لوکا 15
15
گارێن مێشئے مِسال
(مَتّا 18:12–14)
1نون سجّهێن سُنگی و مالیاتگیر و گُنهکارێن مردم ایسّائے گوَرا آتکنت که آییئے هبران بِشکننت. 2بله پَریسی و شَریَتئے زانۆگران نُرنڈت و گوَشت: ”گۆن گُنهکاران اے مردئے رو پچ اِنت و گۆن آیان هۆر ورگَ وارت.“
3گڑا ایسّایا په آیان اے مِسال دات و گوَشت: 4”چه شما اگن کَسێا سَد مێش هست و چه آیان یکّے گار ببیت، گڑا اَلّما نئوَد و نُهێن مێشان چَراگاها#15:4 چَراگاه، بزان دلوَتانی چرَگئے جاگه، چَراگجاه، چَراگ. یلهَ کنت و هما گارێن مێشئے شۆهازا رئوت. تانکه دریَ نگێجیت، آراما نَنِندیت. 5وهدے گارێن مێشا درَ گێجیت، په گَلے وتی کۆپگا کنتی، 6لۆگا رئوت، دۆست و همساهگانَ لۆٹاێنیت و گوَشیت: ’منی گَلا شادان بێت که من وتی گارێن مێش در گێتکگ.‘ 7من شمارا گوَشان، همے ڈئولا په یکّ گُنهکارێا که تئوبهَ کنت، آسمانا بلاهێن شادهے بیت، بله په نئوَد و نُه پهرێزکارا که آیان تئوبه پکار نه‌اِنت، چُشێن شادهَ نبیت.
گارێن کَلدارئے مِسال
8یا که اگن جنێنێا ده کَلدار ببیت و چه آ دهێن کَلداران یکّے گار ببیت، گڑا اَلّما په وتی گارێن کَلدارئے شۆهازا چِراگے رۆکَ کنت و سرجمێن لۆگا پٹّیت. تانکه دریَ نگێجیت، آراما نَنِندیت. 9وهدے کَلدارا درَ گێجیت، دَزگُهار و همساهگانَ لۆٹاێنیت و گوَشیت: ’منی گَلا شادان بێت که من وتی گارێن کَلدار دَر گێتکگ.‘ 10همے پئیما من شمارا گوَشان، اگن یکّ گُنهکارے هم چه وتی گناهان تئوبه بکنت، هُدائے پرێشتگ شادِهَ کننت.“
گار ێن بَچّئے مِسال
11پدا ایسّایا گوَشت: ”مردێا دو مردێن‌چُکّ هست‌اَت. 12کَسترێنا یکّ رۆچے گۆن پتا گوَشت: ’او منی پت! چه تئیی مال و مِلکتا هرچے که منی بهر و وَنڈا کپیت، منا انّون بدئے.‘ گڑا پتا وتی مال و مِلکت دوێن چُکّانی سرا بهر کرتنت.
13لهتێن رۆچا و رَند کَسترێن چُکّا وتی سجّهێن مال و هستی یکجاه کرتنت، زرتنتی و دورێن مُلکێا شت و وتی مالی په ائیش و نۆش گار کرتنت. 14وهدے هر چیزّی گار کرتگ‌اَت، آ مُلکا سکّ ڈُکّال کپت و آ تنگدست بوت. 15هما مُلکا یکّ مردمێئے کِرّا شت و دزبندی‌ای کرت که منا کارا بدار. گڑا آییا وتی ڈگارانی سرا هوکّانی چارێنۆک کرت. 16اۆدا همینچُک گُژنگ بوت که آییئے دلا لۆٹت هما کۆسَگان#15:16 کۆسَگ، بزان کرۆ و بانکلێنکئے هما دْراجێن پۆست که دانگی مان اِنت. بوَران و وتی لاپا سێر بکنان که هوکّانی وراک اَنت، بله کَسّا په ورگا هچّ ندات.
17وهدے هۆشی کرت، گۆن وت گوَشتی: ’منی پتئے بازێن نئوکرێا لاپئے سێرا وراکَ رسیت و من اِدا شُدا مَرک آن. 18نون پادَ کایان و وتی پتئے کِرّا رئوان و آییا گوَشان: او منی پت! من هُدائے گُنهکار آن و تئیی هم. 19نون نکرزان که تئیی چُکّ گوَشگ ببان. منا وتی نئوکرانی ڈئولا یکّ نئوکرے بکن.‘
20گڑا پاد آتک و دێم په پتئے لۆگا رهادگ بوت. پتا که چه دورا دیست، چُکّئے سرا بزّگی بوت و تچانا شُت و گوَراَمبازی کرت و چُکّتی. 21چُکّا گوَشت: ’او منی پت! من هُدائے گُنهکار آن و تئیی هم. نون نکرزان که تئیی چُکّ گوَشگ ببان.‘
22بله پتا گۆن وتی گلامان گوَشت: ’اِشتاپ کنێت، په آییا شرترێن کَباها بیارێت و گوَرایی بدئیێت. چَلّه و مُندریکّی دستا و کئوشی پادا بدئیێت. 23پابُندی#15:23 پابُندی، بزان هما پس و گۆک اِنت که په هِلار کنگا لۆگئے دپا دارنتی. گوَسکا#15:23 گوَسک، بزان گۆلۆ، گۆکئے چُکّ. بیارێت و بکُشێت تانکه وشّێن وراکے بوَرێن و شاتکامی بکنێن. 24چێا که منی اے چُکّ مُرتگ‌اَت بله نون پدا زندگ بوتگ، گار اَت و نون در آتکگ.‘ اے ڈئولا آ شاتکامی کنگا لگّتنت.
25بله مسترێن چُکّ ڈگارانی سرا اَت. وهدے لۆگئے نزّیکّا رَست و ساز و زێمل و ناچ و سُهبتئے تئواری اِشکت، 26چه نئوکران یکّے لۆٹاێنت و جُستی کرت: ’اِدا چے بئیگا اِنت؟‘ 27نئوکرا پَسّئو دات: ’تئیی برات آتکگ و نون که آ په وشّی و سلامَتی رَستگ، تئیی پتا پابُندی گوَسک کُشتگ.‘ 28گڑا مسترێن برات زَهر گپت و نلۆٹتی که تها بئیئت. بله پت ڈنّا در آتک و آییئے وشّان کنگا#15:28 وشّان کنگ، بزان سُهل کنگ، آشتی کنگ. لگّت.
29چُکّا پتئے دزبندیئے پَسّئوا گوَشت: ’بچار، من اینچک سالا تئیی کِرّا گُلامێئے ڈئولا کار کرتگ و هچبر چه تئیی هُکما در نبوتگان، بله تئو منا یکّ شِنِکّے هم نداتگ که گۆن وتی سنگتان شاده بکنان. 30بله تئیی اے چُکّا تئیی مال گۆن کَهبگان گار کرت و تئو په آییا پابُندی گوَسک کُشتگ.‘ 31پتا گوَشت: ’او منی چُکّ! تئو هروهدا منی کِرّا ائے و هرچے که منا هست، آ سجّهێن تئییگ اَنت، 32بله انّون مارا گَل بئیَگ و شاتکامی کنگَ لۆٹیت که تئیی اے برات مُرتگ‌اَت و نون زندگ اِنت، گار و بێگواه اَت و نون دَر آتکگ.‘“
© 2016-22 Wycliffe Bible Translators, Inc.