Maˍkuˆ li‸ 14

Yeˍsuˆ hta‸ tiˇ pehˍ tuˬ awˬ hoˉ teˇ hpaˍjehˬ da‸ ve

1Nyiˇ nyi peuˬ kʼo, Paˍsaˍhkaˍ pawehˇ leh Hkaoˍmonˇ awˬ hkʼaw lo diˇ maˇ keu ve pawehˇ te ve awˬ yanˇ gaˬ la tuˬ yoˬ. Oˇ htaˇ, paw hkuˇ lonˉ teˇ hpaˍ leh li‸ bvuh‸ paˍ teˇ hpaˍ lehˬ, hkʼaˬ hkʼe te leh heˍ ve awˬ hkʼaw lo yawˇ hta‸ hpeh yuˬ leh tiˇ pehˍ tuˬ ca ve yoˬ. 2Awˬ lawn kʼo, yawˇ hui lehˬ, Chaw chi ma ve duiˆ-ehˍ shaˇ-ehˍ maˇ gʼa hpeh‸ la tuˬ, pawehˇ te ve awˬ yanˇ awˬ hkʼaw lo taˇ te teh‸ kʼoˆ da‸ ve yoˬ.

Beˍtaˍniˆ hkʼaˆ hkʼaw lo yaˇ miˇ teˇ gʼaˇ Yeˍsuˆ hta‸ naˍ manˇ hawnˉ shehˍ piˇ ve

3Yeˍsuˆ lehˬ Beˍtaˍniˆ hkʼaˆ hkʼaw hkiˬ tu‸ paˍ Siˉmonˍ ve aˉ hkʼaw hpui lawˇ paˇ lo mui caˇ chehˇ htaˇ, yaˇ miˇ teˇ gʼaˇ lo‸ la ve yoˬ. Yawˇ lehˬ, awˬ hpfuhˇ hkʼaˆ jaˇ ve naˍ manˇ hawnˉ keu taˍ ve hpuˉ-ehˍ ve haˉ pui kaw teˇ maˬ yuˬ laˬ leh, kaw oˇ ve hta‸ dawˆ hkoˇ sheˬ leh Yeˍsuˆ ve oˉ kʼoˍ hta‸ naˍ manˇ hawnˉ oˇ ve ngeuˍ pfuhˍ piˇ ve yoˬ. 4Teˇ hpaˍ hpaˍ nyi ma zuhˆ leh kʼoˆ ve, Aˬ hto‸ ma te awˬ bon maˇ cawˬ ve awˬ hkʼaw lo naˍ manˇ hawnˉ chi hta‸ yehˇ baˬ ve le. 5Naˍ manˇ hawnˉ chi ve hta‸ shehˆ ha hteh‸ hpaˆ hawˇ leh, haˍ yaˇ gʼawˇ yaˇ hui hta‸ pehˬ piˇ cawˇ ve yoˬ teh‸, teˇ gʼaˇ leh teˇ gʼaˇ kʼoˆ da‸ ve yoˬ. Peuˬ leh, yaˇ miˇ oˇ ve hta‸ yawˇ hui deˇ ve yoˬ.

6Ya‸ hkʼaˇ Yeˍsuˆ kʼoˆ ve, Yaˇ miˇ chi hta‸ taˇ deˇ. Nawˬ hui aˬ hto‸ ma te yawˇ hta‸ sho‸ sha‸ piˇ ve le. Yawˇ ngaˬ hta‸ da‸ ve teˇ ceuˬ te laˇ peuˬ. 7Haˍ ve gʼawˇ ve chaw teˇ hpaˍ nawˬ hui geh hkʼaˬ htaˆ ka‸ chehˇ taˍ ve yoˬ. Nawˬ hui te gaˇ ve kʼo, hkʼaˬ ve teˇ yanˇ maˇ kʼoˆ, yawˇ hui hta‸ da‸ ve awˬ ceuˬ te piˇ hpeh‸ ve yoˬ. Ya‸ hkʼaˇ, ngaˬ nawˬ hui geh hkʼaˬ htaˆ ka‸ chehˇ tuˬ ve maˇ heˆ. 8Yaˇ miˇ chi lehˬ, te puiˉ te hpeh‸ ve hkʼe te peuˬ. Ngaˬ awˬ to hta‸ tuˍ tuˬ awˬ pon, awˬ gʼuˇ suhˍ htaˇ ka‸ yawˇ naˍ manˇ hawnˉ pfuhˍ laˇ ve yoˬ. 9Ngaˬ nawˬ hui hta‸ awˬ tehˬ awˬ na kʼoˆ laˇ ve, ha lehˬ ve bon hkawˇ miˬguiˬ teˇ kaˬ le le lo ca maˍ piˇ ve teˇ yanˇ, yaˇ miˇ chi hta‸ dawˇ nawˇ tuˬ awˬ pon yawˇ te taˍ ve kanˉ chi hta‸ kʼaoˍ maˍ piˇ tuˬ yoˬ teh‸ kʼoˆ ve yoˬ.

