1 Kolt 10
10
A 'la dɩbalɩa a tokadɔcɩa
1Bholiecɩnyɩ, n 'ta ‑wa lebhe n 'ka anyɩ wɔlɩ ‑naa 'la 'nyukwlibhuun teli. ‑A tokadɔcɩa ‑tɛtɛa ‑kʋa 'nyukplua ‑zɔn, maa ‑tɛtɛa ya gea nɩkplaan 'plɩlɩ 2'nyɩ maa ‑tɛtɛa ɔ gɩlɩa 'lɛ Moyizi na ya 'nyukplua ɩya gea nɩkplaan 'nyuwluzʋlʋɔ. 3Maa ‑tɛtɛa ya nyɩa ‑ɩ 'wlʋlʋ 'lɛ ‑laagɔɔn na li, 4'nyɩ maa ‑tɛtɛa ya 'lɛ 'nyua ‑ʋ 'wlʋlʋ 'lɛ ‑laagɔɔn na bhlogbɩɩ 'mla. Sa cokwiea ‑ɛ ɩ 'wlʋlʋ 'lɛ ‑laagɔɔn na gɩlɩa maa, ɛla nɩkplaan 'la 'nyua ma mlaa 'lɛ. Cokwie ‑naa, Klisi ɛ ‑glɩa 'lɛ. 5'Bhlɩmɔɔn, maa nɩkplaan, ‑bhutukpa 'ta Laagɔ 'tʋpla, ɩla gbʋ mala ‑blaanyɛkɛa 'kɔsɔlʋa 'lɛ 'pʋpʋa nɩkplaan sa ‑beli ‑beli. 6Ka wɔlɩ ‑naa ‑tɛtɛa 'plɩ 'lɛ le ɩ 'ka ‑ala palalɩda 'plɩ, ɩya wɔɔgugwienyinye 'la ka ‑anyɩ 'wlu ci le saa ɛ cia 'lɛ maa 'wlu na. 7A 'la 'plɩa ‑zliigʋgwlanya le maa sidiin ‑anʋa 'bhisa, sa ɩ ‑zieo lebhe: 'Lɔlʋa ya sakʋ, ʋ ya li, ʋ ya 'mla, 'nyɩ ʋ ya 'kʋbho, ʋ ya 'wɔzɔ. 8‑A 'la lia ‑badaaglu, le saa maa sidiin ‑anʋa nʋa 'lɛ, ‑masa clɩɩa bhlogbɩɩ 'kʋ, ncaatabhliwli ‑glʋʋ ɩya ‑mɔta ya 'lɛ maa sidiin 'ku na. 9‑A 'la vʋvʋalɩa ‑Kwlenyɔ, le saa maa sidiin ‑anʋa vʋvʋalɩa 'mɔɔ 'lɛ, 'nyɩ tla mli 'lɛ maa 'nyɩ ma 'ku 'lɛ na. 10A 'la gbaa wɔlɩ, le saa maa sidiin ‑anʋa gbaa 'lɛ wɔlɩ 'nyɩ dayumonyɔa 'bhla 'lɛ maa na. 11Ka wɔlɩ ‑naa ŋeni 'lɛ maa le ɩ 'ka ncɛlɩ 'la palalɩda 'plɩ. Ka ɩ ‑zieo 'lɛ le ɩ 'ka ‑anyɩa ‑ɔ mɛɛnɩ 'lɛ bhɩalɩclɩɩa cɩ na ‑ala flɩɩnzʋlɩɛ 'plɩ.
12Na, ɔmɔ ‑ɔ ‑ka gugu lebhe ka ɔ 'nylugo 'lɛ na, 'naa ɔ zʋlʋ pɔlɛ 'kʋ ɩya ɔ 'la ka bhli. 13Gbɩɩnclalɩɛa ‑ɩ ŋeni 'lɛ anyɩ na, ɩ ‑glɩ gbɩɩnclalɩɛa ‑ɩ ŋeni 'lɛ nclɔɔ na. Laagɔ glalɩ 'lɛ ɔla niwɔlɩ 'kʋ na, 'ɔ cɩ 'ta ‑jioli 'nyɩ lebhe gbɩɩnclalɩɛa ‑ɩ ‑zilo ala 'tɛtɩa 'kʋ na, ɩ ŋeni anyɩ. Na, gbɩɩnclalɩɛ ‑ka anyɩ ŋeni na, Laagɔ cɩ 'ka anyɩ saa a cɩ 'kɩɩ 'lɛ ‑zɔn 'wlʋwlʋlʋ na pala ɩya ɔ 'ka anyɩ 'tɛtɩ 'nyɩ ɩya a 'kɩɩ mino.
Aya 'wugwi ‑nyinyi 'la 'wlalɩa lɩɩ 'kʋ
14'Na ‑wawabholiecɩnyɩ, Wɔlɩ ‑naa 'la gbʋ, dɛ n cla 'lɛ anyɩ lebhe a 'gulu ‑zliigʋgwlɛ. 15Ncɛlɩa ‑ɔ ‑ka 'lɛ wɔɔgugwie na, maa 'bhisa 'kʋ n solu 'lɛ anyɩ. Na, anyɩ 'titi a kope ɩmɩa n nyɩtɛ 'lɛ na nɩkplaan. 16‑Kɔbhɛa ‑a ma 'lɛ 'nyɩ a palɩ 'lɛ 'nyu na, ɛ 'ta Klisi 'la ‑dolua ‑a poli 'lɛ na ‑glɩ bha? 'Nyɩ 'flawoa ‑a 'dɩdɩlɩ 'lɛ kliin na, ʋ 'ta Klisi 'la 'nyɛkɛa ‑a poli 'lɛ na ‑glɩ bha? 17Saa 'flawoa ‑glɩ 'lɛ bhlo na, sɛɛ ‑anyɩa ‑tɛtɛa ‑a ‑glɩ 'lɛ 'nyɛkɛ bhlo, ‑masa 'flawo ‑naa bhlogbɩɩ ‑anyɩa ‑tɛtɛa ‑a poli 'lɛ. 18A kopeka Izlayɛlɩcuoa* na! Maa ‑ɔ li 'lɛ gʋgwlagbatɩa 'kʋ 'la mlaa na, ka maya gʋgwlagbatɩa 'ta 'lɛ ɛla 'kʋ 'la lɩɩa 'kʋwlalɩ bha? 19Wɔɔsaa n na n 'kaa 'lɛ nyɩtɛ bha? Ka n cla 'lɛ lebhe ‑zliigʋgwlamlaa ma bhla 'lɛ 'nyɩ ma gʋgwla 'lɛ ‑zliia ‑aana ‑zleea na, ɩ ‑glɩ ɩla 'wlua lʋʋ bhlo bha? 20‑Wɔɔ, ‑n 'ta sɛɛ! ‑Masa mlaa ma bhla 'lɛ na, ‑n 'ta Laagɔ ma va 'tɩɩ 'lɛ ‑ma 'wugwi ‑nyinyi ma vɩɩ 'lɛ. Na, n 'ta ‑wa lebhe ‑aya 'wugwinyinyi 'wlalɩ lɩɩ 'kʋ. 21'Nyɩ 'a cɩ 'ta mino a 'ka ‑Kwlenyɔ 'la ‑kɔbhɛa ɩya 'wugwi ‑nyinyi 'la ‑kɔbhɛa zʋ ɩya a 'ka 'mla. 'A cɩ 'ta mino a 'ka ‑Kwlenyɔ 'la 'tlɔnblɩa 'kʋ lili ɩya a 'ka ‑awlɛ 'wugwi ‑nyinyi 'la 'tlɔnblɩa 'kʋ lili. 22‑Aana Laagɔ a ‑wa 'lɛ le ‑a ka vʋvʋalɩ ɩya a 'ka acɩ ɔla dɔgbɛa 'kʋ ‑lalɩ bha? Ka ‑a ‑ka 'lɛ 'tɛtɩ 'nyɩ ‑a zio 'lɛ 'kʋ bha?
