1 Kolt 4
4
Klisi 'la lobhulobhunya ‑a ‑glɩ 'lɛ
1'Naa a 'ma ‑anyɩ le Klisi 'la lobhocuo ɩya Laagɔ 'la wɔlɩa ‑ɩ ‑zizieo 'lɛ na 'la 'klʋlɩnya. 2'Nyɩ ɩmɩa ma 'clalɩ 'lɛ 'klʋlɩnyaa na, ɩmɩ ‑ɩ ‑glɩ 'lɛ lebhe ma pala le ma cɩ maa ‑delikʋtɛbhalɩ. 3‑Ma ‑amʋ, anyɩ ‑aana ncɛlɩ 'la 'tɩtɩplakande kaan 'tɩtɩplao na, 'ɩ nʋ 'taan lʋʋ bhlogbɩɩ. 'Nyɩ ‑awlɛ, ‑amʋ 'titi 'n ‑pla 'ta ncɩ 'tɩtɩ. 4Ɩ ‑glɩ ‑nʋawlɛ le 'na wɔɔgugwiea gɩ 'taan wɔlɩ ‑ylɛylɛ 'kʋ, ‑ma ɩmɩ ‑naa ‑sa 'taa ‑zɔn le n ‑glɩ 'kʋnylugolunyɔ. Ɔmɔa ‑ɔ plaan 'lɛ 'tɩtɩ na, ɔmɔ ‑ɔ ‑glɩ 'lɛ ‑Kwlenyɔa. 5'Dɛndlana, clɩɩa 'ta ka ka 'lɛ ŋeni, 'nyɩ ‑Kwlenyɔa 'ta ka ka 'lɛ ci na, a 'la ‑plaa 'tɩtɩ bhlogbɩɩ. Ɔmɔ ‑ɔ -cɩ ka 'lɛ ɩmɩa ‑ɩ ‑zizieo 'lɛ 'tutua nɩkplaan na, zezezelia nɩkplaan ‑la ɩya ɔ 'ka pɔlɩa 'ciin 'la wɔlɩa ‑zɔnwlaa. Na, Laagɔ cɩ 'ka nclɔɔ nclɔɔ saa ɩ ‑fata 'lɛ na 'ŋwleenfalɩ.
6Bholiecɩnyɩ, anyɩ 'wluku n palalɩ 'lɛ n ‑ya Apolɔsʋ 'la wɔlɩa le a 'ka ‑anyɩ dɩbalɩ, ‑tutule 'la kasɛ anyɩ yeli, a 'la kasɛ ‑anɔ bhlo leen 'plɩ ɩya a 'la ka ‑da -naanɔ bhlo gbatlɩmʋnʋ. 7Na, ncaasaa ‑ɔ 'clɔɔ 'lɛ lebhe ‑n zia ‑n 'yʋ 'kʋ bha? 'Lɩsaa 'titi ‑n ‑kaa 'lɛ 'nyɩ ‑ʋ 'taa 'lɛ 'nyɩnyɩlʋʋ ‑glɩ bha? 'Nyɩ ɩ ‑ka ‑kʋ le ka ma 'nyɩɔ 'lɛ mʋ na, 'lɩsaa 'la gbʋ ‑n kpolia 'lɛ gbɩɩn le saa ʋ 'taa 'lɛ 'nyɩnyɩlʋʋ ‑glɩ na bha?
