Malakaus 6
6
Cov Neeg Hauv Naxalev Tsis Txais Yuav Yexus
(Mathais 13:53-58; Lukas 4:16-30)
1Yexus txawm tawm qhov ntawd rovqab mus rau hauv Nws lub zos, Nws cov thwjtim nrog Nws mus thiab. 2Hnub Xanpataus Yexus pib qhia hauv tsev sablaj. Cov neeg coob-coob uas hnov Yexus qhia xav tsis thoob li. Lawv sibnug zomzaws hais tias, “Nws tau tej no qhovtwg los? Lub tswvyim no yog leejtwg muab rau Nws? Uacas Nws thiaj ua tau txujci tseemceeb no? 3Nws puas yog tus kws kaw ntoo, uas yog Malis tus tub, thiab Nws cov kwv puas yog Yakaunpaus, Yauxes, Yudas thiab Ximoos? Puas yog Nws cov muam twb nrog peb nyob ntawm no thiab?” Cov neeg ntawd txawm tsis lees paub Yexus.
4Yexus hais rau lawv tias, “Tej neeg ob cag puavleej hwm tus xibhwb cev Vajtswv lus, tsuas yog cov neeg uas nyob hauv nws lub zos, nws cov kwvtij, thiab nws tsev neeg thiaj tsis hwm nws xwb.” #Yauh 4:44
5Yexus tsis ua tej txujci tseemceeb rau qhov ntawd, Nws tsuas yog tau tsa tes rau saum qeeleej kom zoo mob xwb. 6Yexus xav tsis thoob, rauqhov cov neeg ntawd tsis muaj kev ntseeg.
Yexus Txib Kaum-Ob Tug Thwjtim Mus Qhia Txoj Moo Zoo
(Mathais 10:5-15; Lukas 9:1-6)
Dhau ntawd, Yexus mus qhia rau ntau lub zejzog uas nyob ibncig ntawd. 7Yexus hu kaum-ob tug thwjtim los uake thiab Nws xa lawv ib nkawg mus rau ib qho. Nws pub hwjchim rau lawv kom kovyeej tej ntsujplig phem, 8thiab Nws hais rau lawv tias, “Nej tsis txhob nqa ib yam dabtsi nrog nej mus, tsuas pub nej nqa tus pas nrig xwb, tsis txhob ntim mov, tsis txhob khuam hnab thoobpuab thiab tsis txhob nqa nyiaj rau ntawm duav mus. 9Yuavtsum rau khau, tiamsis tsis txhob nqa ib lub tsho mus ntxiv.” 10Yexus hais ntxiv rau lawv tias, “Yog yim twg zoosiab tostxais nej mus hauv nws tsev, nej ciali mus so hauv yim ntawd mus txog hnub uas nej tawm ntawm thaj chaw ntawd mus. 11Yog nej mus txog hauv lub zos twg uas tsis muaj neeg tostxais nej, lossis tsis mloog nej tej lus qhia, ces thaum nej tawm mus, nej ciali nchos tej hmoov av uas lo nej kotaw povtseg, uas yog ua ib qhov timkhawv tawmtsam lawv!” #Lukas 10:4-11 #Teshl 13:51
12Yogli ntawd, lawv thiaj tawm mus qhuabqhia kom sawvdaws tso tej kev txhaum tseg. 13Lawv ntiab tau ntau tus dab tawm thiab muab roj pleev rau cov neeg muaj mob thiab kho lawv zoo lawm. #Yakau 5:14
Yauhas Tus Uas Muab Neeg Ua Kevcai Rausdej Kev Tuag
(Mathais 14:1-12; Lukas 9:7-9)
14Vajntxwv Helauj#6:14: Vajntxwv Helauj: Helauj Atipas uas kav lub xeev Kalilais. hnov txog Yexus, rauqhov Yexus lub moo nrov-ncha mus thoobplaws txhua qhov chaw lawm. Muaj qeeleej hais tias, “Yauhas tus uas muab neeg ua kevcai rausdej tau sawv rovqab los lawm, vimli ntawd nws thiaj muaj hwjchim ua tau tej txujci tseemceeb no!”
