لوکا 4
4
شئیتان ایسّایا چَکّاسیت
(مَتّا 4:1–11؛ مَرکاس 1:12–13)
1ایسّا، پاکێن روها سررێچ، چه اُردُنئے کئورا پِر ترّت. پاکێن روه دێم په گیابانا آییئے رهشۆن#4:1 رَهشۆن، بزان رَهبر، سَرۆک، رهدَربر. بوت. 2اۆدا شئیتانا ایسّا تان چِلّ رۆچا چَکّاست.#4:2 چَکّاسگ، بزان آزمائِش کنگ، اِمتهان گِرگ. آ رۆچان ایسّایا هچّ وراک نئوارت. وهدے آ رۆچ هلاس بوتنت، گُژنَگ بوت. 3شئیتانا گوَشت: ”اگن تئو هُدائے چُکّ ائے، گڑا اے سِنگا بگوَش نگنے ببیت.“ 4ایسّایا پَسّئو دات: ”پاکێن کتابا نبیسگ بوتگ: مردم تهنا په نان زندگَ نبیت.“#4:4 موسّائے واز 8:3.
5گڑا شئیتانا آ، بُرزێن جاگهێا برت و په یکّ دمانے دنیائے سجّهێن بادشاهی پێش داشتنت و 6گوَشتی: ”من اے سجّهێن واک#4:6 واک، بزان زۆر، تاکت. اِهتیار#4:6 اِهتیار، بزان مَستری، کُدرَت، زۆر. و شان و شئوکتا ترا دئیان، چێا که اے منا دئیگ بوتگ‌اَنت و من هرکَسا بلۆٹان، داتِشَ کنان. 7گڑا اگن تئو منا سُجده بکنئے، اے سجّهێن تئییگَ بنت.“ 8ایسّایا پَسّئو دات: ”پاکێن کتابا نبیسگ بوتگ: وتی هُداوندێن هُدائے پرستشا بکن و تهنا هماییئے هِزمتا بکن.“#4:8 موسّائے واز 6:13.
9گُڑا شئیتانا ایسّا اورشَلیما برت، مزنێن پرستشگاهئے بُرزترێن جاگها اۆشتارێنت و گوَشتی: ”اگن تئو هُدائے چُکّ ائے گڑا وتا چه اِدا جَهلا دئور بدئے. 10چێا که نبیسگ بوتگ:
هُدا په تئیی نِگهپانیا وتی پرێشتگان هُکمَ کنت # 4:10 زَبور 91:11. و
11 آ ترا وتی دَستانی دلا دارنت
که تئیی پاد ڈۆکێا ملگّیت.“ # 4:11 زَبور 91:12.
12ایسّایا پَسّئو دات: ”پاکێن کتاب چُش هم گوَشیت: وتی هُداوندێن هُدایا آزمائِش مکن.“#4:12 موسّائے واز 6:16.
13وهدے شئیتانا ایسّائے چَکّاسَگ#4:13 چکّاسگ، بزان آزمائش کنگ، امتِهان گِرَگ. هلاس کرت، په دگه شرترێن وهد و مۆهێا#4:13 مۆه، بزان وهد، پُرست، مۆکل، وار و گێگ. اِشتی و شت.
چه ناسِرَها ایسّائے در کنگ
14گڑا ایسّا گۆن پاکێن روهئے زۆر و واکا جَلیلا پِر ترّت. آییئے نام و تئوار سجّهێن دَمگا شنگ بوت. 15ایسّایا کَنیسَهانی#4:15 کَنیسَه، بزان یَهودیانی پرستشگاه. تها تالیمَ دات و سجّهێن مردمان آ سَتا کرت و ساڑات.#4:15 ساڑایگ، بزان ستا کنگ.
