PƏ̃Ə ZA ISRAEL 20
20
Ɓǝ lai jemma vaŋno
(CuuƁ 5:1-21)
1Masǝŋ faa ɓǝ marai daŋ faa: 2Ame Dǝɓlii Masǝŋ ɓii mai mo pǝ̃ǝ ne we gin sǝr Egiɓ, pǝ cok byak ɓiiri.
3Mo juupel wo masǝŋ maki ah ka, sai me to.
4Mo zyeɓ masǝŋ maki ah mor suu ɓo ka, koo ka jur fan makẽne mo tǝlǝǝ sǝŋ ka ta, koo ne fan ma tǝ sǝr sǝŋ ka, koo ne fan ma mor bii sǝŋ laŋ ka ta.#Pǝ̃ǝ 34:17; Lew 19:4; 26:1; CuuƁ 4:15-18; 27:15 5Mo kea ge sǝŋ pel fan ah ra ka, mo so joŋ yeɓ mor fan ah ra ka ta. Mor ame ye Dǝɓlii Masǝŋ ɓo, me ye Masǝŋ ma ne tǝwonni, me faŋ val faɓe' tǝtǝl za ma syiŋra me ne tǝtǝl wee ɓǝr ɓǝǝ ŋhaa dai zahŋhǝǝtǝ̃ǝ patǝ sai ah tǝkine patǝ nai ahe.#Pǝ̃ǝ 34:6-7; KeeZ 14:18; CuuƁ 7:9-10 6Me ga joŋ gboŋgboŋ wo zahŋhǝǝtǝ̃ǝ ujenere, tǝ za ma 'yahra me tǝkine gban ɓǝ lai ɓe ra.
7Mo ɗii tǝɗii Dǝɓlii Masǝŋ ɓo pǝ zah haihai ka, mor Dǝɓlii ka ga soɓ dǝɓ ma ɗii tǝɗii ah pǝ zah haihai bai ŋgoŋ kiita tǝl ah ya.#Lew 19:12
8Mo foo ɓǝ zah'nan com 'yakke, mo gbǝ pǝsãhe.#Pǝ̃ǝ 16:23-30; 31:12-14 9Tǝgǝǝ zah'nan yea mo joŋ yeɓɓe, mo joŋ yeɓ ɓo ne daŋ.#Pǝ̃ǝ 23:12; 31:15; 34:21; 35:2; Lew 23:3 10Amma zah'nan rǝŋ ah com 'yak mǝ Dǝɓlii Masǝŋ ɓo yo, com ah mo joŋ koo yeɓ fẽene ka, amo, we ɓo, mǝlaŋ ɓo, byak ɓo mawor ne mawinni, koo faɓal ɓo, koo za gwǝǝ mo ge kaara ɓo kǝsyil ɓii laŋ mo joŋra yeɓ ne ka. 11Mor tǝgǝǝ zah'nan yea Dǝɓlii joŋ sǝŋ ne sǝrri, bii tǝkine fan makẽne mo mor ah daŋ, 'yak ne zah'nan rǝŋ ahe. Mor ah Dǝɓlii ẽe zah'nan com 'yakke, nǝǝ ɓo mor suu ahe.#Tǝŋ 2:1-3; Pǝ̃ǝ 31:17
12Mo kee pa ɓo tǝkine ma ɓo daŋ, ka mo kyaŋ wo sǝr mai Dǝɓlii Masǝŋ ɓo mo nyi ɓo nyi mo.#CuuƁ 27:16; Mt 15:4; 19:19; Mk 7:10; 10:19; Lu 18:20; Ef 6:2-3
13Mo i wul ka.#Tǝŋ 9:6; Lew 24:17; Mt 5:21; 19:18; Mk 10:19; Lu 18:20; Ro 13:9; Yak 2:11
14Mo joŋ ɓǝǝ ka.#Lew 20:10; Mt 5:27; 19:18; Mk 10:19; Lu 18:20; Ro 13:9; Yak 2:11
15Mo kiŋ nyin ka.#Lew 19:11; Mt 19:18; Mk 10:19; Lu 18:20; Ro 13:9
16Mo gwah ber zah dǝɓ ki ka.#Pǝ̃ǝ 23:1; Mt 19:18; Mk 10:19; Lu 18:20
17Mo cwaa yaŋ dǝɓ ki ka. Mo cwaa mawin dǝɓ ki ka, mo cwaa 'wah ahe, byak ah ra, dǝǝ ahe, korro ahe, koo fẽene mo jol ah daŋ mo cwaa ka.#Ro 7:7; 13:9
Za Israel ɗuura galle
(CuuƁ 5:22-33)
18Za daŋ laara haŋ bam ne kwan sãh bam tǝkine laa cii kokõorĩi, kwora waa pǝ̃ǝ suŋwii. Ne cok za mo kwora, suu coora coo, so uura lal pǝɗǝkki.#Yahu 12:18-19 19So faara nyi Mosus: Mo faa ɓǝ nyi ru ne suu ɓo, ru laa. Amma mo soɓ Masǝŋ faa ɓǝ nyi ru kao ka ru wuk ka. 20Mosus faa nyi zana: We ɗuu gal ka. Masǝŋ ge mor ka lii we, ka gal ah mo yea wo ɓiiri, ka we joŋ faɓe' ka. 21Za uura lal pǝɗǝkki, amma Mosus ge gwari ne cokfuu mai Masǝŋ mo no gŋ.
Ɓǝ lai tǝ cok joŋ syiŋrĩ
22Dǝɓlii faa nyi Mosus: Mo faa nyi za Israel sye: We laa me faa ɓǝ ne we gin coksǝŋ. 23We joŋ masǝŋ ki cam ra ma vãm solai ne vãm kaŋnyeeri tai me ne ka, we joŋ ra mor suu ɓii ka ta. 24We vuu cok joŋ syiŋ nyi me ne vuuri, we joŋ syiŋ suŋwii ne syiŋ ma nyi jam ne gwii ne dǝǝ tǝl ahe, cok mai me nǝǝ ɓo ka tǝɗii ɓe mo ɗii gŋ daŋ me ga ge gŋ ka me ẽe we. 25We tǝ vuu cok joŋ syiŋ nyi me ne tǝsal ɓe, we vuu ne tǝsal ma zyezyeɓ ka, we kal ɓaŋ fan zyeɓ tǝsal kan ge wol ah ɓe, ka we ɓeɓ cok ah ɓe.#CuuƁ 27:5-7; Jos 8:31 26We yee ge tǝ cok joŋ syiŋ ɓe ne kpuucel ka, mor ka za mo kwora suu kol ɓii ka.
Àwon tá yàn lọ́wọ́lọ́wọ́ báyìí:
PƏ̃Ə ZA ISRAEL 20: MUAR
Ìsàmì-sí
Pín
Ṣe Àfiwé
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bible Moundang © Alliance Biblique du Tchad, 1996.