1 Kolt 8
8
‑Zliigʋgwlamla 'la cɩa wɔlɩ
1‑Ɩ ‑glɩ 'lɛ ‑zliigʋgwlamlaa 'la wɔlɩa na, n ‑ci lebhe ‑anyɩa 'fɩan ‑a ‑ci wɔlɩ 'bhlɩɩ, ‑ma wɔɔcibhilie, ka ɩ yeli nclɔɔ ‑tutule. ‑Walʋ, ʋmʋ ‑ʋ ca 'lɛ ncɛlɩ kplʋʋ. 2Na, nclɔɔ ‑ka gugu lebhe ɔ ‑ci wɔlɩ na, 'dɛndlana ɔ 'ta ka ka saa ɩ ‑fataa 'lɛ lebhe ma cibhlilicibhlilili wɔlɩ na, cibhlili. 3‑Ma nclɔɔa ‑ɔ ‑wa 'lɛ Laagɔ na, Laagɔ ‑cio.
4Na, ‑a cɩ mino, ‑a cɩ ‑zliigʋgwlamla li bha? ‑A ‑ci sɛɛ lebhe ‑zlee bhlogbɩɩ 'ta ‑laagɔzɔan ‑kʋ, 'nyɩ ‑buunlaagɔ 'ta ‑kʋ, ɩ ‑ka ‑kʋ lebhe ‑n 'ta Laagɔ bhloo na. 5'Bhlɩmɔɔn ncɛlɩ ‑anʋa la macɩ Laagɔ ‑laagɔɔn ‑aana ‑dʋdʋa 'kʋ, 'nyɩ ɩ ya gba ‑zlii ɩya ‑kwlenya ya zubholi. 6‑Ma ‑anyɩ ‑ala da, Laagɔ ‑glɩ bhlogbɩɩ, ɔmɔ ‑ɔ ‑glɩ 'lɛ Toa ‑ɔ nʋ 'lɛ lɩɩa ‑tɛtɛa 'nyɩ ‑a ‑kʋlʋ 'lɛ na. ‑Kwlenyɔa ‑ma ‑glɩ 'lɛ bhlogbɩɩ, ɔmɔ ‑ɔ ‑glɩ 'lɛ Zozi Klisi, ‑ɔ gba 'lɛ 'nyɩ lɩɩa ‑tɛtɛa ‑kʋ 'lɛ 'nyɩ ‑a ‑kʋ 'lɛ na.
7‑Ma ‑n 'ta ncɛlɩa ‑tɛtɛa ‑ɔ 'ta 'lɛ wɔlɩ ‑naa ‑ci. ‑Anʋa ‑zliigʋgwlɛa ‑plɩɔa 'lɛ na, ka ma li 'lɛ ‑zliigʋgwlamlɛa, le saa ma yɛɛ 'lɛ ‑zaagbʋsa ‑zlee va na, 'nyɩ mala wɔɔgugwiea ‑ɛ mino 'ta 'lɛ wɔlɩ nɩkplaan gbazlɩlɩlɩɛ na, kpobho 'lɛ. 8‑Ma ‑n 'ta lilinyɩ ‑ɩ cɩ 'ta 'lɛ ‑anyɩ Laagɔ cɩmɛ. Na, ‑a 'tɩɩ li na, 'ɩ ‑salɩ 'ta ‑anyɩ 'kʋ, 'nyɩ ka ‑a ‑kɩɩ li na, 'ɩ zʋlʋ 'ta ‑awlɛ ‑anyɩ 'kʋ.
9‑Ma ka 'nyɩ a zʋlʋ ala ‑ncɩkalɩɛa pɔlɛ 'kʋ, ɩya ɩ 'la ka gba ɩya maa ‑ɔ 'taan 'lɛ 'tɛ na, ma 'la ka bhli. 10Sa ‑mɔɔa ‑ɔ ‑ci 'lɛ wɔlɩ na, gbazɩ nclɔɔ ‑kɔɔ 'lɩ 'nyɩ ‑n ‑ka ‑zliigʋgwlapalʋ ‑zɔn, 'tlɔnblɩ 'kʋ gbii na, nʋnʋgbɩ ‑naa cɩ 'ta ɔmɔa ɔla wɔɔgugwiea mino 'ta 'lɛ wɔlɩ nɩkplaan gbazlɩlɩlɩɛ na, 'tɛtɩ 'nyɩ le ɔ limʋ ‑zliigugwlamla bha? 11'Nyɩ 'lɩka ‑sa ɔmɔa ‑ɔ 'taan 'lɛ 'tɛ na, bholia 'la gbʋa Klisi ya 'lɛ 'ku na, ɔ mlɔ 'lɛ ‑naa wɔɔcibhliliea 'la gbʋ. 12Na, a ‑ka ‑sa 'la nyinyia a bholiecɩa cɩ nʋ, 'nyɩ a ‑ka mala wɔɔgugwie ‑ɛ mino 'ta 'lɛ wɔlɩ nɩkplaan gbazlɩlɩlɩɛ na gblogblolu na, a cibhlili sɛɛ lebhe Klisi a nʋ 'lɛ nyinyi cɩ. 13Na, ɩ ‑ka ‑kʋ lebhe lililʋʋ 'ka gba 'nyɩ n bholi 'ka bhli na, n 'ka 'lɛ n bholi sapalɩ na, ‑afalɩma mlɛ ‑tɛɛ n cɩ 'tanɩ 'lɛ li 'pʋpʋ 'kʋ.
Àwon tá yàn lọ́wọ́lọ́wọ́ báyìí:
1 Kolt 8: NTLD13
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.