1 Kolt 14
14
A 'matɩ ‑walʋ
1A 'matɩ ‑walʋ. 'Naa 'Wugoa 'la nʋnʋgbɩa 'la 'tʋ 'bhla anyɩ, ‑ma ‑laagɔnekʋnyɩtɛlɩɛ 'la 'tʋ 'nyɩ ‑ɔ 'bhla anyɩ ‑gbɔɔn. 2Sa ɔmɔa ‑ɔ nyɩtɛ 'lɛ 'bhlɩwɔlɩa ncɛlɩ 'nu 'ta 'lɛ na, ‑n 'ta ncɛlɩ 'ɔ solu 'ta 'lɛ, ‑ma Laagɔ. Nclɔɔ ‑ylɛylɛ 'nu 'tɔɔ neen. 'Wugoa 'plɩlɩɔ 'lɛ 'kʋ 'nyɩ ʋ nyɩtɛ 'lɛ zizieziziewɔlɩa ncɛlɩ 'nu 'ta 'lɛ ɩla ‑zɔn na. 3‑Ma ɔmɔa ‑ɔ nyɩtɛ 'lɛ Laagɔ ne 'kʋ na, ncɛlɩ ɔ solu 'lɛ le ma 'ka ‑sikplii zʋ, ma 'ka pɔlɛɛnzʋlɩɛ 'lɩ, ncɛlɩ -ɔ falɩ 'lɛ wɔlɩ pɔlɛ cɩ 'nyɩ ɔ zʋ 'lɛ maa 'tɛtɩɩn. 4Ɔmɔa ‑ɔ nyɩtɛlɩ 'lɛ lowluwɔlɩ nɩkplaan na, ɔmɔ 'titi ɔcɩ ɔ ca 'lɛ, ‑ma ɔmɔa ‑ɔ nyɩtɛ 'lɛ Laagɔ ne 'kʋ na, ‑laagɔnɩkplaa ɔ zʋ 'lɛ 'tɛtɩɩn. 5Na, n ‑wa lebhe anyɩa 'fɩan nyɩtɛlɩa lowluwɔlɩɩn, ‑ma n ‑wa ‑gbɔɔn lebhe a nyɩtɛa Laagɔ ne 'kʋ. Sa ɔmɔa ‑ɔ nyɩtɛ 'lɛ Laagɔ ne 'kʋ na, ɔ zi ɔmɔa ‑ɔ nyɩtɛlɩ 'lɛ lowluwɔlɩɩn na 'kʋ, 'nyɩ ɩ 'ta sɛɛ ‑kʋ na, 'naa ɔmɔ ‑naa -sɩɩ ‑zɔn ɩya ɔ 'ka ‑alawleea ca.
6Bholiecɩnyɩ, ‑baasakpa n ya anyɩ kopekan ci, 'nyɩ n solulu anyɩ lowluwɔlɩɩn. Na, ɩ ‑ka ‑kʋ lebhe 'na wɔɔnyɩtʋa 'ta anyɩ wɔlɩa ‑ɩ ‑zizieo 'lɛ na pala, ʋ 'ka gba ɩya a 'ka wɔlɩ cibhlili, a 'ka Laagɔ 'la niwɔlɩ 'nu, ‑aana ʋ 'ka anyɩ wɔlɩ ca na, 'lɩsaa n cɩ 'ka 'lɛ anyɩ ‑lalɩ bha? 7Sɛɛ ɩ ‑kʋ 'lɛ gbagbalɩɩa ‑ɩ ‑glɩ 'lɛ dʋpʋ ɩya ‑kete na 'la gbazɔ. Ɩ ‑ka ‑kʋ lebhe ma 'ta lʋʋ lʋʋ 'la gbalɩɛa 'nu na, 'nsasa ma cɩ 'kaa 'lɛ dʋpʋa ‑aana ‑ketea 'la gbalɩɛa cibhlili bha? 8'Nyɩ ɩ ‑ka ‑kʋ lebhe tavʋlɛglɛa 'ta 'nanɩ gba na, ncaasaa ‑ɔ cɩ kaa 'lɛ bhɔsʋa ɩya ɔ 'ka 'lɛ tʋa 'kʋ mʋ bha? 9Na, sɛɛ bhlogbɩɩ anyɩ ‑ma a 'ta wɔlɩa ‑ɩ ‑kʋ 'lɛ 'nunusa na nyɩtɛ na, 'nsasa ma cɩ 'kaa 'lɛ ɩmɩa a nyɩtɛ 'lɛ na 'nu bha? ‑Abuun a cɩ 'ka 'lɛ nyɩtɛlɩ. 