Xekhaliyas 8
8
Tus TSWV Coglus Yuav Txhimkho Lub Nroog Yeluxalees
1Tus TSWV uas muaj Hwjchim Loj Kawg Nkaus hais cov lus no rau Xekhaliyas tias: 2“Kuv tosntsoov yuav pab lub nroog Yeluxalees, vim Kuv hlub cov neeg hauv lub nroog ntawd heev, yog txoj kev hlub uas ua rau Kuv npautaws rau nws cov yeebncuab. 3Kuv yuav rov los nyob hauv Yeluxalees uas yog Kuv lub nroog dawbhuv. Yuav muab lub nroog Yeluxalees hu ua lub Nroog Ncajncees, thiab yuav muab tus TSWV uas muaj Hwjchim Loj Kawg Nkaus lub roob#8:3: tus TSWV uas muaj Hwjchim Loj Kawg Nkaus lub roob: Roob Xi-oos (saib Xi-oos tom cov lus uas teev tseg). hu ua Roob Dawbhuv. 4Cov neeg laus, tsis hais pojniam txivneej, uas laus heev thiab yeej nrig pas lawm xwb, yuav rov tau mus zaum tsaws ntawm tej chaw uasi hauv lub nroog. 5Thiab tej tub tej ntxhais yuav rov mus uasi puvnkaus hauv tej kev dua ib zaug ntxiv.
6“Tus TSWV hais tias, tejzaum zaj no yuav nyuaj heev rau cov neeg uas seem nyob tiam no, tiamsis yeej tsis nyuaj rau Kuv hlo li. 7Kuv yuav cawm Kuv haivneeg kom dim ntawm tej tebchaws uas lawv raug ntes poob mus ua luag qhev, 8thiab yuav coj lawv tim sab hnubtuaj thiab sab hnubpoob rov los nyob rau hauv lub nroog Yeluxalees. Lawv yuav ua Kuv haivneeg thiab Kuv yuav ua lawv tus Vajtswv, Kuv yuav kav lawv ntawm lub siab dawbpaug thiab txoj kev ncajncees.
9“Nej ciali kubsiab lug! Nimno nej twb hnov tej lus uas cov cev Vajtswv lus tau hais thaum lub sijhawm uas luag pib pua lub plagtsev uas yog rov txhimkho Kuv lub Tuamtsev dua tshiab lawm. 10Uantej lub sijhawm ntawd, yeej tsis muaj leejtwg ntiav taus neeg lossis tej tsiaj los ua haujlwm, thiab yeej tsis muaj leejtwg dim ntawm nws cov yeebncuab li. Kuv ua rau cov neeg ntawd kom ib leeg rov tawmtsam ib leeg. 11Tiamsis nimno Kuv yuav tsis ua rau cov seem tuag ntawm haivneeg no li Kuv ua yav tas los lawm. 12Lawv yuav cog lawv tej qoobloo thiab nyob thajyeeb lug; lawv tej txivhmab yuav txi ncw, av yuav zoo qoob heev thiab yuav muaj nag ntau. Kuv yuav muab tagnrho tej koobhmoov no rau kuv haivneeg uas seem tuag ntawd. 13Cov Yudais thiab cov Yixalayees! Yav tag los tej neeg txawv tebchaws ib leeg foom phem rau ib leeg hais tias, ‘Thov kom tej kev puastsuaj uas los raug cov Yudais thiab cov Yixalayees poob los raug koj ib yam nkaus!’ Tiamsis Kuv yuav cawm nej, ces cov neeg txawv tebchaws ib leeg yuav rov hais rau ib leeg tias, ‘Thov kom koj tau txais tej koobhmoov uas cov Yudais thiab cov Yixalayees tau txais lawm!’ Yogli ntawd, nej ciali ua siabloj thiab tsis txhob ntshai.”
14Tus TSWV uas muaj Hwjchim Loj Kawg Nkaus hais tias, “Thaum uas nej cov yawgkoob tau ua rau Kuv chim, Kuv yeej npajsiab tso kev puastsuaj los rau lawv thiab Kuv twb tsis hloov siab li, thiab Kuv ua rawsli Kuv tau npaj tseg lawm. 15Tiamsis nimno Kuv npajsiab yuav foom koobhmoov rau cov neeg hauv lub nroog Yeluxalees thiab hauv tebchaws Yudas. Yogli ntawd, nej tsis txhob ntshai. 16Ntawm no yog tej uas nej yuav tau ua: Ib leeg yuavtsum haislus tseeb rau ib leeg, txiavtxim ncajncees hauv tsev tu plaub—qhov uas yuav coj kev nyabxeeb los rau sawvdaws. #Efex 4:25 17Tsis txhob tuav tswvyim ua phem rau lwmtus. Tsis txhob coglus ua timkhawv tsis tseeb. Kuv ntxub txoj kev dag, kev ua tsis ncaj thiab uanruj uatsiv.”
18Tus TSWV uas muaj Hwjchim Loj Kawg Nkaus hais tej lus no rau Xekhaliyas tias: 19“Ua kevcai yoo mov thaum lub plaub hlis, tsib hlis, xya hli thiab lub kaum hli ntuj, yog cov kevcai zoosiab thiab lomzem rau cov neeg Yudais ntag. Nej yuavtsum nyiam qhov tseeb thiab txojkev nyabxeeb.”
20Tus TSWV uas muaj Hwjchim Loj Kawg Nkaus hais tias, “Lub sijhawm ntawd, yuav muaj neeg ntau#8:20: ntau; lossis tej nroog loj. lub nroog tuaj rau hauv Yeluxalees. 21Cov tibneeg uas tuaj hauv ib lub nroog tuaj, yuav hais rau cov neeg uas tuaj dua lwm lub nroog tuaj tias, ‘Peb tabtom tuaj pehawm tus TSWV uas muaj Hwjchim Loj Kawg Nkaus thiab thov nws foom koobhmoov rau peb. Nej ciali nrog peb mus los mas!’ 22Muaj neeg coob leej#8:22: coob leej; lossis ntau heev. thiab ntau haivneeg uas muaj hwjchim yuav tuaj pehawm tus TSWV uas muaj Hwjchim Loj Kawg Nkaus hauv lub nroog Yeluxalees thiab thov Nws foom koobhmoov rau lawv. 23Thaum txog lub sijhawm ntawd, kaum tus tibneeg txawv tebchaws yuav tuaj cuag ib tug neeg Yudais thiab hais tias, ‘Peb xav nrog nej tau koobhmoov, rauqhov peb hnov tias Vajtswv nrognraim nej nyob.’ ”
© 2022 United Bible Societies. All rights reserved.