15Tiamsis muaj qeeleej hais tias, “Yexus yog Eliyas.” #Math 16:14; Malak 8:28; Lukas 9:19
Muaj qeeleej hais tias, “Yexus yog ib tug xibhwb cev Vajtswv lus, ib yam li cov xibhwb cev Vajtswv lus thaum ub.”
16Thaum Helauj hnov sawvdaws hais li ntawd, nws hais tias, “Yeej yog Yauhas tus uas muab neeg ua kevcai rausdej ntag! Kuv twb muab Nws txiav cajdab lawm, tiamsis nimno nws sawv rovqab los lawm!” 17Helauj tuskheej ntag yog tus uas hais kom luag ntes Yauhas khi thiab coj mus kaw rau hauv tsev lojcuj. Helauj ua li no twb yog vim Helaudias, uas nws tau yuav los ua nws pojniam, txawm yog Helaudias yog nws tus kwv Filiv tus pojniam los nws tseem yuav thiab. 18Vim Yauhas pheej txeev ntuas Helauj hais tias, “Koj tsis muaj cai yuav koj tus niamntxawm los ua koj tus pojniam!” #Lukas 3:19-20
19Vimli ntawd Helaudias thiaj cibnyeej Yauhas heev, thiab xav muab Yauhas tua tiamsis tua tsis tau, 20rauqhov Helauj ntshai Yauhas, vim Helauj paub tias Yauhas yog ib tug neeg ncajncees thiab dawbhuv, nws thiaj tsis pub leejtwg ua phem rau Yauhas. Txawm yog txhua zaus uas Helauj mloog tej lus uas Yauhas qhia ntawd ua rau nws nyuajsiab los nws nyiam mloog Yauhas qhia kawg li.
21Muaj ib hnub yog hnub zoo sijhawm rau Helaudias. Hnub ntawd yog Helauj hnub yug, nws txawm ua tau ib rooj mov rau nws cov nomtswv, cov thawj tubrog thiab cov neeg tseemceeb hauv lub xeev Kalilais tuaj noj. 22Helaudias tus ntxhais#6:22: Helaudias tus ntxhais; tej phau ntawv qub uas xuas tes sau, muaj nws tus ntxhais Helaudias. txawm los seevcev rau sawvdaws saib, ua rau Helauj thiab nws cov qhua txaussiab kawg li. Vajntxwv Helauj txawm hais rau tus ntxhais tias, “Koj xav yuav dabtsi koj ciali thov, kuv yuav muab yam ntawd pub rau koj.” 23Helauj txawm coglus hais tias, “Kuv coglus rau koj hais tias koj thov yam twg, kuv yuav muab yam ntawd rau koj; txawm yuav yog ibnrab ntawm kuv lub tebchaws los kuv yeej kam!”
24Tus ntxhais txawm tawm mus nug nws niam hais tias, “Kuv yuav thov dabtsi?”
Nws niam teb tias, “Koj ciali thov yuav Yauhas tus uas muab neeg ua kevcai rausdej lub taubhau.”
25Tamsim ntawd tus ntxhais txawm rov los cuag vajntxwv thiab hais tias, “Kuv xav kom koj muab Yauhas tus uas muab neeg ua kevcai rausdej lub taubhau tso rau hauv lub phaj nqa los rau kuv tamsim no!”
26Vajntxwv nyuajsiab kawg li, tiamsis nws hloov tsis tau lawm, vim nws tau coglus tabmeeg sawvdaws lawm. 27Tamsim ntawd Helauj txawm txib kiag ib tug tubrog mus nqa kom tau Yauhas lub taubhau los. Ces tus tubrog txawm mus rau tom tsev lojcuj thiab txiav Yauhas cajdab; 28nws muab Yauhas lub taubhau tso rau hauv ib lub phaj nqa los rau tus ntxhais, ces tus ntxhais txawm muab rau nws niam. 29Thaum Yauhas cov thwjtim hnov li ntawd, lawv thiaj tuaj muab nws lub cev coj mus log.