Yeˍsuˆ hta‸ chiˇ a‸ piˇ tuˬ Yuˇda‸ hkanˍ ve

10Oˇ htaˇ, awˬ la‸ gʼawˇ teˇ chi nyiˇ gʼaˇ awˬ hkʼaw lo Yuˇda‸ Iˉsaˍkaˍriˍoˆ lehˬ, Yeˍsuˆ hta‸ paw hkuˇ lonˉ hui ve la‸ sheh awˬ hkʼaw lo chiˇ a‸ piˇ tuˬ yawˇ hui geh kʼai ve yoˬ. 11Yawˇ hui tawˇ oˇ ve hta‸ gʼa kaˇ ve teˇ yanˇ ha lehˬ jaˇ leh, yawˇ hta‸ hpu piˇ tuˬ ka ti‸ te taˍ ve yoˬ. Hkʼe te leh yawˇ hta‸ chiˇ a‸ piˇ tuˬ, da‸ ve awˬ yanˇ hta‸ Yuˇda‸ ca chehˇ ve yoˬ.

Yeˍsuˆ yawˇ ve awˬ la‸ gʼawˇ hui geh Paˍsaˍhkaˍ pawehˇ caˇ ve

12Hkaoˍmonˇ awˬ hkʼaw lo diˇ maˇ keu ve pawehˇ awˉ lawˉ teˇ nyi htaˇ, paˍsaˍhkaˍ yawˬ ehˉ hta‸ tiˇ tanˇ ve teˇ nyi awˬ hkʼaw lo, yawˇ ve awˬ la‸ gʼawˇ teˇ hpaˍ yawˇ geh laˬ leh kʼoˆ ve, Paˍsaˍhkaˍ pawehˇ caˇ tuˬ, nawˬ awˬ pon hkʼaˬ lo teˇ kaˬ ngaˬ hui hta‸ ca gu tcuh laˇ gaˇ ve le teh‸ na nyi ve yoˬ.

13Oˇ htaˇ, yawˇ yawˇ ve awˬ la‸ gʼawˇ nyiˇ gʼaˇ hta‸ kʼai tcuh leh kʼoˆ piˇ ve, Venˇ awˬ hkʼaw lo kʼai-o. Iˉ kaˆ mu‸ hkʼu taˆ ve chaw teˇ gʼaˇ hta‸ nawˬ huiˉ maˬ gʼa hpuˇ da‸ tuˬ yoˬ. 14Yawˇ awˬ hkʼaˇ suh kʼai leh, yawˇ hkʼaˬ lo lo‸-e ve maˇ kʼoˆ, yehˬ shehˍ hpaˇ hta‸ chi hkʼe kʼoˆ piˇ-oˆ. Saˍ la‸ kʼoˆ laˇ ve, Ngaˬ leh ngaˬ ve awˬ la‸ gʼawˇ hui geh teˇ geh Paˍsaˍhkaˍ pawehˇ caˇ tuˬ, ngaˬ awˬ pon teh taˍ ve hkehˉ chaw bawehˇ hkʼaˬ lo le. 15Oˇ htaˇ, chehˇ kuiˬ hkʼa deh‸ gu taˍ peuˬ ve, awˬ hta‸ teˇ htai‸ bawehˇ uiˍ ve teˇ bawehˇ yawˇ nawˬ huiˉ maˬ hta‸ maˍ laˇ tuˬ yoˬ. Oˇ kaˬ lo ngaˬ hui awˬ pon gu taˍ-o‸ teh‸ kʼoˆ piˇ ve yoˬ.

