DANGYASARAO 21
21
Tura ha Paul thang ba
1Bonsi jang degao lai hi, rung jang jing baigo hi, boni yaohon ha se beleng hi Kos hahgojo sophin hi, oraha ni phrang thang pha lang hi Patara ha jing sohi kha; 2Phoiniki raji ha thang mane rung masi mai hi, rung ha ga dada jing thang la kha. 3Kupra hahgojo khe jing nuha ba, ode bokhe yaosi gede haiger hi thangpha lang hi, Suria raji gede thangpha lang hi, Tura ha jing akhai ba; bede thikhade oraha rung ni phrang jinis akhai rima nang du. 4Oraha, yaohon rikphayarao sereba khe goron dada nokha sain sni bonsi ni ha dongthao ba. Bonsi bese jang thijao hi, Paul khe Jerusalem ha igah gasingya mane thi ba. 5Thikhabo, ebo basain ni yaohon ha jing baigo hi, thangla kha. Boha, daphlungrao khrip bo, bonsi ni bihih ar basathu bo nolei rogong sosi jing khe degar hi ba; ode sagor dergong ha yasgu thuhi jing bi ba. 6Ode, khrip khe juthai khlim hi jing degao lai hi, rung ha ga kha, bonsi de jar jarni noh ha thangphin la kha.
Kaisari raji ha Paul thang ba
7Tura ni phrang rung ha jing gahi thang bani yaohon ha Ptolemai sohi dada, daphlungrao khe khlim hi, bonsi niha sainsi dongthao ba. 8Gibin basain ha jing baigo hi, Kaisari ha jing sohi ba. Oraha hamba graojma thiyaba Phillip ni noh ha hapsing ba; bo Jerusalem ha dangyasa saikhoyaba sni ni bising ha saosi se. 9Boni ha mala gathar bri dong ba, bonsi Madai ni grao khe sainthi re. 10Oraha ning gabang basain jing dong ba ha, Judai raji ni phrang gorasali saosi Agaba thiyaba phai ba. 11Bo jini ha phai hi, Paul ni jengsdu khe lang hi, bo jarni yao igah khe khahi thi ba, Ebo de Bese Gathar thi ba: ebo jengsdu ni bubra khe Jerusalem ha, elei jasosi khahi, Jentailrao ni yao ha rijao ma, bo ode thi ba. 12Bo grao khe jing khna hi, jing jang bo nolei ni subung buthu Paul khe Jerusalem ha thangya mane jing khainsu ba. 13Boha Paul thiphin ba, Nisi snadi khlai ba, nisi olei grahi grahi ani khah khe sabai ba? Gabra Jisu ni bumu ne khlai hi Jerusalem ha khajaoma se ning niya hi, thih mani khlai hibo ang salai kha, nisi mithi lah.
14Bo maniya bani yaohon ha, Gabra ni khusi ja thing, thihi jing phirik phirik dong la kha.
15Oraha gejesi bubli dong bani yaohon ha, jing bakho salai hi, Jerusalem gede thang ba. 16Kaisari ni phrang bo gejesi rikphayarao jing jang baosi thangpha hi, bumu Mnason, Kupra hahgojo ni rikphayasa saosi jang jing thaohi mane bonsi lang ba.
Paul, Jakob jang goron lai ba
17Jerusalem ha sohi ba jang, daphlungrao khaja hi bonsi jing khe lamjao kha. 18Gibin basain ha, Paul jing khe lang hi, Jakob niha thang ba, oraha longjom ni khraorao bo dong ba. 19Paul bonsi khe khlim hi, jarni khusi khe dang hi Madai ning Jentailrao ni bising ha dang riyaba buthu khe bising bohor ni grao khe thi ba. 20Daphlungrao bo grao khe khna hi, bonsi bo Madai khe bakhan khlai ba; ode, Paul niha thi ba, Daphlung Paul, Judarao ni bising ha lonyaba bangba khe ning nu kha, bonsi khripbo Dara ni basao ha khah jang muh jang khnabo khna du. 21Ning Jentailrao ni bising ha khrip Juda dongyarao niha bonsi ni basathu jogai bujuh raso mane ode, dara lai da dong thi hi, Moses khe dangkhlaiyaba ni grao khe sling ri re thihi malai ni khuh ni phrang bonsi khna ba. 22Bonsi ning sophai ba khe khna kha thi. Bede jama kho? 23Nini ha jing thiba lai ning dang lah. Grao hanggaiyaba miyahrao jini ha bri dong. 24Bonsi khe lang hi bo jang baosi jar khe jar susa lah; ode bonsi ni khnai khe khep phu mani khlai hi bonsi ne rang khoros khlai lah. Odese subung khrip malai ni khuh ha nini grao khe bonsi khnayaba buthu gibi niya thihi tharmai nang. Ning jar ning Dara ni balam ha hamsisi dong ba thihi bonsi tharmai la nang. 25Thikhabo, Jentailrao ni bising ha lonyarao, saokhuli ne bandai riya bani mogong khe jiya mane, mogong ni thijao khe jiya mane, mih gorna derthaiyaba ni mogong khe jiya mane, ode gaori jayaba khe gathar jama nang ma, thihi jing bisar khlai hi reb kha, bonsi ode thi ba.
