Roma 3
3
1Ayahuda i ta̱ n ili i na uma o yoku a̱ ciya̱i ba? Te ɗai ugaꞋin wi a kiɗa le baci avaja? 2Wi ta̱ n ugaꞋin a uye n a̱bunda̱i! Uye u iyain u ɗaɗa Ka̱shile ke neke ta̱ akaka a̱ ni e ekiye a aza a Ayahuda.
3Mayun ɗa ele vi yoku a̱ kpa̱ɗa̱i kuneke a̱ɗu n akaka a. Na lo va u kusa̱nka̱ ta̱ Ka̱shile kuyaꞋan ili i na u yaꞋin uzuwakpani? 4Ko kenu! Ka̱shile ka tsu dansa ta̱ ili i mayun, ko yaba dem wi vuza va aꞋuwa. Katagarda ka Ciɗa ka dana ta̱ ukuna u nam pa adama a̱ Ka̱shile,
“Ayin a na baci de dem vi yaꞋin kadanshi, yaba dem u kene ta̱ a na vi yaꞋin derere.
Ayin a na baci a bankai nu nsata n nu a̱ ubuta̱ wa afada, vi ta̱ a kulyaꞋa le.”#Ish. 51:4.
5Uma o yoku a danai, “Tsu nusa baci, na lo va u yotsongu ta̱ e keteshe a na Ka̱shile ki derere. Adama a nannai Ka̱shile ka takacika tsu baci tsu dana u nusa ta̱.” (Mi ta̱ a kuyaꞋan ulinga n kadanshi ka vuma, ka na ki derere ba.) 6Kanananai ka nam pa ka, mayun ɗa ba! Mayun ɗa baci Ka̱shile ka ci yaꞋan kasingai ayin tutu ba, mayun u kufuɗa kuyaꞋanka aduniyan afada ba. 7Vuza yoku feu u danai, “E neke baci Ka̱shile tsugbayin ka̱u, adama a na aꞋuwa a̱ va̱ o yotsongu ta̱ ili i na u danai mayun ɗa, nini ɗai u kudana mpa vuza vu unushi ɗa, ka̱ta̱ u takacika mu?” 8Ta baci nannai, u gaꞋan ba yi ta̱ kpamu a kudana “YaꞋan ci yaꞋansa kawuya, wo okpo an uye u kucikpa Ka̱shile.” Uma o yoku a ci shika tsu ta̱ a dana ci ta̱ a kuyaꞋan kuyotsongusu nahannai. Mayun ɗa ba! Ka̱shile ki ta̱ a kutakacika le adama a ili i na a yaꞋin.
Babu vuza vu usuɓi
9Ci ta̱ a kudana a na a̱tsu na ci Ayahuda tsu laꞋa ta̱ uma a na a buwai? Ta nannai ba! Ci yotsongu ta̱ ɗe a na unushi† u tsu ka̱na̱ Ayahuda n Aza̱ka̱yimbi dem. 10Katagarda ka Ciɗa ka danai,
“Babu vuza na wi n usuɓi,†
ko vuza te wi lo ba.
11Babu vuza vu ugboji.
Babu vuza na wi a̱ kula̱nsa̱ Ka̱shile.
12Uma ra̱ka̱ a̱ shirikpa̱ka̱ ta̱ Ka̱shile kucina̱.
N nannai ɗa ta na, yaba dem wo okpoi ili i wasasa.
Babu vuza na wi a kuyaꞋan kasingai.
Ko vuza te wi lo ba.”#Ishp. 14:1-3; 53:1-3.
13“A̱ tsu tuka̱ ta̱ n ukpa̱ a̱ ubuta̱ u kadanshi ke le.
Kadanshi ke le ki ta̱ tukpa n aꞋuwa.”
“Ili i na a tsu dansa yi ta̱ an tsukono tsu koko.”#Ishp. 5:9; 140:3.
14“Ayin tutu i ta̱ a kuyaꞋan una̱ u wuya u na u konokpoi.”
15“Ayin tutu i ta̱ ufoɓushi adama a na a una uma.
16A̱ ubuta̱ u na a banai dem, a tsu la̱nga̱sa̱ ta̱ ukuna ka̱ta̱ a̱ tuka̱ n atakaci.
17A ci yaꞋan ili adama a na a zuwa uma o yongo m mapanakpanai ba.”#Ish. 59:7-8.
18“I a kusuma Ka̱shile ba.”#Ishp. 36:1.