10'Bhlɩwɔlɩa ‑ɩ ‑kʋ 'lɛ ‑laagɔzɔan na, ɩ 'ta ne ‑ka. ‑Ma bhlogbɩɩ 'ta ‑kʋ ɩya ɩ 'la ka ‑zɔnsalɩɛ kalɩ. 11'Nyɩ ɩ -ka ‑kʋ lebhe n 'ta 'bhlɩwɔlɩ 'nu na, ka n cɩ 'ka 'lɛ ɔmɔa ‑ɔ nyɩtɛ 'lɛ na 'ciin kʋ le lowlunyɔ ɩya ɔmɔ ‑ma, ɔ 'kaan 'ciin kʋ le lowlunyɔ. 12Na, anyɩ ‑ma, 'Wugoa 'la nʋnʋgbɩa 'la 'tʋa bhla 'lɛ anyɩ ‑gbɔɔn na, a 'matɩɩ ɩya a mʋ 'kʋklʋʋn. ‑Ma ka 'nyɩ ɩ 'plɩ ‑laagɔnɩkplaa 'la 'ghlibolilɩɛ 'la gbʋ. 13Ɩla gbʋ, dɛ ɩ ‑fata 'lɛ lebhe ɔmɔa ‑ɔ nyɩtɛlɩ 'lɛ lowluwɔlɩɩn na, ɔ bhibhie ɩya ɔ 'ka ɩla ‑zɔnsatɛtɩa 'lɩ. 14Sa, gbazɩ n ‑ka lowluwɔlɩ nɩkplaan bhibhielida ‑kʋ na, 'na 'Wugoa nɩkplaan n bhibhieli 'lɛ, ‑ma 'na dɩgalɩa nʋ 'ta lʋʋ ‑ylɛylɛ.
15Na, 'lɩsaa ɩ ‑fata 'lɛ lebhe n nʋ bha? N cɩ 'ka 'Wugoa nɩkplaan bhibhieli 'bhlɩmɔɔn, ‑ma n cɩ dɩgalɩa ‑ma nɩkplaan bhibhieli. N cɩ 'ka 'Wugoa nɩkplaan bhlɩlɩ 'bhlɩmɔɔn, ‑ma n cɩ dɩgalɩa ‑ma nɩkplaan bhlɩlɩ. 16Sa, ‑n ‑ka Laagɔ bhɔlʋda ‑kʋ, 'nyɩ ɩ ‑ka 'Wugoon bhlobhlo 'plɩlɩ na, ɔmɔa ‑ɔ ‑kʋ 'lɛ 'nyukwliinponyaa sidiin 'kpɔkpɔ na, 'nsasa ɔ cɩ 'kaa 'lɛ ‑naa bhibhiea neenŋonuŋonunu ɩya ɔ 'kaa 'lɛ 'cla lebhe «ɩ ‑kʋ sɛɛ» bha? ‑Masa, ‑ɔ 'ta 'lɛ ɩmɩa ‑n nyɩtɛ 'lɛ na 'nu na. 17‑Naa bhibhiea cɩ mɛma, ‑ma ɛ 'ta ‑n 'yʋa lʋʋ bhlogbɩɩ ‑lalɩ.
18Laagɔ ‑bɔɔ, 'nyɩ n nyɩtɛlɩ lowluwɔlɩɩn 'nyɩ n zi anyɩa 'fɩan 'kʋ. 19‑Ma n ‑ka ‑laagɔnɩkplaa sidiin ‑kʋ na, n ‑wa wɔɔkli ‑ngbi, ncɛlɩ cɩ 'lɛ 'nu, 'nyɩ ‑ɩ cɩ 'lɛ maa ca na, nyɩtɛlɩɛ 'nyɩ n zi 'bhlɩwɔɔkli ‑tabhli 'kʋgba ncɛlɩ 'nu 'ta 'lɛ nyɩtɛlɩɛ.
