Malakaus 11
11
Yexus Mus Hauv Yeluxalees Yam Muajyeej
(Mathais 21:1-11; Lukas 19:28-40; Yauhas 12:12-19)
1Thaum Yexus lawv mus yuav txog lub nroog Yeluxalees, lawv mus txog ntawm lub zos Npefakhes thiab lub zos Npethanis, ntawm lub Roob Txiv Ntoo-Roj. Yexus txawm txib Nws ob tug thwjtim ua Nws ntej mus, 2Nws qhia nkawd hais tias, “Neb mus rau hauv lub zos uas nyob tom neb hauvntej. Thaum neb mus txog hauv lawm, neb yuav pom ib tug menyuam neesluav khi cia rau ntawd uas yeej tsis tau muaj leejtwg caij dua li, neb muab daws thiab cab los rau ntawm no. 3Yog muaj leejtwg nug neb hais tias, ‘Neb ua dabtsi li ntawd?’ Neb teb tias, ‘Tus Tswv#11:3: Tus Tswv; lossis nws tus tswv. xav siv, ib ntsis Nws mamli xa rovqab los.’ ”
4Nkawd thiaj mus thiab pom ib tug menyuam neesluav nyob tom kev, khi rau ntawm lub qhovrooj tsev. Thaum nkawd tseem tabtom daws hlua, 5ibtxhia neeg uas sawv ntawd nug hais tias, “Neb muab tus menyuam neesluav no daws hlua ua dabtsi?”
6Nkawd teb rawsli Yexus tau qhia rau nkawd lawm, ces lawv txawm tso nkawd mus. 7Nkawd cab tus menyuam neesluav mus rau Yexus, nkawd hle nkawd ob lub tsho ntev los pua tus menyuam neesluav nrobqaum rau Yexus caij. 8Muaj ntau leej hle lawv tej tsho los pua hauv txoj kev, lwmtus ho mus txiav tej nplooj ntoos tom ntug zos nqa los pua kev thiab. 9Cov neeg uas uantej thiab cov uas uaqab sawvdaws qw nrov-nrov hais tias, “Hauxanas!#11:9: Hauxanas yog lolus Henplais uas txhais tau hais tias “thov pab cawm lau!” Thov Vajtswv foom koobhmoov rau tus uas los hauv Vajtswv lub npe los! #Nnkauj 118:25-26 10Thov Vajtswv foom koobhmoov rau peb yawgkoob Vajntxwv Daviv lub tebchaws uas tabtom los yuav txog no! Ciali qhuas Vajtswv!”
11Thaum Yexus mus txog hauv lub nroog Yeluxalees lawm, Nws mus rau hauv lub Tuamtsev, thiab Nws tsa muag ntsia txhua yam thoobplaws. Tiamsis vim twb tsausntuj lawm, Nws thiaj nrog Nws kaum-ob tug thwjtim mus rau tom lub zos Npethanis.
Yexus Foom Tsob Ntoo Txiv Ncuavpias
(Mathais 21:18-19)
12Hnub tomqab ntawd thaum Yexus thiab Nws cov thwjtim rovqab tom lub zos Npethanis los, Yexus txawm muaj ntsis tshaib plab. 13Nws pom ib tsob txiv ncuavpias muaj nplooj tsaus nti nyob deb tsawv, ces Nws txawm mus saib seb puas txitxiv. Tiamsis thaum Nws mus txog, Nws tsuas pom muaj nplooj xwb, rauqhov tseem tsis tau txog lub caij txi. 14Yexus txawm hais rau tsob txiv ncuavpias ntawd tias, “Txij no mus yuav tsis muaj leejtwg tau noj koj cov txiv ib zaug li lawm!”
Cov thwjtim kuj hnov tej lus uas Yexus hais ntawd.
Yexus Mus Rau Ntawm Lub Tuamtsev
(Mathais 21:12-17; Lukas 19:45-48; Yauhas 2:13-22)
15Thaum lawv mus txog lub nroog Yeluxalees lawm, Yexus mus rau hauv lub Tuamtsev thiab pib ntiab cov neeg uas tuaj yuav khoom thiab muag khoom kom ciali tawm mus. Nws muab cov neeg uas pauv nyiaj thiab cov neeg uas muag nquab tej rooj nyob ntxeev huv tibsi. 16Thiab Nws txwv tsis pub leejtwg coj ib yam dabtsi hla hauv lub tshavloog ntawm Tuamtsev mus. 17Yexus qhia rau lawv tias, “Vajtswv tej Lus tau sau cia hais tias, ‘Kuv lub Tuamtsev yog lub tsev thov Vajtswv.’ Tiamsis nej muab hloov los ua qhov chaw rau tubsab nkaum!” #Yaxaya 56:7; Yelemi 7:11
18Cov thawj povthawj hlob thiab cov xibhwb uas qhia Kevcai hnov tej no, lawv thiaj pib nrhiav kev muab Yexus tua. Lawv ntshai Yexus, rauqhov Yexus tej lus qhia ua rau sawvdaws xav tsis thoob.
