1 Kolt 12
12
'Wugoa 'la nʋnʋgbɩa
1Bholiecɩnyɩ, ‑ɩ ‑glɩ 'lɛ 'Wugoa 'la nʋnʋgbɩa 'la wɔlɩa na, n 'ta ‑wa lebhe a kʋ 'nyukwlibhuun. 2A ‑ci lebhe daa a 'ta ka kaa 'lɛ Laagɔ cibhlili na, ‑abuun a gɩlɩa 'lɛ ‑zliia ‑ɩ ‑kʋ 'lɛ ‑amunaan na. 3Dɛ n cla 'lɛ anyɩ lebhe nclɔɔa Laagɔ 'la 'Wugoa ‑kʋ 'lɛ 'kʋ 'nyɩ ‑ɔ nyɩtɛ 'lɛ na, 'ɔ 'cla 'ta lebhe 'palɩɛ ŋeni Zozii. 'Nyɩ nclɔɔ ‑ylɛylɛ cɩ 'ta mino ɩya ɔ 'ka 'cla lebhe Zozii ‑glɩ ‑Kwlenyɔ, ɩ ‑ka ‑kʋ lebhe ‑Kplɔkplɔ ‑Wugoa* 'tɔɔ 'kʋ ‑kʋ na.
4Laagɔ 'la 'nanɩa ‑kʋ 'ci 'ci, ‑ma 'Wugoa bhlogbɩɩ ‑ʋ nyɩɩ 'lɛ. 5Laagɔ 'la lobholɩɛa ‑kʋ 'ci 'ci, ‑ma ‑Kwlenyɔa ma lobho 'lɛ na, ɔ ‑glɩ bhlo. 6Nʋnʋgbɩa ‑ma ‑kʋ 'ci 'ci, ‑ma Laagɔ bhlogbɩɩ ‑ɔ 'plɩlɩ 'lɛ ncɛlɩa ‑tɛtɛa 'kʋ 'nyɩ ɔ nʋ 'lɛ ɩmɩa 'fɩan. 7'Wugoa 'plɩlɩ nclɔɔ nclɔɔ 'kʋ 'nyɩ ʋ pala ʋla nʋnʋgbɩa, ncɛlɩa ‑tɛtɛa 'la 'nanɩ 'la gbʋ. 8'Wugoa nyɩ ‑anɔ dɩgalɩwɔɔnyɩtʋ, 'nyɩ ‑anɔ bhlo, 'Wugoa bhlogbɩɩ nyɩɔ 'lɛ wɔɔcibhliliwɔɔnyɩtʋ. 9'Wugoa nyɩ ‑anɔ pɔɔtɛtɛ, 'nyɩ ‑anɔ bhlo, 'Wugoa bhlogbɩɩ nyɩɔ 'lɛ guzenya 'la jabhatɛtɩ. 10Ʋ nyɩ ‑anɔ 'ciinzizielɩlobholi 'la nʋtɛtɩ, ‑anɔ bhlo, Laagɔ 'la nekʋnyɩtɛtɛtɩ, ‑da ‑naanɔ bhlo 'wugwi 'la nɩkplaangbazlɩlɩtɛtɩ, ‑da ‑naanɔ bhlo ‑awlɛ, 'bhlɩwɔlɩa maa 'nu 'ta 'lɛ ɩla ‑zɔn na ɩla nyɩtɛtɛtɩ, 'nyɩ ʋ nyɩ 'lɛ ‑da ‑naanɔ bhlo ɩla ‑zɔnsatɛtɩ. 11‑Ma ɩmɩ ‑naa ‑tɛtɛa, 'Wugoa 'titi bhlogbɩɩ ‑ʋ nʋɩ 'lɛ, ʋmʋ ‑ʋ nyɩ 'lɛ ʋla nʋnʋgbɩa nclɔɔ nclɔɔ 'ci 'ci, saa ʋ ‑wa 'lɛ na.
