Roma 4
4
Uneki u ka̱ɗu wi Ibrahim
1Yi ɗa̱i tsa kudana n ukuna wu uneki u ka̱ɗu u na akaya a̱ tsu Ibrahim u piꞋisai? 2Ka̱shile ko bonoko yi baci derere adama a ili i na u yaꞋin, ashe u ciya̱ ta̱ ili i na u kuyaꞋanka a̱ra̱ɗi. Amma ili i na Ka̱shile ke sheshei i ɗa ba. 3Katagarda ka Ciɗa ka danai, “Ibrahim u neke ta̱ ka̱ɗu n Ka̱shile, ɗa Ka̱shile ke kecei ni a̱ ka̱tsuma̱ ka uma a̱ usuɓi.”#Ugi. 15:6.
4Vuza u yaꞋan baci ulinga, mayun ɗa a tsu tsupa yi adama a ulinga u na u yaꞋin. Ikebe i nan lo ya kuneꞋe ku ɗa ba. 5Amma va kuzuwa Ka̱shile ku ushuku n a̱ɗa̱ adama a ili i yoku i na i yaꞋin ba. Ka̱shile ko bonoko ta̱ aza a unushi derere adama a uneki u ka̱ɗu u na i n u ɗa a kubana wa̱ ni. 6Dawuda u dansa ta̱ feu nannai derere ana u yaꞋin kadanshi ka̱ ma̱za̱nga̱ ka vuma vu na Ka̱shile ki isai ɗa wo okpoi vuza vu usuɓi,† ko a na usuɓi u nan lo wi adama a ili i na vuza va u yaꞋin ba.
7“Uma a na a yaꞋin ili i gbani-gbani i na Ka̱shile ka cinukpakai le,
i ta̱ a̱ ma̱za̱nga̱ mayun.
Ka̱shile ka takpa ta̱ unushi u le.
8Uma a nan lo a i ta̱ a̱ ma̱za̱nga̱,
aza a na Vuzavaguɗu u kpa̱ɗa̱i kudoku kuciɓasa n unushi u le.”#Ishp. 32:1-2.
9Ma̱za̱nga̱ ma na Dawuda u yaꞋin kadanshi na adama a aza a na a kiɗai avaja ɗa koci? Ta nannai ba! Ali n aza a na a̱ kpa̱ɗa̱i kukiɗa avaja feu. Adama a na tsu dana ta̱ ɗe tsu na Katagarda ka Ciɗa ka danai, “Ibrahim u neke ta̱ ka̱ɗu n Ka̱shile, ɗa Ka̱shile ke kecei ni vuma vu usuɓi.” 10Nini ɗai ka yaꞋin? Ka̱shile ki isa ta̱ Ibrahim† kafu a kiɗa yi kavaja, ko sai ana u kiɗai biꞋi? Ka̱shile ki isa yi ta̱ kafu a kiɗa yi kavaja. 11Kukiɗa ku kavaja urotu u ɗa u na u yotsongi a na Ibrahim u nekei ɗe ka̱ɗu, ali kpamu Ka̱shile ki isai ni ɗe. Ɗa u bonokoi ni vuza vu usuɓi, ali kafu a kiɗa yi kavaja. Ta nannai Ibrahim a̱yi ɗa dada va aza a na e nekei a̱ɗu ɗa i babu ukiɗi wa avaja. O okpoi aza a̱ usuɓi a̱ Ka̱shile adama a uneki wa̱ a̱ɗu u le. 12Ibrahim va a̱yi ɗa kpamu dada vu uma a na a kiɗai avaja feu, amma sai i baci n uneki u ka̱ɗu tsu na Ibrahim wi ishi kafu a kiɗa yi kavaja.
