1 Tesalonikɛ̀n anmàn-bɔ̀ 4
4
Esùnàn tɔ̀n léyi Ɔwɔ kɛ cüɛ̀n nɔn
1Ɔtrɔmɛ̀n lɔ, anwrɔn-nɛ́n-muan-ẅì hɔ̀n, bɔ̀ yé nyɛ̀n esùnan léyi ke ji le nyɛ́n ẅɛ̀n ô Ɔwɔ kɛ̀ cüɛn nyɛ̀n nɔn. Annànwɔrɛ mɛ̀n lɔ, esùnan ndɔ lɔ de nyɛ́n ẅɛ̀n nɔn. Tɛ́n zɛtɛ̀ lɔ, bɔ́ sán nyɛ̀n kɩ bɔ́ sɛ́n nyɛ̀n Ɛẅɛnwrɔn Zhezü bɩmɛ̀n: nyɛ́n vru nyɛ́n hán kɛ̀ vrán. 2Nyɛ́n nyri annanwɔrɛ mɛ̀n lɔ, ankà-yé hɔ̀n léyi bɔ̀ tán nyɛ̀n Ɛẅɛnwrɔn Zhezü bimɛ̀n nɔn. 3Nyàn eci léyi dú Ɔwɔ kɔrɛ̀-zì-ci-hán nɔn: ke ji le nyɛ́n dú prɔnprɔn mɛ̀n, ô nyɛ́n wá ny'edomɛ̀n esùva eci-gbangbàn-hán tɛ̀sɛ̀n. 4Ke ji le ɔwrɔnwrɔn kè nyrì bɩ́ ɛnnyɔnwrɔn prɔnprɔn mɛ̀n mán ɛwá mɛ̀n, 5nɛ́n bɩ́ teze n'edomɛ̀n nɛ́n hɔ́n ankà-tro gbàngbàn wú, kɛ hán anwrɔn hɔ̀n léyi kè sɩ̀ nyrì Ɔwɔ nɔn. 6Ankà ndɔ lɔ mɛ̀n, ke sɩ́ ji le ɔwrɔn kè hán nɛ́n muanẅì eci gbàngbàn, ô kɛ̀ jrɛ́ n'ɛkɔrɛ̀levri-ci. Bɔ́ gɔ̀ dɔ́ nyɛ̀n ankà ndɔ lɔ, kɩ bɔ́ bi-dɔ́ nyɛ̀n ɛshishiemɛ̀n: Ɛẅɛnwrɔn kɛ lɛ hán anwrɔn hɔ̀n léyi kɛ hán ɛci ndɔ hɔ̀n lɔ nɔn ɛgbàn. 7Ɔwɔ kè sɩ̀ bi bɔ̀, ô bɔ̀ dú ɛwúvà gbàngbàn-ẅɛn mɛ̀n, tɛ́n bɔ̀ dú prɔnprɔn mɛ̀n. 8Hɩ le kruhú de, ɔwrɔn léyi kɛ kɔ́n ankà-yé ndɔ hɔ̀n lɔ ke die nɔn, nɛ́n sɩ́ kɔ́n ɔwrɔn zriɛmɛ́n nɛ́n diɛ, tɛ́n Ɔwɔ léyi kɛ tán nyɛ̀n n'Ɛnhɛ́n Prɔnprɔn de nɛ kɔ́n die nɔn.
