ܙܟ݂ܪܝܐ 14
14
ܐ݇ܬܵܝܬܵܐ ܕܝܵܘܡܵܐ ܕܡܵܪܝܵܐ ܘܡܲܠܟܘܼܬܹܗ
1ܗܵܐ، ܝܵܘܡܵܐ ܕܡܵܪܝܵܐ ܒܹܐܬܵܝܵܐ ܝܠܹܗ، ܘܒܸܬ ܦܵܐܹܫ ܦܘܼܠܸܥܵܐ ܣܠܵܒܵܟ݂ܝ ܒܓܵܘܵܟ݂ܝ. 2ܘܒܸܬ ܓ̰ܲܡܥܸܢ ܠܟܠܲܝܗܝ ܐܸܡܘܵܬܹ̈ܐ ܠܐܘܿܪܸܫܠܸܡ ܠܦܠܵܫܵܐ، ܘܒܸܬ ܦܵܝܫܵܐ ܫܩܝܼܠܬܵܐ ܡܕܝܼܢ݇ܬܵܐ، ܘܒܸܬ ܦܵܝܫܝܼ ܣܠܝܼܒܹܐ ܒܵܬܹ̈ܐ، ܘܒܲܟ݂ܬܵܬܹ̈ܐ ܒܸܬ ܦܵܝܫܝܼ ܒܘܼܣܪܹܐ، ܘܒܸܬ ܦܵܠܹܛ ܦܲܠܓܵܐ ܕܡܕܝܼܢ݇ܬܵܐ ܒܓܵܠܘܼܬܵܐ، ܘܣܵܗܡܵܐ ܦܝܼܫܵܐ ܕܥܲܡܵܐ ܠܹܐ ܦܵܐܹܫ ܩܛܝܼܥܵܐ ܡ̣ܢ ܡܕܝܼܢ݇ܬܵܐ. 3ܘܒܸܬ ܦܵܠܹܛ ܡܵܪܝܵܐ ܘܒܸܬ ܦܵܠܹܫ ܥܲܡ ܕܐܵܢܝܼ ܐܸܡܘܵܬܹ̈ܐ، ܐܲܝܟ݂ ܝܵܘܡܵܐ ܕܦܠܝܼܫ ܠܹܗ ܒܝܵܘܡܵܐ ܕܩܪܵܒ݂ܵܐ. 4ܘܒܸܬ ܟܵܠܝܼ ܐܲܩܠܘܼ̈ܗܝ ܒܗ̇ܘ ܝܵܘܡܵܐ ܥܲܠܔ ܛܘܼܪܵܐ ܕܙܲܝܬܹ̈ܐ، ܕܝܼܠܹܗ ܠܒܲܠܩܘܼܒ݂ܠܔ ܕܐܘܿܪܸܫܠܸܡ ܡ̣ܢ ܡܲܕܢܚܵܐ، ܘܒܸܬ ܦܵܩܹܥ ܛܘܼܪܵܐ ܕܙܲܝܬܹ̈ܐ ܡ̣ܢ ܦܲܠܓܹܗ ܠܵܡܲܕܢܚܵܐ ܘܠܵܡܲܥܪܒ݂ܵܐ، ܘܒܸܬ ܗܵܘܹܐ ܒܝܼܹܗ ܪܵܘܘܿܠܵܐ ܓܘܼܪܵܐ ܪܵܒܵܐ، ܘܒܸܬ ܫܲܢܹܐ ܦܲܠܓܵܐ ܕܛܘܼܪܵܐ ܠܵܓܲܪܒܝܵܐ، ܘܦܲܠܓܹܗ ܠܵܬܲܝܡܢܵܐ. 5ܘܒܸܬ ܥܵܪܩܝܼܬܘܿܢ ܒܪܵܘܘܿܠܵܐ ܕܛܘܼܪ̈ܵܢܝܼ، ܣܵܒܵܒ ܒܸܬ ܡܵܛܹܐ ܪܵܘܘܿܠܵܐ ܕܛܘܼܪܹ̈ܐ ܠܐܵܨܵܠܔ، ܘܒܸܬ ܥܵܪܩܝܼܬܘܿܢ ܕܵܐܟ݂ܝܼ ܕܥܪܝܼܩ ܠܵܘܟ݂ܘܿܢ ܡܩܵܕ݇ܡ ܦܵܬܵܐ ܕܪܵܘܕܵܢܵܐ، ܒܝܵܘܡܵܢܹ̈ܐ ܕܥܘܿܙܝܼܵܐ ܡܲܠܟܵܐ ܕܝܼܗܘܼܕܵܐ، ܘܒܸܬ ܐܵܬܹܐ ܡܵܪܝܵܐ ܐܲܠܵܗܝܼ، ܟܠܲܝܗܝ ܩܲܕܝܼܫܹ̈ܐ ܥܲܡܘܼܗܝ#14:5 ܝܲܢ ܥܲܡܘܼܟ݂؛ ܝܲܢ ܥܲܡܵܟ݂ܝ، ܝܵܥܢܝܼ ܐܘܿܪܸܫܸܠܡ. 6ܘܒܸܬ ܗܵܘܝܵܐ ܒܗ̇ܘ ܝܵܘܡܵܐ، ܠܹܐ ܗܵܘܹܐ ܒܲܗܪܵܐ، ܢܲܗܝܼܪܹ̈ܐ ܒܸܬ ܚܵܒ݂ܝܼ. 7ܘܒܸܬ ܗܵܘܹܐ ܚܲܕ ܝܵܘܡܵܐ، ܗ̇ܘ ܕܝܼܠܹܗ ܝ݇ܕܝܼܥܵܐ ܠܡܵܪܝܵܐ، ܠܵܐ ܐܝܼܡܵܡܵܐ ܘܠܵܐ ܠܲܝܠܹܐ، ܘܒܸܬ ܗܵܘܝܵܐ، ܒܙܲܒ݂ܢܵܐ ܕܪܲܡܫܵܐ ܒܸܬ ܗܵܘܹܐ ܒܲܗܪܵܐ. 8ܘܒܸܬ ܗܵܘܝܵܐ ܒܗ̇ܘ ܝܵܘܡܵܐ، ܒܸܬ ܦܵܠܛܝܼ ܡ̈ܝܼܵܐ ܚܵܝܹ̈ܐ ܡ̣ܢ ܐܘܿܪܸܫܠܸܡ، ܦܲܠܓܲܝܗܝ ܠܵܝܵܡܵܐ ܡܲܕܢܚܵܝܬܵܐ، ܘܦܲܠܓܲܝܗܝ ܠܵܝܵܡܵܐ ܡܲܥܪܒ݂ܵܝܬܵܐ، ܒܩܲܝܛܵܐ ܘܒܣܸܬܘܵܐ ܒܸܬ ܗܵܘܹܐ ܗܲܕܟ݂ܵܐ. 9ܘܒܸܬ ܗܵܘܹܐ ܡܵܪܝܵܐ ܡܲܠܟܵܐ ܥܲܠܔ ܟܠܵܗ̇ ܐܲܪܥܵܐ. ܒܗ̇ܘ ܝܵܘܡܵܐ ܒܸܬ ܗܵܘܹܐ ܡܵܪܝܵܐ ܚܲܕ ܘܫܸܡܹܗ ܚܲܕ. 10ܡ̣ܢ ܓܒܲܥ ܠܪܸܡܘܿܢ ܒܸܬ ܚܵܕܪܵܐ ܟܠܵܗ̇ ܐܲܪܥܵܐ ܐܲܝܟ݂ ܥܵܪܵܒ݂ܵܐ، ܕܝܼܠܵܗ̇ ܒܬܲܝܡܢܵܐ ܕܐܘܿܪܸܫܠܸܡ، ܘܒܸܬ ܪܵܝܡܵܐ ܐܘܿܪܸܫܠܸܡ ܘܒܸܬ ܝܵܬܒ݂ܵܐ ܒܕܘܼܟܬܘܼܗ̇، ܡ̣ܢ ܕܲܪܘܵܙܵܐ ܕܒܸܢܝܵܡܹܝܢ ܗܲܠܔ ܫܵܘܦܵܐ ܕܕܲܪܘܵܙܵܐ ܩܲܕ݇ܡܵܝܵܐ، ܗܲܠܔ ܕܲܪܘܵܙܵܐ ܕܩܘܼܪ̈ܢܝܼܵܬܹܐ، ܘܡ̣ܢ ܒܘܼܪܓ̰ܵܐ ܕܚܢܵܢܵܐܹܝܠܔ ܗܲܠܔ ܡܲܥܨܲܪ̈ܝܵܬܹܐ ܕܡܲܠܟܵܐ. 11ܘܒܸܬ ܝܵܬܒ݂ܝܼ ܓܵܘܘܼܗ̇ ܥܵܡܪ̈ܵܢܹܐ، ܘܚܸܪܡܵܐ ܠܹܐ ܗܵܘܹܐ ܡܸܢܕܪܸܫ، ܘܒܸܬ ܝܵܬܒ݂ܵܐ ܐܘܿܪܸܫܠܸܡ ܒܫܸܠܝܘܼܬܵܐ.