Uzuwakpani u ɗaɗa adama a aza a na e nekei a̱ɗu ra̱ka̱
13Ka̱shile ka yaꞋankai Ibrahim nu ntsukaya n ni uzuwakpani u danai wi ta̱ e kuneke le aduniyan. Ka̱shile ka yaꞋan nannai adama a na Ibrahim u tonoi Wila̱ ba, amma adama a uneki u ka̱ɗu u ni u ɗaɗa Ka̱shile ki isai ni. 14Uma i baci a kisa ili i na Ka̱shile ka yaꞋin uzuwakpani a̱ ubuta̱ u kutono ku Wila̱, uneki u ka̱ɗu wo okpo ta̱ ili i gbani. Ka̱ta̱ kpamu uzuwakpani u Ka̱shile a kubana wi Ibrahim wo okpo feu gbani. 15Ka̱shile ka tsu pana ta̱ wupa a ayin a na baci uma a̱ kpa̱ɗa̱i kutono Wila̱. Wila̱ wi ishi baci lo ba, vuza wo kukoɗo u ɗa ba.
16Adama a nannai uma a ci isa ta̱ uzuwakpani u Ka̱shile e neke baci a̱ɗu. U ci neke ta̱ u ɗa gbani, adama a kasingai† ka̱ ni. U ci neke ta̱ u ɗa o tono baci Wila̱ wa Ayahuda, ko o tono baci u ɗa ba. I ta̱ a̱ kuciya̱ u ɗa i baci n uneki u ka̱ɗu ci Ibrahim. Adama a na Ibrahim a̱yi ɗa dada va aza a na e nekei a̱ɗu ra̱ka̱. 17Tsu na Katagarda ka Ciɗa ka danai ana Ka̱shile ka danai Ibrahim, “N zuwa wu ta̱ vu okpo esheku a iɗika kakau n a̱bunda̱i.”#Ugi. 17:5. Uzuwakpani u nam pa a yaꞋanka ta̱ u ɗa Ibrahim adama a na u neke ta̱ ka̱ɗu n Ka̱shile, vuza na u tsu ɗengusa̱ a̱kpisa̱ n wuma. Ka̱ta̱ kpamu u yaꞋan ili i savu yu uta̱ a̱ ubuta̱ u na ili yi ishi lo ba.
18Ana Ka̱shile ka yaꞋankai Ibrahim uzuwakpani u na u kokpo esheku a iɗika kakau n a̱bunda̱i, ɗa Ibrahim u nekei ka̱ɗu n Ka̱shile. Ka̱shile ka dana ta̱ feu, “Ntsukaya n nu mi ta̱ a kuyaꞋan n a̱bunda̱i, tsa azangata.”#Ugi. 15:5. U neke ta̱ ka̱ɗu ko a na uzuwakpani nannai u yotsoi adanshi wa kuyaꞋan ba! 19Ɗa Ibrahim u lyaꞋi kelime n kuneke ka̱ɗu, ko a na a̱ya̱ a̱ ni i ɗevu n amangatawun, ali tsukutsa ci ni ci a̱ kusa̱nka̱ yi kudoku kumatsa. Vuka vi ni feu Saratu† u kutsa ta̱ babu ta na u ciya̱ muku.
20Ibrahim u yaꞋan munla̱i ma na Ka̱shile ka kuyaꞋan ili i na u yaꞋin uzuwakpani ba, u ka̱sa̱kpa̱ ta na kuneke ka̱ɗu ba. Uneki u ka̱ɗu u ni u zuwakai ni utsura, ɗa u nekei Ka̱shile tsugbayin. 21Wi ta̱ n uneki u ka̱ɗu u mayun a na Ka̱shile ki a kufuɗa kuyaꞋan ili i na u yaꞋin uzuwakpani.
22Adama a uneki u ka̱ɗu wi Ibrahim, ɗa “Ka̱shile ke kecei ni vuma vu usuɓi.” 23Ana Katagarda ka Ciɗa ka danai, “Ka̱shile ke kece yi ta̱ vuma vu ma̱riki,” Ibrahim ɗa a ɗanakai ukuna u nan lo koci ba. 24A ɗana ta̱ nannai adama a̱ tsu feu, ciya̱ a dana tsu Ka̱shile ki ta̱ o kubonoko tsu uma a̱ usuɓi ci neke baci a̱ɗu n a̱yi, vuza na u ɗengusa̱i Yesu Vuzagbayin vu tsu a̱ ukpa̱. 25Ka̱shile ke neke ta̱ Yesu u kuwa̱ adama a unushi u tsu, ɗa u ɗengusa̱i ni n wuma, adama a na Ka̱shile ko bonoko tsu derere.
© 2012 Wycliffe Bible Translators, Inc. All rights reserved