16Awˬ la‸ gʼawˇ oˇ ve nyiˇ gʼaˇ tawˆ kʼai leh, venˇ awˬ hkʼaw lo lo‸-e ve teˇ yanˇ, yawˇ kʼoˆ laˇ ve hkʼe gʼa mawˬ leh, Paˍsaˍhkaˍ pawehˇ caˇ tuˬ awˬ pon gu taˍ ve yoˬ.

17Mehˆ muiˉ naˆ la htaˇ, awˬ la‸ gʼawˇ teˇ chi nyiˇ gʼaˇ geh yawˇ laˬ ve yoˬ. 18Yawˇ hui awˍ mui caˇ chehˇ htaˇ Yeˍsuˆ lehˬ, Ngaˬ nawˬ hui hta‸ awˬ tehˬ awˬ na kʼoˆ laˇ ve, nawˬ hui awˬ hkʼaw lo ngaˬ geh teˇ geh hkaˆ caˇ ve chaw teˇ gʼaˇ lehˬ, ngaˬ hta‸ chiˇ a‸ tuˬ yoˬ teh‸ kʼoˆ ve yoˬ. #Chi 41:9

19Yawˇ hui dawˇ haˍ leh, Ngaˬ laˇ teh‸ teˇ gʼaˇ peuˬ teˇ gʼaˇ yawˇ hta‸ na nyi ve yoˬ.

20Peuˬ leh yawˇ kʼoˆ ve, Teˇ chi nyiˇ gʼaˇ awˬ hkʼaw lo ngaˬ geh teˇ hkehˇ tiˉ hkaˆ caˇ ve chaw teˇ gʼaˇ yoˬ. 21Chaw yaˇ ve Yaˇ hpu lehˬ, yawˇ ve awˬ lawn bvuh‸ taˍ ve hkʼe, yawˇ gʼa kʼo‸-e tuˬ yoˬ. Ya‸ hkʼaˇ, chaw yaˇ ve Yaˇ hpu hta‸ chiˇ a‸ ve chaw teˇ gʼaˇ lehˬ gʼa dawˇ haˍ jaˇ tuˬ yoˬ. Chaw oˇ ve maˇpaw la ve hkʼe kʼo, yawˇ awˬ pon da‸ leuˉ ve yoˬ teh‸, yawˇ hui hta‸ kʼoˆ piˇ ve yoˬ.

Jawˇmawˇ Yeˍsuˆ ve pawehˇ caˇ ve

22Yawˇ hui caˇ chehˇ htaˇ, yawˇ hkaoˍmonˇ hta‸ yuˬ leh bon hta‸ chiˇ mvuh ve yoˬ. Peuˬ leh yawˇ hkaoˍmonˇ hta‸ hkʼeh‸ leh awˬ la‸ gʼawˇ hui hta‸ piˇ leh kʼoˆ ve, Yuˬ-o‸. Chi lehˬ ngaˬ ve awˬ to yoˬ teh‸ kʼoˆ piˇ ve yoˬ.

23Kawˆ hta‸ htawˇ yawˇ yuˬ leh, bon hta‸ chiˇ mvuh peuˬ hkʼaw‸ nawˉ yawˇ hui hta‸ piˇ leh, yawˇ hui hkʼa peu-eˬ kawˆ oˇ ve hta‸ dawˬ ve yoˬ. 24Peuˬ leh yawˇ kʼaw‸ kʼoˆ ve, Chi lehˬ ka ti‸ shaˉ caˆ hta‸ caˉ da‸ ve ngaˬ ve awˬ suhˍ yoˬ. Awˬ suhˍ chi lehˬ, chaw maˇ maˇ ve awˬ pon ngeuˍ pfuhˍ ve yoˬ. 25Ngaˬ nawˬ hui hta‸ awˬ tehˬ awˬ na kʼoˆ laˇ ve, Gʼuiˬsha ve mvuhˇmiˬ awˬ hkʼaw lo a pehˉ meuˇ gʼuiˬ awˬ suhˉ hta‸ gʼa dawˬ tuˬ ve awˬ nyi hkʼa gaˬ, ngaˬ a pehˉ meuˇ gʼuiˬ hta‸ maˇ kʼaw‸ dawˬ teh‸ yawˇ hui hta‸ kʼoˆ piˇ ve yoˬ.

