vare, lumashankatha Avāva̱ kala ithumwui Proho Jishu Khristawui Avāva̱li ningshisa. 4#2 Cor 7.6-7; 13. Ana ithumwui kachotkachāngli ringphā ngasakmi, chiwui vang eina ithumli Varena ringpha khangasak chi tākam eina ithumnala kakhanang samkaphanga athum chili ringpha ngasakmishapa. 5Khristawui kakhanang tarākha ithumla phungkhangarum chithada Khristawui mangā eina ringkaphālila kachungkha ringphāruma. 6Ithumna kachotkachāng samphangakha chi nathumli ngachon khavai kala kahui samphang khavaina. Ithumli ngachonmihaiakha nathumli ngachonmi kahaina kala ithumna kachotkachāng khāngkahai tākam eina nathumla khāngthei khavai pangshap mihaira. 7Ithumna nathumli kachihān chi mangacheilakmana; kaja nathumna ithumli kakhanang phungkharum thada ringkaphālila mathānruma kaji ithumna thei.
8Ivānaobing, Asiali ithumna kachotkachāng samkaphang chi nathumli phaningung ngasakngai. Ithumwuitungli parkahai kachotkachāng chi haknai; kala ritnāhaoda ithum ringrada machihānsāmana. 9Shaothat khavai hukum mihao-eili da phaningsai; kha otshot chi ithum khalattali machihānla katheli ringkhangasaka Vareli chihānthei khavai ngasāsai. 10Chiyakha ka̱lākashiwui eina ana kanshokmi, ana kanmiluira kala ana kanmichingra kaji ithumna chihāntitta lei. 11Nathumna ithumwui vang seihāsak eina ngachonmi. Chithada sāda ithumwui vang seihā sāmi kahai saikora ngahānkāmira kala Varena ithumli somira, kala mi kachungkhana ithumwui vang Vareli ningshira.
Paulwui Angarān-angayeili Khangachei
12Mikumowui thangkhameina maningla Varewui lukhamashanwui pangshap eina ithumna okathui hili mataimeikapta nathum eina ithumwui khangashik hi Varena khami ningkhakasā kala ningkathar eina munga kaji hi ithumwui mashun-makhuina chitheikhamiwui vang ithumna langsoi. 13Nathumna pākhuishapki kaji kala theishingkhuishapki kajimāng ithumna kagapina 14Kha nathumna ithumli teomeikha bhap tākahai thada, naoda nathumla bhap tāserhaora da phaninga, chieina ithumwui Proho Jishuwui Zimiksholi ithumna nathumwui vang lāngsokapai thada nathumna ithumwui vang eina lāngsopaira.
15Ina hi theishingkakhuiwui vang nathumwuili rāri khavai phaningsai, chi nathum ringphāmei mahaimei khavaina. 16Judea khavāli nathumwui khangachon samphang khavai ina Macedoniali khavāshongla, khaungshongla nathumli rāsamphang khavai phaningda lei. 17Iwui khangarān hi ngacheizarnai da phaningla? Kala okathui ot kasā thada “Ya” jikhashi “Ngga” jikhashi kaji thada phaningla? 18Varena khamashung tui khamatui thada, ina nathumli “Ninglapai” “Maninglapai” kaji tui mahānglakmana. 19#1 Thes 1.1; Ots 15.22. Silvanusna nilala, Timothyna nilala, ina nilala tamchitheida khalei Varewui Naomayara Jishu Khrista hiya “Ninglapai” “Maninglapai” kaji maningmana. Kha awuili Varewui “Ninga” kaji lei. 20#1 Cor 14.16; Phon 3.14. Kaja Varewui ngashit kahahaili “Ninga” kaje chi ana. Chiwui vang eina Vareli tekmatei khavai Jishu Khristawui mingli ithumna “Amen” kajina. 21Nathum ithum Khristali okthuirum khavai Varena kasāna. 22Ana ithumli mahor nammihaira kala naodala sokhami mira kajiwui khudam sāda ithumwui wuklungli Manglā Kathara sangmida ngashitmihaira.
23Vare iwui shākhina, chiya nathumli masheikhautkhangaiwui vang ina Corinthli makharāna. 24Nathumna khili shitsangrakhala da hāngchithei khavai kasā maningmana; nathumwui shitkasang ngatarda lei kaji thei. Nathumwui ringphā khavai ithumna sakkharumaya.
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.