Yexus Pub Mov Rau 5,000 Leej Noj
(Mathais 14:13-21; Lukas 9:10-17; Yauhas 6:1-14)
30Yexus cov timthawj rovqab los cuag Nws, thiab qhia txhua yam uas lawv tau mus ua thiab qhia lawm rau Yexus mloog. 31Muaj neeg coob-coob pheej tuaj mloog Yexus qhia, pab tas pab tuaj, ua rau Yexus thiab Nws cov thwjtim tsis muaj sijhawm noj mov li. Yexus thiaj hais rau cov thwjtim tias, “Cia peb mus rau tej qhov chaw uas nyob ntsiagto, nej thiaj tau so mentsis.” 32Yexus thiab Nws cov thwjtim txawm caij nkoj hla hiavtxwv mus rau ib qhov chaw uas nyob ntsiagto.
33Txawm li ntawd los muaj neeg ntau leej pom lawv sawvkev mus thiab paub tias yog Yexus thiab Nws cov thwjtim. Lawv thiaj khiav mus hauv txhua lub zos mus, lawv tseem xub uantej mus txog qhov chaw uas Yexus thiab Nws cov thwjtim yuav mus. 34Thaum Yexus tawm hauv nkoj los, Nws pom cov neeg coob-coob ntawd, ua rau Nws hlub lawv kawg li, rauqhov lawv zooli pab yaj uas tsis muaj tus tswv yug. Yogli, Yexus thiaj pib qhia ntau zaj rau lawv mloog. #Teev 27:17; 1Vaj 22:17; 2Xwm 18:16; Exek 34:5; Math 9:36 35Thaum yuav tsausntuj Yexus cov thwjtim los hais rau Nws hais tias, “Twb lig-lig lawm thiab ntawm thaj chaw no tsis muaj dabtsi li; 36yuav tau hais kom sawvdaws mus nrhiav yuav mov tom tej zos uas nyob ibncig ntawm no rau lawv noj.”
37Yexus teb cov thwjtim hais tias, “Nej ciali nrhiav rau lawv noj.”
Cov thwjtim nug Yexus hais tias, “Koj xav kom peb siv 200 lub npib nyiaj#6:37: npib nyiaj: ib npib nyiaj yog raug nqi ib yam li ib tus neeg uas ua zog ib hnub (saib Math 20:2). Phau Kilis sau hais tias 200 denalis. mus yuav mov los rau sawvdaws noj lov?”
38Yexus nug lawv hais tias, “Mus saib seb, nej muaj pestsawg lub ncuav?”
Thaum lawv nrhiav tau lawm, lawv qhia rau Yexus hais tias, “Peb muaj tsib lub ncuav thiab ob tug ntses.”
39Yexus kom cov thwjtim mus hais rau cov neeg coob-coob ntawd kom zaum ua tej pab tej pawg rau ntawm tej nyom. 40Cov neeg ntawd txawm zaum ua tej pab, qee pab muaj ibpuas leej, thiab qee pab muaj tsibcaug leej. 41Ces Yexus txawm muab tsib lub ncuav thiab ob tug ntses los, Nws tsa qhovmuag ntsia rau saum ntuj thiab ua Vajtswv tsaug. Nws muab cov ncuav ntais thiab cev rau Nws cov thwjtim nqa mus faib rau sawvdaws. Nws kuj muab ob tus ntses faib rau lawv thiab. 42Txhua tus puavleej tau noj tsau huv tibsi. 43Cov thwjtim mus sau tej ncuav thiab tej ntses uas sawvdaws noj tsis tas tau kaum-ob tawb puvnkaus. 44Cov uas tau noj mov ntawd, cov txivneej xwb yog muaj 5,000 leej.
Yexus Mus Saum Nplaimdej
(Mathais 14:22-23; Yauhas 6:15-21)
45Tamsim ntawd Yexus txawm hais kom cov neeg sawvdaws rov mus tsev, thiab hais kom Nws cov thwjtim nce nkoj thiab caij hla dej hiavtxwv ua Nws ntej mus rau tim lub nroog Npexaidas. 46Thaum cov neeg mus tas lawm, Yexus nce mus thov Vajtswv pem roob. 47Thaum tsausntuj cov thwjtim twb caij nkoj mus txog ibnrab dej lawm, tiamsis Yexus tseem nyob ib leeg pem roob. 48Yexus pom Nws cov thwjtim nquam nkoj mus nyuaj kawg li, vim muaj cua hlob los ntaus lub nkoj. Kwvlam li thaum peb teev mus rau rau teev yav yuav kajntug ntawd, Yexus txawm mus kotaw saum nplaimdej los cuag cov thwjtim. Zooli Nws yuav hla dhau lawv mus,#6:48: yuav hla dhau lawv mus; lossis koom nrog lawv. 49tiamsis thaum lawv pom Nws mus kotaw saum nplaimdej, lawv xav tias ntshe yog dab, lawv txawm qw ntsoogqees. 50Thaum lawv pom Nws, lawv ntshai kawg li.