Peˍtruˆ Yeˍsuˆ hta‸ chiˇ baˬ tuˬ ve awˬ lawn Yeˍsuˆ kʼoˆ piˇ ve

26Peuˬ leh, yawˇ hui kʼa muiˬ hkawˇ kʼa peuˬ hkʼaw‸ nawˉ yawˇ hui tawˆ-e leh Shaˍlonˍ hkʼaw lo kʼai ve yoˬ. 27Oˇ htaˇ Yeˍsuˆ yawˇ hui hta‸ kʼaw‸ kʼoˆ piˇ ve, Nawˬ hui hkʼa peu-eˬ nyi ma luˬ tuˬ yoˬ. Awˬ lawn kʼo, Yawˬ hawˉ paˍ hta‸ ngaˬ dawˆ pehˍ leh, yawˬ teˇ hpaˍ hpaˆ da‸ leh teˇ kaˬ teˇ hkeh hpaw kʼai tuˬ yoˬ teh‸, Li‸ hpu hkʼaw bvuh‸ taˍ ve yoˬ. #Zhk 13:7 28Ya‸ hkʼaˇ, ngaˬ kʼaw‸ te‸ tu la peuˬ hkʼaw‸ nawˉ nawˬ hui gʼuˇ suhˍ Gaˍliˍlehˇ mvuhˇ miˬ lo ngaˬ kʼai tuˬ yoˬ teh‸ kʼoˆ ve yoˬ.

29Oˇ htaˇ Peˍtruˆ kʼoˆ ve, Shu hkʼa peu-eˬ nyi ma luˬ htawˇ ngaˬ lehˬ nyi ma maˇ luˬ teh‸ yawˇ hta‸ kʼoˆ piˇ ve yoˬ.

30Yeˍsuˆ lehˬ, Ngaˬ nawˬ hta‸ awˬ tehˬ awˬ na kʼoˆ laˇ ve, ya‸ puiˉ gʼaˆ hpfuh nyiˇ pawˆ maˇ bvuhˬ sheˍ htaˇ, nawˬ ngaˬ hta‸ shehˆ pawˆ hkʼa gaˬ chiˇ baˬ tuˬ yoˬ teh‸ yawˇ hta‸ kʼoˆ piˇ ve yoˬ.

31Peˍtruˆ lehˬ, Nawˬ geh teˇ geh ngaˬ gʼa suh ve htawˇ, nawˬ hta‸ ngaˬ maˇ chiˇ baˬ taˬ teh‸, yawˇ hta‸ hehnˇ chaweh kʼoˆ piˇ ve yoˬ.

Yawˇ hui hkʼa peu-eˬ htawˇ oˇ hkʼe kʼoˆ ve yoˬ.

Geˍseˍmaˍniˆ hko hkʼaw lo Yeˍsuˆ bon ca lawˬ ve

32Oˇ htaˇ Geˍseˍmaˍniˆ meh ve teˇ kaˬ lo yawˇ hui gaˬ leh, Ngaˬ bon ca lawˬ chehˇ htaˇ nawˬ hui choˬ kaˬ lo mui taˍ-o‸ teh‸, yawˇ ve awˬ la‸ gʼawˇ teˇ hpaˍ hta‸ yawˇ kʼoˆ piˇ ve yoˬ. 33Peuˬ leh, Peˍtruˆ, Yaˍkoˆ, Yoˇhanˬ hui hta‸ yawˇ geh teˇ geh shiˍ veu ve yoˬ. Oˇ htaˇ yawˇ nyi ma awˬ hkʼaw lo anˇ jaˇ, sho‸ sha‸ jaˇ la leh, 34yawˇ hui hta‸ kʼoˆ piˇ ve, Ngaˬ nyi ma dawˇ haˍ jaˇ ve suh la yoˬ. Choˬ kaˬ lo chehˇ taˍ leh shaw taˍ-o‸ teh‸ kʼoˆ piˇ ve yoˬ.