20Na, bholiecɩnyɩ, wɔlɩnɩkplaangbazlɩlɩlɩɛa 'la gbazɔ, a 'la 'plɩa 'cuo. ‑Abhɔlɛ 'la gbazɔ, ‑ghɛɛ, 'naa a 'plɩ 'cuo, ‑ma wɔlɩnɩkplaangbazlɩlɩlɩɛa 'la gbazɔ, a 'plɩ ncɛlɩa ‑ɔ -ci 'lɛ macɩ da na. 21Ɩ ‑zieo ‑jlɩmaa 'la ‑afluwia nɩkplaan lebhe: «‑Kwlenyɔ nabhe:
Lowie n cɩ 'ka 'lɛ 'kʋ 'plɩlɩ,
lowie 'la nee n cɩ 'kanɩ 'lɛ 'ma
ɩya n 'kanɩ 'lɔlʋʋ ‑naa solu.
'Nyɩ sɛɛ 'kʋ ‑zizio, maa cɩ 'ta ‑amʋa 'nyukwliinpo.»
22Na, lowluwɔlɩɩn 'la nyɩtɛlɩa ‑glɩ ghleda bhlo, ‑n 'ta maa ‑ɔ ‑ka 'lɛ pɔɔtɛtɛ na 'la gbazɔ, ‑ma maa ‑ɔ 'ta 'lɛ pɔɔtɛtɛ ‑ka na 'la gbazɔ. 'Nyɩ ‑laagɔnekʋnyɩtɛlɩɛa ‑ma, ɩ ‑glɩ 'lɛ ghleda bhlo, ‑n 'ta maa ‑ɔ 'ta 'lɛ pɔɔtɛtɛ ‑ka na 'la gbazɔ, ‑ma maa ɔ ‑ka 'lɛ pɔɔtɛtɛ na 'la gbazɔ. 23Ɩ ‑ka ‑kʋ lebhe ‑baasakpa, ‑laagɔnɩkplaa ‑tɛtɛa ‑ka 'wluwlalɩ, 'nyɩ ala nɩkplaan ncɛlɩa 'fɩan ‑ka lowluwɔlɩɩn nyɩtɛlɩ na, daa ma ‑ɔ ci 'lɛ le ɔ ka maa 'nyukwliinpo bhlobhlo na ‑aana maa ‑ɔ 'ta 'lɛ Zozii 'la pɔɔtɛtɛ ‑ka na, cɩ ka 'lɛ daa a ‑kʋ 'lɛ na ble na, maa cɩ 'ta gugu lebhe pɔɔbhlanya a ‑glɩ 'lɛ bha? 24‑Ma ɩ ‑ka ‑kʋ lebhe maa 'fɩan ‑ka Laagɔ ne 'kʋ nyɩtɛ na, nclɔɔa ‑ɔ 'ta 'lɛ pɔɔtɛtɛ ‑ka, ‑aana ncaatʋtʋʋntʋa ‑ɔ ble 'lɛ na, ɔ cɩ 'ka 'lɩ lebhe maa 'fɩan sɔɔ 'bɩ, 'nyɩ ma salɩɔ ge. 25Ɔla pɔlɛa 'ciin 'la wɔlɩa cɩ 'ka ‑zɔnwlʋ. Na, ɔ cɩ 'ka 'klʋsagblii, ɔ 'ka Laagɔ gʋgwla ɩya ɔ 'ka 'cla lebhe ‑zaagbʋsa, Laagɔ ‑kʋ anyɩ sidiin.