12ܘܐܵܗܵܐ ܒܸܬ ܗܵܘܝܵܐ ܡܚܘܿܬܵܐ ܕܒܸܬ ܡܵܚܹܐ ܡܵܪܝܵܐ ܠܟܠܲܝܗܝ ܥܲܡܡܹ̈ܐ ܕܐ݇ܬܹܐ ܠܗܘܿܢ ܒܚܲܝܠܵܘܵܬܹ̈ܐ ܥܲܠܔ ܐܘܿܪܸܫܠܸܡ: ܒܸܬ ܦܵܫܹܪ ܒܸܣܪܲܝܗܝ ܟܲܕ ܟܸܠܝܹܐ ܥܲܠܔ ܐܲܩܠܲܝ̈ܗܝ، ܘܥܲܝܢܲܝ̈ܗܝ ܒܸܬ ܦܵܫܪܝܼ ܒܒܸܙܥܵܙܲܝ̈ܗܝ، ܘܠܸܫܵܢܲܝܗܝ ܒܸܬ ܦܵܫܹܪ ܒܦܘܼܡܲܝܗܝ. 13ܒܗ̇ܘ ܝܵܘܡܵܐ ܒܸܬ ܗܵܘܹܐ ܚܒ݂ܵܛܵܐ ܓܘܼܪܵܐ ܓܵܘܲܝܗܝ ܡ̣ܢ ܠܟܸܣ ܡܵܪܝܵܐ، ܘܒܸܬ ܕܵܒܹܩ ܟܠܔ ܐ݇ܢܵܫܵܐ ܒܐܝܼܕܵܐ ܕܚܲܒ݂ܪܹܗ، ܘܒܸܬ ܐܵܣܩܵܐ ܐܝܼܕܹܗ ܕܲܠܩܘܼܒ݂ܠܔ ܐܝܼܕܵܐ ܕܚܲܒ݂ܪܹܗ. 14ܘܐܘܼܦ ܝܼܗܘܼܕܵܐ ܒܸܬ ܦܵܠܹܫ ܒܐܘܿܪܸܫܠܸܡ، ܘܒܸܬ ܦܵܐܹܫ ܓ̰ܘܼܡܸܥܵܐ ܥܘܼܬܪܵܐ ܕܟܠܲܝܗܝ ܐܸܡܘܵܬܹ̈ܐ ܚܵܕܸܪ̈ܘܵܢܹܐ: ܕܲܗܒ݂ܵܐ ܘܣܹܐܡܵܐ، ܘܓ̰ܘܼܠܹ̈ܐ ܒܒܘܼܫܵܝܘܼܬܵܐ ܪܵܒܵܐ. 15ܘܗܲܪ ܐܲܝܟ݂ ܕܐܵܗܵܐ ܡܚܘܿܬܵܐ ܒܸܬ ܗܵܘܝܵܐ ܥܲܠܔ ܣܘܼܣܹܐ، ܘܟܵܘܸܕܢܵܐ، ܘܓܘܼܡܠܵܐ، ܘܚܡܵܪܵܐ، ܘܟܠܔ ܒܥܝܼܪܵܐ ܕܗܵܘܹܐ ܒܐܵܢܝܼ ܡܲܫܪ̈ܝܼܵܬܹܐ.