35Peuˬ leh, yawˇ awˬ gʼuˇ suhˍ a ciˉ kʼai peuˬ hkʼaw‸ nawˉ, yawˇ miˬ chaˇ hkʼoˆ boˆ sheˍ leh, awˬ yanˇ chi ve yawˇ hta‸ ponˬ kʼai gʼa kʼo, ponˬ kʼai laˇ tuˬ bon lawˬ ve yoˬ. 36Aˍbaˆ A pa-oˬ, nawˬ hkʼa peu-eˬ ve hta‸ te hpeh‸ ve yoˬ. Kawˆ chi ve ngaˬ hta‸ ponˬ kʼai tcuh laˇ-oˆ. Ya‸ hkʼaˇ, ngaˬ a loˍ cawˇ ve hkʼe taˇ hpeh‸ piˇ. Nawˬ a loˍ cawˇ ve hkʼe hpeh‸ piˇ-oˆ teh‸ lawˬ ve yoˬ.

37Yawˇ kʼaw‸ gaˬ la htaˇ, yawˇ hui zuh‸ muiˉ kʼa chehˇ ve hta‸ gʼa mawˬ leh Peˍtruˆ hta‸ kʼoˆ piˇ ve, Siˉmonˍ-oˬ, nawˬ zuh‸ muiˉ kʼa chehˇ ve laˇ. Teˇ naˍ riˍ ceh ka‸ nawˬ shaw taˍ maˇ hpeh‸ laˇ. 38Nawˬ hui beˬ ve lawˇ ve awˬ hkʼaˇ suh maˇ gʼa kʼai tuˬ bon lawˬ leh shaw taˍ-o‸. Nawˬ hui te gaˇ ve nyi ma cawˬ htawˇ, awˬ suhˍ awˬ shaˍ lehˬ awˬ gʼaˇ nuˇ ve yoˬ teh‸ kʼoˆ ve yoˬ.

39Peuˬ leh, yawˇ teˇ pawˆ kʼaw‸ kʼai leh, awˬ gʼuˇ suhˍ htaˇ lawˬ ve hkʼa shuˍ shuˍ bon kʼaw‸ lawˬ ve yoˬ. 40Yawˇ teˇ pawˆ kʼaw‸ kʼaw‸ la htaˇ, yawˇ hui zuh‸ muiˉ geu‸ jaˇ ve pa taw zuh‸ muiˉ kʼa chehˇ ve hta‸ yawˇ gʼa mawˬ ve yoˬ. Yawˇ hta‸ hkʼaˬ hkʼe kʼaw‸ kʼoˆ piˇ tuˬ yawˇ hui maˇ shiˍ.

41Shehˆ pawˆ teˇ pawˆ yawˇ kʼaw‸ la leh kʼoˆ piˇ ve, Nawˬ hui zuh‸ muiˉ kʼa leh gʼaˇ jehˇ chehˇ sheˍ laˇ. Pehˇ-o, chaw yaˇ ve Yaˇ hpu lehˬ venˇbaˆ yaˇ hui ve la‸ hkʼaw lo chiˇ a‸ ve hta‸ gʼa hkanˍ ve awˬ yanˇ gaˬ la peuˬ. 42Tu, kʼai-a veuˬ. Nyi loˬ, ngaˬ hta‸ chiˇ a‸ shehˍ hpaˇ awˬ paˇ lo gaˬ la peuˬ teh‸ kʼoˆ ve yoˬ.

Yeˍsuˆ hta‸ chiˇ a‸ piˇ leh hpeh yuˬ ve

43Yawˇ tawˇ yaw chehˇ htaˇ, tcuh yaˇ teˇ chi nyiˇ gʼaˇ awˬ hkʼaw lo Yuˇda‸ meh ve teˇ gʼaˇ laˬ leh, aˉ htaw pfuhˇ leh suhˆ taˬ taˆ ve chaw awˬ moˍ lonˉ htawˇ yawˇ geh laˬ ve yoˬ. Chaw awˬ moˍ lonˉ oˇ ve lehˬ, paw hkuˇ lonˉ hui, li‸ bvuh‸ paˍ hui leh awˬ hoˉ chaw mawˇ teˇ hpaˍ tcuh peu laˇ ve chaw hpeh‸ ve yoˬ. 44Yawˇ hta‸ chiˇ a‸ piˇ shehˍ hpaˇ teˇ gʼaˇ lehˬ, yawˇ hui hta‸ awˬ heˆ chi hkʼe te tuˬ kʼoˆ piˇ taˍ ve, Ngaˬ boˆ nu ve chaw teˇ gʼaˇ lehˬ yawˇ yoˬ. Yawˇ hta‸ yuˬ tiˍ taˍ leh hkʼa deh‸ yuˬ kʼai-o teh‸ kʼoˆ piˇ ve yoˬ.

