1 SAMUEL 3
3
Prohona Samuelli Rākachithei
1Kateowa naoshinao Samuelna Eliwui azingli Proholi otram ngatha̱sai. Chitharan Prohona mili chan mangazekphāphāmana, kala marāmahāmiphāphāmana. 2Atam chitharan Eli ngazanhaida mik mathāda makathei atamna, chieina awui pamli pida leisai; 3Varewui thaomei chila masashimitrangsai, kala Samuelna Varewui ningkhami oko haikhavai pam Prohowui shimlungli pihairasai. 4Chieina Prohona, “Samuel! Samuel!” da kaho eina, ana “I hili leili!” da ngahānkai, 5kala ana Eliwuili yongvāda, “I hili leili, kaja nana ili hoi” da ahānga. Kha ana “I mahomana, ungpiluihaolu” da hānga. Chieina ana ungpihaowa. 6Kala Prohona, “Samuel!” da raholuishita kala Samuelna ngakarthuida Elili, “I hili leili, kaja nana ili hoi” da ahānga. Kha ana, “I mahomana, inao; ungpiluihaolu” da hānga. 7Samuel Proholi matheilakrangsai, Prohowui tuila ali maphongmilakrangsai. 8Prohona Samuelli kakathuma raholuishita; ana ngakarthuida Elili, “I hili leili, kaja nana ili hoi” da hānga. Chieina nao hili Prohona kaholakra da Elina phaningkhui. 9Chiwui vang eina Elina Samuelli hānga, “Ungpiulu, kala kalikhada ana raholuishitakha, ‘Proho, hāngmilu kaja narao I nganādalei da ngahānkālu.’” Chieina Samuelna awui apamli ungpihaowa.
10Kala Prohona ranganingda kharewui tākam eina, “Samuel! Samuel!” da hoi. “Kahāngmilu, kaja narao ina nganādalei.” da Samuelna ngahānkai. 11Chieina Prohona Samuelli hānga, “Yanglu, ina Israelwui alungli sākida khalei ot hi khanā khani kakā kachiva̱na shāda nganaringhaira. 12Chithang ina rida hāngkahai athishurda khare eina thuilaga khanao eina tangda Eliwui shimkhurli ungshung ngasakra. 13Kaja ana kathei khayonkhamāng chiwui vang ina awui shimkhurli katang makhavai tandi miki jihaira kaji ina ali hānga, kaja anaomayarabingna ili chipata, kala ana athumli mahāngmachinmana. 14Chiwui vang eina Eli shimkhurwui khayonkhamāng hi pha̱kaphayā lah kachigat hina atam kachida mapheomirarlakmarada ina ngashit kahaina.”
15Samuelna ngathor eina tangda piya; chiwui thili ana Prohowui shim khāmongbing ashohaowa. Kala Samuelna ali rākhamahā chi Elili hāngkida ngacheehaowa. 16Kha Elina Samuelli hokhuida hānga, “Inaomayara Samuel!” Kala ana, “I hili leili.” da ngahānkai. 17Kala Elina hānga, “Ana nali rakahāng chi khikhala? Ili mathumhailakalu. Kalikhada ana kahahāng chi nana thumhaiakha Varenala nali chithada sāra.” 18Chieina Samuelna mangathumlakla katonga chi hānga. Kala Elina hānga, “Chi Prohona; ana awui vang phara kaji chi sāranu.”
19Kala Samuelna rarsangmamānda Prohona ngasomi, kala awui tui akhala mangapatlakmana. 20Kala Israel saikora Dan eina thuilaga Beer-sheba vāshungda, Samuel hi Prohowui marān akhana da theikhui. 21Kala Shilohli Prohona Samuelli rachitheiluiya, kaja Proho akhalattana Samuelli awui tui eina rāphongmiluishita.
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.