19Ci yeve ta̱ ili dem i na Wila̱ u dansai, u dansa ta̱ i ɗa wa aza a na Ka̱shile ke nekei Wila̱ wa. Ta ki nannai adama a na uma a namba ili i kulaꞋaka, ka̱ta̱ Ka̱shile ka yaꞋanka uma a aduniyan ra̱ka̱ afada. 20Ka̱shile ko kubonoko vuza n usuɓi adama a na u tonoi Wila̱ koci ba. Nannai ɗa ba, ili i na Wila̱ u ci yaꞋan i ɗaɗa, u zuwa tsu ta̱ ci yeve a na tsu nusai ɗe.
Uteku u na Ka̱shile ko bonokoi tsu aza a̱ ma̱riki
21Amma gogo na Ka̱shile ko yotsongu ta̱ uye u yoku kau u na u kukece uma o okpo aza a̱ usuɓi. Wila̱ n iɗani i Eneki a dansa ta̱ ukuna wu uye u nam pa, u ɗa ta na wi adama o kutono Wila̱ u Musa ba. 22Ka̱shile ke ci kece ta̱ uma o okpo aza a̱ ma̱riki a̱ ushuki baci Yesu Kirisiti Kishi u takpa unushi u le. Uma ra̱ka̱ i ta̱ a̱ kuciya̱ wishi a uye u te u nam pa, ko ele ɗa anan ya, ko ili i na a yaꞋin ɗe kpamu. 23Yaba dem u nusa ta̱, ɗa kpamu u gusa̱i a̱ ubuta̱ u tsugbayin tsu Ka̱shile. 24Amma Ka̱shile ke ci kece le ta̱ derere adama a wishi u ni u na u nekei gbani. U yaꞋan ta̱ na va a̱ ubuta̱ u Kirisiti Yesu Kishi, vuza na u nekei tsu uba̱ruwi,† ana u takpai unushi u tsu. 25Ka̱shile ke neke ta̱ Yesu tsa alyuka† adama a na u takpa atakaci a unushi u uma, ciya̱ u doku u pana wupa n ele ba. Ka̱shile ke ci kece ta̱ uma aza a̱ ma̱riki, a̱ ushuku baci a na Yesu u tsuwa̱in mpasa n ni a̱ ubuta̱ wu ukpa̱, ana u nekei wuma u ni tsa alyuka adama e le. Ka̱shile ki ta̱ n uremi u ka̱ɗu ayin tutu ɗa kpamu wi a kuyaꞋansa ili i singai. Ta ki nannai m mani-mani va ɗe, ana u kpa̱ɗa̱i kutakacika uma adama a unushi u le. 26Ɗa Ka̱shile ke nekei tsu Yesu adama a na u yotsongu a na u ci yaꞋan ili i na yi derere ana u ci kecei aza a unushi o okpo aza a̱ ma̱riki adama a na e neke ta̱ a̱ɗu n Yesu.
27Ci ta̱ n ili i na tsa kuyaꞋanka a̱ra̱ɗi adama a̱ ka̱ci ka̱ tsu? A̱Ꞌa̱, ana Ka̱shile ku ushuki n a̱tsu, adama a ili i singai i na ci yaꞋin ɗa ba. Amma adama a uneki u ka̱ɗu u tsu u ɗa. 28Ka̱shile ka zuwa tsu ta̱ tso okpo m ma̱riki n a̱yi adama a na ci neke ta̱ a̱ɗu, amma adama a na tsu tonoi Wila̱ ba. 29Ka̱shile ka Ayahuda kaꞋa koci? A̱Ꞌa̱! Ka̱shile ka Aza̱ka̱yimbi kaꞋa feu? E, ta nannai! 30Ka̱shile ke te kaꞋa ki lo koci, uye u te u ɗa kpamu wi lo u na u tsu ushuku n uma. U zuwa ta̱ uma o okpo m ma̱riki n a̱yi koci e neke baci a̱ɗu. Ukuna wi punu ba, ko ele Ayahuda a ɗa ko Ayahuda a ɗa ba. 31Gogo na a na ci n uneki u ka̱ɗu, ci ta̱ a kuvaruku Wila̱ wa? Ko kenu! Uneki u ka̱ɗu u ɗaɗa u tsu zuwa tsu tso okpo ili i na Wila̱ u cigai tso okpo mayun.
© 2012 Wycliffe Bible Translators, Inc. All rights reserved