19Thaum yuav tsausntuj, Yexus thiab Nws cov thwjtim txawm tawm hauv lub nroog mus lawm.
Tsob Ntoo Txiv Ncuavpias Qhuav
(Mathais 21:20-22)
20Hnub tomqab sawvntxov, thaum Yexus thiab Nws cov thwjtim lawv tabtom taug kev mus, lawv pom tsob txiv ncuavpias twb tuag tshav, qhuav ti nkaus cag lawm. 21Petus nco tau hais tias yog licas ces nws txawm hais rau Yexus tias, “Xibhwb, Koj saib seb, tsob txiv ncuavpias uas naghmo Koj foom twb qhuav tag lawm!”
22Yexus teb tias, “Yog nej ntseeg Vajtswv, 23Kuv qhia tseeb rau nej hais tias, yog nej leejtwg hais rau lub roob no kom txav mus rau hauv hiavtxwv, uas yeej tsis ua xyemxyav hauv nej lub siab, tiamsis ntseeg tias yeej yuav muaj rawsli qhov uas nej hais ntawd, ces yeej yuav muaj li ntawd xwb. #Math 17:20; 1Klt 13:2 24Twb yog vimli no, Kuv thiaj hais rau nej tias, thaum nej thov Vajtswv pub ib yam dabtsi rau nej, nej yuavtsum ntseeg tias nej twb tau txais lawm, nej thiaj yuav tau yam uas nej thov ntawd. 25Thaum nej sawvntsug thov Vajtswv, nej yuavtsum zamtxim rau txhua tus uas nej tsis txaussiab rau, kom nej Leejtxiv tus uas nyob sau ntuj ceebtsheej thiaj yuav zam nej lub txim.” 26#11:26: Tej phau ntawv qub uas xuas tes sau ntxiv nqe 26 no rau: Yog nej tsis zamtxim rau lwmtus, nej Leejtxiv tus uas nyob saum ntuj ceebtsheej yuav tsis zamtxim rau nej thiab. #Math 6:14-15
Leejtwg Tsocai Rau Yexus
(Mathais 21:23-27; Lukas 20:1-8)
27Yexus thiab Nws cov thwjtim rov mus rau hauv lub nroog Yeluxalees ib zaug ntxiv. Thaum Yexus mus rau hauv lub Tuamtsev, cov thawj povthawj hlob, cov xibhwb uas qhia Kevcai, thiab cov txwjlaug tuaj cuag Nws, 28thiab nug Nws hais tias, “Koj tau cai qhovtwg los ua tej no? Leejtwg tsocai rau Koj?”
29Yexus teb lawv hais tias, “Kuv yuav nug nej ib los, yog nej teb tau, Kuv mamli qhia rau nej hais tias leejtwg tsocai rau Kuv ua tej no. 30Nej sim qhia rau Kuv seb, leejtwg tsocai rau Yauhas muab neeg ua kevcai rausdej, Vajtswv lossis neeg?”
31Lawv txawm sibtham hais tias, “Peb yuav teb licas? Yog peb teb tias, ‘Vajtswv tsocai rau Yauhas ua,’ Nws yuav hais tias, ‘Ua licas nej ho tsis ntseeg Yauhas?’ 32Tiamsis yog peb ho teb tias, ‘Neeg tsocai rau Yauhas ua ...’ ” (Lawv ntshai cov pejxeem, rauqhov sawvdaws yeej paub tias Yauhas yog ib tug xibhwb cev Vajtswv lus.) 33Lawv thiaj teb Yexus hais tias, “Peb tsis paub.”
Yexus thiaj hais rau lawv tias, “Kuv los yuav tsis qhia rau nej hais tias leejtwg tsocai rau Kuv ua tej no thiab.”
© 2022 United Bible Societies. All rights reserved.