9Ɔwrɔn-nɛ́n-muan-ẅì cüɛ̀n ankà lɔ, ke sɩ́ ji le ye merɛ́n nyɛ̀n owrú, ɔmuhi annanwɔrɛ mɛ̀n lɔ, Ɔwɔ yé nyɛ̀n nyɛ́n dùku ny'edomɛ̀n cüɛ̀n. 10Ɛcüɛ̀n ndɔ de nye yé tán nyɛ́n muan-ẅì hɔ̀n lɔ fɛn léyi dú Maseduhanɛ̀n kpɔsɔ wú nɔn. Tɛ́n bɔ́ yɩ́ nyɛ̀n edù, anwrɔn-nɛ́n-muan-ẅì hɔ̀n, nyɛ́n vru nyɛ́n hán kɛ̀ vrán ndɔ lɔ. 11Anwɔwɔ-wúvà-ẅɛ̀n kè dú ny'ankà shishi, nyɛ́n dùku nyɛ́n wá ny'ɛci hɔ̀n esùva, ô nyɛ́n cɔ́ ny'ɛkɔrɛ̀-kɔhɔ̀n-hán ci-zî, hán ɔmu le bɔ́ gɔ̀ dɔ́ nyɛ̀n nɔn hɔ́. 12Ɔmu lɔ de ny'esùnàn kɛ lɛ wá tán ny'ɛwá, anwrɔn léyi kè sɩ̀ dù Krisì-sɛ̀nkɛn-bɔ̀ nɔn y'ɛtɛ̀sɛ̀n, kɩ nyɛ́n sɩ̀ srɔ ɔwrɔn zriɛmɛ́n lowru.
Ɛẅɛnwrɔn vá vra lɔ
13Anwrɔn-nɛ́n-muan-ẅì hɔ̀n, bɔ́ ji le nyɛ́n nyri ankà annanwɔrɛ léyi dú owú-bɔ̀ ankà wú, ô nyɛ́n bɩ́ dú obòto mɛ̀n kɛ hán anwrɔn hɔ̀n léyi kè sɩ̀ ẅɛ̀n esɛ́ nɔn. 14Bɔ bú tán le Zhezü nwù kɩ dú owúemɛ̀n frɔ́; ɔmu zri lɔ, bɔ́ bú tán le Ɔwɔ ke le sɩ́ anwrɔn hɔ̀n léyi ke le wù nɔn, yɔ mán Zhezü mɛhi ɔkɔrɛ-bɔ̀ mɛ̀n ke dú kɛ yɔ bú n'ankà yɔ tán ankaẅì.
15Annanwɔrɛ mɛ̀n lɔ, nyàn ankà léyi bɔ́ dɔ́ Ɛẅɛnwrɔn ankà-yé tɔ̀n wú nɔn: bɔ́ ɛmɛ̀n lɔ, anwrɔn hɔ̀n léyi ke le dú ɔkɔrɛ-bɔ̀ mɛ̀n ɛnvra léyi Ɛẅɛnwrɔn kɛ lɛ và nɔn, yɔ sɩ̀ ẅɛn vɔ̀nshɛ́ kɛ̀ vrán yɔ hɔ̀n léyi nwù nɔn. 16Yɛ lɛ yá ɛnyànmàn-tán bobo tɔ̀n, Ɔwɔ-kùyüre-wrɔn cüìcüì sùva mán Ɔwɔ brɛ̀n kù-dì, kɩ Ɛẅɛnwrɔn dùku ke le dú anhobɩ́ kɛ lɛ kàkɛ. Anwrɔn hɔ̀n léyi wú Krisì ankàẅì-bùtan lɔ mɛ̀n nɔn, yɔ le dú kpàkpà-bɔ̀ yɔ vá ɔkɔrɛ-bɔ̀ mɛ̀n; 17zɛtɛn, bɔ́ léyi bɔ́ le dú ɔkɔrɛ-bɔ̀ mɛ̀n hɩ vra lɔ nɔn, ye le bɩ́ bɔ̀, yɔ mán bɔ́ mɛhi ye ci ɛnwì-gbú granmɛ̀n, ô bɔ̀ srɔ́n Ɛẅɛnwrɔn ɛsù ɔwràn mɛ̀n. Kɩ ɔmu lɔ, bɔ́ le dú bɔ́ mán Ɛẅɛnwrɔn mɛhi ɛnvra lɔ fɛn. 18Zɛtɛn nyɛ́n bi ɛnborɛ nyɛ́n wá ny'edòmɛ̀n ankàdɔ̀ ndɔ hɔ̀n lɔ wú.
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.