26Odehe, Paul bo subung buthu khe lang hi, gibin basain ha bonsi jang baosi gathar jahi, Madai ni bikhoh ha thang ba, ode oraha sainthi ba je gathar jabani basain ha, khrip saosi saosi ne khlai hi mih bandai ri mane riya si de, ragao si gathar jahi bonsi dong ma nang ma thihi, Jonthai niha bonsi sainthi da ba.
Paul khe bikhoh ha rem ba
27Thikhabo, nokha sain sni japhaima jaba ha, Asia raji ni Judarao, Paul khe Madai khoh ha nuhi, khrip subung jaokhu hi, bokhe bonsi rem ba. 28Bonsi jirik khaohi thi ba, Israel ni subung buthu, juru ha! Ebo subung ning khrip hathan ha ode khrip subung niha, Juda ja thing, Dara khe ja thing, ebo noh khe ja thing, sijiyaba se; ebo khe garhi bo Madai ni bikhoh ha Greek subung buthu khe bo bising ha labupha hi, ebo noh gathar khe bo rege rege khlai kha! bonsi ode thi ba. 29(Ebo ni sagang ha Ephesi ni subung Trophim khe Paul jang baosi nogor ha nu ba, ode Paul bokhe Madai khoh ni bising ha labu pha ba thihi bonsi buji ba.)
30Boha bo nogor ni khrip ha subung buthu khai hi bojom ja ba, ode Paul khe Madaikhoh ha remhi baji ha bonsi labu ba, ode derga buthu khe srap phrao thar ba. 31Bokhe bonsi sthaima baoba ha, Jerusalem ni khrip subung bonsi nam jalai du thihi siphaiyarao ni hoja dedao thaoyaba niha graojma sohi kha. 32Boha ning bo siphaiyarao jang siphaiya rjasi ni hoja khe labu hi, bonsi niha bo khai khlai bu ba. Ode, bonsi siphaiya ni hoja dedao thaoyaba ode siphaiyarao khe bonsi nuba jang bonsi Paul khe suba thao kha. 33Hoja dedao thaoyaba boni gabasi phai hi, Paul khe rem hi, sikhol magin jang kha mani hukhum rihi, Ebo sere? Bo snadi khlai ba? thi hi bonsi sing ba. 34Subung bojom jayarao ni bising ha gejesi grao masi khe bonsi jirik khao ba, gejesi jakha de gibin grao khe jirik khao ba, yao bani bo gibi grao khe musibo haphrang mai phuya kha. Odebani noh bising ha lang mani bo hukhum ri ba. 35Bo yamthai ha sohiba jang subung buthu gabang subani, siphaiyarao bo khe bamkhu hi langma nang ba. 36Khrip subung, Bokhe sjam khlah! thihi jirik khao hi bonsi rikpha du.
Paul jar khe grao jang dimkhao ba
37Paul khe khorongma ha langba ha, bo siphaiya rjasi ni hoja dedao thaoyaba niha thi ba, Nini ha ang grao thaisi thiphu nang?.
Hoja singphin ba, Ning Greek grao tharmai du na? 38Sagang ha subung buthu khe phuslaiya ba, subung sthaibaiyarao rjing bri hajengling ha langyaba, Egypt ni subung ning niya? bo ode thi ba.
39Paul thiphin ba, Ang de Juda subung se, Kiliki raji ni Tarsa nolei ha dongyaba se. Khasao hi ang khe subung buthu niha grao sainthi mane ri lah, thihi bokhe sain ba.
40Hoja hukhum riba jang, Paul yamthai ha song hi, subung buthu khe phirik phirik dong mani khlai hi jarni yao jang phunu ba. Ode, phirik thaoba jang Hebrai grao jang bo thi kha.
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.