Malakaus 11
11
Yexus Mus Hauv Yeluxalees Yam Muajyeej
(Mathais 21:1-11; Lukas 19:28-40; Yauhas 12:12-19)
1Thaum Yexus lawv mus yuav txog lub nroog Yeluxalees, lawv mus txog ntawm lub zos Npefakhes thiab lub zos Npethanis, ntawm lub Roob Txiv Ntoo-Roj. Yexus txawm txib Nws ob tug thwjtim ua Nws ntej mus, 2Nws qhia nkawd hais tias, “Neb mus rau hauv lub zos uas nyob tom neb hauvntej. Thaum neb mus txog hauv lawm, neb yuav pom ib tug menyuam neesluav khi cia rau ntawd uas yeej tsis tau muaj leejtwg caij dua li, neb muab daws thiab cab los rau ntawm no. 3Yog muaj leejtwg nug neb hais tias, ‘Neb ua dabtsi li ntawd?’ Neb teb tias, ‘Tus Tswv#11:3: Tus Tswv; lossis nws tus tswv. xav siv, ib ntsis Nws mamli xa rovqab los.’ ”
4Nkawd thiaj mus thiab pom ib tug menyuam neesluav nyob tom kev, khi rau ntawm lub qhovrooj tsev. Thaum nkawd tseem tabtom daws hlua, 5ibtxhia neeg uas sawv ntawd nug hais tias, “Neb muab tus menyuam neesluav no daws hlua ua dabtsi?”
6Nkawd teb rawsli Yexus tau qhia rau nkawd lawm, ces lawv txawm tso nkawd mus. 7Nkawd cab tus menyuam neesluav mus rau Yexus, nkawd hle nkawd ob lub tsho ntev los pua tus menyuam neesluav nrobqaum rau Yexus caij. 8Muaj ntau leej hle lawv tej tsho los pua hauv txoj kev, lwmtus ho mus txiav tej nplooj ntoos tom ntug zos nqa los pua kev thiab. 9Cov neeg uas uantej thiab cov uas uaqab sawvdaws qw nrov-nrov hais tias, “Hauxanas!#11:9: Hauxanas yog lolus Henplais uas txhais tau hais tias “thov pab cawm lau!” Thov Vajtswv foom koobhmoov rau tus uas los hauv Vajtswv lub npe los! #Nnkauj 118:25-26 10Thov Vajtswv foom koobhmoov rau peb yawgkoob Vajntxwv Daviv lub tebchaws uas tabtom los yuav txog no! Ciali qhuas Vajtswv!”
11Thaum Yexus mus txog hauv lub nroog Yeluxalees lawm, Nws mus rau hauv lub Tuamtsev, thiab Nws tsa muag ntsia txhua yam thoobplaws. Tiamsis vim twb tsausntuj lawm, Nws thiaj nrog Nws kaum-ob tug thwjtim mus rau tom lub zos Npethanis.
Yexus Foom Tsob Ntoo Txiv Ncuavpias
(Mathais 21:18-19)
12Hnub tomqab ntawd thaum Yexus thiab Nws cov thwjtim rovqab tom lub zos Npethanis los, Yexus txawm muaj ntsis tshaib plab. 13Nws pom ib tsob txiv ncuavpias muaj nplooj tsaus nti nyob deb tsawv, ces Nws txawm mus saib seb puas txitxiv. Tiamsis thaum Nws mus txog, Nws tsuas pom muaj nplooj xwb, rauqhov tseem tsis tau txog lub caij txi. 14Yexus txawm hais rau tsob txiv ncuavpias ntawd tias, “Txij no mus yuav tsis muaj leejtwg tau noj koj cov txiv ib zaug li lawm!”
Cov thwjtim kuj hnov tej lus uas Yexus hais ntawd.
Yexus Mus Rau Ntawm Lub Tuamtsev
(Mathais 21:12-17; Lukas 19:45-48; Yauhas 2:13-22)
15Thaum lawv mus txog lub nroog Yeluxalees lawm, Yexus mus rau hauv lub Tuamtsev thiab pib ntiab cov neeg uas tuaj yuav khoom thiab muag khoom kom ciali tawm mus. Nws muab cov neeg uas pauv nyiaj thiab cov neeg uas muag nquab tej rooj nyob ntxeev huv tibsi. 16Thiab Nws txwv tsis pub leejtwg coj ib yam dabtsi hla hauv lub tshavloog ntawm Tuamtsev mus. 17Yexus qhia rau lawv tias, “Vajtswv tej Lus tau sau cia hais tias, ‘Kuv lub Tuamtsev yog lub tsev thov Vajtswv.’ Tiamsis nej muab hloov los ua qhov chaw rau tubsab nkaum!” #Yaxaya 56:7; Yelemi 7:11
18Cov thawj povthawj hlob thiab cov xibhwb uas qhia Kevcai hnov tej no, lawv thiaj pib nrhiav kev muab Yexus tua. Lawv ntshai Yexus, rauqhov Yexus tej lus qhia ua rau sawvdaws xav tsis thoob.