'Nyɛkɛ bhlo
12Sɛɛ bhlogbɩɩ 'nyɛkɛa 'la gbɩa palalɩ 'lɛ. Ɛ ‑glɩ bhlo, 'nyɩ ɛ ‑ka 'lɛ 'blɩ ‑bhutukpa. Ɛla 'blɩa ‑zu 'bhlɩmɔɔn, ‑ma 'nyɛkɛ bhlogbɩɩ ɩmɩa ‑tɛtɛa ‑glɩ 'lɛ. Sɛɛ ‑tɛɛ bhlogbɩɩ Klisi 'la gbɩa ‑kʋ 'lɛ. 13Sa ‑anyɩa ‑tɛtɛa, Zifʋnya* ‑aana Glɛkɩnyao, geye ‑aana ‑ncɩkalɩnyao, 'nyuwluzʋlɩɛa bhlogbɩɩ ‑a 'lɩ 'lɛ le ‑a ka 'nyɛkɛ bhlo 'plɩ, 'Wugoa bhlogbɩɩ nɩkplaan, 'nyɩ 'Wugo ‑naa bhlogbɩɩ ‑ʋ lolu 'lɛ anyɩ.
14'Nyɛkɛa ‑n 'ta 'blʋ bhlo ɛ 'ta 'lɛ ‑glɩ, ‑ma 'blɩ ‑bhutukpa ɛ ‑ka 'lɛ. 15'Nyɩ gbazɩ kple ‑kaa 'cla lebhe: «Sa n 'ta 'lɛ ‑kɔɔgba ‑glɩ na, 'dɛndlana n 'ta 'nyɛkɛa nɩkplaan kʋmʋ» na, ɩmɩ ‑naa cɩ gba 'nyɩ a cɩ 'tanɩ 'nyɛkɛa 'nɛ 'plɩ bha? 16Gbazɩ 'nyukwli ‑kaa 'cla lebhe: «Sa n 'ta 'lɛ 'ci ‑glɩ na, 'dɛndlana n 'ta 'nyɛkɛa nɩkplaan kʋmʋ» na, ɩmɩ ‑naa cɩ gba 'nyɩ ɛ cɩ 'tanɩ 'nyɛkɛ 'nɛ 'plɩ bha? 17'Nyɩ ka 'nyɛkɛ bhuoa ‑kaa 'ci 'tɛɛ ‑glɩ na, 'nda 'nyukwlia cɩ 'kaanɩa 'lɛ kʋ bha? ‑Tɛtɛa 'fɩan ‑kaa 'nyukwli ‑glɩ na, 'nda 'mlea cɩ 'kaanɩa 'lɛ kʋ bha? 18‑Ma Laagɔ ya 'nyɛkɛa 'la lʋʋ lʋʋ ʋla da zʋ, saa ɔ ‑wabha 'lɛ na. 19'Nyɩ ka 'nyɛkɛa 'la dɩa ‑tɛtɛa ‑kaa da bhlogbɩɩ ‑tɛɛ ‑glɩ na, 'nda 'nyɛkɛa cɩ 'kaanɩa 'lɛ kʋ bha? 20Na, 'nyɛkɛa 'la dɩa ‑zu, ‑ma ɛ ‑glɩ bhlo.