16ܘܒܸܬ ܗܵܘܝܵܐ، ܟܠܔ ܕܦܵܐܹܫ ܫܒ݂ܝܼܩܵܐ ܚܵܝܵܐ ܡ̣ܢ ܟܠܲܝܗܝ ܐܸܡܘܵܬܹ̈ܐ ܐܵܬܝܵܢܹ̈ܐ ܕܲܠܩܘܼܒ݂ܠܔ ܐܘܿܪܸܫܠܸܡ، ܒܸܬ ܐܵܣܩܝܼ ܡ̣ܢ ܫܹܢ݇ܬܵܐ ܠܫܹܢ݇ܬܵܐ ܠܸܣܓ݂ܵܕܵܐ ܠܡܲܠܟܵܐ، ܡܵܪܝܵܐ ܚܲܝܠܬܵܢܵܐ، ܘܠܸܥܒ݂ܵܕܵܐ ܥܹܐܕܵܐ ܕܡܛܲܠܠܹ̈ܐ. 17ܘܒܸܬ ܗܵܘܝܵܐ، ܟܠܔ ܫܲܪܒܬܵܐ ܡ̣ܢ ܫܲܪ̈ܒܵܬܹܐ ܕܐܲܪܥܵܐ ܕܠܵܐ ܐܵܣܩܵܐ ܠܐܘܿܪܸܫܠܸܡ، ܠܸܣܓ݂ܵܕܵܐ ܠܡܲܠܟܵܐ، ܡܵܪܝܵܐ ܚܲܝܠܬܵܢܵܐ، ܠܹܐ ܗܵܘܝܵܐ ܥܲܠܲܝܗܝ ܩܲܫܩܲܫܬܵܐ ܕܡܸܛܪܵܐ. 18ܘܐܸܢ ܫܲܪܒܬܵܐ ܕܡܸܨܪܹܝܢ ܠܵܐ ܐܵܣܩܵܐ ܘܠܵܐ ܐܵܬܝܵܐ، ܠܹܐ ܗܵܘܝܵܐ ܥܲܠܲܝܗܝ ܩܲܫܩܲܫܬܵܐ ܕܡܸܛܪܵܐ، ܐܸܠܵܐ ܒܸܬ ܗܵܘܝܵܐ ܥܲܠܲܝܗܝ ܡܚܘܿܬܵܐ ܕܒܸܬ ܡܵܚܹܐ ܡܵܪܝܵܐ ܠܐܸܡܘܵܬܹ̈ܐ ܕܠܵܐ ܐܵܣܩܝܼ ܠܸܥܒ݂ܵܕܵܐ ܥܹܐܕܵܐ ܕܡܛܲܠܠܹ̈ܐ. 19ܐܵܗܵܐ ܒܸܬ ܗܵܘܝܵܐ ܚܛܝܼܬܵܐ ܕܡܸܨܪܹܝܢ ܘܚܛܝܼܬܵܐ ܕܟܠܲܝܗܝ ܐܸܡܘܵܬܹ̈ܐ ܕܠܵܐ ܐܵܣܩܝܼ ܠܸܥܒ݂ܵܕܵܐ ܥܹܐܕܵܐ ܕܡܛܲܠܠܹ̈ܐ.
20ܒܗ̇ܘ ܝܵܘܡܵܐ ܒܸܬ ܗܵܘܹܐ ܟܬܝܼܒ݂ܵܐ ܥܲܠܔ ܙܹܓܹ̈ܐ ܕܣܘܼܣܵܘܵܬܹ̈ܐ، ”ܩܘܼܕܫܵܐ ܠܡܵܪܝܵܐ،“ ܘܒܸܬ ܗܵܘܝܼ ܡܲܪܸ̈ܓܠܹܐ ܕܓܵܘ ܒܲܝܬܵܐ ܕܡܵܪܝܵܐ ܐܲܝܟ݂ ܟܵܣܹ̈ܐ ܕܩܵܕ݇ܡ ܡܲܕܒܚܵܐ. 21ܘܒܸܬ ܗܵܘܹܐ ܟܠܔ ܡܲܪܸܓܠܵܐ ܕܓܵܘ ܐܘܿܪܸܫܠܸܡ ܘܓܵܘ ܝܼܗܘܼܕܵܐ ܩܘܼܕܫܵܐ ܠܡܵܪܝܵܐ ܚܲܝܠܬܵܢܵܐ، ܘܒܸܬ ܐܵܬܝܼ ܟܠܲܝܗܝ ܕܵܒ݂ܚܵܢܹ̈ܐ، ܘܒܸܬ ܫܵܩܠܝܼ ܡܸܢܲܝܗܝ ܘܒܸܬ ܒܲܫܠܝܼ ܒܝܼܲܝܗܝ، ܘܠܹܐ ܗܵܘܹܐ ܟܢܲܥܢܵܝܵܐ ܡܸܢܕܪܸܫ ܓܵܘ ܒܲܝܬܵܐ ܕܡܵܪܝܵܐ ܚܲܝܠܬܵܢܵܐ ܒܗ̇ܘ ܝܵܘܡܵܐ.
Aramaic Bible Translation Assyrian Bible © 2025 Aramaic Bible Translation