1 CORINTHNAO 14
14
Manglāwui Lemmet
1Leikashi hi nathumwui kharin ngasā ngasaklu. Manglāna khami lemmetbingwui ngachaili mataimeikapta marānkhami chili kahaolu. 2Tuiyur khamatuia chi mikumoli maningla Vareli khamatuina, kaja khipānakha awui tui chi matheirarmana. Kha Varewui kathuka tui chi Manglāwui pangshapna matui khangasakna. 3Chithā-ilala phongkhami chiya mibingli tamkachitheina kala athumli khangachon, kakatom kala ringphāmei, mathānmei khavai kasāna. 4Tuiyur khamatuia chiya akhalatta katheimaya, kha phongkhami chiya church katongali ngachonmi.
5Nathum saikorali tuiyur khangatei matui ngasakngai kha phongkhami lemmet khaleia sāngasakngaimei. Kaja tuiyur khamatui chi khalatkhame maleiakha church katongawui vang kānkhanā maleimana. 6Ivānaobing, ina nathumli tuiyur eina rāmatuida nathumna iwui eina kānkhanā samphangrala? Varena phongkhami awor pao hākashok kala tamkachithei hibing hi ina makhuirāsāsi kaja nathumna kateokhala kānkhanā masamphangmara. 7Manglā makhangavā sipa̱, tingteilā kathā eina tangda kachui khanem akhon mathālak eina makhongakha khilaa kasākhala kaji khipāna theira? 8Kala talla̱ kakhongana mi khangahotwui talla̱khon mathālak eina makhongakha raili vāusa kajina da khipāna theira? 9Chithada sāda tuiyur eina khamatui chi shenglak eina mashākhuiakha khipāna theirakhala? Matuiphāphā khanganao thāhaora. 10Okathuili tuiyur kachungkha lei kha kakhalat makhalei tuiyur akhala maleimana: 11Ina makashā tui eina mi akhana rāngazekakha a kha̱minao thāhaowa, kala awui vang ila kha̱minao thāhaowa. 12Nathumna Manglāwui lemmet samphangngaihaogada, ot saikorawuitungli phāmeikap kaje church sākakāli khangachona lemmetbing chi shichinlu.
13Tuiyur khamatuia china kakhalat mathālak eina meikhaimishap khavai seihā sālu. 14Kaja chikathā tuiyur eina ina seihā sākha imanglāna seihā sai kha iwui ningva chili maleimana. 15#Eph 5.19; Col 3.16. Chithākha ina khi sāra? Ina imanglā eina seihā sāra, ining einala sāra; imanglā eina laa sāra, ining einala laa sāra. 16#1 Thot 16.36; Laa 106.48; Mat 15.36. Nana Vareli ningkashiwui seihā kasāli manglāmāng eina sākha, khokharumli kazanga mibing china kathada nawui seihā kasāli “Amen” sāngrakhala? Kaja nana seihā kasā chi kateina bhap matāmana. 17Nana mathālak eina seihā sālala kateiwui vang khikha khangachon maleimana.
18Nathum saikorali ina tuiyur chungmeida khamatuiwui vang Vareli ningshi. 19Kha churchwui khokharumliva tuiyurwui eina tuikhur thingthing hāngkhui kajiwui vanga theikhuikapai tuikhur phangāmāng kahāngna phāmei. 20#Eph 4.14. Ivānaobing nathumwui chukhamja̱li naoshinao mathaalu. Makaphā otli angangnao thada sālu kha chukhamaja̱li khararnao thada sālu. 21#Isa 28.11-12. Hithada kapihaida lei:
“Ngateihang kahai tuiyur khamatuia mibing
kala ngalei khangateiwui mibingwui morchai eina ina iwui mibingli matuira,
chithālala athumna ili manganāsangmara da
Prohona hānga.”
22Chiwui vang eina tuiyur khamatui hi shitkasangbingwui vang maningla mashitkasangbingwui machutkhui khavaina. Kha Varewui phongkhami hiya mashitkasangbingwui vang maningla shitkasangbingwui machutkhui khavaina.
23Chithākha church katongana kaziplakha saikorana tuiyur ngatateida matuiakha ayarwui mibingna kala mashitkasangbingna rāyanglaga kapāna majimarala? 24Kha mi kachiva̱na phongsi kaje mashitkasangbingna kala ayarwui mina kashā samphanglaga awui morei phaningkhui ngasakra. Ana shākakhui china ali bichar sāra. 25Awui ngathum kahai kaphaning chi phongyānghaora, kala kui mashungzangda Vareli khorumra kala “Kachangkhat Varena nathumli ngasoda lei” da ana hāngphatra.
Churchli Sākhangayi Achei-arei
26 #
Eph 5.19. Ivānaobing, nathumna kakazip chitharan kaikhana laa sai, kaikhana tamchithei, kaikhana phongmi, kaikhana tuiyur matui kala khangatei kaikhana khalatmi jiakha ithumna khi hāngusi! Kha kasāsā kachiva̱ china church ngashim khavai sālu. 27Kachikathāna tuiyur matuiki kaji leiakha khani kathumli malāngaranu, kala ava̱va̱na matuida khangatei akhana meikhaimiranu. 28Kha tui chi meikhaimishapa maleisaakha churchlungli kasaikha pamda a khalattali kala Vareli ngazekranu. 29Varewui pao samkaphanga mi khani kathumna matuiranu kala athumna kahāng chi kateibingna machukranu. 30Kha pamda khaleia akhana Varewui eina pao samphangakha matuikasāpā chi ngasāmhaoranu. 31Nathum saikora ngatakta matuisera, chithada tamkhui ngarokta kasatsang ngarokra. 32Marānbingwui manglā chi marānbingna kasingna. 33Kaja Vare hi pa̱khangapāwui Vare maningmana, kha chingri kahaiwuina.
Katharabingwui church saikorali kasā thada 34#1 Tim 2.11-12; 1 Pet 3.1. sha̱naobingna khokharumli kasaikha pamranu. Ainli hāngkahai thada athum mamatuipaimana, kha khangachona sāda pamranu. 35Athumna theikhangai leiakha gahara ngarāli shimli ngahānranu. Sha̱naona churchlungli khamatui kakhayak otna.
36Varewui tui chi nathumwui eina kharāla? Chi maningakha nathummāngli kharāla? 37Kachikathā akhana a paokazata akhana kala manglāli khangaphuma mina da phaningakha ina nathumli kakapi hi Varewui ningkhamina da ana theiphalungra. 38Kha ana hi khikha maningmana jiakha alila khikha maningmana jilu.
39Chieina ivānaobing, Varewui pao hākashokli ningsanglu; chithālala tuiyur khamatuibingli mahaphailu. 40Ot saikora achei-arei theilak eina kala ayat unglak eina sāphalungra.
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.