Tamsim ntawd Yexus hais rau lawv tias, “Txhob poobsiab! Yog Kuv xwb, tsis txhob ntshai.” 51Yexus txawm nce mus nrog cov thwjtim nyob hauv lub nkoj, ces cua txawm tu zujzus lawm. Cov thwjtim yeej xav tsis thoob li, 52lawv yeej tseem tsis totaub lub ntsiablus ntawm zaj uas Yexus muab ncuav faib rau 5,000 leej noj; rauqhov lawv lub siab tawv heev.
Yexus Kho Mob Hauv Nkenexales
(Mathais 14:34-36)
53Yexus thiab Nws cov thwjtim caij nkoj hla hiavtxwv mus txog tim Nkenexales, lawv txawm muab lub nkoj khi rau ntawm ntug hiavtxwv. 54Thaum lawv tabtom tawm hauv lub nkoj los, cov neeg uas nyob ntawd paub tias yog Yexus. 55Ces lawv txawm khiav mus qhia rau tej neeg uas nyob thoobplaws ib cheebtsam ntawd. Thaum lawv paub tias Nws nyob qhovtwg lawm, lawv txawm muab lev nqa cov neeg uas muaj mob tuaj cuag Nws. 56Txhua qhov uas Yexus mus, tsis hais hauv tej zejzog, hauv tej nroog lossis pem tej yajsab, pheej muaj neeg coj cov uas muaj mob tuaj tso rau ntawm tej kiab tej khw thiab thov Nws kom cia cov neeg muaj mob ntawd kov Nws lub tw tsho. Txhua tus uas tau kov lawd puavleej zoo huv tibsi.
© 2022 United Bible Societies. All rights reserved.
Malakaus 6
6
Cov Neeg Hauv Naxalev Tsis Txais Yuav Yexus
(Mathais 13:53-58; Lukas 4:16-30)
1Yexus txawm tawm qhov ntawd rovqab mus rau hauv Nws lub zos, Nws cov thwjtim nrog Nws mus thiab. 2Hnub Xanpataus Yexus pib qhia hauv tsev sablaj. Cov neeg coob-coob uas hnov Yexus qhia xav tsis thoob li. Lawv sibnug zomzaws hais tias, “Nws tau tej no qhovtwg los? Lub tswvyim no yog leejtwg muab rau Nws? Uacas Nws thiaj ua tau txujci tseemceeb no? 3Nws puas yog tus kws kaw ntoo, uas yog Malis tus tub, thiab Nws cov kwv puas yog Yakaunpaus, Yauxes, Yudas thiab Ximoos? Puas yog Nws cov muam twb nrog peb nyob ntawm no thiab?” Cov neeg ntawd txawm tsis lees paub Yexus.
4Yexus hais rau lawv tias, “Tej neeg ob cag puavleej hwm tus xibhwb cev Vajtswv lus, tsuas yog cov neeg uas nyob hauv nws lub zos, nws cov kwvtij, thiab nws tsev neeg thiaj tsis hwm nws xwb.” #Yauh 4:44
5Yexus tsis ua tej txujci tseemceeb rau qhov ntawd, Nws tsuas yog tau tsa tes rau saum qeeleej kom zoo mob xwb. 6Yexus xav tsis thoob, rauqhov cov neeg ntawd tsis muaj kev ntseeg.