19Thaum yuav tsausntuj, Yexus thiab Nws cov thwjtim txawm tawm hauv lub nroog mus lawm.
Tsob Ntoo Txiv Ncuavpias Qhuav
(Mathais 21:20-22)
20Hnub tomqab sawvntxov, thaum Yexus thiab Nws cov thwjtim lawv tabtom taug kev mus, lawv pom tsob txiv ncuavpias twb tuag tshav, qhuav ti nkaus cag lawm. 21Petus nco tau hais tias yog licas ces nws txawm hais rau Yexus tias, “Xibhwb, Koj saib seb, tsob txiv ncuavpias uas naghmo Koj foom twb qhuav tag lawm!”
22Yexus teb tias, “Yog nej ntseeg Vajtswv, 23Kuv qhia tseeb rau nej hais tias, yog nej leejtwg hais rau lub roob no kom txav mus rau hauv hiavtxwv, uas yeej tsis ua xyemxyav hauv nej lub siab, tiamsis ntseeg tias yeej yuav muaj rawsli qhov uas nej hais ntawd, ces yeej yuav muaj li ntawd xwb. #Math 17:20; 1Klt 13:2 24Twb yog vimli no, Kuv thiaj hais rau nej tias, thaum nej thov Vajtswv pub ib yam dabtsi rau nej, nej yuavtsum ntseeg tias nej twb tau txais lawm, nej thiaj yuav tau yam uas nej thov ntawd. 25Thaum nej sawvntsug thov Vajtswv, nej yuavtsum zamtxim rau txhua tus uas nej tsis txaussiab rau, kom nej Leejtxiv tus uas nyob sau ntuj ceebtsheej thiaj yuav zam nej lub txim.” 26#11:26: Tej phau ntawv qub uas xuas tes sau ntxiv nqe 26 no rau: Yog nej tsis zamtxim rau lwmtus, nej Leejtxiv tus uas nyob saum ntuj ceebtsheej yuav tsis zamtxim rau nej thiab. #Math 6:14-15
Leejtwg Tsocai Rau Yexus
(Mathais 21:23-27; Lukas 20:1-8)
27Yexus thiab Nws cov thwjtim rov mus rau hauv lub nroog Yeluxalees ib zaug ntxiv. Thaum Yexus mus rau hauv lub Tuamtsev, cov thawj povthawj hlob, cov xibhwb uas qhia Kevcai, thiab cov txwjlaug tuaj cuag Nws, 28thiab nug Nws hais tias, “Koj tau cai qhovtwg los ua tej no? Leejtwg tsocai rau Koj?”
29Yexus teb lawv hais tias, “Kuv yuav nug nej ib los, yog nej teb tau, Kuv mamli qhia rau nej hais tias leejtwg tsocai rau Kuv ua tej no. 30Nej sim qhia rau Kuv seb, leejtwg tsocai rau Yauhas muab neeg ua kevcai rausdej, Vajtswv lossis neeg?”
31Lawv txawm sibtham hais tias, “Peb yuav teb licas? Yog peb teb tias, ‘Vajtswv tsocai rau Yauhas ua,’ Nws yuav hais tias, ‘Ua licas nej ho tsis ntseeg Yauhas?’ 32Tiamsis yog peb ho teb tias, ‘Neeg tsocai rau Yauhas ua ...’ ” (Lawv ntshai cov pejxeem, rauqhov sawvdaws yeej paub tias Yauhas yog ib tug xibhwb cev Vajtswv lus.) 33Lawv thiaj teb Yexus hais tias, “Peb tsis paub.”
Yexus thiaj hais rau lawv tias, “Kuv los yuav tsis qhia rau nej hais tias leejtwg tsocai rau Kuv ua tej no thiab.”
© 2022 United Bible Societies. All rights reserved.