21'Ci cɩ 'ta mino ɩya ɛ 'ka ‑kɔɔgba 'cla lebhe: «N 'tɔɔ ‑mie» ‑aana 'wlu cɩ 'ta kpli 'cla lebhe: «'N 'ta anyɩ ‑mie.» 22‑Ma, 'nyɛkɛa 'la daa ma 'lɩ 'lɛ lebhe ɩ ‑ba 'ciin na, ɩmɩ ‑ma ɩ ‑ka ɩla lobholi. 23'Nyɩ ɩmɩa ‑a lɩ 'lɛ lebhe ɩ 'ta ‑fata lebhe ‑a falɩ ‑gbɔɔn pɔlɛ cɩ na, ɩmɩ 'titi ‑a falɩ 'lɛ pɔlɛ cɩ ‑gbɔɔn. Saa ɩ ‑ka 'lɛ ‑anyɩ ‑zo na, sɛɛ ‑a falɩɩ 'lɛ 'nanɩ pɔlɛ cɩ. 24Ɩmɩa ‑ɩ 'ta 'lɛ ‑anyɩ ‑zo ‑ka na, 'ɩ 'matɩ 'ta pɔlɛcɩfalɩɛ ‑naa. Laagɔ nʋ 'lɛ 'nyɛkɛ na, ka ɔ nʋɛ 'lɛ le ma 'ka ɩmɩa ‑ɩ ‑ka 'lɛ ‑zo na, 'nanɩ pɔlɛcɩfalɩ 25ɩya 'nyɛkɛa 'la ka nɩkplaan do, ‑ma ɛla dɩa ‑tɛtɛa 'ka pɔlɛ cɩ falɩfalɩlɩ. 26Na, gbazɩ 'kwlɩ ‑ka 'nyɛkɛa 'la dabhlo bhɩada ‑kʋ na, ka 'nyɛkɛa 'la dɩa ‑tɛtɛa ‑yɛɛsɛ 'wlalɩ 'lɛ ɩla 'kwlɩbhɩɛa 'kʋ. 'Nyɩ gbazɩ ma ‑ka dabhlo 'ŋwleenfalɩ na, ka dɩa ‑tɛtɛa ‑yɛɛsɛ 'wlalɩ 'lɛ ɩla pɔlɛkʋmɛnɔa 'kʋ.
27Anyɩ, Klisi 'la 'nyɛkɛa a ‑glɩ 'lɛ, 'nyɩ nclɔɔnclɔɔ, ɔla saa ɔ ‑kʋkʋlʋ 'lɛ na, ‑glɩ 'lɛ ɔla 'nyɛkɛa 'la dabhlo. 28'Nyɩ maa Laagɔ zʋ 'lɛ ‑laagɔnɩkplaa 'kʋklʋʋn na, ‑bɛka -naanʋa ‑glɩ 'lɛ lobhulobhunya*, ‑mɔsɔ -naanʋa ‑glɩ 'lɛ Laagɔnekʋnyɩtɛnya*, ‑mɔta -naanʋa ‑glɩ 'lɛ canya 'nyɩ maa ɔ 'nyɩ 'lɛ 'ciinzizielɩlobholi 'la nʋtɛtɩ na, gɩɩ 'lɛ 'dɛ, 'nyɩ mala leen, maa ɔ 'nyɩ 'lɛ ncaajabhalɩɛ, ncaaklalɩlɩɛ, ncɛlɩ 'la 'klʋlɩlɩɛ, ɩya lowluwɔlɩɩn 'la nyɩtɛlɩtɛtɩa na, ci 'lɛ. 29Na, ka maa ‑tɛtɛa ‑glɩ 'lɛ lobhulobhunya bha? Ka maa ‑tɛtɛa ‑glɩ 'lɛ Laagɔnekʋnyɩtɛnya* bha? Ka maa ‑tɛtɛa ca 'lɛ bha? Ka maa ‑tɛtɛa nʋ 'lɛ 'ciinzizielɩlobholi bha? 30Maa ‑tɛtɛa ‑ka guzenya 'la jabhatɛtɩ bha? Maa ‑tɛtɛa nyɩtɛ 'bhlɩwɔlɩa maa 'nu 'ta 'lɛ ɩla ‑zɔn na bha? Maa ‑tɛtɛa sɩɩ ‑zɔn bha? 31'Tɛtɩ ‑naa ‑tɛtɛa 'Wugoa nyɩ 'lɛ na nɩkplaan, a 'matɩ ɩmɩa ‑ɩ ‑pʋʋ 'lɛ ‑da -naanɩa ‑tɛtɛa 'kʋklʋʋn na. Na, n cɩ 'kanɩ anyɩ 'plɩlɩda bhlo pala, ‑ɛ zi 'lɛ ‑da -naanɩa ‑tɛtɛa 'kʋ na.
Àwon tá yàn lọ́wọ́lọ́wọ́ báyìí:
1 Kolt 12: NTLD13
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.