Yexus Txib Kaum-Ob Tug Thwjtim Mus Qhia Txoj Moo Zoo
(Mathais 10:5-15; Lukas 9:1-6)
Dhau ntawd, Yexus mus qhia rau ntau lub zejzog uas nyob ibncig ntawd. 7Yexus hu kaum-ob tug thwjtim los uake thiab Nws xa lawv ib nkawg mus rau ib qho. Nws pub hwjchim rau lawv kom kovyeej tej ntsujplig phem, 8thiab Nws hais rau lawv tias, “Nej tsis txhob nqa ib yam dabtsi nrog nej mus, tsuas pub nej nqa tus pas nrig xwb, tsis txhob ntim mov, tsis txhob khuam hnab thoobpuab thiab tsis txhob nqa nyiaj rau ntawm duav mus. 9Yuavtsum rau khau, tiamsis tsis txhob nqa ib lub tsho mus ntxiv.” 10Yexus hais ntxiv rau lawv tias, “Yog yim twg zoosiab tostxais nej mus hauv nws tsev, nej ciali mus so hauv yim ntawd mus txog hnub uas nej tawm ntawm thaj chaw ntawd mus. 11Yog nej mus txog hauv lub zos twg uas tsis muaj neeg tostxais nej, lossis tsis mloog nej tej lus qhia, ces thaum nej tawm mus, nej ciali nchos tej hmoov av uas lo nej kotaw povtseg, uas yog ua ib qhov timkhawv tawmtsam lawv!” #Lukas 10:4-11 #Teshl 13:51
12Yogli ntawd, lawv thiaj tawm mus qhuabqhia kom sawvdaws tso tej kev txhaum tseg. 13Lawv ntiab tau ntau tus dab tawm thiab muab roj pleev rau cov neeg muaj mob thiab kho lawv zoo lawm. #Yakau 5:14
Yauhas Tus Uas Muab Neeg Ua Kevcai Rausdej Kev Tuag
(Mathais 14:1-12; Lukas 9:7-9)
14Vajntxwv Helauj#6:14: Vajntxwv Helauj: Helauj Atipas uas kav lub xeev Kalilais. hnov txog Yexus, rauqhov Yexus lub moo nrov-ncha mus thoobplaws txhua qhov chaw lawm. Muaj qeeleej hais tias, “Yauhas tus uas muab neeg ua kevcai rausdej tau sawv rovqab los lawm, vimli ntawd nws thiaj muaj hwjchim ua tau tej txujci tseemceeb no!”
15Tiamsis muaj qeeleej hais tias, “Yexus yog Eliyas.” #Math 16:14; Malak 8:28; Lukas 9:19
Muaj qeeleej hais tias, “Yexus yog ib tug xibhwb cev Vajtswv lus, ib yam li cov xibhwb cev Vajtswv lus thaum ub.”
16Thaum Helauj hnov sawvdaws hais li ntawd, nws hais tias, “Yeej yog Yauhas tus uas muab neeg ua kevcai rausdej ntag! Kuv twb muab Nws txiav cajdab lawm, tiamsis nimno nws sawv rovqab los lawm!” 17Helauj tuskheej ntag yog tus uas hais kom luag ntes Yauhas khi thiab coj mus kaw rau hauv tsev lojcuj. Helauj ua li no twb yog vim Helaudias, uas nws tau yuav los ua nws pojniam, txawm yog Helaudias yog nws tus kwv Filiv tus pojniam los nws tseem yuav thiab. 18Vim Yauhas pheej txeev ntuas Helauj hais tias, “Koj tsis muaj cai yuav koj tus niamntxawm los ua koj tus pojniam!” #Lukas 3:19-20
19Vimli ntawd Helaudias thiaj cibnyeej Yauhas heev, thiab xav muab Yauhas tua tiamsis tua tsis tau, 20rauqhov Helauj ntshai Yauhas, vim Helauj paub tias Yauhas yog ib tug neeg ncajncees thiab dawbhuv, nws thiaj tsis pub leejtwg ua phem rau Yauhas. Txawm yog txhua zaus uas Helauj mloog tej lus uas Yauhas qhia ntawd ua rau nws nyuajsiab los nws nyiam mloog Yauhas qhia kawg li.
