1 Kolt 16
16
Ma ya Zolizalɛmʋ 'la ‑laagɔnɩkplaa 'la 'dala ‑bʋʋ
1‑Ɔ ‑glɩ 'lɛ ‑kplɔkplɔnyaa 'la 'dala 'la ‑bʋʋlɩɛa na, anyɩ ‑ma a 'plɩlɩ ɩmɩa n solu 'lɛ Galasiibhlɩa 'la ‑laagɔnɩkplaa na 'kʋ. 2Na, nyamaclɩɩa 'fɩan 'la ‑bɛkaclɩɩa 'kʋ, 'naa nclɔɔ nclɔɔ zʋ 'dalaa ɔ mino 'lɛ 'nyɩ ɔ gbɛga 'lɛ na ɔ 'bhisleen sa ɩya ma 'la ka 'na cilɩɛa ‑bɛ 'fɩɔn le 'ka ma 'wlalɩa 'lɛ 'wlu. 3Daa n cɩ 'ka 'lɛ ci na, n cɩ 'ka ncɛlɩa a cɩ 'ka 'lɛ ‑sa na, ‑afluwi 'kʋ ‑gbɛ ɩya ma 'ka ala vavalɩɩa Zolizalɛmʋ fa. 4'Nyɩ ɩ ‑ka ‑kʋ lebhe ‑amʋ 'titi n mʋ na, n -ya maasɔ cɩ mʋ.
Pɔlʋ nyɩtɛ ɔla lowluunmʋwɔlɩ
5Masedʋanɩbhlɩa n cɩ 'ka 'lɛ 'ŋatɩ ɩya n 'ka anyɩ 'bhlɩ ci. ‑Masa 'yɛpɩ n cɩ 'ka 'lɛ 'plɩlɩ na. 6N cɩ anyɩ cɩ ‑gwlɛlɩ 'nyɩ ɩ 'taan 'tɛ na, n cɩ 'dɛ kʋ ‑aan 'nyɩ wɔtlɩdaa cɩ 'plɩ, ɩ cɩa gba 'nyɩ a cɩ ‑amʋa ‑gugwiea klalɩ. 7Sa ‑ɔ ‑glɩ 'lɛ 'na ‑yaka ‑naa 'la ciliea na, n 'ta ‑wa lebhe n 'kanɩ anyɩ 'ci 'kʋ 'pa 'kpɔɔ ɩya n 'ka 'plɩ. ‑Kwlenyɔa ‑ka ŋonu na, n ‑wa lebhe n cɩ anyɩ cɩ clɩɩ ‑zlʋsaasa li. 8‑Ma n cɩ 'ka Efɛzɩdua 'kʋ kʋ ‑aan ɩya Pantekɔtʋa#16.8 Pantekɔtʋa ‑glɩ Zifʋnyaa 'la nyaadɩfɛtlɩ. Ma ‑ka mala geyliinwlʋfɛtlɩa li, 'nyɩ clɩɩ ‑gwlɩɩ ‑mɔsɔ ɩya 'kʋgba ‑ka 'kʋcɩlɩ na, dɛ ma lii 'lɛ. 'ka ŋeni, 9sa 'na lobholia 'la gbinikadie ya 'yɛpɩ kalɩ 'nyɩ ‑zɔbhɛlɩgbanyaa ma ‑zu.
10Gbazɩ Timoti ‑ka ci na, a nʋ saa 'fɩan ɩya anyɩ sidiin pɔɔvʋ ‑ylɛylɛ 'la 'bhlɔɔ, sa ‑amʋ 'bhisa, ‑Kwlenyɔa 'la lobholia ɔ nʋ 'lɛ. 11Na, nclɔɔ ‑ylɛylɛ 'la zɔbhɛlɩɔ. ‑Ma a klalɩɔ ɩya ɔ 'kaan cɩ cɔlɔ, pupue nɩkplaan, sa n ‑bɛɔ, n ‑ya bholiecɩa. 12‑Ɔ ‑glɩ 'lɛ ‑a bholi Apolɔsʋ na, n yɔɔ ‑gbɔɔn 'tɛtɩɩn zʋ le ɔya bholiecɩa 'ka anyɩ 'bhlɩ mʋ, ‑ma ɔ 'ta ‑wa ‑ylɛylɛ le ɔ 'ka ‑pɔtɔnʋ mʋ. Ɔ ‑ka ‑jioli 'lɩ na, 'nyɩ ɔ cɩ ci.
Bhɩalɩwɔlɩ ɩya ‑ayopalɩɛ
13A 'la ŋɔmʋa, a 'nylugo kpaan pɔɔtɛtɛa nɩkplaan, a 'plɩ ŋodie, a kalɩ 'tɛtɩ 14ɩya a nʋnʋ ‑tɛtɛa 'fɩan ‑walʋ nɩkplaan!
15Bholiecɩnyɩ, 'lɩka ‑awlɛ wɔɔce bhlo. A ‑ci sɛɛ lebhe Sefanasɩ ɩya ɔla 'lɔlʋa ‑ɔ ‑glɩ 'lɛ Akayiibhlɩa 'kʋ 'la ‑bɛka ncɛlɩa ‑ɔ zʋ 'lɛ mala pɔɔtɛtɛa Klisi 'kʋ na. Ma ya macɩ ‑kplɔkplɔnyaa 'la klalɩlobholia nɩkplaan zʋ. 16Na, a zʋ maa 'bhisa 'kʋ 'la ncɛlɩa ɩya maa 'fɩan ‑ɔ klalɩ 'lɛ maa mala lobholia na.
17Sefanasɩ, Fɔtunatusu ɩya Akayikusu -kʋʋn 'lɛ cɩ na, pɔlɛ 'kʋ mɛnɩɩn. Ma ya ala 'jeen 'plɩ. 18Ma yaan pɔlɛ ɩya anyɩ ‑ma a 'nɩa pupuo. Na, a cibhlili ‑sa 'la ncɛlɩa 'la 'nanɩa ma nʋ 'lɛ na.
19Aziibhlɩa 'kʋ 'la ‑laagɔnɩkplaa pa anyɩ ‑ayo. Akilasɩ, Plisii ɩya ‑laagɔnɩkplaa ‑a 'wlalɩ 'lɛ ma 'bhisleen 'wlu na, ma pa anyɩ ‑ayo, ‑Kwlenyɔ 'la 'ŋlɩa nɩkplaan. 20Bholiecɩa 'fɩan pa anyɩ ‑ayo. A gbelegbeleli ‑kplɔlɩɛ nɩkplaan ɩya a 'papalɩ ‑ayo. 21‑Amʋ Pɔlʋ 'titi, ‑amʋ ‑ɔ zie 'lɛ ‑ayopalɩɛa.
22Ɩ ‑ka ‑kʋ lebhe nclɔɔ 'ta ‑Kwlenyɔa ‑wa na, 'palɩɛ ŋenio. ‑Malanata#16.22 ‑Malanata ‑glɩ Zifʋnyaa 'bhlɩwɔlɩ. Ɩ sa ‑zɔn lebhe ‑Kwlenyɔ ci 'yɛpɩ, ‑aana ‑Kwlenyɔ 'maa ci..
23'Naa ‑Kwlenyɔ Zozii 'la 'nyupalɩɛa kʋ anyɩ 'kʋ! 24N ‑wa anyɩa 'fɩan Zozi Klisi nɩkplaan.
Àwon tá yàn lọ́wọ́lọ́wọ́ báyìí:
1 Kolt 16: NTLD13
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.