'Klisigɩlɩnya 'la 'wluwlalɩɛ 'la cɩa wɔlɩ
26Na, Bholiecɩnyɩ, 'lɩsaa a cɩ 'kanɩ 'lɛ nʋ bha? Gbazɩ a ‑ka 'wluwlalɩ na, nclɔɔ bhlo cɩ mino ɔ cɩ 'lʋ bhlɩ, ɔ cɩ anyɩ wɔlɩ ca ‑aana ɔ cɩ anyɩ ɩmɩa Laagɔ palɔɔ 'lɛ na solu, ɔ cɩ lowluwɔlɩɩn nyɩtɛlɩ ‑aana, ɔ cɩɩ ‑zɔnsa. ‑Ma 'naa ɩmɩ ‑naa ‑tɛtɛa ‑nʋɔ le ‑laagɔnɩkplaa 'fian 'ka -'tɛlɩ 'lɩ. 27Ma ‑ka lowluwɔlɩɩn nyɩtɛlɩ na, 'naa ma 'plɩ ‑mɔsɔ ‑aana ma ‑ka ‑gbɔɔn ‑zu na, ‑mɔta, ɩya ma nyɩtɛ bhloonbhloon, ɩya bhlo ‑sɩɩ ‑zɔn. 28'Nyɩ ka nclɔɔ 'ta ‑kʋ ɩya ɔ 'kɩɩ ‑zɔnsa na, 'dɛndlana, 'naa ‑a bholia mɛ ɔla nea ‑alawleea sidiin, ɩya ɔ nyɩtɛlɩ ɔcɩ pɔlɛɛn ɩya ɔ solu Laagɔ. 29Ɔ ‑glɩ 'lɛ ‑laagɔnekʋnyɩtɛlɩɛa na, 'naa maa ‑ɔ nyɩtɛ 'lɛ na, 'plɩ ‑mɔsɔ ‑aana ‑mɔta, ɩya ‑da ‑naanʋa gbazlɩlɩ mala wɔɔnyɩtʋa nɩkplaan. 30‑Ma gbazɩ maa ‑ɔ ‑kʋ 'lɛ 'dɛ na, Laagɔ ‑ka bhlo wɔlɩ pala na, ɔmɔa ‑ɔ nyɩtɛa 'lɛ na, 'naa ɔ mɛ ɔla nea. 31Anyɩa 'fɩan cɩ mino a cɩ Laagɔ ne 'kʋ nyɩtɛ, ‑ma ka 'nyɩ a nyɩtɛ bhloonbhloon, ɩya a 'ka ncɛlɩa 'fɩan ca ɩya a 'ka maa 'tɛtɩɩn zʋ. 32‑Masa Laagɔnekʋnyɩtɛnyɔ*, ɔmɔ ‑ɔ ‑ka 'lɛ Laagɔ 'la wɔɔnyɩtʋa ‑ʋ 'wlʋlʋɔ 'lɛ neen na 'la wɔlɩ. 33Laagɔ 'ta ‑wuyawuya 'la Laagɔ ‑glɩ, ‑ma pupue 'la Laagɔ ɔ ‑glɩ 'lɛ.
Saa ɩ ‑kʋ 'lɛ ‑kplɔkplɔnyaa 'fɩan sidiin, ‑laagɔnɩkplaa sidiin na, 34'naa 'ŋwlɛa mɛ mala nia ‑alawleea sidiin. Ma 'ta ‑jioli ‑ka ɩya ma 'ka nyɩtɛ. ‑Ma, ma ‑la macɩ ‑dʋdʋ 'kʋ, saa ‑jlɩmaa bhli 'lɛ 'kʋ na. 35Gbazɩ ma ‑ka ‑wa lebhe ma 'ka wɔlɩ neencla na, 'naa ma clɩɩ ma -ŋutiecɩ neen 'sleen. Sa ɩ 'ta nanɩ lebhe 'ŋlɔ kʋ ‑laagɔnɩkplaa 'la ncɛlɩa sidiin ɩya ɔ nyɩtɛ. 36Laagɔ 'la wɔɔnyɩtʋa, a 'bhlɩ ʋ bhɔlʋ 'lɛ bha? ‑Aana, anyɩ bhlo ʋ ŋeni 'lɛ 'kʋ bha? 37Na, nclɔɔ ‑ɔ ‑ka gugu lebhe ɔ ‑glɩ Laagɔnekʋnyɩtɛnyɔ ‑aana 'Wugoa ‑kʋɔ 'kʋ na, 'naa ɔ cibhlili lebhe ɩmɩa n zie 'lɛ anyɩ na, ‑Kwlenyɔa 'la niwɔlɩ ɩ ‑glɩ 'lɛ. 38Nclɔɔ ‑ɔ 'tɩɩ cibhlili na, 'dɛndlana Laagɔ 'tɔɔ ‑ci.
39Na, n bholiecɩnyɩ 'naa ‑laagɔnekʋnyɩtɛlɩɛa 'la 'tʋ 'bhla anyɩ ‑gbɔɔn, ɩya a 'la tiea le ma nyɩtɛlɩ 'bhlɩwɔlɩa ma 'nu 'ta 'lɛ ɩla ‑zɔn na nɩkplaan, 40‑ma 'naa ɩmɩa ‑tɛtɛa 'plɩ saa ɩ ‑fata 'lɛ na ɩya ɩ kʋ 'cɛ 'cɛ.
Àwon tá yàn lọ́wọ́lọ́wọ́ báyìí:
1 Kolt 14: NTLD13
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.