16گڑا ایسّا ناسِرَها شت، همۆدا که رُستگ و مزن بوتگ‌اَت. شَبَّتئے رۆچا#4:16 شَبَّتئے رۆچ هما شمبِه اِنت، بزان یَهودیانی کار نکنگئے رۆچ. وتی هێل و آدتئے پدا کَنیسَها آتک. اۆشتات که چه پاکێن کتابا چیزّے بوانیت. 17اِشئیا نبیئے کتابِش آییئے دستا دات. آییا تومار#4:17 تومار هما کتابانَ گوَشنت که کوَهنێن زمانگا تاک یا پۆستانی سرا نبیسگ و گرد گردا پتایگ بوتگ‌اَنت. پَچ کرت، هما بهری در گێتک که اۆدا نبشته اَت:
18 ”هُداوندئے روه گۆن من گۆن اِنت،
پرچا که آییا منا رۆگن پِر مُشتگ # 4:18 اسراییلیانی کِرّا رۆگن پِر مُشگ بادشاه و مزنێن دینی پێشوایانی گچێن کنگئے رسمے بوتگ. ”مَسیهئے“ لبزئے مانا ”رۆگن پِر مُشتگێن“ اِنت.
که گریب و نێزگاران وشّێن مستاگا بدئیان.
منا دێمی داتگ که بندیگان آزاتیئے،
کۆران بیناییئے،
زُلم آماچان # 4:18 آماچ، بزان دُچار، شِکار نجاتئے مستاگا بدئیان و
19 هُداوندئے رهمتئے سالئے بشارتا بدئیان.“ # 4:19 اِشئیا نبیئے کتاب 61:1–2، لاویان 25:10.
20پدا ایسّایا تومار پێتک، کَنیسَهئے هِزمتکارئے دستا دات و نِشت. کَنیسَهئے سجّهێن مردم آییئے نێمگا چارگا اَتنت. 21ایسّایا گۆن آیان گوَشت: ”مرۆچی گۆن شمئے گۆش دارگا، پاکێن کتابئے اے نبشتهئے راستی پکّا و سَرجم بوت.“ 22هرکَسا په آییا شَرّێن گواهیے دات و سجّهێن مردم چه آییئے دِلکَشّێن هبران هئیران و هَبَکّه منتنت. گوَشتِش: ”اے همے ایسُّپئے چُکّ نه‌اِنت؟“ 23ایسّایا گۆن آیان گوَشت: ”من دلجم آن شما اے بَتَلا په منَ کارێت که اگن تئو تبیبے ائے، گڑا پێسرا وتا دْراه بکن. شما منا گوَشێت که هما مۆجزه که ما اِشکتگ تئو کَپَرناهوما کرتگ‌اَنت، آیان اِدا وتی شهر و هَنکێنا هم بکن.“ 24وتی هبری دێما برت و گوَشتی: ”شمارا راستێنَ گوَشان، هچّ نبی وتی شهر و هَنکێنا منّگَ نبیت. 25دلجم ببێت که اِلیاس نبیئے زمانگا، وهدے تان سئے سال و نێما آسمانئے دپ بند بوت و سجّهێن مُلکا مزنێن ڈُکّالے#4:25 ڈُکّال، بزان کَهت، هُشکسالی. کپت، اِسراییلا بازێن جنۆزامے هست‌اَت. 26بله اِلیاس چه آیان یکّێئے کِرّا هم راه دئیگ نبوت، تهنا سئیدونئے دَمَگا سارِپتهئے شَهرا یکّ جنۆزامێئے کرّا رئوان دئیگ بوت. 27همے پئیما اِلیشا نبیئے زمانگا اِسراییلا بازێنے گَرّئے#4:27 اَسلیگێن یونانی زبانئے لبز، په سْیَه‌گَرّ و بَگ و سُهرباد و په دگه تَهر تَهرێن پۆستی نادراهیان کار بندگَ بیت. نادْراهیا گپتگ‌اَت، بله نۆمان سوریاییا ابێد#4:27 اَبێد (چه)، بزان گئیر چه. یکّے هم دْراه نبوت.“
28چه اے هبرانی اِشکنگا، کَنیسَها آتکگێن مردم زهر گپتنت. 29پاد آتکنت و ایسّااِش تێلانک دئیان چه شهرا در کرت و شهرئے کۆهئے سرا برت. آیان لۆٹِت که ایسّایا چه کۆهئے کلانٹَگا دئور بدئینت، 30بله ایسّا چه آیانی دستا دَر آتک و وتی راها شت.