8Ka a ‑lonɩ 'lɛ! A yanɩ 'bhɛlɩ li! A ya ‑anyɩ te, 'nyɩ a ‑glɩnɩ 'lɛ nyɩbhɛlɩ! 'Ayɩ! 'Nyɩ a 'plɩnɩa maa ‑zaagbʋsa, ɩya ‑anyɩ ‑ma ‑aya anyɩsɔ 'kanɩa nebhlo ‑kwleli! 9‑Ma, n gugu lebhe ka Laagɔ pala 'lɛ 'kpataa le ‑anyɩ Klisi 'la lobhulobhunyaa*, ɔ ya ‑anyɩ ncɛlɩa 'fɩan 'la leenbhɩalɩ ‑naanʋa ple, ncɛlɩa ‑ɔya 'kwɩ ‑fata 'lɛ na 'bhisa. Ɔ ya ‑anyɩ ‑jleen zʋ le ‑laagɔzɔan, 'bhlaandleecɩa* ɩya ncɛlɩ 'ka ‑anyɩ 'lɩmʋ. 10Klisi 'la gbʋ, ‑a ‑glɩ pɔɔbhlanya, ‑ma Klisi nɩkplaan, anyɩ ‑a ‑glɩnɩ dɩgalɩnya. ‑A 'ta ‑cɩcɩ ‑ka, ‑ma anyɩ, a ‑ka 'tɛtɩ. Ma zʋ anyɩ 'klʋ 'kpaan, 'nyɩ ma ŋu 'lɛ ‑anyɩ 'klʋ. 11'Ŋwacɩ ‑naa nɩkplaan 'titio, ŋɔmʋ bhla ka ‑azla ‑anyɩ, 'nyutʋ bhla ka ‑azla ‑anyɩ, ‑a ‑kʋ ka ‑azla ‑abaan, ma sa ka ‑azla ‑anyɩ gbaylɩ, 'nyɩ ‑a ‑glɩ ka ‑azla 'lɛ bibinya. 12A sa ‑kɔɔgbʋsusu, ma vla ‑anyɩ, 'nyɩ ‑a palɩ 'lɛ 'nyu. Ma sa ‑anyɩ gbaylɩ, 'nyɩ ‑a kla 'lɛ pɔlɛ. 13Ma ‑ka ‑anyɩ ‑glaan, 'nyɩ ‑a zʋ 'lɛ pɔlɛɛn. ‑A glɩ ka ‑azla ‑laagɔzɔan 'la ŋanyɩ, lɩɩa ‑laagɔzɔn bhuoa pa 'lɛ 'kwlaan na.
Pɔlʋ ple Kolɛntɩnyaa 'la pɔlɛ
14'N zie 'ta anyɩ ɩmɩ ‑naa le n 'ka anyɩ sʋkpa, ‑ma n 'ka anyɩ flɩɩnzʋ, 'na ‑wawacuo 'bhisa. 15Ka a -kaa Klisi nɩkplaan, canya ‑tabhli 'kʋgba ‑ka 'titio na, a 'ta tocɩ ‑bhutukpa ‑ka. Sa, ‑amʋ -ɔ 'plɩlɩ 'lɛ Dɩnanɩa* 'kʋ 'nyɩ n ya 'lɛ anyɩ Zozi Klisi nɩkplaan valɩlɩ. 16Na, n 'clalɩ anyɩ le a 'plɩ 'na dɩbalɩnya. 17Ɩmɩ ‑naa 'la gbʋ, dɛ n lobhu 'lɛ 'na ‑wawaco Timoti, ma cɩ 'lɛ ‑Klwenyɔ nɩkplaan ‑delikʋtɛbhalɩ na anyɩ 'bhlɩ. Ɔ cɩ 'ka anyɩ 'na saa n namʋnamʋnʋ 'lɛ Klisi nɩkplaan na luoli, saa ‑tɛɛa n cɩɩ 'lɛ daa ‑tɛtɛa, ‑laagɔnɩkplaa 'fɩan na.
18‑Ma, anyɩ sidiin, ncɛlɩ ‑anʋa ya gugu le 'n cɩ 'taanɩa a 'bhlɩ cɔlɔ, ɩla gbʋ na ‑tutule ya maa yeli. 19‑Ma clɩɩklipɛ nɩkplaan, ‑Kwlenyɔ ‑ka ŋonu na, n cɩ 'ka anyɩ 'bhlɩ ci ɩya n 'ka ‑tutulelinya ‑naa 'la nʋnʋgbɩa cibhlili, ‑ma ‑n 'ta mala wɔɔnyɩtʋa. 20Sa, Laagɔ 'la Nyɩbhɛlɩdua* 'ta wɔɔnyɩtʋʋn ‑kʋlʋ, ‑ma nʋnʋgbɩ nɩkplaan ʋ ‑kʋlʋ 'lɛ. 21Na, 'lɩsaa a ‑waa 'lɛ bha? N 'ma pɛ ɩya n ci anyɩ 'bhlɩ bha? ‑Aana n cili ‑walʋʋn ɩya ‑pɔɔwɔtɛɛn bha?
Àwon tá yàn lọ́wọ́lọ́wọ́ báyìí:
1 Kolt 4: NTLD13
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.