45Yawˇ gaˬ la htaˇ Yeˍsuˆ geh teˇ cawˬ haˉ kʼai leh, Jawˇmawˇ-oˬ, teh‸ kʼoˆ leh yawˇ hta‸ boˆ nu ve yoˬ. 46Oˇ htaˇ yawˇ hui Yeˍsuˆ hta‸ vawˆ leh yuˬ tiˍ taˍ ve yoˬ. 47Awˬ paˇ lo huˉ taˍ ve chaw hui awˬ hkʼaw lo teˇ gʼaˇ lehˬ, yawˇ ve aˉ htaw gʼawˬ tawˆ leh, paw hkuˇ lonˉ vuiˬ taˍ ve awˬ ceˬ hta‸ chaw leh naˍ paw cheˆ ve yoˬ. 48Yeˍsuˆ yawˇ hui hta‸ kʼoˆ piˇ ve, Nawˬ hui lehˬ, chaw hkʼawˇ hta‸ ca hpeh yuˬ ve hkʼe, aˉ htaw leh suhˆ taˬ teˇ hpaˍ yuˬ veu laˇ leh ngaˬ hta‸ ca hpeh la ve leˇ. 49Teˇ nyi le le bon yehˬ lonˉ awˬ hkʼaw lo ngaˬ nawˬ hui geh chehˇ leh maˍ piˇ chehˇ ve htawˇ, nawˬ hui ngaˬ hta‸ maˇ hpeh yuˬ. Ya‸ hkʼaˇ, chi hkʼe hpeh‸ la ve lehˬ, Li‸ hpu hkʼaw bvuh‸ taˍ ve hkʼe biˇ la tuˬ awˬ pon yoˬ teh‸ kʼoˆ ve yoˬ.

50Oˇ htaˇ, yawˇ ve awˬ la‸ gʼawˇ hkʼa peu-eˬ yawˇ hta‸ baˬ taˉ leh hpaw-e ve yoˬ.

Chaw haˉ paˍ teˇ gʼaˇ hpaw-e ve

51Chaw haˉ paˍ teˇ gʼaˇ lehˬ, pi‸ hpa teˇ hkʼoˆ ceh tiˉ yawˇ awˬ to hta‸ hawˆ taˍ leh Yeˍsuˆ awˬ hkʼaˇ suh kʼai ve yoˬ. Chaw oˇ ve teˇ hpaˍ yawˇ hta‸ hpeh yuˬ ve teˇ yanˇ, 52pi‸ hpa oˇ ve hta‸ yawˇ kʼehˆ baˬ taˉ leh awˬ kʼu nyi te hpaw-e ve yoˬ.

Jehˬ da‸ shehˍ hpaˇ awˬ moˍ Yeˍsuˆ hta‸ suhˉ jehˬ ve

53Oˇ htaˇ yawˇ hui lehˬ, Yeˍsuˆ hta‸ paw hkuˇ lonˉ geh yuˬ kʼai ve yoˬ. Paw hkuˇ lonˉ teˇ hpaˍ, awˬ hoˉ chaw mawˇ teˇ hpaˍ leh li‸ bvuh‸ paˍ teˇ hpaˍ hkʼa peu-eˬ oˇ kaˬ lo hpawnˬ la ve yoˬ. 54Peˍtruˆ lehˬ, paw hkuˇ lonˉ ve shaˉ nanˉ awˬ paˇ lo ko taˍ kuiˬ awˬ hkʼaw hpawˇ hkʼa gaˬ Yeˍsuˆ awˬ hkʼaˇ suh a ciˉ vuiˇ kuiˬ lo kʼai leh, shaw shehˍ hpaˇ teˇ hpaˍ geh mui leh, aˬ miˍ lehˬ chehˇ ve yoˬ. 55Paw hkuˇ lonˉ teˇ hpaˍ leh jehˬ da‸ shehˍ hpaˇ awˬ moˍ hkʼa peu-eˬ lehˬ, Yeˍsuˆ hta‸ gʼa tiˇ pehˍ tuˬ, shaˉ hkiˆ hkanˍ shehˍ hpaˇ teˇ hpaˍ hta‸ ca ve htawˇ, shaˉ hkiˆ ca maˇ mawˬ. 56Awˬ lawn kʼo, chaw maˇ maˇ yawˇ awˬ lawn maˇ heˆ heˆ ve shaˉ hkiˆ hkanˍ ve htawˇ, yawˇ hui shaˉ hkiˆ hkanˍ ve maˇ hawˍ da‸.