21Muaj ib hnub yog hnub zoo sijhawm rau Helaudias. Hnub ntawd yog Helauj hnub yug, nws txawm ua tau ib rooj mov rau nws cov nomtswv, cov thawj tubrog thiab cov neeg tseemceeb hauv lub xeev Kalilais tuaj noj. 22Helaudias tus ntxhais#6:22: Helaudias tus ntxhais; tej phau ntawv qub uas xuas tes sau, muaj nws tus ntxhais Helaudias. txawm los seevcev rau sawvdaws saib, ua rau Helauj thiab nws cov qhua txaussiab kawg li. Vajntxwv Helauj txawm hais rau tus ntxhais tias, “Koj xav yuav dabtsi koj ciali thov, kuv yuav muab yam ntawd pub rau koj.” 23Helauj txawm coglus hais tias, “Kuv coglus rau koj hais tias koj thov yam twg, kuv yuav muab yam ntawd rau koj; txawm yuav yog ibnrab ntawm kuv lub tebchaws los kuv yeej kam!”
24Tus ntxhais txawm tawm mus nug nws niam hais tias, “Kuv yuav thov dabtsi?”
Nws niam teb tias, “Koj ciali thov yuav Yauhas tus uas muab neeg ua kevcai rausdej lub taubhau.”
25Tamsim ntawd tus ntxhais txawm rov los cuag vajntxwv thiab hais tias, “Kuv xav kom koj muab Yauhas tus uas muab neeg ua kevcai rausdej lub taubhau tso rau hauv lub phaj nqa los rau kuv tamsim no!”
26Vajntxwv nyuajsiab kawg li, tiamsis nws hloov tsis tau lawm, vim nws tau coglus tabmeeg sawvdaws lawm. 27Tamsim ntawd Helauj txawm txib kiag ib tug tubrog mus nqa kom tau Yauhas lub taubhau los. Ces tus tubrog txawm mus rau tom tsev lojcuj thiab txiav Yauhas cajdab; 28nws muab Yauhas lub taubhau tso rau hauv ib lub phaj nqa los rau tus ntxhais, ces tus ntxhais txawm muab rau nws niam. 29Thaum Yauhas cov thwjtim hnov li ntawd, lawv thiaj tuaj muab nws lub cev coj mus log.
Yexus Pub Mov Rau 5,000 Leej Noj
(Mathais 14:13-21; Lukas 9:10-17; Yauhas 6:1-14)
30Yexus cov timthawj rovqab los cuag Nws, thiab qhia txhua yam uas lawv tau mus ua thiab qhia lawm rau Yexus mloog. 31Muaj neeg coob-coob pheej tuaj mloog Yexus qhia, pab tas pab tuaj, ua rau Yexus thiab Nws cov thwjtim tsis muaj sijhawm noj mov li. Yexus thiaj hais rau cov thwjtim tias, “Cia peb mus rau tej qhov chaw uas nyob ntsiagto, nej thiaj tau so mentsis.” 32Yexus thiab Nws cov thwjtim txawm caij nkoj hla hiavtxwv mus rau ib qhov chaw uas nyob ntsiagto.
33Txawm li ntawd los muaj neeg ntau leej pom lawv sawvkev mus thiab paub tias yog Yexus thiab Nws cov thwjtim. Lawv thiaj khiav mus hauv txhua lub zos mus, lawv tseem xub uantej mus txog qhov chaw uas Yexus thiab Nws cov thwjtim yuav mus. 34Thaum Yexus tawm hauv nkoj los, Nws pom cov neeg coob-coob ntawd, ua rau Nws hlub lawv kawg li, rauqhov lawv zooli pab yaj uas tsis muaj tus tswv yug. Yogli, Yexus thiaj pib qhia ntau zaj rau lawv mloog. #Teev 27:17; 1Vaj 22:17; 2Xwm 18:16; Exek 34:5; Math 9:36 35Thaum yuav tsausntuj Yexus cov thwjtim los hais rau Nws hais tias, “Twb lig-lig lawm thiab ntawm thaj chaw no tsis muaj dabtsi li; 36yuav tau hais kom sawvdaws mus nrhiav yuav mov tom tej zos uas nyob ibncig ntawm no rau lawv noj.”
37Yexus teb cov thwjtim hais tias, “Nej ciali nrhiav rau lawv noj.”
Cov thwjtim nug Yexus hais tias, “Koj xav kom peb siv 200 lub npib nyiaj#6:37: npib nyiaj: ib npib nyiaj yog raug nqi ib yam li ib tus neeg uas ua zog ib hnub (saib Math 20:2). Phau Kilis sau hais tias 200 denalis. mus yuav mov los rau sawvdaws noj lov?”