A nʋ ‑tɛtɛa 'fɩan le ɩ 'ka Laagɔ 'la 'klʋagba 'plɩ
23A ‑ka ‑jioli ɩya a 'ka ‑tɛtɛa 'fɩan nʋ, ‑ma ‑tɛtɛa 'fɩan 'ta nʋda nanɩ. A ‑ka ‑jioli ɩya a 'ka ‑tɛtɛa 'fɩan nʋ, ‑ma ‑tɛtɛa 'fɩan 'ta ‑nvʋsʋɛ 'kʋ ‑ka. 24Nclɔɔ ‑ylɛylɛ 'la 'matɩa ɔmɔ bhlo ɔla 'nanɩ, ‑ma 'naa ɔ 'matɩmʋ ɔ 'yʋʋ 'nɩ. 25Lɩɩa 'fɩan ma zʋ 'lɛ ‑adabhlaan 'pɛlʋ na, a lii. A 'la 'claa neen, ala wɔɔgugwiea 'la kasɛ anyɩ 'kʋclalɩ. 26Sa ‑Kwlenyɔa nɩnɩ 'lɛ ‑dʋdʋa ɩya lɩɩa ‑tɛtɛa ‑ɩ ‑kʋʋ 'lɛ 'kʋ na. 27Na, gbazɩ nclɔɔa ‑ɔ 'ta 'lɛ Klisi 'la pɔɔtɛtɛ ‑ka na, ‑ka anyɩ 'tlɔnblɩ 'kʋ la, 'nyɩ a ‑ka ŋonu le a cɩ mʋ na, ɩmɩa 'fɩan ɔ cɩ 'ka 'lɛ anyɩ 'nyɩ na, a lii, ‑ma a 'la 'cla neen, wɔɔgugwiea 'la kasɛ anyɩ 'kʋclalɩ. 28‑Ma gbazɩ nclɔɔ ‑ka anyɩ 'cla lebhe ‑zliigʋgwlamlɛ na, a 'la liee, ɔmɔa ‑ɔ zʋ 'lɛ anyɩ flɩɩn na, ɩya ala wɔɔgugwiea 'la gbʋ. 29‑N 'ta ala wɔɔgugwiea 'la wɔlɩ 'n nyɩtɛ 'ta 'lɛ ‑da, ‑ma ɔ 'nɛa 'la wɔlɩ. Sa 'lɩsaa 'la gbʋ ‑buun nclɔɔ 'la wɔɔgugwiea cɩ 'lɛ 'na ‑ncɩkalɩɛa 'tɩtɩpla bha?
30Gbazɩ ɩmɩa n li 'lɛ na, n ‑ka ɩla gbʋ Laagɔ bhɔlʋ na, 'lɩsaa 'la gbʋ ma cɩ 'kaan 'lɛ ɩmɩa 'la gbʋa n bhɔlʋ 'lɛ Laagɔ na ɩla gbʋ wɔlɩ cɩ gba bha? 31Na, ka a ‑ka li, ‑aana ka a ‑ka 'mlao na, ‑lʋʋ 'tʋtʋʋntʋa a cɩ 'lɛ nʋ na, a nʋ ‑tɛtɛa 'fɩan Laagɔ 'la 'klʋagbaa 'la gbʋ. 32Zifʋnya*, maa ‑ɔ 'ta 'lɛ Zifʋnya ‑glɩ, ‑aana Laagɔ 'la 'lɔlʋa, a 'la gba ɩya nclɔɔ ‑ylɛylɛ 'la bhlia. 33‑Sa ‑amʋ 'titi n 'sɩlɩlɩ 'lɛ le ‑tɛtɛa 'fɩan nɩkplaan, n 'ka ncɛlɩa ‑tɛtɛa 'tʋpla. N 'matɩ 'ta ‑amʋ bhlo 'na 'nanɩ, ‑ma ncɛlɩ 'fɩan 'la 'nanɩ, ɩya ncaabhutukpa 'ka gbʋʋnsalɩɛ 'lɩ.
Àwon tá yàn lọ́wọ́lọ́wọ́ báyìí:
1 Kolt 10: NTLD13
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.