57Oˇ htaˇ chaw teˇ hpaˍ hpaˍ tu la leh, yawˇ awˬ lawn maˇ heˆ heˆ ve shaˉ hkiˆ hkanˍ leh kʼoˆ ve, 58La‸ sheh te taˍ ve bon yehˬ lonˉ chi hta‸ ngaˬ te luˬ leh, la‸ sheh maˇ te ve awˬ kaˍ awˬ nu bon yehˬ lonˉ hta‸ shehˆ nyi awˬ hkʼaw lo ceh tiˉ ngaˬ kʼaw‸ te tuˬ yoˬ teh‸ yawˇ kʼoˆ ve hta‸ ngaˬ hui gʼa kaˇ peuˬ teh‸ yawˇ hui kʼoˆ ve yoˬ. 59Yawˇ hui chi hkʼe shaˉ hkiˆ hkanˍ ve htawˇ, maˇ hawˍ da‸.

60Oˇ htaˇ, paw hkuˇ lonˉ tu leh awˬ kʼaw ji lo huˉ taˍ leh, Nawˬ te‸ chiˉ ka‸ maˇ yaw hkʼaw‸ ve laˇ. Chaw chi teˇ hpaˍ nawˬ awˬ lawn aˬ hto‸ ma shaˉ hkiˆ hkanˍ ve le teh‸, Yeˍsuˆ hta‸ na nyi ve yoˬ.

61Ya‸ hkʼaˇ, Yeˍsuˆ ta‸ iˉ chehˇ taˍ leh te‸ chiˉ maˇ yaw hkʼaw‸ ve yoˬ. Paw hkuˇ lonˉ teˇ pawˆ kʼaw‸ kʼoˆ piˇ ve, Nawˬ lehˬ Awˬ bon uiˍ shehˍ hpaˇ Gʼuiˬsha ve Yaˇ hpu Hkri‸ teh‸ kʼoˆ ve teˇ gʼaˇ yoˬ laˇ teh‸ yawˇ hta‸ na nyi ve yoˬ.

62Yeˍsuˆ kʼaw‸ kʼoˆ ve, Yoˬ, ngaˬ yoˬ. Chi hkʼoˆ ka‸, chaw yaˇ ve Yaˇ hpu lehˬ, Kanˇ paˆ awˬ shehˍ hpaˇ ve la‸ sha paˉ lo mui leh, mvuhˇ naw ma ve moˬ hta‸ ciˇ ya‸ la ve hta‸ nawˬ hui gʼa mawˬ tuˬ yoˬ teh‸ kʼoˆ ve yoˬ. #Chi 110:1, Dyl 7:13

63Oˇ htaˇ paw hkuˇ lonˉ lehˬ, yawˇ hkʼaˇ yawˇ, yawˇ ve veu‸ kʼaˇ hta‸ tzuh‸ suhˍ leh kʼoˆ ve, Ngaˬ hui aˬ hto‸ ma shaˉ hkiˆ kʼaw‸ loˍ sheˍ le. 64Yawˇ lehˬ Gʼuiˬsha hta‸ maˇ shawˍ maˇ caˆ kʼoˆ ve hta‸ nawˬ hui gʼa kaˇ peuˬ. Nawˬ hui hkʼaˬ hkʼe dawˇ le teh‸ na nyi htaˇ,

Yawˇ lehˬ suh keunˍ ve yoˬ teh‸, yawˇ hui hkʼa peu-eˬ Yeˍsuˆ hta‸ suhˉ taˆ ve yoˬ.