جِنّئے کَشّگ
(مَرکاس 1:21–28)
31رَندا، ایسّا جَلیلئے دَمگئے شهر کَپَرناهوما شت و شَبَّتئے رۆچا مردمی تالیم داتنت. 32ایسّائے تالیمانی گۆش دارۆک چه آییئے هبرانی اِشکنگا هئیران بوتنت، چێا که آییا گۆن واک و اِهتیار گپّ جت.
33کَنیسَهئے تها یکّ مردێا که آییا پَلیتین روهے بزان جِنّے پِر اَت، کوکّار کنانا گوَشت: 34”او ایسّا ناسِری! ترا مئے کارا چِه کار اِنت؟ آتکگئے که مارا گار و گُمسار بکنئے؟ منَ زانان تئو کئے ائے، تئو هُدائے گچێن کرتگێن هما پاکێن ائے.“ 35ایسّایا جِنّ هکّل دات و گوَشت: ”وتی دپا بدار و اے مردا یله دئے!“ جِنّا مردمانی دێما آ مرد زمینا دئور دات و اَنچُش در آتک که آ مردا هچّ نُکسانے نرَست.
36سجّهێن مردم هئیران بوتنت و وت‌مان‌وتا گوَشتِش: ”اے چۆنێن هبرے؟ گۆن واک و اِهتیارے جِنّان هُکمَ دنت و آ هم مردمان یلهَ کننت.“ 37گڑا کِرّ و گوَرئے سجّهێن جاگهان ایسّائے نام و تئوار شِنگ بوت.
دْرهبکشی و هُدائے کُلئو
(مَتّا 8:14–17؛ مَرکاس 1:29–39)
38ایسّا چه کَنیسَها در کپت و شَمونئے لۆگا شت. شَمونئے وسّیگ تْرندێن تَپێا گپتگ‌اَت. شَمونئے لۆگئے مردمان په آییئے دْراه کنگا گۆن ایسّایا دَزبندی کرت. 39ایسّا شت، آییئے کَشا اۆشتات و تپی هکّل دات. آییئے تَپ سِست. آ، دمانا پاد آتک و آیانی هِزمت کنگا لگّت.
40رۆنِندئے وهدا مردمان هر ڈئولێن نادْراه ایسّائے کِرّا آورت و آییا نادْراهانی سرا دست پِر مُشت و دْراه کرتنت. 41جِنّ چه بازێن مردمێا در آتکنت و کوکّار کنانا گوَشتِش: ”تئو هُدائے چُکّ ائے.“ آیانَ زانت که آ، مَسیه اِنت، بله ایسّایا هکّل دات و گپّا نه‌اِشتنت.
42وهدے رۆچ بوت، ایسّا گِستا و پناهێن#4:42 گِستا، بزان یکّ کِرّ، دور. جاگهێا شت. مردم آییئے شۆهازا اَتنت. وهدے آیان ایسّا دیست، گوَشتِش: ”گۆن ما بجَلّ#4:42 جَلّگ، بزان دارگ، اۆشتگ، مانَگ. و مارا یله مدئے.“ 43ایسّایا گوَشت: ”منا هُدائے بادشاهیئے مِستاگ آ دگه شهران هم رسێنگی اِنت، چێا که هُدایا منا په همے کارا راه داتگ.“ 44گڑا یَهودیَهئے کَنیسَهان وشّێن مِستاگئے جار جنگئے کاری دێما بُرت.
© 2016-22 Wycliffe Bible Translators, Inc.