38Yexus nug lawv hais tias, “Mus saib seb, nej muaj pestsawg lub ncuav?”
Thaum lawv nrhiav tau lawm, lawv qhia rau Yexus hais tias, “Peb muaj tsib lub ncuav thiab ob tug ntses.”
39Yexus kom cov thwjtim mus hais rau cov neeg coob-coob ntawd kom zaum ua tej pab tej pawg rau ntawm tej nyom. 40Cov neeg ntawd txawm zaum ua tej pab, qee pab muaj ibpuas leej, thiab qee pab muaj tsibcaug leej. 41Ces Yexus txawm muab tsib lub ncuav thiab ob tug ntses los, Nws tsa qhovmuag ntsia rau saum ntuj thiab ua Vajtswv tsaug. Nws muab cov ncuav ntais thiab cev rau Nws cov thwjtim nqa mus faib rau sawvdaws. Nws kuj muab ob tus ntses faib rau lawv thiab. 42Txhua tus puavleej tau noj tsau huv tibsi. 43Cov thwjtim mus sau tej ncuav thiab tej ntses uas sawvdaws noj tsis tas tau kaum-ob tawb puvnkaus. 44Cov uas tau noj mov ntawd, cov txivneej xwb yog muaj 5,000 leej.
Yexus Mus Saum Nplaimdej
(Mathais 14:22-23; Yauhas 6:15-21)
45Tamsim ntawd Yexus txawm hais kom cov neeg sawvdaws rov mus tsev, thiab hais kom Nws cov thwjtim nce nkoj thiab caij hla dej hiavtxwv ua Nws ntej mus rau tim lub nroog Npexaidas. 46Thaum cov neeg mus tas lawm, Yexus nce mus thov Vajtswv pem roob. 47Thaum tsausntuj cov thwjtim twb caij nkoj mus txog ibnrab dej lawm, tiamsis Yexus tseem nyob ib leeg pem roob. 48Yexus pom Nws cov thwjtim nquam nkoj mus nyuaj kawg li, vim muaj cua hlob los ntaus lub nkoj. Kwvlam li thaum peb teev mus rau rau teev yav yuav kajntug ntawd, Yexus txawm mus kotaw saum nplaimdej los cuag cov thwjtim. Zooli Nws yuav hla dhau lawv mus,#6:48: yuav hla dhau lawv mus; lossis koom nrog lawv. 49tiamsis thaum lawv pom Nws mus kotaw saum nplaimdej, lawv xav tias ntshe yog dab, lawv txawm qw ntsoogqees. 50Thaum lawv pom Nws, lawv ntshai kawg li.
Tamsim ntawd Yexus hais rau lawv tias, “Txhob poobsiab! Yog Kuv xwb, tsis txhob ntshai.” 51Yexus txawm nce mus nrog cov thwjtim nyob hauv lub nkoj, ces cua txawm tu zujzus lawm. Cov thwjtim yeej xav tsis thoob li, 52lawv yeej tseem tsis totaub lub ntsiablus ntawm zaj uas Yexus muab ncuav faib rau 5,000 leej noj; rauqhov lawv lub siab tawv heev.
Yexus Kho Mob Hauv Nkenexales
(Mathais 14:34-36)
53Yexus thiab Nws cov thwjtim caij nkoj hla hiavtxwv mus txog tim Nkenexales, lawv txawm muab lub nkoj khi rau ntawm ntug hiavtxwv. 54Thaum lawv tabtom tawm hauv lub nkoj los, cov neeg uas nyob ntawd paub tias yog Yexus. 55Ces lawv txawm khiav mus qhia rau tej neeg uas nyob thoobplaws ib cheebtsam ntawd. Thaum lawv paub tias Nws nyob qhovtwg lawm, lawv txawm muab lev nqa cov neeg uas muaj mob tuaj cuag Nws. 56Txhua qhov uas Yexus mus, tsis hais hauv tej zejzog, hauv tej nroog lossis pem tej yajsab, pheej muaj neeg coj cov uas muaj mob tuaj tso rau ntawm tej kiab tej khw thiab thov Nws kom cia cov neeg muaj mob ntawd kov Nws lub tw tsho. Txhua tus uas tau kov lawd puavleej zoo huv tibsi.
© 2022 United Bible Societies. All rights reserved.