65Oˇ htaˇ, chaw teˇ hpaˍ hpaˍ yawˇ hta‸ ciˉ gʼuiˇ hpe‸ pfuhˍ ve, yawˇ ve mehˆ hpfuhˇ hta‸ beh taˍ leh yawˇ hta‸ chu-eˬ leh kʼoˆ ve, Gʼuiˬsha ve tcuh kaˍ paˍ hkʼe te leh ngaˬ hui hta‸ hto laˇ-oˆ teh‸, yawˇ hta‸ kʼoˆ piˇ ve yoˬ. Shaw shehˍ hpaˇ teˇ hpaˍ htawˇ yawˇ hta‸ dawˆ leh yuˬ kʼai ve yoˬ.

Peˍtruˆ Yeˍsuˆ hta‸ chiˇ baˬ ve

66Peˍtruˆ lehˬ, awˬ hawˉ lo ko taˍ kuiˬ awˬ hkʼaw hpawˇ lo chehˇ taˍ ve teˇ yanˇ, paw hkuˇ lonˉ ve awˬ ceˬ ma teˇ gʼaˇ laˬ leh, 67Peˍtruˆ aˬ miˍ lehˬ chehˇ ve hta‸ gʼa mawˬ ve teˇ yanˇ, yawˇ hta‸ hkʼa deh‸ nyi leh, Nawˬ htawˇ Naˍzaˍrehˆ chaw Yeˍsuˆ geh chehˇ ve yoˬ teh‸ kʼoˆ piˇ ve yoˬ.

68Ya‸ hkʼaˇ, Peˍtruˆ gʼawˬ hkʼaˆ leh, Nawˬ kʼoˆ ve hta‸ ngaˬ maˇ shiˍ, na ka‸ na maˇ gʼa teh‸ kʼoˆ ve yoˬ. Peuˬ leh, ko taˍ kuiˬ yehˬ miˉ awˬ baˬ lo yawˇ tawˆ kʼai ve yoˬ.

69Awˬ ceˬ ma oˇ ve teˇ pawˆ yawˇ hta‸ kʼaw‸ mawˬ htaˇ, awˬ paˇ lo huˉ chehˇ ve chaw teˇ hpaˍ hta‸, Chaw chi teˇ gʼaˇ lehˬ, yawˇ hui awˬ hkʼaw lo chehˇ ve chaw teˇ gʼaˇ hpeh‸ ve yoˬ teh‸ kʼoˆ piˇ ve yoˬ. 70Ya‸ hkʼaˇ yawˇ teˇ pawˆ kʼaw‸ gʼawˬ hkʼaˆ ve yoˬ.

Awˬ hkʼaw‸ nawˉ maˇ maw maw gaˬ leh awˬ paˇ lo huˉ chehˇ ve chaw teˇ hpaˍ kʼoˆ ve, Nawˬ lehˬ awˬ tehˬ awˬ na yawˇ hui awˬ hkʼaw lo chehˇ ve chaw teˇ gʼaˇ hpeh‸ ve yoˬ. Awˬ lawn kʼo, nawˬ Gaˍliˍlehˇ chaw hpeh‸ ve yoˬ teh‸, Peˍtruˆ hta‸ kʼoˆ piˇ ve yoˬ.

71Oˇ htaˇ yawˇ hkʼaˇ yawˇ, yawˇ awˬ to hta‸ hkeu leh, Nawˬ hui kʼoˆ ve teˇ gʼaˇ hta‸ ngaˬ maˇ shiˍ teh‸ kʼoˆ leh hkanˍ ve yoˬ. 72Teˇ cawˬ haˉ gʼaˆ hpfuh nyiˇ pawˆ teˇ pawˆ bvuhˬ la ve yoˬ. Gʼaˆ hpfuh nyiˇ pawˆ maˇ bvuhˬ sheˍ htaˇ nawˬ ngaˬ hta‸ shehˆ pawˆ hkʼa gaˬ chiˇ baˬ tuˬ yoˬ teh‸, Yeˍsuˆ yawˇ hta‸ kʼoˆ piˇ taˍ ve hta‸ Peˍtruˆ dawˇ nawˇ la ve yoˬ. Yawˇ oˇ ve hta‸ kʼaw‸ dawˇ nyi ve teˇ yanˇ hawˬ ve yoˬ.

Àwon tá yàn lọ́wọ́lọ́wọ́ báyìí:

Maˍkuˆ li‸ 14: LHBE

Ìsàmì-sí

Pín

Daako